සමස්ත ලෝක අස්වැන්න රැස් කිරීමට තවත් මිෂනාරිවරු
සැප්තැම්බර් මාසය ගොවීන් අස්වැන්න රැස් කරන මාසයකි, නමුත් වඩාත් වැදගත් අස්වැන්න රැස් කිරීමේ කටයුත්තක්, 1991 සැප්තැම්බර් 8වන දින, හඩ්සන් ගඟ හරහා පිහිටි න්‍යූ යෝක් නගරයෙන් විශාල සෙනඟක් ජර්සි නගරයේ යෙහෝවඃ වහන්සේගේ සාක්ෂිකරුවන්ගේ එක් රැස්වීම් ශාලාව වෙත රැස් කරවී ය. බයිබල් ස්කූල් ඔෆ් ගිලියඩ් හි 91වන කණ්ඩායම උපාධි ලබමින් සිටියහ. බෙතෙල් පවුලේ සාමාජිකයන් 4,263 දෙනෙක් හා ආරාධනා කරන ලද අමුත්තන් එහි සිටිය අතර, මීට අමතර ව තවත් 1,151 දෙනෙක් බෘක්ලින් මූලස්ථානයටත්, වෝල්කිල් හා පැටර්සන් හි ගොවිපොළවලටත් දුරකථනයෙන් සම්බන්ධ වී සිටියහ.
ගිලියඩ් පාසලේ සභාපති වන, වසර 98ක් පමණ වයසැති, ෆෙඩ්රික් ඩබ්. ෆ්‍රාන්ස්, සිතේ හැඟුම් දනවන එමෙන් ම අතිශයින් භක්තිමත් යාච්ඤාවකින් වැඩසටහන ආරම්භ කළේ ය. පාලක මණ්ඩලයේ සාමාජිකයෙක් මෙන් ම කලින් පාසලේ ලේකම් හා උපදේශක ව සිටි, ඇල්බර්ට් ඩී. ශ්රෝඩර් උපාධි පිරිනැමීමේ වැඩසටහනේ සභාපති ලෙස ක්‍රියා කළේ ය. ජාතීන් සොලවන්නා වූ මෙන් ම ඔවුන් තුළ මහත් අර්බුදකාරී තත්ත්වයක් පවතින්නා වූ මෙම කාලය පුරෝකථනය කරන ගීතාවලිය 2:1, 2 හා වෙනත් අනාවැකි එහි පැමිණ සිටි අයට හෙතෙම සිහිගැන්වී ය. මෙම අවුල් සහගත තත්ත්වය, අස්වැන්න රැස්කිරීමේ කටයුත්ත සඳහා අලුත් ක්ෂේත්‍ර බොහොමයක් විවෘත කිරීමට තුඩු දී ඇත.
දවසේ පළමුවන කථාව, බෙතෙල් කමිටුවේ සාමාජිකයෙක් වන ජෝජ් එම්. කොවුච් විසින් ඉදිරිපත් කරන ලදි. “ඔබගේ ආශීර්වාදයන් සැලකිල්ලට ගන්න” යන්න ඔහුගේ තේමාව විය. මෙම පුරුද්ද පටන් ගැනීමට එය කිසිවිටෙකත් කල්වේලා වැඩි නොවන බව හෙතෙම ගිලියඩ් ශිෂ්‍යයන්ට මතක් කර දුන්නේ ය. නිසැක ව ම එම ශිෂ්‍යයන් දැනටමත් ආශීර්වාද ලබා සිටිය ද, මෙම ආශීර්වාද ලැබ තිබුණේ මහත් සේ වෙහෙස මහන්සි වී වැඩ කිරීමෙන් පසු ව බව හෙතෙම පෙන්වා දුන්නේ ය. මේ හා සමාන ව, අවුරුදු 97ක් වයසැති යාකොබ්—ආශීර්වාදයක් ලබා ගනු පිණිස—රාත්‍රියක් පුරා දේව දූතයෙක් සමඟ පොරබැදී ය. (උත්පත්ති 32:24-32) නිෂේධාත්මක සිතැඟියාවන් ම දරනු වෙනුවට යාච්ඤාව හා අධිෂ්ඨානය තුළින් මනසේ සාමය වඩවා ගනිමින් අන්‍යයන්ට ආශීර්වාදයක් වන ලෙස සහෝදර කොවුච් ශිෂ්‍යයන්ගෙන් උදක් ම ඉල්ලා සිටියේ ය.
