පෙර ආත්මයක ජීවත් වූ බව ඔබ විශ්වාස කරනවාද?

ඔබ ඇත්තටම කවුද? ඔබ පෙර ආත්මයක ජීවත් වෙලා තියෙනවා කියලා ඔබට හිතෙනවද? එසේනම් එහෙම හිතෙන්නේ ඔබට පමණක් නොවෙයි. අතීතයේ සිට ලෝකයේ විවිධ සංස්කෘතීන්ට අයත් ජනයා ඒ ප්‍රශ්න ගැන කල්පනා කර ඒ ගැන සොයා බලා තිබෙනවා. එහි ප්‍රතිඵලයක් ලෙස සමහරුන් පුනරුත්පත්තිය නමැති ඉගැන්වීම විශ්වාස කරන්න පටන්ගෙන තිබෙනවා. කෙනෙකු මිය යන විට ආත්මය ඔහුගේ ශරීරයෙන් පිට වී එය නැවතත් මිනිස් හෝ සත්ව ශරීරයකට නැත්නම් ශාකයකට ඇතුල් වී ජීවත් වන බව ඔවුන්ගේ විශ්වාසයයි.

එය සත්‍යයක් බව සමහරු පිළිගත්තත් ඇත්තටම එය සත්‍යයක්ද කියා අපි දැනගන්නේ කොහොමද? ඒ ගැන පුරාණ පොතක් වන ශුද්ධ බයිබලයේ සඳහන් වන්නේ කුමක්ද? ඊට පිළිතුරු දැනගැනීමට පෙර පුනරුත්පත්තිය නමැති විශ්වාසය ආරම්භ වුණේ කොහොමද කියා අපි බලමු.

එහි ආරම්භය

කෙනෙක් මිය ගියත් ඔහුට අමරණීය ආත්මයක් තිබෙනවා කියා ක්‍රිස්තු පූර්ව 3000 අවසාන කාලයේදී බැබිලෝනි නගරයේ විසූ වැසියන් විශ්වාස කළ බව ඉතිහාසඥයන් හා විශාරදයන් පවසනවා. ලේඛකයෙක් වූ මොරිස් ජැස්ත්‍රෝ ඔහු ලියූ පොතක මෙසේ සඳහන් කළා. “අමරණීය ආත්මයක් තිබෙනවා යන අදහසට බැබිලෝනියේ සිටි පූජකයන් වැඩි අවධානයක් දුන්නා. ඔවුන් මරණය සැලකුවේ තවත් ජීවිතයකට මඟ විවෘත වීමක් හැටියටයි. අමරණීය ආත්මයක් ගැන ඔවුන් විශ්වාස කිරීමට හේතුව වුණේ කෙනෙක් මිය ගිය විට ඔහුගේ ජීවිතය එතැනින් අවසන් වන බව පිළිගැනීමට අකමැති වූ නිසයි.”—The Religion of Babylonia and Assyria.

පුරාණ බැබිලෝනියෙන් ආරම්භ වූ එම විශ්වාසය ලෝකයේ වෙනත් ප්‍රදේශවලටත් පැතිර ගියා. ඉන්දියාවේ සිටි දර්ශනවාදීන් අමරණීය ආත්මයක් පවතිනවා යන ඉගැන්වීමට නව මුහුණුවරක් දෙමින් හේතුපල වාදය හෝ කර්මය යන ඉගැන්වීම හඳුන්වා දුන්නා. ප්‍රසිද්ධ ග්‍රීක දර්ශනවාදීන්ද පුනරුත්පත්තිය පිළිගත් අතර ඒ නිසා තව බොහෝදෙනෙක්ද එය වැලඳගත්තා.

අද දිනත් පුනරුත්පත්තිය නමැති විශ්වාසය බොහෝ බටහිර රටවලත් ඉතා ජනප්‍රියයි. ඒ හා සම්බන්ධ විශ්වාසයන් හා වත්පිළිවෙත් ප්‍රසිද්ධ පුද්ගලයන්ගේ මෙන්ම තරුණ පරම්පරාවේද ප්‍රසාදයට ලක් වී තිබෙනවා. පෙර ආත්මයක ජීවත් වූ බවට පවසන අයගේ අද්දැකීම් ඇතුළත් පොත් පත් මෙන්ම වෙබ් අඩවි විශාල ප්‍රමාණයක් මේ වන විට නිර්මාණය කර තිබෙනවා. කෙනෙකුගේ වර්තමාන තත්වය දැනගැනීමට බොහෝ රටවල මෝහනය කිරීම යොදාගන්නවා. එයින් ඔවුන් බලාපොරොත්තු වන්නේ පෙර ආත්මයක ඔවුන් කළා යැයි සිතන යමක් වර්තමාන තත්වයට බලපානවාදැයි දැනගැනීමටයි.

