යෙහෝවඃ වහන්සේගේ සාක්ෂිකරුවන් හා වෛද්‍ය වෘත්තියේ සහයෝගය
රුධිර ප්‍රවේශනය වනාහි ශුද්ධ ලියවිලිවලට පටහැනි ව රුධිරය භාවිතා කිරීමක් බව යෙහෝවඃ වහන්සේගේ සාක්ෂිකරුවන් විසින් 1945 දී අවබෝධ කර ගන්නා ලදි. මෝසෙස්ගේ ව්‍යවස්ථාවෙහි අන්තර්ගත වූ තහනම ක්‍රිස්තියානි ග්‍රීක් ශුද්ධ ලියවිලි පද තුළට ගෙනැවිත් ඇත. ක්‍රියා 15:28, 29 [NW ] මෙසේ සඳහන් කරයි: “රූපවලට පූජා කළ දේවලින් ද ලෙයින් ද බොටුව මිරිකා මැරූ සතුන්ගෙන් ද වේශ්‍යාකමින් ද යන මෙම අවශ්‍ය දේවලින් ඔබ වළකින්ට ඕනෑවා මිස, වෙන කිසි බරක් ඔබ පිට නොතබන්නට ශුද්ධාත්මයටත් අපටත් යහපතැයි පෙනී ගියේ ය. මේවායින් ඔබ ප්‍රවේසමෙන් වළකින්නහු නම් ඔබ සඵල වේ. ඔබට හොඳ සෞඛ්‍ය ලැබේවා!” (ලෙවී කථාව 17:10-12 බලන්න.) සාක්ෂිකරුවන් රුධිර ප්‍රවේශනයන් පිළිගැනීමට ප්‍රතික්ෂේප කිරීම වෛද්‍ය වෘත්තියෙහි නියැලෙන සමහරෙකු සමඟ බොහෝ විරෝධතාවයන්ට මඟ පෑදුණි.
රෝහල් සම්බන්ධතා කමිටු
රුධිරය ගැනීමට ප්‍රතික්ෂේප කිරීම වෙනුවෙන් සාක්ෂිකරුවන්ට සහාය වීමට, වෛද්‍යවරුන්ගේ සහ රෝහල්වල වරදවා තේරුම් ගැනීම් ඉවත් කිරීමට මෙන් ම වෛද්‍ය ආයතන සහ සාක්ෂිකාර රෝගීන් අතර වඩා සහයෝගිත්වයක් ඇති කිරීමට ද, යෙහෝවඃ වහන්සේගේ සාක්ෂිකරුවන්ගේ පාලක මණ්ඩලය විසින් රෝහල් සම්බන්ධතා කමිටු පිහිටවනු ලැබී ය. වෛද්‍යවරුන් සහ රෝහල් සමඟ අවබෝධයෙන් යුතු ව කටයුතු කිරීමට පුහුණුව ලද මේරූ සාක්ෂිකරුවන්ගෙන් සමන්විත වූ මෙම කමිටු ගැටුම් සමනය කළ අතර ඔවුහු වඩා වැඩි සහයෝගිතාවයේ ස්වභාවයක් පිහිටුවා ගත්හ. එක්දාස් නවසිය සැත්තෑ නවයේ දී එවැනි කමිටු ස්වල්පයක් තිබූ අතර දැන් එම ගණන රටවල් 65ක 850 දක්වා වැඩි වී තිබේ. මින් අදහස් කරන්නේ ඔවුන්ගේ උපකාරවත් සේවාවන් දැන් යෙහෝවඃ වහන්සේගේ සාක්ෂිකරුවන්ගේ මිලියන 3.5කට පමණ ලබා ගත හැකි ව තිබෙන බව ය.