පාලක මණ්ඩලයේ ජෝන් ඊ. බාර් ඉන් අනතුරුව “ඔබ අතර ප්‍රේමය ඇති ව සිටින්න” යන තේමාව යටතේ කථා කළේ ය. යේසුස් වහන්සේගේ අනුගාමිකයෝ එකිනෙකා උදෙසා මිය යාමට කැමැත්තෙන් සිටියහ. “මෙයාකාර ප්‍රේමය ඔබගේ හෘදයන්හි උතුරුවමින් තිබෙන බව ඔබට හැඟේ ද?” යයි ඔහු ශිෂ්‍යයන්ගෙන් ඇසුවේ ය. ‘මෙවන් ප්‍රේමයක් නොමැති ව, අප කිසිත් නැත. එය තේරුම් ගැනීමට එතරම් ම සරල දෙයක්’ යයි ඔහු පැවසී ය. (1 කොරින්ති 13:3) සහෝදර බාර්, ප්‍රේමය පෙන්විය හැකි ප්‍රායෝගික ක්‍රම සමහරක් හුවා දැක්වී ය. කාරණා පැවසීමට නිතර උපායශීලී ක්‍රම සොයමින්, හවුල් මිෂනාරිවරුන් ගෞරවයෙන් සලකන ලෙස ඔහු ශිෂ්‍යයන්ට දිරිගැන්වී ය. පළමු පේතෘස් 4:8 උපුටා දක්වමින්, ‘පොඩි දේවල් අමතක කර දමන්න’ යයි ඔහු ඔවුන්ට අවවාද කළේ ය. මිෂනාරිවරුන් හට ආහාර පිසින්නට ඇති දිනයන්හි පවා, එම කටයුත්ත හුදු යාන්ත්‍රික ව කරන දේකට වඩා වැඩි යමක් ලෙස කල්පනා කිරීමෙන්, ඒවා ප්‍රේමය පෙන්වීමට අවස්ථාවන් වන බව ඔහු සඳහන් කළේ ය. “අප අපගේ සහෝදර සහෝදරියන්ට ප්‍රේමය පෙන්වීමට ණය ගැති ව සිටීමෙන් කිසිදා නොනවතින්නෙමු” යයි ඔහු ශිෂ්‍යයන්ට මතක් කර දුන්නේ ය.—රෝම 13:8.
“ඔබට කොතරම් ආත්ම විශ්වාසයක් තිබෙනවා ද?” යන්න සේවා අංශ කමිටුවේ ඩේවිඩ් ඒ. ඕල්සන්ගේ කථාවේ ගොඩනගන ලද සිත්ගන්නා තේමාව විය. ආත්ම විශ්වාසය ඇතුව සිටිය හැකි ක්ෂේත්‍රයන් දෙකක් ඔහු හුවා දැක්වී ය: මේ සඳහා අප හට අසංඛ්‍යාත හේතු ඇත්තා වූ, යෙහෝවඃ වහන්සේ හා උන් වහන්සේගේ සංවිධානය කෙරෙහි (හිතෝපදේශ 14:6; යෙරෙමියා 17:8); හා තමන් කෙරෙහි ය. දේව සේවකයන් වශයෙන් තමන්ගේ පසුතලය මෙන් ම යෙහෝවඃ වහන්සේ හා උන් වහන්සේගේ සංවිධානය තමන් කෙරෙහි තබා ඇති විශ්වාසය යනාදිය නිසා, යම් ප්‍රමාණයක ආත්ම විශ්වාසයක් ඇති ව සිටීමට මිෂනාරිවරුන් හට හේතු තිබේ. ප්‍රේරිත පාවුල් මේ හා සමාන හේතු උදෙසා එවන් ආත්ම විශ්වාසයක් පෙන්වී ය. (1 කොරින්ති 16:13; පිලිප්පි 4:13) කෙසේ නමුත්, “මම බොහෝ විට මා ව ම උපුටා දක්වමි. එය මාගේ සාකච්ඡාව රසවත් කරයි” යනුවෙන් සුප්‍රකට ලේඛකයෙකු විසින් පැවසූ බවට වාර්තා වී ඇති කියමනෙන් පෙනෙන්නා සේ, ලෝකය විසින් පොලඹවනු ලබන්නා වූ, තමන් ගැන ම ඕනෑවට වඩා විශ්වාසය තැබීම සම්බන්ධයෙන් සහෝදර ඕල්සන් අනතුරු ඇඟවූයේ ය. කෙසේ වෙතත්, යටහත් පහත් බවින් සමබර වූ ආත්ම විශ්වාසයට, අන් අය තුළ නිසැකකමක් ඇති කරවිය හැකි ය. පාවුල් සම්බන්ධයෙන් මෙය සැබෑ වූ බවට සහතික ය.—පිලිප්පි 1:12-14.
