මිෂනාරිවරු ආලෝකයේ නියෝජිතයෝද අන්ධකාරයේ නියෝජිතයෝද?—6වන කොටස

අදදින සැබෑ ගෝලයන් සෑදීම

යේසුස් ක්‍රිස්තුස්වහන්සේ මෙසේ අණ කළසේක: “නුඹලා ගොස්, සියලු ජාතීන් ගෝලයන් කරපල්ලා . . . බව්තීස්ම කරපල්ලා.” (මතෙව් 28:19) “සමහරවිට සුළු උනන්දුවකින් පමණක් වුවත්, සෑම යුගයකම ක්‍රිස්තියානීන් විසින්” මෙම නියෝගය “ඉටු කර” ඇතැයි එව්රිමෑන්ස් එන්සයික්ලොපීඩියා පවසයි. ද මිෂනරි මිත් යන පොත මෙසේ අසයි: “මිෂනාරි යුගය අවසන් වී ඇත්ද?”

මෙම වසරේ ජනවාරියේදී, නිව්ස්වීක් සඟරාව මෙසේ වාර්තා කළේය: “දෙවන ජුවාම් පාවුලු පාප් විසින් රෝමානු කතෝලික ධර්මය වීදිවලට ගෙන යයි.” සඟරාව මෙසේ පැහැදිලි කළේය: “රෝමානු නර්තන ශාලාවල, සුපිරි වෙළඳසැල්වල සහ භූගත දුම්රිය මාර්ගවල ජනයා හරවනු වස්, ඔහු විසින් දේවගැතියන් නොවන එවැන්ජලිස්තවරුන් 350ක් යැවේ. මෙම අත්හදාබැලීමේ වැඩසටහන ඇරඹෙන්නේ අළු බදාදාය (පෙබ. 16). එය සාර්ථක වන්නේ නම්, පාප්වරයා ලොව පුරා යයි—එනම් බුවේනස් අයිරස් සිට ටෝකියෝ දක්වා කතෝලික මිෂනාරිවරුන්ට දොර සීනු නාද කළ හැකි වන පරිදි ඉදිරියට යෑමකි.”

අනික් අතට, යෙහෝවඃවහන්සේගේ සාක්ෂිකරුවෝ බොහෝ කලකට පෙර සිට එවැන්ජලිස්ත වැඩය කිරීමට ඔවුන්ට ඇති වගකීම තේරුම්ගෙන සිටියහ. (2 තිමෝති 4:5) සැබවින්ම, සියල්ලෝම විදේශ රටවල මිෂනාරිවරු වශයෙන් දේශනා නොකරති. එහෙත් ඔවුන් සිටින කොතැනකදී වුවත් ඔවුන්ට දේශනා කළ හැක—තවද එසේ කරති. මේ අයුරින් බලන කල, ඔවුහු සියල්ලෝම මිෂනාරිවරු වෙති.

විශේෂාකාරයේ පාසැලක්

වහා උපකාරය අත්‍යවශ්‍යව තිබෙන විදේශ රටවල මිෂනාරිවරුන් වශයෙන් සේවය කිරීමට පළපුරුදු දේවසේවකයන්ව පුහුණු කිරීම සඳහා වොච් ටවර් සමිතිය මගින් 1940 මුල් භාගයේදී පාසැලක් පිහිටුවනු ලැබීය. ඉකුත් වර්ෂ පුරා අධ්‍යයන පරිපාටිය අලුත් කර ඇති නමුත්, බයිබල් පාඩම්වල වැදගත්කම අවධාරණය කිරීමේ සහ වටිනා එවැන්ජලිස්ත වැඩය ඉටු කිරීමේ මූලික ඉලක්කයෙන් එය කිසිදා ඉවතට හැරී නැත.

අලුත් පාසැල සඳහා තෝරාගත් නම වනාහි ගිලියඩ් වූ අතර, එහි හෙබ්‍රෙව් අර්ථය වන්නේ “සාක්ෂිකරුවන් එක්රැස් කිරීම” යන්නය. යෙහෝවඃවහන්සේගේ ගෞරවය පිණිස සාක්ෂිකරුවන්ව එක්රැස් කිරීමට උපකාර කිරීම මගින්, අපගේ කාලයේදී සිදුවනු ඇතැයි යේසුස්වහන්සේ පුරෝකථනය කළ, ලෝක ව්‍යාප්ත දේශනා වැඩය කිරීමේදී ගිලියඩ් මහඟු කාර්යභාරයක් ඉටු කර තිබේ.—මතෙව් 24:14.

