ද්විතීය කතාව
26 “ඔයාලාගේ දෙවි වන යෙහෝවා ඔයාලට උරුමයක් හැටියට දෙන දේශයට ඔයාලා ගිහිල්ලා ඒක අයිති කරගෙන එහේ පදිංචි වෙයි. 2 එහෙම ඉද්දී ඔයාලාගේ දෙවි වන යෙහෝවා ඔයාලට දීලා තියෙන ඒ දේශයෙන් නෙළාගන්න මුල්ම පලදාවෙන් කොටසක් වෙන් කරන්න. වෙන් කරන ඒ කොටස කූඩයක දාලා ඔයාලාගේ දෙවි වන යෙහෝවා ඔහුගේ නම දරන්න තෝරගන්න තැනට ඒක අරන් යන්න.+ 3 ඒ කාලේ පූජකයා විදිහට සේවය කරන කෙනා ළඟට ගිහින් මෙහෙම කියන්න. ‘යෙහෝවා අපේ මුතුන්මිත්තන්ට පොරොන්දු වුණ විදිහටම දැන් මම මේ දේශයේ ජීවත් වෙනවා. ඉතින් අද මම මෙතනට ආවේ අපේ දෙවි වන යෙහෝවාට මගේ අගය පෙන්නන්න.’+
4 “පූජකයා ඔයාලා ගෙනාපු කූඩ අරගෙන ඔයාලාගේ දෙවි වන යෙහෝවාගේ පූජාසනය ඉස්සරහා තියයි. 5 ඊටපස්සේ ඔයාලාගේ දෙවි වන යෙහෝවා ඉස්සරහා ඔයාලා මෙහෙම කියන්න ඕනේ. ‘අපේ ආදිපියා තැනින් තැනට ගිහින් ජීවත් වුණ* අරාමීය+ ජාතිකයෙක්. එයාගේ පවුලේ කීපදෙනා+ එක්ක එයා ඊජිප්තුවට ගිහිල්ලා+ විදේශිකයෙක් විදිහට ජීවත් වුණා. එහෙදී එයාගෙන් පැවත ආපු අයගේ ගාණ වැඩි වෙලා විශාල, බලවත් ජාතියක් හැදුණා.+ 6 ඊජිප්තුවරුන් අපිට කුරිරු විදිහට හිරිහැර කරලා අපිව වහල්කමට ගත්තා.+ 7 අපි අපේ මුතුන්මිත්තන්ගේ දෙවි වන යෙහෝවාට ඒ ගැන කන්නලව් කළා. යෙහෝවා අපේ කන්නලව්වට සවන් දුන්නා. අපි අද්දැක්ක දුක් පීඩා, හිරිහැර ඔහු දැක්කා.+ 8 ඉතින් යෙහෝවා ඔහුගේ මහත් බලය+ පාවිච්චි කරලා පුදුමසහගත ක්‍රියා, ආශ්චර්යයන් සහ හරිම භයානක දේවල් කරලා+ අපිව ඊජිප්තුවෙන් නිදහස් කළා. 9 ඊටපස්සේ ඔහු අපිව කිරියෙන් සහ පැණියෙන් ඉතිරෙන මේ දේශයට ගෙනාවා.+ 10 ඒ නිසා මං කැමතියි යෙහෝවා අපිට දුන්න දේශයෙන් ලැබුණ මුල්ම පලදාව ඔහුට දෙන්න.’+
“ඔයාලා ගේන ඒ දේවල් ඔයාලාගේ දෙවි වන යෙහෝවා ඉස්සරහා තියන්න. ඊටපස්සේ යෙහෝවා දෙවියන් ඉස්සරහා වැඳ වැටිලා ඔහුට නමස්කාර කරන්න. 11 ඔයාලාගේ දෙවි වන යෙහෝවා ඔයාලටයි, ඔයාලාගේ පවුලේ අයටයි දුන්න හැම යහපත් දෙයක් ගැනම සතුටු වෙන්න. ඔයාලත් එක්ක ජීවත් වෙන ලෙවීවරුන්ට වගේම විදේශිකයන්ටත් පුළුවන් ඔයාලත් එක්ක සතුටු වෙන්න.+