පාලක මණ්ඩලයේ ලයිමන් ඒ. ස්විංගල්, ඊළඟට ශිෂ්‍යයන්ට අනුශාසනා කළේ: “ගිලියඩ් උපාධිධාරී ඔබ, අස්වැන්න රැස් කළ යුතු ක්ෂේත්‍රයන්ට!” යනුවෙනි. උපාධිධාරීන් ගොසින්—1940 ගණන්වල පළමුවන, දෙවන, හා තෙවන පන්තිවලින් වූ—තවමත් මිෂනාරි සේවයේ යෙදී සිටින කලින් උපාධි ලත් දහස් සංඛ්‍යාවන් හා එක්වනු ඇති බැවින්, මෙය ගිලියඩ් පාසලටත්, ලෝක ව්‍යාප්ත සහෝදරත්වයටත් අස්වැන්න රැස් කරන දිනයක් යයි ඔහු පැවසී ය. පෙර ඒ කාලයේ මිෂනාරි වැඩකටයුතු තවත් වසර 50ක් ඉදිරියට සිදුවනු ඇතැයි, එසේත් නැතහොත් දේශනා කටයුත්තට එරෙහි ව තිබූ නාට්සි වාදය, පැසිස්ට් වාදය, මෙන් ම වෙනත් රාජ්‍ය තහංචි ක්‍රමයෙන් ඉවත්වනු ඇතැයි කවරෙක්වත් සිතුවේ නැතැයි සහෝදර ස්විංගල් ප්‍රකාශ කළේ ය. “යෙහෝවඃ වහන්සේ අතීතයේ කර ඇති දේවල් සම්බන්ධයෙන් අප ගරුබියෙන් මවිත වන්නේ නම්, අනාගතය ගැන කුමක් කිව හැකි ද?” යයි ඔහු ඇසී ය. “ක්ෂේත්‍රයට යන්න!” යන ප්‍රබෝධවත් කරවන කියමනෙන් හෙතෙම සිය කථාව අවසන් කළේ ය.