එවකට වොච් ටවර් සමිතියේ සභාපතිව සිටි නේදන් එච්. නෝර්, 1943හි ගිලියඩ් පාසැලේ පළමු පංතිය අමතමින් මෙසේ පැවසීය: “රාජ්‍ය පණිවිඩය දේශනා කරමින් රෝමානු අධිරාජ්‍යයේ සියලු කොටස්වල සංචාරය කළ ප්‍රේරිත පාවුල්, මාර්ක්, තිමෝති සහ වෙනත් අය කළ වැඩයට සමාන වැඩක් සඳහා ඔබලාව වඩාත් සූදානම් කර තිබේ. . . . ඔබේ ප්‍රධාන වැඩය වනාහි යේසුස්වහන්සේ සහ ප්‍රේරිතයන් කළාක් මෙන් ගෙයින් ගෙට රාජ්‍යයේ ශුභාරංචිය දේශනා කිරීමය.”

පළමු පංතියේ පුහුණුවීම අවසන් වූ පසු, එහි උපාධිය ලැබූවන්ව ලතින්-අමෙරිකානු රටවල් නවයකට යැවීය. එදා පටන් මේ දක්වා, ගිලියඩ් පාසැලේදී 110කටත් වැඩි රටවල් සංඛ්‍යාවකින් ශිෂ්‍යයන් 6,500කට වඩා පුහුණු කර ඇති අතර, 200කටත් වැඩි රටවල් සහ දූපත් කාණ්ඩවලට මිෂනාරිවරුන් වශයෙන් යවා තිබේ.

විවිධාකාර මිෂනාරිවරු

ක්‍රිස්තියානි ලෝකයේ අතීත මිෂනාරිවරුන්ගේ ක්‍රියාකාරකම ගැන මෙම ලිපි මාලාවේ පෙර ලිපිවල පැවසීය. ග්‍රීන්ලන්තයට යැවූ අය වැනි බොහෝදෙනෙක් බයිබලය හෝ එහි කොටස් ස්වභාෂාවලට පරිවර්තනය කළහ. එහෙත්, එවැනි මුල් මිෂනාරිවරුන්ට බොහෝවිට ජනතාවට බයිබලය උගන්වනවාට වඩා වැඩි වෙනත් කටයුතු තිබිණ.

උදාහරණයක් වශයෙන්, ජපානයට ගිය ක්‍රිස්තියානි ලෝකයේ මිෂනාරිවරු “අධ්‍යාපනික ආයතන සහ පාසැල්වල” හවුල්වී සිටියහයයි කොඩැන්ෂා එන්සයික්ලොපීඩියා ඔෆ් ජපෑන් සඳහන් කරයි. එය මෙසේ පවසයි: “මිෂනාරිවරුන් ගණනාවක් තම ශිෂ්‍යත්ව මගින් තමන්ව වෙන් කොට හඳුනාගෙන තිබේ.” ඔවුහු සාහිත්‍ය, භාෂාව, ඉතිහාසය, දර්ශනය, පෙරදිග ආසියානු ආගම් සහ ජපන් ජන-ඉතිහාසය වැනි විෂයන් උගන්වමින් භාෂාවේදීහු හෝ මහාචාර්යවරු බවට පත්වූහ. “පුණ්‍යාධාර සහ සමාජ සේවා සුභසාධන ආයතනද මිෂනාරි වැඩයෙහි වැදගත් කොටසකි” යයි එන්සයික්ලොපීඩියා තවදුරටත් පවසයි.

පොදුවේ ගත් කල මිෂනාරිවරුන් ශුභාරංචිය දේශනා කිරීමට මුල් තැන දී තිබුණේ නැත. බොහෝවිට ඔවුන් අවධාරණය කළේ, ආත්මික අවශ්‍යතාවන්ට වඩා ශාරීරික අවශ්‍යතා තෘප්තිමත් කිරීම වෙතය. පෞද්ගලික කටයුතු ලුහුබැඳ යෑම ඔවුන්ගේ මූලික පරමාර්ථය බවට පත්විය. මෙබැවින්, 1889දී ජපානයට යවනු ලැබූ එංගලන්ත සභාවේ මිෂනාරිවරයෙකු අදදින “ජපන් කඳුකරයේ පියා,” වශයෙන් ප්‍රසිද්ධියක් උසුලයි.