12 “තුන්වෙනි අවුරුද්දේදී ඔයාලට ලැබෙන පලදාවෙන් දහයෙන් කොටස+ සම්පූර්ණයෙන්ම එකතු කළාට පස්සේ ඔයාලා ඒක ලෙවීවරුන්ටයි, විදේශිකයන්ටයි, තාත්තා නැති දරුවන්ටයි, වැන්දඹුවන්ටයි දෙන්න ඕනේ. ඔයාලාගේ නගරවල ජීවත් වෙන ඒ හැමෝටම ඒකෙන් ඇති තරම් කාලා සතුටු වෙන්න පුළුවන්.+ 13 එහෙම කළාට පස්සේ ඔයාලාගේ දෙවි වන යෙහෝවා ඉස්සරහා මෙහෙම කියන්න. ‘දෙවියනි, ශුද්ධ දෙයක් විදිහට වෙන් කරපු දේවල් මම මගේ ගෙදර තියාගත්තේ නැහැ. ඔයා අණ කරපු විදිහටම මම ඒ දේවල් ලෙවීවරුන්ටයි, විදේශිකයන්ටයි, තාත්තා නැති දරුවන්ටයි, වැන්දඹුවන්ටයි+ දුන්නා. මම ඔයාගේ ආඥා කඩ කළේවත් ඒවා සැහැල්ලුවට ගත්තෙවත් නැහැ. 14 වෙන් කරපු ඒ දේවල් මං දුකෙන් හිටපු කාලේදී* කෑමට ගත්තෙවත් මං අපවිත්‍ර වෙලා ඉද්දී ඒවා ඇල්ලුවෙවත් මැරුණ කෙනෙක් වෙනුවෙන් ඒවා දුන්නෙවත් නැහැ. යෙහෝවා මගේ දෙවියනි, මං ඔයාට කීකරු වෙලා ඔයා අණ කරපු දේවල් ඒ විදිහටම කළා. 15 දෙවියනි, ඔයාගේ ශුද්ධ වාසස්ථානය වන ස්වර්ගයේ ඉඳන් ඔයාගේ සෙනඟ වන ඊශ්‍රායෙල්වරුන් දිහා බලලා එයාලට ආශීර්වාද කරන්න. අපේ මුතුන්මිත්තන්ට පොරොන්දු වුණ විදිහටම+ ඔයා අපිට දුන්න කිරියෙන් සහ පැණියෙන් ඉතිරෙන+ මේ දේශයටත් ආශීර්වාද කරන්න.’+
16 “ඔයාලාගේ දෙවි වන යෙහෝවා මේ නියෝග සහ තීන්දු පිළිපදින්න කියලා අද ඔයාලට අණ කරනවා. ඔයාලාගේ මුළු හදවතින්ම ඒවා පිළිපදින්න.+ ඒවාට කීකරු වෙන්න ඔයාලට පුළුවන් හැම දේම කරන්න.* 17 යෙහෝවා ඔයාලාගේ දෙවියන් වෙනවා කියන සහතිකය අද ඔයාලට ලැබෙනවා. හැබැයි ඒක ඔයාලට ලැබෙන්නේ ඔහුගේ මඟ පෙන්වීම්වලට අනුව ජීවත් වෙලා+ ඔහුගේ අණපනත්+ සහ තීන්දු+ පිළිපැදලා ඔහු කියන හැම දේකටම ඔයාලා ඇහුම්කන් දෙනවා නම් විතරයි. 18 ඔයාලා දුන්න සහතිකයත් අද ඔහුට ලැබුණා. ඒකට අනුව ඔයාලා කිව්වා යෙහෝවා පොරොන්දු වුණ විදිහට ඔයාලා ඔහුට අයිති ඔහුගේ විශේෂ සෙනඟ*+ වෙනවා කියලා. ඔහුගේ හැම ආඥාවක්ම පිළිපදිනවා කියලත් ඔයාලා කිව්වා. 19 එහෙම කරනවා නම් ඔහු ඔයාලට පොරොන්දු වුණ විදිහටම ඔහු බිහි කරපු අනිත් හැම ජාතියකටම වඩා ඔයාලව උසස් කරයි.+ ඔයාලා යෙහෝවා දෙවියන් වෙනුවෙන් වෙන් වුණ ශුද්ධ සෙනඟක් කියලා ඔප්පු කරනවා නම් ඔහු ඔයාලට ප්‍රශංසාව, ගෞරවය වගේම ලොකු ප්‍රසිද්ධියකුත් ලබා දෙයි.”+