ISOMO LYA 37
Bici Ebibliya Edesire Okubiyerekire Akazi n’Ensaranga?
K’okola olibusire bwenene n’entanya z’okubula akazi n’ensaranga? Nka byakahikira ntyo kwanaba kuzibu okuhikiriza amalagirire girhu n’okuha Yehova enterekêro eshinganine. Ebibliya erhuhire amahano gakarhurhabala omu kanga ka ntyo.
1. Bici Ebibliya edesire okubiyerekire akazi?
Nnâmahanga aba alonzize rhushagalukire akazi kirhu. Ebibliya edesire oku “nta kantu kinja omuntu akaba nako kulusha . . . okushagalukira akazi kage kazibu.” (Omuhanûzi 2:24, NWT) Yehova anakole bwenene. Erhi rhuyiga olwiganyo lwage lw’okukakola n’obushiru, rhunamushagaluse, na kandi rhunaciyumve rhurhimusirwe.
Akazi kaba ka bulagirire. Cikone rhurhashinganini rhubone oku ko kali ka bulagirire kulusha enterekêro rhuha Yehova. (Yowane 6:27) Yehova arhulaganyize oku erhi rhwakakamuhira oku nafasi ntanzi, anashibirira amalagirire girhu g’omubiri.
2. Okuba n’entanya z’olugero okubiyerekire ensaranga k’okuderha gurhi?
Ciru akaba Ebibliya edesire oku “ensaranga buba bulanzi,” cikone kandi erhubwizire oku ensaranga zone zirhakarhuma rhwaba n’omwishingo. (Omuhanûzi 7:12, NWT) Co cirhumire Ebibliya erhuhanwire oku rhurhakagizigira ensaranga, cikone ‘rhusîmisibwe [kurhimukwa] n’ebi rhugwerhe.’ (Osome Abahabraniya 13:5.) Erhi rhurhimukwa n’ebi rhugwerhe, rhunayake okuba n’amalumwa galerhwa n’okulonza okuba na bintu binji. Na kandi rhunayake okuba n’amadeni garhagwerhi nda na mugongo. (Emigani 22:7) Na kandi okurhimukwa kunarhurhabale rhurhajaga omu murhego gw’okukasharha emicezo y’ensaranga n’okuba n’omuhigo gw’okugala ho n’aho.
3. Gurhi rhwakakolesa ensaranga omu njira eyerekine oku rhurhali bamujina?
Yehova arhaba wamujina, rhunanayige olwiganyo lwage erhi rhuba ‘bakuhâna n’omurhima mwinja, na bakushangira ebirugu birhu n’abandi.’ (1 Timoteyo 6:18) Rhunayerekane oku rhurhali bamujina erhi rhukolesa ensaranga zirhu omu kuhâna emicango (burhabale) omu cigamba n’erhi rhurhabala abalagirire oku burhabale, ci bwenene abirhu bemezi. Ebi Yehova alabiriza bwenene, burhaba obunji bw’ebi rhuhânyire ci ebyarhushumagya okubihâna. Erhi rhuhâna n’omurhima mwinja, rhunashagaluke na kandi rhunashagaluse Yehova.—Osome Ebijiro by’Entumwa 20:35.
HUMBIRIRA LY’OHUGÛKWA
Olole obunguke omuntu akaba nabo erhi akaheba akazi oku nafasi kashinganine n’erhi akaba wakurhimukwa.
4. Okengese Yehova kugerera enjira okolamwo akazi kawe
Obwîra bwirhu haguma na Yehova bwanashumya entanya zirhu lugenda akazi. Olole EVIDEO, na buzinda oganirire aga madoso gakulikire.
Nk’oku obwine mw’eyo video, ntanya zihi Jason agwerhe lugenda akazi na lugenzi lwa gurhi agwerhe?
Gurhi ajijire ly’akazi karhakagimuhanza okuharamya Yehova?