ක්‍රිස්තියානි ලෝකයේ අයගෙන් ගිලියඩ්-පුහුණු මිෂනාරිවරුන්, බොහෝ අයුරින් වෙනස් වේ. ජෙහෝවා’ස් විට්නසස්—ප්‍රොක්ලේමර්ස් ඔෆ් ගෝඩ්’ස් කිංඩම් යන පොතේ 23වන පරිච්ඡේදය මෙසේ නිරීක්ෂණය කරයි: “ගිලියඩ් පාසැලේ මිෂනාරි උපාධිධාරීහු ජනයාට බයිබලය උගන්වති. පල්ලි පිහිටුවමින් ජනයා ඒවා වෙත පැමිණෙතැයි අපේක්ෂා කරනවා වෙනුවට, ඔවුන් ගෙයින් ගෙට යන්නේ . . . , සේවය ලැබීමට නොව, නමුත් සේවය කිරීමටය.”

ප්‍රතිඵලය කුමක් වී ඇත්ද?

යුරෝපයේ ක්‍රිස්තියානි ගෝලයන් සෑදීමට ශතවර්ෂ ගණනාවක කාලයක් තිබීමෙන් පසු, ක්‍රිස්තියානි ලෝකයේ මිෂනාරිවරුන් සාර්ථක වී තිබෙන්නේ කෙතරම් දුරකටද? එ ග්ලෝබල් විව් ඔෆ් ක්‍රිස්ටියන් මිෂන්ස් යන පොත මෙසේ පිළිතුරු දෙයි: “යුරෝපයේ මිලියන 160ක ජනතාවක් කිසිම ආගමකට අයත් නොවන බවට තක්සේරු කර තිබේ. ක්‍රිස්තු ධර්මයට තවමත් පක්ෂපාතකම දක්වන අය අතරෙන් තම ආගම බරපතළ ලෙස සලකන්නේ ස්වල්පදෙනෙකි. . . . යුරෝපය ක්‍රිස්තියානි අර්ධද්වීපයක්යයි කල්පනා කළ නොහැක.”

ආසියාවේ තත්වය ගැන කුමක් කිව හැකිද? කොඩැන්ෂා එන්සයික්ලොපීඩියා ඔෆ් ජපෑන් මෙසේ පිළිතුරු දෙයි: “ජනයා තක්සේරු කරන අන්දමට ක්‍රිස්තු ධර්මය ගැන තවමත් සලකන්නේ, සාමාන්‍ය ජපන් ජනයා සඳහා සුදුසු නොවන . . . ‘විදේශ’ ආගමක් ලෙසය, . . . ජපන් සමාජයේ සීමාවන් තුළ ක්‍රිස්තියානි ව්‍යාපාරය පවතියි.” ඇත්තෙන්ම, ජපානයේ සියයට 4කටද, ඉන්දියාවේ සියයට 3කටද, පකිස්තානයේ සියයට 2කටද, එමෙන්ම චීනයේ සියයට 0.5කටද වඩා අඩු ජනතාවක් නාමික ක්‍රිස්තියානීහු වෙති.

අප්‍රිකාවේ, ක්‍රිස්තියානි ලෝකයේ මිෂනාරිවරුන්ගේ සේවයේ ශතවර්ෂ ගණනාවකට පසු, එහි තත්වය කුමක්ද? රෝමයෙහි ඉකුත් වසරේ වසන්ත සමයේ පැවැත්වූ අප්‍රිකානු බිෂොප්වරුන්ගේ රැස්වීමක් පිළිබඳව ෆෝකස් නමැති ජර්මන් සඟරාව මෙසේ වාර්තා කළේය: “අප්‍රිකානු ආගම් තවදුරටත් මිථ්‍යාදෘෂ්ටික නමස්කාරය වශයෙන් හෙළාදකින්නේ නැත. තවමත් ප්‍රකාශයට පත් නොවූ රජයේ ලියවිල්ලක් දක්වන්නේ ‘සම්ප්‍රදායී අප්‍රිකානු ආගම්’ වටිනා සහ අනර්ඝ මට්ටමකින් පවතින බවයි. ඔවුන්ගේ සාමාජිකයන්ව වැදගත් සේ සැලකීමට යෝග්‍යව තිබේ. ස්වභාවයෙන්ම මෝඩ භක්තියකට භාජන වීමක් ලෙස කලින් ප්‍රතික්ෂේප කළ ආගම් මගින්, ‘බොහෝවිට ඉතා භක්තිවන්ත කතෝලිකයන්ගේ ජීවන-රටාව පවා තීරණය වන බවට’ ධර්මාධිකාරී සභාව වටහාගත්තේය.”a