රුධිර ප්‍රවේශනයේ පිහිට පතන්නේ නැති ව කළ හැකි සියල්ල, වෛද්‍ය පොත් පත්වල අඩංගු දේ මගින් කළ හැකි දැයි බැලීමට ඔවුනට උපකාර කිරීම සඳහා යෙහෝවඃ වහන්සේගේ සාක්ෂිකරුවන්ගේ සභාවල සිටින වැඩිමහල්ලෝ 4,500කට වඩා වෛද්‍යවරුන් සමඟ කථා කිරීමට පුහුණුව ලබා සිටිති. යම් විශේෂ අවශ්‍යතා ඇති අවස්ථාවල දී, රුධිරය භාවිතා නොකර සාක්ෂිකරුවන්ට ප්‍රතිකාර කිරීම සඳහා වෛද්‍යවරුන්ට උපකාර කිරීමට සුදුසු ලිපි කෙළින් ම රෝහලට ෆැක්ස් ක්‍රමය මගින් යවනු ලැබේ. නැතහොත් රුධිර රහිත ප්‍රතිකාරයන් හෝ ශල්‍යකර්මයන් සඳහා දක්ෂ උපායන් වර්ධනය කිරීමට වෙනත් සහයෝගි වෛද්‍යවරුන්ගෙන් උපදෙස් ලැබීම සඳහා කමිටු මගින් විධිවිධාන යොදයි.
උදාහරණයක් ලෙස, රුධිරය අඩු වීමේ හේතුවෙන් දරුණු නීරක්තයෙන් පෙළෙන අසංඛ්‍යාත දෙනා සඳහා රතු-රුධිරාණු ගණන වැඩි කරනු පිණිස ප්‍රවේශනයක් අවශ්‍ය යයි වෛද්‍යවරුන් පැවසූ අවස්ථාවල දී, එම දේ ම කිරීමට ප්‍රතිසම්බන්ධක එරිතොපොයිටින්වලට (EPO) ඇති දක්ෂ හැකියාව පෙන්නුම් කර තිබෙන වෛද්‍ය පොත් පත්වල ලිපිවලින් අදහස් බෙදා ගැනීමට රෝහල් සම්බන්ධතා කමිටුවලට හැකි වී තිබේ. මෙම කෘත්‍රිම හෝමෝන අපගේ වකුගඩුවල තිබෙන ස්වාභාවික එරිතොපොයිටින් වාගේ ම ක්‍රියා කර, රුධිර ධාරාවට අලුත් රතු රුධිරාණු යැවීම සඳහා ඇට මිදුලු උත්තේජනය කරයි.
අවශ්‍යතාව සපුරාලීමට ප්‍රමාණවත් වේගයකින් EPO ක්‍රියා නොකරනු ඇතැයි ඇතැම් වෛද්‍යවරුන්ට හැඟී ඇතත්, යෙහෝවඃ වහන්සේගේ සාක්ෂිකරුවන් ඇතුළු රෝගීන් ගණනාවකට එය කෙතරම් ඉක්මනින් ප්‍රතිඵල ලබා දෙන්නේදැයි නිදර්ශනය කරනු ලැබී ය. එක් අවස්ථාවක දී, EPO දීමට නිර්දේශ කළ පසු, එම දිනයේ දී ම, නව රතු රුධිරාණුවල ගණන සාමාන්‍ය ගණනට වඩා හතර ගුණයකින් වැඩි විය! පසුදා රෝගියාගේ තත්ත්වය ස්ථිර වූ අතර හතර වන දිනය වන විට, හොඳින් මේරූ රතු-රුධිරාණු ගණන වැඩි වන්නට පටන් ගැනුණි. ඉන් ස්වල්ප දිනකට පසු, එය ඉතා සීඝ්‍රයෙන් වැඩි වෙමින් තිබුණි. රෝගියාගේ ජීවිතය බේරුණි. මේ අයුරින් රෝහල් සම්බන්ධතා කමිටුවල මෙම ක්‍රියාකාරකම් මගින් වෛද්‍යවරුන් මෙන් ම රෝගියා ද ප්‍රයෝජන ලැබී ය.
