සේවයේ දක්ෂ වීමට බාධා ජය ගන්න

ඒක වැදගත් ඇයි? ස්වාභාවික විපතක් සිදු වෙන්න ළඟයි කියලා ඔබ දැනගත්තා කියලා හිතන්න. එතනින් ඉවත් වුණේ නැත්නම් ජීවිත අනතුරේ. ඔබේ අසල්වැසියෙකුට ඒ අනතුර ගැන කියන්න ගියත් ඔහුට ඒක අහන්න වෙලාවක් නැහැ කියලා කිව්වොත් ඔබ මොකද කරන්නේ? ජීවිතය ගලවගන්න ඔහුට උදව් කරන එක අත්හරිනවාද? නෑ. අපේ ප්‍රදේශයේ ඉන්න හුඟක් අයත් අපේ පණිවිඩේ ප්‍රතික්ෂේප කරනවා. අපේ පණිවිඩේ ජීවිත ගලවන වටිනා එකක් කියලා ඒ අය දන්නේ නෑ. සමහරවිට අපි ඔවුන්ව මුණගැහෙන්න යන වෙලාවේ ඔවුන් කාර්යබහුලව ඉන්න ඉඩ තියෙනවා. (මතෙ. 24:37-39) කටකතා අහලා අපි ගැන වැරදියට හිතාගෙන ඉන්නවා වෙන්නත් පුළුවන්. (මතෙ. 11:18, 19) අපි හා අනිත් ආගම්වල අය අතරේ වෙනසක් නැහැ කියලා හිතන්නත් ඉඩ තියෙනවා. (2 පේතෘ. 2:1, 2) නිවැසියා මුල් අවස්ථාවේදී අකමැති වුණ නිසාම උත්සාහය අත්හරින්න හොඳ නෑ.

ඒක කරන්නේ කොහොමද?

ගෙයින් ගෙට සේවයේ යන්න කලින් සංවාදයට ඇති වෙන්න පුළුවන් බාධා ගැනත් ඒවා ජය ගන්න පුළුවන් විදිහ ගැනත් හිතලා බලන්න.
කැමති නැහැ කියලා කිව්වත් සංවාදය දිගටම කරගෙන යන්න පුළුවන් විදිහක් ගැන හිතන්න. ඔහු කියපු දෙයක් අගය කරන්න පුළුවන්ද කියලා බලන්න. උදාහරණයකට නිවැසියා කිව්වොත් මට ආගමක් තියෙනවා කියලා ඔබට මෙහෙම කියන්න පුළුවන්. “මමත් ආසාවෙන් හිටියේ ආගම දහමට ළැදි කෙනෙක්ව හම්බ වෙන්න.” ඒ විදිහට ඔබ ඔහුගේ හැඟීම් හා තත්වය තේරුම්ගත්තා කියලා ඔහුට දැනුණොත් පණිවිඩේ කියන්න ඔබට අවස්ථාවක් ලැබෙයි. “මට වැඩ තියෙනවා කියලා” කිව්වොත් “එහෙනම් මම මේක දීලා යන්නම්” කියලා කියන්න පුළුවන්. කැමති නැහැ කියලා කිව්වොත් මෙහෙම අහන්නත් පුළුවන්. “ඔයා අකමැති බයිබලයේ තියෙන දේවලටද නැත්නම් ආගම්වලටද?”
තමන්ට සවන් දෙන්න කියලා යෙහෝවා දෙවි කාටවත් බල කරන්නේ නෑ කියලා මතක තියාගන්න. (ද්වි. 30:19) පණිවිඩේට සවන් දෙනවාද නැද්ද කියන එක පෞද්ගලික තීරණයක්. (ගලා. 6:5) නිවැසියා කැමති නැහැ කියලා තරයේම කිව්වොත් එතනින් පිට වෙලා යන්න. අපි නිවැසියා ගැන හිතලා එතනින් පිට වෙලා ආවොත් වෙන දවසක ඔහු පණිවිඩය අහන්න ඉඩ තියෙනවා.—1 පේතෘ. 3:15.

මාසය තුළ මෙය අත්හදා බලන්න

කැමති නැහැ කියලා කිව්ව නිවැසියාගේ ගෙදරින් පිට වෙලා එද්දී, ඊට වඩා හොඳින් ප්‍රතිචාරය දක්වන්න පුළුවන්කම තිබුණේ කොහොමද කියලා ඔබ එක්ක සේවයේ යන කෙනාත් එක්ක කතා කරන්න.