එම ඉගැන්වීම සත්‍යයක්ද?

පුනරුත්පත්තිය පුරාණයේ සිට පැවත එන විශ්වාසයක් බව ඇත්තයි. නමුත් ප්‍රශ්නය වන්නේ එම ඉගැන්වීම සත්‍යයක්ද යන්නයි. අපිට ජීවිතය ලැබී තිබෙන්නේ යෙහෝවා දෙවිගෙන් නිසාත් ඔහු “රහස් හෙළි කිරීමට හැකියාව ඇති” දෙවි කෙනෙක් නිසාත් ජීවිතය හා මරණය ගැන මිනිසුන් නොදන්නා සැබෑ තොරතුරු දෙවි හෙළි කර තිබෙනවා. ඒ තොරතුරු තිබෙන්නේ දෙවි දී ඇති පොත වන බයිබලයේ. (යොහන් 17:17) ඒ නිසා මරණයේදී ඇත්තටම සිදු වන්නේ කුමක්ද කියා හරියටම දැනගන්න නම් අපි බයිබලයෙන් පිළිතුරු සෙවිය යුතුයි.—දානියෙල් 2:28; ක්‍රියා 17:28.

මුල් මිනිස් යුවළ වූ ආදම් සහ ඒව දෙවිට අකීකරු වූ අවස්ථාවේදී දෙවි ඔවුන්ට පැවසූ දේ බයිබලයේ මෙසේ සඳහන් වෙනවා. “භූමියෙන් ගන්නා ලද ඔබට, භූමියට හැරී යන තෙක්ම දහඩිය මහන්සියෙන් කෑම සොයන්න සිදු වෙයි. ඔබ දූවිලිය, දූවිල්ලටම හැරී යන්නෙහිය.” (උත්පත්ති 3:19) දෙවි ආදම්ව නිර්මාණය කළේ දූවිල්ලෙන්. ඒ නිසා ඔහු මිය යන විට නැවතත් දූවිල්ලටම හැරී යනවා කියා දෙවි කිව්වා. ඒ අනුව කෙනෙක් මිය යන විට ඔහු තවත් තැනක නැවත ඉපදෙන්නේ නැහැ. එතැනින් ඔහුගේ පැවැත්ම අවසන් වෙනවා.a සීතලයි රස්නෙයි, අඳුරයි ආලෝකයයි එකිනෙකට හාත්පසින්ම වෙනස් දේවල් වගේ ජීවිතයයි මරණයයි කියන්නෙත් සම්පූර්ණයෙන්ම එකිනෙකට වෙනස් දේවල්. කෙනෙක් මිය යනවා කියන්නේ ඔහු වෙන කොහේවත් නැහැ කියන එකයි. එය සරල මෙන්ම පිළිගත හැකි තර්කයක් නොවෙයිද?

එසේනම් තමන් පෙර ආත්මයක ජීවත් වූ බවට සමහරුන් පවසන්නේ ඇයි? ඊට යම් හේතු බලපාන්න පුළුවන්. මිනිස් මනසේ ක්‍රියාකාරිත්වය ගැන කිසිවෙක් සම්පූර්ණයෙන්ම වටහාගෙන නැහැ. කෙනෙක් ලබාගන්නා ප්‍රතිකාර ක්‍රම හා ඔහු ලබා ඇති අප්‍රසන්න අද්දැකීම් ඔහුගේ මනසට බලපාන විදිහත් කෙනෙකුට සම්පූර්ණයෙන් විස්තර කරන්න බැහැ. තොරතුරු කන්දරාවක් මතකයේ රඳවාගන්න මිනිස් මොළයට තිබෙන හැකියාව නිසා සමහරවිට කෙනෙක් දකින සිහින හා සිතේ මවාගන්නා දේවල් සැබෑ සිදුවීම් මෙන් දැනෙන්න ඉඩ තිබෙනවා. සමහර අවස්ථාවලදී භූතයන්ද මිනිසුන්ට යම් අද්භූත දේවල් පෙනෙන්න සලස්වා සැබෑ නොවන දේවල් සැබෑ දේවල් ලෙස හැඟෙන්න සලස්වනවා.—1 සාමුවෙල් 28:7-19.