කලාතුරකින් සෑදෙන නිවර්තන රෝගයක් සඳහා රුධිරය භාවිතා නොකර සාක්ෂිකාර රෝගියෙකුගේ ජීවිතය ගලවා ගැනීමට නොහැකි බව ඕස්ට්‍රේලියාවේ වෛද්‍යවරු පවසා සිටි විට, රුධිරය නොමැති වෛද්‍ය ප්‍රතිකාරයක් ගැන තොරතුරු සොයා ගැනීම සඳහා යම් උපකාරයක් තමන්ට දීමට කමිටුවට හැකිදැයි දැනගැනීමට ඔවුහු ප්‍රාදේශීය රෝහල් සම්බන්ධතා කමිටුවෙන් ඉල්ලා සිටියහ. අවශ්‍යතාව ගැන යෙහෝවඃ වහන්සේගේ සාක්ෂිකරුවන්ගේ ඕස්ට්‍රේලියානු ශාඛා කාර්යාලයට දන්වනු ලැබී ය. ඔවුහු නිව් යෝර්ක්, බෘක්ලින් හි යෙහෝවඃ වහන්සේගේ සාක්ෂිකරුවන්ගේ ජාත්‍යන්තර මූලස්ථානයේ පිහිටි රෝහල් තොරතුරු සේවාවන්ට දැනුම් දුන්හ. එය වෛද්‍ය දත්ත මූලයකින් පර්යේෂණය කරන ලදි. උපකාරවත් ලිපි ෆැක්ස් ක්‍රමය මගින් ඕස්ට්‍රේලියාවට යැවී ය. ඕස්ට්‍රේලියාවේ වෛද්‍යවරයාගේ කාර්යාලයෙන් පිට වී හරියට ම පැය 11කට පසු, අවශ්‍ය ලිපි සමඟින් ඕස්ට්‍රේලියානු රෝහල් සම්බන්ධතා කමිටුවේ සාමාජිකයා නැවත පැමිණ සිටියේ ය. මෙය ඵලදායී බව ඔප්පු කරමින් රෝගියාගේ ජීවිතය ගැලවුණි. ෆැක්ස් ක්‍රමය මගින් නිව් යෝර්ක් සිට නේපාලය තරම් දුරකට වෛද්‍ය තොරතුරු යවා ඇත.
ගුණාත්මක පර්යේෂණය සහ සහාය
යෙහෝවඃ වහන්සේගේ සාක්ෂිකරුවන් විසින් වෛද්‍ය පොත් පත්වලින් කර තිබෙන පර්යේෂණයේ ගුණාත්මකභාවය ස්ථිර මෙන් ම තත්කාලීන ය. අමෙරිකා එක්සත් ජනපදයේ ඔරිගන්වල පිහිටි රෝහලක ශල්‍ය සේවාවන් පිළිබඳ සහාය අධ්‍යක්ෂිකාවක් වූ රජයේ හෙදියක්, ශල්‍යාගාර කළමනාකරුවන් සඳහා වූ වෛද්‍ය ප්‍රකාශනයක ඇති එක් ලිපියක මෙසේ පැවසුවා ය: “යෙහෝවඃ වහන්සේගේ සාක්ෂිකරුවා[වෝ] . . . අපට වඩා ඉදිරියෙන් [සිටිති]. රුධිරය සහ රුධිර නිෂ්පාදනයන් වෙනුවට විකල්පයන් ගැන වැඩි ම දැනගැන්මක් තිබෙන මෙන් ම අප ඒ ගැන අසන්නට පෙර පවා අපට පොත් පත් සපයන්නේ ඔවුන් ය.”—OR මැනේජර්, 1993 ජනවාරි, 12වන පිටුව.
සමප්‍රභව රුධිරය යොදා නොගෙන ප්‍රතිකාර දිය හැකි ඇතැම් ප්‍රමුඛ වෛද්‍යවරුන් සහ වෛද්‍ය මධ්‍යස්ථාන සමහරක් තමන්ගේ එළැඹීම් සහ ක්‍රියා පරිපාටිය ගැන තමන්ගෙන් උපදෙස් ලබා ගැනීම සඳහා හැකි කරවා තිබේ. ලිව්කීමියාව සහ විවිධාකාරයේ ශල්‍යකර්මයන් සඳහා සාර්ථක ප්‍රතිකාරයක් ලබා තිබෙන අය තුළ දක්නට ලැබෙන ලෙස, මෙම අවශ්‍යතාව සඳහා ඔවුන්ගේ ත්‍යාගශීලී ප්‍රතිචාරය ජීවිත ගලවා ගැනීමේ දී උපකාර කර ඇත. මෙම වෛද්‍ය උපදෙස් බොහෝ විට හසුරුවා තිබෙන්නේ ජාත්‍යන්තර දුරකථන පණිවුඩ මගිනි.
