පැනයට පිළිතුර බයිබලයෙන්

කවදා හරි මුළු ලෝකෙටම එක ආණ්ඩුවක් එයිද?

ලෝකෙටම එක ආණ්ඩුවක් ආවොත් මිනිසුන්ට කොච්චර ප්‍රයෝජන ලැබෙයිද කියලා හිතන්න. අද සමහරු සැප විඳිද්දී සමහරු දුක් විඳිනවා. මිනිසුන්ගේ දුක දැනෙන ආණ්ඩුවක් නම් හැමෝගෙම අවශ්‍යතා සපුරන්න වගබලා ගනියි. ඒ වගේ ආණ්ඩුවක් ඇති කරන්න මිනිසුන්ට පුළුවන් වෙයිද?—යෙරෙමියා 10:23 කියවන්න.

ඉතිහාසය පුරා රට වැසියන්ගේ විශේෂයෙන්ම දිලිඳු අයගේ අවශ්‍යතා සපුරන්න හුඟක් පැතිවලින් ආණ්ඩුවලට බැරි වෙලා තියෙනවා. සමහර පාලනයන් හරිම කෲරයි. (දේශනාකාරයා 4:1; 8:9) ඒත් සියලු බලැති දෙවියන් පොරොන්දු වෙනවා හැම ආණ්ඩුවක්ම ඉවත් කරලා එක ආණ්ඩුවක් පිහිටුවනවා කියලා. ඒකේ පාලකයා මිනිසුන් ගැන හුඟක් සැලකිලිමත් කෙනෙක්.—යෙසායා 11:4; දානියෙල් 2:44 කියවන්න.

දේවරාජ්‍යයෙන් කරන්නේ මොනවාද?

යෙහෝවා දෙවියන් සුදුසුම කෙනාව, ඒ කියන්නේ ඔහුගේ පුත්‍රයා වන යේසුස්ව රජ හැටියට තෝරගෙන තියෙනවා. (ලූක් 1:31-33) ඔහු මේ පොළොවේ ඉන්නකොට උනන්දුවෙන් මිනිසුන්ට උදව් කළා. ඉදිරියේදී ඔහු රජ හැටියට සියලුම ජාතීන්ව එක්සත් කරලා මිනිසුන්ගේ සියලුම දුක් වේදනා ඉවත් කරනවා.—ගීතාවලිය 72:8, 12-14 කියවන්න.

පාලකයා හැටියට හැමෝම යේසුස්ව පිළිගනියිද? නැහැ. ඒත් යෙහෝවා දෙවියන් ඉවසලා පාලකයා හැටියට යේසුස්ව පිළිගන්න ඔවුන්ට අවස්ථාව දෙනවා. (2 පේතෘස් 3:9) ළඟදීම ඔහු නරක මිනිසුන්ව ඉවත් කරලා මුළු ලෝකෙම සාමය හා සුරක්ෂිතභාවය තියෙන තැනක් කරනවා.—මීකා 4:3, 4 කියවන්න.