පවුලේ කාලසටහන—පවුලක් ලෙස ක්ෂේත්‍ර සේවයේ යෙදීම
1 බාලයන් යෙහෝවාගේ නාමයට ප්‍රශංසා කරනවා දකින විට යෙහෝවා ඉතා ප්‍රීති වෙනවා. (ගීතා. 148:12, 13) යේසුස්ගේ කාලයේදී ‘බිලිඳුන්ගේද කිරි බොන දරුවන්ගේද මුවින්’ පවා දෙවිට ප්‍රශංසා ලැබුණා. (මතෙ. 21:15, 16) අද දිනත් සිදු වන්නේ එයමයි. දෙමාපියෙනි, ඔබේ දරුවන්ට ක්‍රිස්තියානි දේවසේවයේදී උද්‍යෝගයෙන් යෙහෝවාට ප්‍රශංසා කරන්නන් වීමට උපකාර කරන්න ඔබට හැකි වන්නේ කෙසේද? සභා රැස්වීම් ගැන මීට කලින් ලිපියේ අවධාරණය කළ ලෙසම නැවතත් වැදගත් වන්නේ ඔබගේ ආදර්ශයයි. දෙමාපියන් වැඩිදෙනෙකුගේ අදහස එක් පියෙක් මෙසේ කැටි කොට දැක්වුවා. “දෙමාපියන්ගේ අවවාදයට වඩා ආදර්ශය උතුම්!”
2 දේවභයැති දෙමාපියන් යටතේ හැදුණු වැඩුණු එක් සහෝදරියක් සිහියට නඟන්නේ මෙසේයි. “සෙනසුරාදා උදේ අපි නැඟිට්ටාම සේවයේ යනවාද කියලා අපි කවදාවත් ඇහුව්වේ නෑ. අනිවාර්යයෙන්ම යන බව අපි දැනගෙන හිටියා.” ඒ වගේම ඔබටත් පුළුවන් පවුලක් වශයෙන් සතිපතා දේවසේවයේ හවුල් වීම පුරුද්දක් කරගැනීම මගින් දේශනා සේවයේ ඇති වැදගත්කම දරුවන්ගේ සිතේ පැළපදියම් කිරීමට. එසේ කිරීමෙන් දරුවෝ ඔබේ ආදර්ශය දිහා බලලා ඉගෙනගන්නවා වගේම දරුවන්ගේ ආකල්ප, හොඳ පුරුදු සහ ඔවුන් තම හැකියාවන් වර්ධනය කරන්නේ කොහොමද කියලා ඔබට දැක බලාගැනීමටත් හැකියාවක් ලැබෙනවා.
3 ක්‍රමානුකූලව පුහුණු කිරීම: දරුවන් දේවසේවයේදී ප්‍රීතියක් ලබන්න නම් උද්‍යෝගයෙන් ඊට සහභාගි වීමට සූදානම්ව සිටිය යුතුයි. කලින් සඳහන් කළ සහෝදරිය තවදුරටත් මෙහෙම කිව්වා. “දෙමාපියන් එක්ක සේවයේ යද්දී අපි කවදාවත් ඒගොල්ලන්ගේ පස්සේ ඔහේ යන්නම් වාලේ ගියේ නෑ. අපිටත් කරන්න දෙයක් තිබුණා. ගෙදරක සීනුව නාද කිරීම නැත්නම් පත්‍රිකාවක් දැමීම වගේ දේවල් කරන්න තිබුණා. සති අන්තයේදී සේවයේ සහභාගිවීමට කලින් හොඳින් සූදානම් වුණ නිසා අපි කියන්නේ මොනවාද කියලා අපි දැනගෙන හිටියා.” දේවසේවය සඳහා සූදානම් කිරීමට ඔබේ දරුවන්ට එවැනි පුහුණුවක් ලබා දෙන්න ඔබටත් පුළුවන්. ඒ සඳහා සෑම සතියකම පවුලේ පාඩම කරන විටදී නැත්නම් වෙනත් වෙලාවකදී විනාඩි කිහිපයක් ගත කළ හැකියි.
4 පවුලක් ලෙස දේශනා සේවයේ හවුල් වීමෙන් ඔබේ දරුවන් තුළ සත්‍ය පැළපදියම් කිරීමට අමතර ප්‍රස්තාවක් ලැබෙනවා. එක් ක්‍රිස්තියානි පියෙක් වෙනත් ගමක සිටින ගම්වැසියන්ට පත්‍රිකා බෙදාහැරීමට යන්නයි එන්නයි කිලෝමීටර් විස්සක් ඇවිදින විට තම දියණියවද ගෙන ගියා. “එහෙම ඇවිදින වෙලාවලට තමයි තාත්තා මගේ සිතේ සත්‍යය පැළපදියම් කළේ” කියලා ඇය ඉතා සෙනෙහසින් සිහිපත් කරනවා. (ද්වි. 6:7) සතිපතා පවුලේ කාලසටහනට ක්ෂේත්‍ර සේවයේ යෙදීමද ඇතුළත් කරගැනීමෙන් ඔබටත් එලෙසම ආශීර්වාද ලැබේවා!