තව ද අවශ්‍යතාවයෙන් සිටින අය ඇදහිල්ලට-අභියෝග කරන වෛද්‍යමය තත්ත්වයකට මුහුණ දෙන විට ඔවුනට උපකාර කිරීම සඳහා යෙහෝවඃ වහන්සේගේ සාක්ෂිකරුවන් කෙතරම් දුරකට ගොස් තිබෙනවාදැයි පෙන්නුම් කරනවා නම්, රෝගියෙකු එක් රෝහලකින් තවත් රෝහලකට, රටේ එක් කොටසකින් තවත් කොටසකට සහ එක් රටකින් තවත් රටකට පවා මාරු කිරීමට විධිවිධානය යොදා තිබේ. ඇතැම් උදාහරණ: වැඩිහිටි රෝගියෙකු සුරිනාම්වල සිට පුවටෝ රිකෝ දක්වා ද; තව කෙනෙකු සමොවා සිට හවායි දක්වා ද; බිළිඳෙකු ඕස්ට්‍රියා සිට අමෙරිකා එක්සත් ජනපදයේ ෆ්ලොරිඩා දක්වා ද ගෙන ගොස් ඇත.
තවත් වෛද්‍යවරු සහාය දක්වති
මෙම කාරණය සම්බන්ධයෙන් යෙහෝවඃ වහන්සේගේ සාක්ෂිකරුවන් සමඟ සහාය වීමට කැමැත්තක් දක්වන වෛද්‍යවරුන්, වසර පහකට පෙර 5,000 පමණ සිට දැන් රටවල් 65ක 30,000කටත් වඩා වැඩි වී තිබීම, ඔවුන් සඳහා තත්ත්වයේ වැඩි දියුණුවකි. එම දක්ෂ වෛද්‍යවරුන් විවිධ රටවල රුධිරය රහිත වෛද්‍ය හා ශල්‍ය මධ්‍යස්ථාන 30කට වඩා වැඩියෙන් ඇති කිරීමෙන්—තවත් සතුටුදායක දියුණුවක් සැලසී තිබේ.
මෙබැවින්, මේ දිනවල, අඩු ම තරමින් උතුරු අමෙරිකාවෙහි වැඩිහිටියෙකුට රුධිර ප්‍රවේශනයක් ලබා ගනු වස් බල කිරීමට ප්‍රයත්න දරන බව අසන්නට ලැබෙන්නේ නැති තරම් ය. වෙනත් රටවල් බොහොමයක් ද එම තත්ත්වයට වර්ධනය වෙමින් තිබේ. දැන් තිබෙන ගැටලුවලින් වැඩි හරියක් ම තිබෙන්නේ අලුත උපන් ළදරුවන් සහ විශේෂයෙන් ම නොමේරූ දරු උපත් සමඟ ය. මෙම නොමේරූ දරු උපත් පෙණහලු සහ වකුගඩු වැනි සාමාන්‍ය ලෙස ක්‍රියා නොකරන හොඳින් නොවැඩුණු ඉන්ද්‍රියයන් සම්බන්ධ බොහෝ ගැටලුවලින් ඇරඹේ. එහෙත් වෛද්‍යවරු රුධිර ප්‍රවේශන නොමැති ව මෙම තත්ත්වයන්ට ප්‍රතිකාර කිරීමට මාර්ග සොයති. උදාහරණයක් ලෙස, ස්වසන ආපදා සන්ධාවයෙන් නිදහස් වීමට කෘත්‍රිම පෘෂ්ටික ආතතිය අඩු කිරීම සඳහා යොදන ශ්ලේෂ්මල ආකාරයේ මිශ්‍රණයක් දැන් ලබා ගත හැකි ය. නොමේරූ දරු උපත්වල නීරක්තය සමඟ ක්‍රියා කිරීම සඳහා EPO භාවිතා කිරීම පුළුල් ලෙස පිළිගන්නක් බවට පත්වෙමින් තිබේ.