නොමැරී ජීවත් වෙන්නත් අපේ අනාගතය මොන වගේද කියලා දැනගන්නත් අපි කවුරුත් ආසයි. ඒ ආසාව අපි තුළ ඇති කළේ අපේ නිර්මාතෘ. ඒ ගැන බයිබලයේ මෙසේ සඳහන් වෙනවා. “ඔහු සදාකල් ජීවත් වීමේ ආශාව මිනිසාගේ සිතෙහි තබා ඇත.”—දේශනාකාරයා 3:11.

හැමදාටම ජීවත් වීමේ ආසාව අප තුළ ඇති කළේ යෙහෝවා දෙවි නම් ඒ ජීවිතය ලබාගන්නා ආකාරයත් ඔහු අපට දන්වයි කියා සිතීම සාධාරණයි. ඒ ගැන ඔහු බයිබලයේ හෙළි කර තිබෙනවා. තමාට කීකරු වන මිනිසුන්ට ළඟදීම පාරාදීස පොළොවක සදාකල් ජීවත් වීමේ අවස්ථාව ලබා දීම මිනිසුන් සඳහා දෙවිට තිබෙන උතුම් අරමුණයි. ඒ ගැන දෙවි දී තිබෙන පොරොන්දුව මෙයයි. “ධර්මිෂ්ඨයෝ පොළොව උරුම කරගන්නෝය. ඔවුහු එහි සදාකල් ජීවත් වන්නෝය.” (ගීතාවලිය 37:29) දැනටමත් මිය ගොස් සිටින අය සම්බන්ධයෙන්ද දෙවිට අරමුණක් තිබෙනවා. එනම් ඔවුන්ව නැවත නැඟිටුවීමයි.—ක්‍රියා 24:15; 1 කොරින්ති 15:16-19.

නැවත නැඟිටීම සැබෑ බලාපොරොත්තුවක්

මිය ගිය අයට නැවත ජීවිතය ලබා දීම ගැන ඇසින් දුටු සාක්ෂි අටක් පිළිබඳ තොරතුරු බයිබලයේ සඳහන් වෙනවා.b බයිබලයේ සඳහන් සිද්ධීන්වලදී මිය ගිය පුද්ගලයාව ඒ ආකාරයෙන්ම නැවත නැඟිටෙවූ නිසා ඔවුන්ව ඔවුන්ගේ පවුලේ අය හා මිතුරන් ඒ වෙලාවෙම හඳුනාගත්තා. ඒවා පුනරුත්පත්ති නොවෙයි. මොකද මිය ගිය කෙනා බිලිඳෙකු ලෙස නැවත ඉපදිලාද කියා සොයා බලන්න ඔවුන්ට සිදු වුණේ නැහැ.—යොහන් 11:43-45.

අනාගතයේ මේ පොළොව පාරාදීසයක් වන කාලයේදී මිය ගොස් ඇති විශාල පිරිසක්ව දෙවි නැවත නැඟිටුවන බව බයිබලයේ සඳහන් වෙනවා. (2 පේතෘස් 3:13, 14) මේ වන විට මිය ගොස් සිටින බිලියන ගණන් මිනිසුන් පිළිබඳ සියලුම තොරතුරු යෙහෝවා දෙවිගේ අසමසම මතකයේ රැඳී තිබෙනවා. සියලුම තාරකාවල නම් පවා මතක තබාගැනීමට හැකියාව ඇති දෙවිට එය සුළු දෙයක්. (ගීතාවලිය 147:4; එළිදරව් 20:13) යෙහෝවා දෙවි මිය ගොස් සිටින අයව පිළිවෙළකට අනුව නැවත නැඟිටුවන විට තමන්ගේ පවුල්වල අයව මෙන්ම කිසි දිනක දැක නොතිබුණු තම මුතුන්මිත්තන්ව දැකගන්නත් හඳුනාගන්නත් අවස්ථාව ලැබෙනවා. එය මොන තරම් බලාපොරොත්තුවලින් පිරි අනාගතයක්ද!