ISOMO LYA 11

Obushagaluke

Abaroma 12:11

OBOFOFI: Ohe abumvirhiza bawe omurhima onabashumye omu kuderha n’obushiru.

Ojire omwanzi oli waganirira guhume oku murhima gwawe. Amango oli warheganya ecigabi cawe, orhanye bwenene oku bulagirire bw’omwanzi waganirira. Ocihangane okumanyirira bwinja ebirimw’ogo mwanzi ly’oderha ebintu birhenzire oku murhima.
Orhanye lugenda abumvirhiza bawe. Orhanye gurhi omwanzi wasoma erhi kuyigiriza gwalerheramwo abandi obunguke. Orhanye oku njira ziri lubero wakageza mw’eyo myanzi ly’abumvirhiza bawe bayishagalukira bwenene.
Orhabaga wa mboho-mboho, lubero n’oko ogeze omwanzi gwawe n’obushagaluke. Oderhe n’obushiru. Okolese ebimanyiso by’omubiri n’eby’ebusu by’okunali ly’oyerekana gurhi oli waciyumva.

Obe masu ly’orhag’irhuma abumvirhiza bawe babula busegeza obwenge bwabo kw’ebi oli waderha enyanya z’okuba oli wagalukira cimanyiso ciguma cone kanji-kanji. Ojire ebimanyiso bipatine n’ebi oli waderha. Oyerekane obushagaluke amango oli wayigiriza ebintu by’obulagirire bwenene n’amango olonzize okuha abumvirhiza bawe omurhima lyo bajira kantu kalebe. Omanye warhamya abumvirhiza bawe enyanya z’okuba na bushagaluke bunji bwenene kurhenga oku murhondero gw’ecigabi cawe kuhika oku buzinda.