වෛද්‍ය කාර්ය මණ්ඩලය සහ නිලධාරින් සඳහා උපකාරය
යෙහෝවඃ වහන්සේගේ සාක්ෂිකරුවන්ගේ දරුවන්ට රුධිර ප්‍රවේශන නොමැති ව ප්‍රතිකාර කිරීම සඳහා, ළමා රෝග විශේෂඥයන්ට හා බිළිඳු රෝග විශේෂඥයන්ට උපකාර කිරීමට, අලුත උපන් ළදරුවාගේ ගැටලු රැසක් සඳහා රුධිරය නොමැති ව කළ හැක්කේ කුමක්දැයි පෙන්නුම් කරන වෛද්‍ය පොත් පත්වලින් ගත් ලිපි 55කින් යුත් තුන් ආකාර සූචියන් සහිත වෙළුමක්, රෝහල් තොරතුරු සේවාවන් මගින් නිපදවා ඇත.
රුධිර නොවන වෛද්‍ය විකල්පයන් ගැන තොරතුරු සමඟින් විනිශ්චයකරුවන්, සමාජ සේවකයන්, ළමා රෝහල්, බිළිඳු රෝග විශේෂඥයන් සහ ළමා රෝග විශේෂඥයන් වෙත යෑමට, යෙහෝවඃ වහන්සේගේ සාක්ෂිකරුවන් විසින් ෆැමිලි කෙයා ඇන්ඩ් මෙඩිකල් මැනේජ්මන්ට් ෆො ජෙහෝවා’ස් විට්නසස් නමින් හැඳින් වූ පිටු 260කින් සමන්විත වෙළුමක් විශේෂයෙන් ම මෙම වෛද්‍ය කාර්ය මණ්ඩලය හා නිලධාරින් සඳහා නිපදවා ඇත.a එය කොල ගැලවිය හැකි අත්පොතක් බැවින් එය තත්කාලීන ව තබා ගත හැක. යෙහෝවඃ වහන්සේගේ සාක්ෂිකරුවන් අතරේ පවුල් ජීවිතය ගැන යම් වරදවා තේරුම් ගැනීමක් තිබූ නිසා, එය බයිබල් ඉගැන්වීම මගින් හටගන්වන ජීවන-රටාවකින් නිපද වූ ඒකාන්තයෙන් ම ප්‍රයෝජනවත්, සැලකිලිමත් වාතාවරණයක සිටින තම දරුවන් සඳහා දෙමව්පියන් තුළ ඇති ප්‍රේමය ද පැහැදිලි ව පෙන්නුම් කරයි.
එම ප්‍රකාශනයට ප්‍රතිචාරය දක්වා තිබෙන්නේ කෙසේ ද? එම පොතේ අඩංගු දෑ පරීක්ෂා කිරීමෙන් පසු, අ.එ.ජ., පෙන්සිල්වේනියාවේ ළමා රෝහලක උප සභාපති පවසා සිටියේ තම සේවක මණ්ඩලය එය කියවා ජීරණය කර ගෙන, භාවිතා කිරීම තමාගේ අපේක්ෂාව බවයි. ඔහු මෙසේ ද පැවසී ය: “එය අතින් අත යවා අධ්‍යයනය නොකර මා වෙත පැමිණෙනවා නම්, එසේ වීමට හේතුව දැනගැනීමට මට වුවමනායි!” වෛද්‍යවරුන් රුධිරය භාවිතා කිරීමට පෙර සියලු ම රුධිර නොවන විකල්ප යොදා ගැනීම අවශ්‍ය කරවීම සඳහා ඇතැම් විනිශ්චයකරුවන් විසින් අධිකරණ නියෝග සංශෝධනය කර ඇත. රුධිරය නොමැති ව දරුවන්ට ප්‍රතිකාර කර ඇති අතර සනීප වී ගෙදර ගොස් ඇත.