අමෙරිකාවල ක්‍රිස්තියානි ගෝලයන් සෑදීමට ශතවර්ෂ ගණනක් තිබීමෙන් පසු, ක්‍රිස්තියානි ලෝකයේ මිෂනාරිවරුන් සාර්ථක වී තිබෙන්නේ කෙතරම් දුරකටද? මිෂන් ටු ද වර්ල්ඩ් පොත මෙසේ පිළිතුරු දෙයි: “මෑත දශකවලදී මිෂනාරි සේවයෙහි මහත් දියුණුවක් තිබුණත්, ‘ලතින් අමෙරිකාව’ තවමත් ‘නොසලකා හරින ලද මහාද්වීපය’ යන නම ලැබීමට සුදුසුව සිටියි.” එක්සත් ජනපදය සම්බන්ධයෙන්, මෑත සමීක්ෂණ මගින් නිව්ස්වීක් සටහන් කරන්නේ, “අමෙරිකානු භූමි ප්‍රදේශය මත ආගම පැතිර ගියත්, ඒ ගැන බරපතළ ලෙස සිතන්නේ අතළොස්සක් පමණක්යයි පෙන්නුම් කරන බවයි. . . . විමසනු ලැබූවන්ට තමන් ඉරුදිනවල පල්ලියේ ගත කරන්නේයයි පවසා සිටින අයගෙන් අඩක් සැබෑව පවසන්නේ නැත. . . . වයස 18 සහ ඊට වැඩි අමෙරිකානුවන්ගෙන් තුනෙන් එකක් පමණ මුළුමනින්ම බාහිර භක්තියක් පිළිබිඹු කරති . . . තමන්ගේ ආගම විධිමත්ව පිළිපදින්නේ . . . සියයට 19ක් පමණි.”

කෙටියෙන් කියනවා නම්, දුප්පත්කම, දුර්වල සෞඛ්‍යය සහ අධ්‍යාපනයේ හිඟකම යන ගැටලු අඩු කිරීමට ක්‍රිස්තියානි ලෝකයේ මිෂනාරිවරු දරන වෑයමේදී, ඔවුහු කණ්ඩායමක් වශයෙන්, තාවකාලික මෙන්ම අඩ සහනයක් පමණක් ගෙනා මිනිස් ව්‍යාපාරවලට පක්ෂ වූහ. අනික් අතට, සැබෑ ක්‍රිස්තියානි මිෂනාරිවරු, සදාතනිකව හා මුළුමනින්ම සහනය ගෙනෙන, පිහිටුවා ඇති දේවරාජ්‍යය වෙත ජනයා යොමු කළහ. එය හුදෙක් ගැටලු අඩු කරනවා පමණක් නොව; එය ඒවා විසඳනු ඇත. එසේය, දෙවියන්වහන්සේගේ රාජ්‍යය මිනිස්වර්ගයාට පරිපූර්ණ සෞඛ්‍යය, අව්‍යාජ වාණිජ සුරක්ෂිතකම, සියලුදෙනා සඳහා ඵලදායී වැඩවල නිරත වීමේ නිම නොවන ප්‍රස්තා මෙන්ම කෙළවර නොවන ජීවිතයක් ගෙනෙනු ඇත!—ගීතාවලිය 37:9-11, 29; යෙසායා 33:24; 35:5, 6; 65:21-23; එළිදරව් 21:3, 4.