Osome Abakolosi 3:23, 24, na buzinda oganirire er’idoso:
Bulya gurhi rhushinganine okuba n’entanya nyinja okubiyerekire akazi?
Akazi kaba ka bulagirire. Cikone rhurhashinganini rhubone oku ko kali ka bulagirire kulusha okuharhamya Yehova
5. Okurhimukwa kunarhulerhere obunguke
Bantu banji banakajira okwabo koshi lyo baba na nsaranga nyinji. Cikone Ebibliya erhubwizire oku okujira ntyo kurhali kwinja. Osome 1 Timoteyo 6:6-8, na buzinda oganirire er’idoso:
Bici Ebibliya erhuhîre omurhima rhukajira?
Rhwanaba n’omwishingo ciru akaba rhurhagwerhi bintu binji. Olole EVIDEO, na buzinda oganirire idoso likulikire.
Bici bishagalwire eyi milala ciru akaba erhagwerhi nsaranga nyinji?
Cikone ka hali omurhego erhi rhwakaba rhugwerhe bintu binji buzinda rhuje rhwalongereza okuba na bintu binji kulusha? Yezu ahânyire olwiganyo luhugwîre ogo murhego. Osome Luka 12:15-21, na buzinda oganirire er’idoso:
Bici ociyigirizize kugerera olwiganyo Yezu ahânaga?—Olole omulongo gwa 15.
Osome onashushanye Emigani 10:22 na 1 Timoteyo 6:10. Buzinda oganirire aga madoso:
Bici orhanyize biba bya bulagirire bwenene? K’obwîra haguma na Yehova erhi kuba na nsaranga nyinji? Bulya gurhi?
Mazibu gahi okulonza okuba na nsaranga nyinji kulerha?
6. Yehova ahikiriza amalagirire girhu
Okubula akazi n’ensaranga kwanarhuma rhwayerekana kunganaci rhuba rhulangalire Yehova. Olole EVIDEO ly’obona ebi rhwakajira erhi rhwakabula akazi erhi nsaranga, buzinda oganirire amadoso gakulikire.
Nk’oku obwine mw’eyo video, mazibu gahi oyo mwene wirhu agwerhe?
Bici byamurhabire ly’alwisa ago mazibu?
Osome Mateyo 6:25-34, na buzinda oganirire er’idoso:
Bici Yehova alaganyize ajirira abamuhira oku nafasi ntanzi omu kalamo kabo?
HALI ABANTU BADERHA NTYA: “Bihunyîre nkole bwenene lyo mpikiriza amalagirire g’omulala gwani. Ntakahashikaja oku ntimanano ngasi mugobe.”
Lwandiko luhi lukuyemezize oku okuhira enterekêro rhuha Yehova oku nafasi ntanzi go guba muhigo mwinja?
KWA BOFOFI
Akazi n’ensaranga biba bya bulagirire omu kalamo kirhu, cikone birhashinganini birhuhanze okukolera Yehova.
Okucikengeza
Bici byakakurhabala obe n’entanya z’olugero okubiyerekire akazi?
Gurhi okukarhimukwa kwakakurhabalamwo?
Gurhi wakayerekanamwo oku olangalire eciragane Yehova ahanyîre c’okuhikiriza amalagirire g’abantu bage?
OCIYIGIRIZE KWA BULÎRI
Olole erhi Ebibliya eba edesire oku okuba n’ensaranga kuba kubi.
“K’Ensaranga y’Eba Nshôko y’Ebintu Bibi?” (Mwanzi guli oku jw.org)
Ociyigirize kuhâna kuhi kushagalusa Nnâmahanga.
“Bici Ebibliya Edesire Okubiyerekire Okuhâna?” (Mwanzi guli oku jw.org)
Ka haba obubi bw’okusharha emicezo y’ensaranga?
“Mawazo ya Biblia—Michezo ya Feza” (Amuka!, y’Omwezi gwa 3, 2015)
Olole ebyarhabire mushasi muguma w’emicezo y’ensaranga wali cishambo ajire empindûlo omu kalamo kage.