අමෙරිකා එක්සත් ජනපදයේ, ඔහයෝ හි ළමා අපරාධ සම්බන්ධ විනිශ්චයකරුවෙක් එම ප්‍රතික්‍රියාව ම දැක්වී ය. ෆැමිලි කෙයා වෙළුම කෙතරම් ඔහුගේ සිත් ගත්තා ද කිවහොත් ඔහුගේ සහායයන් සඳහා අමතර පිටපත් හතක් ඇණවුම් කළේ ය. දෙමව්පියන්ගේ අයිතිවාසිකම සමඟ වෛද්‍යවරයාගේ කාර්යයන් සමබර කිරීමට ඔහු දැන් ඔහුගේ අධිකරණ නියෝග අලුත් කරයි, මෙය දෙයාකාරයකින් ඉටු කෙරේ. ඔහු සිය නියෝගයේ මෙසේ විශේෂ කොට දක්වයි (1) වෛද්‍යවරුන් විසින් රුධිරය භාවිතා කිරීමට පෙර සියලු ම විකල්ප ප්‍රතිකාර අත්හදා බැලිය යුතුයි; එමෙන් ම (2) වෛද්‍යවරුන්, තමන් භාවිතා කරන රුධිරය පරීක්ෂා කර තිබෙන බවටත්, ඒඩ්ස් සහ සෙංගමාලය [හෙපටයිටිස්] යන දෙක ම එහි නොමැති බවටත් සහතික විය යුතුයි. ඔහු ඒවා අලුත් කිරීමට පටන් ගත් දා සිට ඉදිරිපත් කළ නියෝග තුනක දී, දරුවන් තුන් දෙනාට ම රුධිර ප්‍රවේශන නොමැති ව සාර්ථක ව ප්‍රතිකාර කරනු ලැබී ය.
බොස්ටන් විද්‍යාලයේ නීති පාසලේ මහාචාර්ය චාල්ස් එච්. බැරන්, ඉකුත් වසරේ පැරීසියේ විශ්ව විද්‍යාලයෙහි උපාධිධාරීන් සඳහා රැස්වීමක දී ලියවිල්ලක් ඉදිරිපත් කළේ ය. ඔහුගේ විෂය වූයේ “රුධිරය, පාපය සහ මරණය: යෙහෝවඃ වහන්සේගේ සාක්ෂිකරුවන් හා අමෙරිකානු රෝගීන්ගේ අයිතිවාසිකම්වල ව්‍යාපාරය,” යනුවෙනි. සාක්ෂිකරුවන්ගේ රෝහල් සම්බන්ධතා කමිටුවල සේවය සම්බන්ධයෙන් එම ලියවිල්ලෙහි ම පහත දැක්වෙන ඡේදය සඳහන් වේ:
“තවදුරට සාක්ෂි සලකා බැලීමේ අටියෙන් තම විශ්වාසයන්ගෙන් සමහරක් නැවත සලකා බැලීම සඳහා අමෙරිකානු වෛද්‍ය විද්‍යාවට ඔවුන් සලස්වා තිබේ. මෙම ක්‍රියා පිළිවෙළේ දී, අමෙරිකානු සමාජයේ සියලු දෙනා ම ප්‍රයෝජන ලබා ඇත. සාක්ෂිකරුවන්ගේ රෝහල් සම්බන්ධතා කමිටුවල සේවය නිසා යෙහෝවඃ වහන්සේගේ සාක්ෂිකරුවන්ට පමණක් නොව, අද දින සාමාන්‍ය රෝගීන්ට පවා අනවශ්‍ය රුධිර ප්‍රවේශන නොදෙන තරම් ය. සියලු රෝගීන්ගේ අයිතිවාසිකම්වල ව්‍යාපාරයක කොටසක් වශයෙන් සාක්ෂිකරුවන් විසින් කරන ලද සේවය හේතුවෙන් සාමාන්‍ය රෝගීහු සෞඛ්‍ය සැලකිලි තීරණ සියල්ලක් සම්බන්ධයෙන් වඩා වැඩි ස්වාධීනත්වයක් තිබීමේ ප්‍රීතිය භුක්ති විඳිති. තව ද සාක්ෂිකරුවන්ගේ විශ්වාසයන් සමඟ නොගැළපෙන ක්‍රියාවක් ගැනීමට ඔවුනට බල කිරීමේ වෑයම්වලට ස්ථිරයෙන් ම විරුද්ධ ව සිටීම මගින් පොදු නිදහස හා විශේෂයෙන් ආගමික නිදහස වැඩි දියුණු වී ඇත.”