ක්‍රිස්තියානි ලෝකයේ මිෂනාරිවරුන්, තමන් ‘සියලු ජාතීන් ගෝලයන් කර, ඔවුන් බව්තීස්ම කර’ තිබෙන බව තහවුරු කිරීමක් වශයෙන්, ඉඳහිට ආගමික මෙහෙයන්ට සහභාගි වන නාමික ක්‍රිස්තියානීන්ව හුවා දැක්විය හැක. එහෙත් ‘යේසුස්වහන්සේ අණ කළ දේවල් පැවැත්වීමට’ මෙම බව්තීස්ම වූවන්ට ඉගැන්වීමට මෙම මිෂනාරිවරුන් අසමත් වී ඇති බව සාධක පෙන්වයි.—මතෙව් 28:19, 20.

කෙසේවුවද, සැබෑ ක්‍රිස්තියානීන්ගේ ඉගැන්වීමේ වැඩය දෙවියන්වහන්සේගේ නව ලොව දක්වා නොකඩවාම සිදුවනු ඇත. දෙවියන්වහන්සේගේ මාර්ග ගැන උපදෙස් අවශ්‍ය වනු ඇති, නැවත නැගිටින මිලියන සංඛ්‍යාත ජනයා වෙතටද එය ගෙන යනු ඇත.

[පාදසටහන්වල]

[18වන පිටුවේ කොටුව]

ඔවුන් ජනයාට උපකාර කර ඇති අයුරු

ගිලියඩ්-පුහුණු මිෂනාරිවරුන්ගේ උපකාරයෙන් ප්‍රයෝජන ලබා ඇති අය විසින් කෙරෙන විස්තර පහත දැක්වේ.

“ඔවුන්ගේ රටේ දේශගුණය, භාෂා, සිරිත් විරිත්, ආහාර සහ ආගම්වල වෙනස්කම්වලට හොඳින් මුහුණ දෙමින් සිටින ඔවුන්ගේ ස්ථිරත්වය ගැන මා පුදුම වෙනවා. එසේවුවත්, ඔවුන් තමන්ගේ පැවරුමෙහි, සමහරු මරණය දක්වාම රැඳී සිටියා. ඔවුන්ගේ හොඳ පාඩම් පුරුදු සහ දේවසේවයෙහි ජ්වලිතය, මා තුළ එවැනිම දේ වර්ධනය කරගැනීමට උපකාරවත් වුණා.”—ජේ. ඒ., ඉන්දියාව.

“මා සමඟ පාඩම් කළ මිෂනාරිවරයාගේ නියමිත වෙලාවට පැමිණීම ගැන මගේ සිතට කාවැදුණා. මගේ අගතිසහගත හැඟීම් සහ නූගත්කම සම්බන්ධයෙන් ඉවසීමෙන් ඔහු ආත්ම-දමනය විශිෂ්ට ලෙස පෙන්නුම් කළා.”—පී. ටී., තායිලන්තය.

“සාක්ෂිකාර මිෂනාරිවරුන් විසින් විදහාපෑ නිර්මලත්වය ගැන මගේ බිරිඳ සහ මා අගය කළා. පූර්ණ-කාලීන සේවය අපගේ ඉලක්කය කරගැනීමට ඔවුන්ගේ වැඩය අපට බලපෑමක් වූ අතර, අදදින අපම මිෂනාරිවරුන් වීමේ ප්‍රීතිය අපට තිබෙනවා.”—ඒ. සී., මොසැම්බික්

“මා ජීවත් වූයේ මා ගැන පමණක් තකමින්. මිෂනාරිවරුන් මුණගැසීමෙන් එය වෙනස් කිරීමට අවශ්‍ය වූ උනන්දුව මා තුළ ඇති කළා. ඔවුන් තුළ මා දුටුවේ බාහිර සතුටක් නොව නමුත් සැබෑ සතුටක් තිබෙන බවයි.”—ජේ. කේ., ජපානය.

“ක්‍රිස්තියානි ලෝකයේ මිෂනාරිවරුන් සැපපහසු ජීවිත ගත කළා. සේවකයෝ නිවස පිරිසිදු කළා, ඉවුම් පිහුම් කළා, ඇඳුම් සෝදා දුන්නා, වත්ත රැකබලාගත්තා, මෝටර් රථය පැදෙව්වා. ගිලියඩ් මිෂනාරිවරු දේවරාජ්‍යය ගැන ඉගෙනීමට රටවැසියන්ට උපකාර කරමින්ම තමන්ගේ ගෙදර දොරේ වැඩකටයුතු දක්ෂ ලෙස කරනවා දැකීමෙන් මා පුදුමයට පත්වුණා.”—එස්. ඩී., තායිලන්තය.

