Okukolesa Amadoso

Mateyo 16:13-16

OBOFOFI: Odose amadoso n’obulenga ly’ozukiza abumvirhiza bawe irala ly’okugendekera bakuyumvirhiza, ly’orhanya haguma n’abumvirhiza bawe, na kandi ly’osegeza ebintu by’obulagirire.

OKU WAKAJIRAMWO NTYO:

• Ozukize abumvirhiza bawe irala onabashumye bagendekere bakuyumvirhiza. Odose amadoso gakarhuma abumvirhiza bawe barhanya oku mwanzi oli waganirira n’okucishuza erhi agakarhuma baba n’irala ly’okulonza okumanya ishuzo.

• Orhanye haguma n’abumvirhiza bawe oku mwanzi oli waganirira. Orhabale abumvirhiza bawe babone gurhi ntanya ndebe zipatine n’obwenge omu kubadosa amadoso gakabarhabala barhôle emihigo minja.

• Osegeze ebintu by’obulagirire. Ly’orhondera okuganirira ntanya ndebe z’obulagirire odose idoso lyakarhuma abantu baba n’irala ly’okulonza okumanya. Okolese amadoso g’okucikengeza enyuma z’okuganirira kantu kalebe k’obulagirire erhi amango oli washwinja omwanzi wakag’iganirira.