යේසුස් සබත් දවසකදී සුව කළා

යේසුස් එක්ක තරහෙන් හිටිය පරිසිවරුන්ට ඕන වුණේ යේසුස්ගේ වරදක් අල්ලගන්න. එයාලා යේසුස්ට කිව්වා සබත් දවසකදී අසනීප අයව සුව කරන්න එපා කියලා. උපතින්ම අන්ධ හිඟන කෙනෙක්ව සබත් දවසකදී යේසුස්ට මුණගැහුණා. ඒ වෙලාවේ යේසුස් ගෝලයන්ට කිව්වා ‘දෙවියන්ගේ බලයෙන් මං මෙයාට උදව් කරන විදිහ බලන්න’ කියලා. යේසුස් බිමට කෙළ ගහලා මැටි ගුලියක් හදාගෙන ඒක අන්ධ කෙනාගේ ඇස් දෙකේ ගාලා කිව්වා “සිලෝම් පොකුණෙන් ඇස් දෙක හෝදගන්න” කියලා. එහෙම කළාට පස්සේ එයාට හැම දේම පෙනුණා.

එයාව දැකපු අය කතා වුණා ‘මේ අර හිඟන්නාද නැත්නම් එයා වගේ වෙන කෙනෙක්ද’ කියලා. එතකොට එයා කිව්වා ‘උපතින්ම අන්ධ වෙලා හිටියේ මං තමයි’ කියලා. “ඔයාට පෙනීම ලැබුණේ කොහොමද” කියලා එයාලා ඇහුවා. එයා ඒක විස්තර කළාම මිනිස්සු එයාව පරිසිවරු ළඟට ගෙනිච්චා.

එයා පරිසිවරුන්ට මෙහෙම කිව්වා. ‘යේසුස් මගේ ඇස්වලට මැටි ටිකක් ගාලා සිලෝම් පොකුණෙන් ඇස් හෝදගන්න කිව්වා. මං එහෙම කළාම මට පෙනීම ලැබුණා.’ එතකොට පරිසිවරු කිව්වා ‘යේසුස් සබත් දවසකදී සුව කළා නම් ඒක කළේ දෙවියන්ගේ බලයෙන් වෙන්න බෑ’ කියලා. ඒත් ‘එයාට දෙවියන්ගේ බලය ලැබුණේ නැත්නම් මේ වගේ දෙයක් කරන්න බෑ’ කියලා තවත් අය කිව්වා.

ඊටපස්සේ පරිසිවරු ඒ කෙනාගේ අම්මා තාත්තාගෙන් ඇහුවා ‘පුතාට පෙනීම ලැබුණේ කොහොමද’ කියලා. යේසුස්ව විශ්වාස කරන අයව සිනගෝගයෙන් එළියට දානවා කියලා පරිසිවරු කියලා තිබුණු නිසා එයාලා හිටියේ බයෙන්. ඒ නිසා එයාලා කිව්වා ‘අපි දන්නේ නෑ, එයාගෙන්ම අහන්න’ කියලා. ඉතින් පරිසිවරු ආයෙත් එයාගෙන් ප්‍රශ්න කළාම ‘වෙච්ච හැම දේම මං කිව්වනේ. ඉතින් ඇයි ආයේ ඒ ගැන අහන්නේ’ කියලා එයා කිව්වා. කේන්ති ගත්ත පරිසිවරු එයාව එළියට දැම්මා.

යේසුස් එයාව හොයාගෙන ගිහින් ඇහුවා ‘ඔයා ගැලවුම්කරුව විශ්වාස කරනවාද’ කියලා. ‘ඔහුව දැනගෙන හිටියා නම් මං විශ්වාස කරනවා’ කියලා එයා කිව්වාම යේසුස් කිව්වා ‘මං තමයි ගැලවුම්කරු’ කියලා. යේසුස් එයාව සුව කළා විතරක් නෙවෙයි විශ්වාසයක් ඇති කරගන්නත් උදව් කළා.