“උෂ්ණත්වය ෆැරන්හයිට් අංශක 115ටත් වඩා වැඩි වූ විට පවා, මිෂනාරි සහෝදරියන් ජනයා බැහැදැකීමට බයිසිකල් පැද්දා. ඔවුන්ගේ සංග්‍රහශීලිත්වය හා අපක්ෂපාතීකම, මෙන්ම ඔවුන්ගේ විඳදරාගැනීම, මට සැබෑව වටහාගැනීමට උපකාර කළා.”—වී. එච්., ඉන්දියාව.

“මිෂනාරිවරු අන් අයට වඩා තමන් උසස්යයි සිතුවේ නෑ. ඔවුන් යටහත් පහත්ව රටවැසියාට මෙන්ම දුගී ජීවන තත්වයන්ට හැඩගැසුණා. ඔවුන් පැමිණ තිබෙන්නේ සේවය කිරීමට නිසා, ඔවුන් කිසිදා පැමිණිලි නොකළ නමුත් සැමවිටම ප්‍රීතියෙන් හා සෑහීමට පත්ව සිටියා.”—සී. පී. තායිලන්තය.

“ඔවුන් බයිබලයේ සත්‍යය බාල කළේ නෑ. එහෙත්, රටවැසියන්ගේ සම්ප්‍රදායානුකූල සංස්කෘතියේ සියලු පැති වැරදි බව හෝ ඔවුන් බටහිර සිරිත් විරිත් පිළිපැදිය යුතු බව හෝ දැනීමට සැලසුවේ නෑ. ඔවුන් කිසිදා අන්‍යයන් පහත් හෝ නොසෑහෙන බව හැඟෙන්ට සැලසුවේ නෑ.”—ඒ. ඩී., පැපුවා නිව් ගිනියාව.

“ක්‍රිස්තියානි ලෝකයේ මිෂනාරිවරුන් මෙන් නොව, අපගේ බයිබල් පාඩම පැවැත්වුණු අතරේදී කොරියානු ක්‍රමයට කතිරයක් මෙන් පාද නමාගෙන බිම ඉඳගැනීමට ඇය කැමැත්තක් දැක්වූවා. ඈ අපගේ කොරියානු ආහාරවලට හුරුවීමට වෑයම් කළා. ඇය වෙත මා තුළ ඇති වූ ස්නේහය මට ප්‍රගතිශීලි වීමට ඉවහල් වුණා.”—එස්. කේ., කොරියාව.

“මා දස හැවිරිදි වියේදී දිවා කාලයේ පාසැලෙන් පිටත් වන්ට වුණා. සන්ධ්‍යා කාලවලදී මිෂනාරිවරයෙක් ඔහු සමඟ ක්ෂේත්‍ර සේවයේ යෑමට එන ලෙස මට ආරාධනා කළා. ඔහු මට බොහෝ බයිබල් ප්‍රතිපත්ති ඉගැන්වූ අතර, යෙහෝවඃවහන්සේගේ සංවිධානය වෙත සැබෑ අගයක් මා තුළ පැලපදියම් කළා.”—ආර්. ජී., කොලම්බියාව.

“පැමිණිලි කිරීමකින් තොරව කළ යුතු දේ කරමින් පැවරුම් තුළ රැඳී සිටීමට ඔවුන් මට ඉගැන්නුවා. අප වෙත මිෂනාරිවරුන් එවීම සඳහා, මගේ හද පත්ළෙන්ම මා යෙහෝවඃවහන්සේට හා යේසුස් ක්‍රිස්තුස්වහන්සේට තුති පිදුවා.”—කේ. එස්., ජපානය. g94 12/22

[17වන පිටුවේ පින්තූරය]

රටවල් 16ක ගිලියඩ්-පුහුණු මිෂනාරිවරු මෑත සමුළුවකදී අද්දැකීම් ඉදිරිපත් කළහ