රෝහල් සම්බන්ධතා කමිටු මගින් කරන මෙම ක්‍රියාකාරකම කෙළින් ම දෙවියන් වහන්සේගේ රාජ්‍යයේ ශුභාරංචිය දේශනා කිරීම නොවිය හැකි නමුත්, පළමු ශතවර්ෂයේ පාලක මණ්ඩලය විසින් අපගේ පරිශුද්ධ සේවයේ “අවශ්‍ය දේවල්” වලින් එකක් යයි හැඳින්වූ දෙය සම්බන්ධයෙන් අපගේ නමස්කාරයට කළ ඍජු අභියෝගයකට ස්ථිරයෙන් ම පිළිතුරු සපයයි. (ක්‍රියා 15:28, 29) කෙසේ වුවද, අප විසින් නිර්භීත ව එහෙත් ගෞරවයෙන් අදහස් හුවමාරු කර ගැනීමට ළඟා වීම, වෛද්‍ය වෘත්තියේ නියැලෙන ඇතැම් අයට රාජ්‍යය පණිවුඩය කෙරෙහි ප්‍රතිචාරය දැක්වීම සඳහා මාර්ගය විවෘත කර තිබීම සිත්ගන්නා දෙයකි. රෝහල් සම්බන්ධතා කමිටුවල සාමාජිකයන් කිහිප දෙනෙක්, කමිටු ක්‍රියාකාරකම මගින් මුණ ගැසුණු වෛද්‍යවරුන් සමඟ බයිබල් පාඩම් පටන් ගෙන තිබෙන අතර එවැනි වෛද්‍යවරුන්ගෙන් දෙදෙනෙක් මෑතක දී බව්තීස්ම වූහ.
එබැවින් රෝහල් සම්බන්ධතා කමිටු විධිවිධානයේ උපකාරය සමඟින්, අවශ්‍ය වෛද්‍ය ප්‍රතිකාර ලබා ගන්නා අතරේ දී ම, තම අඛණ්ඩතාවය බිඳ හෙලා නොගෙන, රුධිරයෙන් වැළකී සිටීම සම්බන්ධයෙන් යෙහෝවඃ වහන්සේගේ පරිපූර්ණ ව්‍යවස්ථාවට කීකරු වීම සඳහා යෙහෝවඃ වහන්සේගේ සාක්ෂිකරුවෝ උපකාරය ලබමින් සිටිති. (ගීතාවලිය 19:7) කලක පැවති පරතරය වසාලමින් ඇත්තෙන් ම දිගට ම හොඳ සාර්ථකත්වයක් තිබී ඇත. ලබා ගැනීමට තිබෙන රුධිර නොවන වෛද්‍ය ප්‍රතිකාර සැපයීමට වෛද්‍යවරුන්ට හා රෝහල්වලට හැකි ආකාරය ගැන දැන් වඩා හොඳින් ඔවුනට දන්වා තිබේ. රෝගීන්, නෑදෑයන්, ආගමික ආශ්‍රිතයන් සහ රෝහල් කාර්ය මණ්ඩලය යන සියලු දෙනාට ම අවශ්‍ය වන දේ—එනම් රෝගියා නිරෝගිමත් කිරීම එමගින් සිදු කරයි.—සපයන ලද්දේ වොච්ටවර් සමිතියේ ලෝක මූලස්ථානයේ රෝහල් තොරතුරු සේවාවන් මගිනි. g93 11/22
[පාදසටහන්වල]
a ලබා ගත හැක්කේ ඉංග්‍රීසියෙන් පමණි.
[25 පිටුවෙහි ඇති පින්තූර]
සම්බන්ධතා කමිටුව වෛද්‍යවරයෙකු සමඟ සාකච්ඡා කරයි
[26 පිටුවෙහි ඇති පින්තූර]
“පවුලේ සුභ සාදනය”