ගිලියඩ් පාසලේ මූලික උපදේශකයන් දෙදෙනා ඉන් අනතුරුව අවසාන වතාවට 91වන පන්තිය ඇමතූහ. ජැක් ඩී. රෙඩ්ෆඩ් “ප්‍රඥාව අත්කර ගන්න” යන තේමාවෙන් කථාවක් ඉදිරිපත් කළේ ය. ගිලියඩ් පාසල දැනගැන්ම හා අවබෝධය ඉගැන්වූව ද, ඔවුන් සිය දැනගැන්ම නිසි අයුරින් යොදා ගැනීමට ඇති හැකියාව වන, ප්‍රඥාව අත්කර ගත යුතු ය. සියල්ලක් ම ගිලියඩ් පාසලෙන් ඉගෙන ගත්තා ය යන තමන් තුළ ඇති මිථ්‍යාව ප්‍රතික්ෂේප කරන මෙන් ඔහු ශිෂ්‍යයන්ගෙන් උදක් ම ඉල්ලා සිටියේ ය. “ගණන් ගනු ලබන්නේ ඔබ පාසලෙන් පසු ව ඉගෙන ගන්නා දෙය ය.” ඔවුනට තවමත් ඉගෙන ගැනීමට තිබෙන දේවල් අතර: ජනයා සමඟ සාමකාමී ව කටයුතු කිරීම; කලත්‍රයෙකුට, සෙසු මිෂනාරිවරුන්ට, හා තම ප්‍රදේශයේ සහෝදර සහෝදරියන්ට “මට සමාවන්න” යයි කීමට හැකියාව ඇති ව සිටීම; සෑම ගැටලුවක ම මතුපිට ස්වරූපය එකහෙලා විශ්වාස කිරීමෙන් ප්‍රවේසම් වී, සෑම ගැටලුවක් ම සංකීර්ණ බව තේරුම් ගෙන, ඥානවන්ත උපදෙස් දීමට පෙර තත්ත්වයන් පිළිබඳ ගැඹුරු අවබෝධයක් අවශ්‍ය කරවන බව තේරුම් ගැනීම; දුෂ්කර තත්ත්වයන් යටතේ කටයුතු කරගෙන යාමට දේශීය සහෝදරයන්ට ඇති හැකියාව සම්බන්ධයෙන් ඔවුන්ට ගෞරව කිරීම යනාදියයි.—හිතෝපදේශ 15:28, 16:23; යාකොබ් 1:19.
ගිලියඩ් පාසලේ ලේකම් වන, යුලිසීස් වී. ග්ලාස්, පිලිප්පි 3:16 සිය කථාවේ තේමාව කර ගති. තමන් ලබා ඇති ප්‍රගතියට එම පන්තියට ප්‍රශංසා කළ ඔහු, එම ශුද්ධ ලියවිලි පදයට එකඟ ව තවදුරටත් එසේ ක්‍රියා කරන ලෙස අනුශාසනා කළේ ය. ශිෂ්‍යයන් තවදුරටත් ඒකාන්ත දැනගැන්ම අත්කර ගත යුතු වුව ද, ඔවුන් කවදාවත් සියල්ලක් ම දැන නොගනු ඇතැයි ඔහු සඳහන් කළේ ය. හෙතෙම සංඛ්‍යාංක [ඩිජිටල්] අත් ඔරලෝසුවකින් එම කරුණු විස්තර කොට දැක්වී ය. එය ඇත්තෙන් ම ක්‍රියා කරන ආකාරය එහි අයිතිකරු දැන නොසිටිය ද, එය ක්‍රියාත්මක කරවීමට ඔහු දැන සිටිය හැකි ය. මේ හා සමාන ව, මිෂනාරිවරුන්, තමන්ගේ අවබෝධයේ ගැඹුර සන්සන්දනය නොකොට, වැදගත් දෙය වූ, එනම් යෙහෝවඃ වහන්සේට භය විය යුතු ආකාරය දන්නා අය පහත් කර නොසැලකිය යුතු ය. (හිතෝපදේශ 1:7) ‘සරල ඇසක්’ තබා ගැනීමේ වැදගත්කම ඔහු පන්තියට මතක් කර දුන්නේ ය. (මතෙව් 6:22) ශාරීරික ඇස මෙන් ම ආත්මික ඇස ද අවහිර විය හැකි ය. නිදසුනක් වශයෙන්, ඇතමෙක් පටු අදහස් ඇති ව සුළු සුළු කාරණා ගැන ඕනෑවට වඩා වෙහෙසෙති, අනෙක් අතට, වෙනත් අය දකින්නේ මතු පිට ප්‍රශ්න පමණි, ඔවුන් විසින් අවධානය යොමු කළ යුතු ප්‍රධාන ප්‍රශ්න ඔවුන්ගෙන් ගිලිහී ගොසිනි.
පාලක මණ්ඩලයේ තියඩෝර් ජේරැස් විසින් දෙන ලද උදෑසන අවසාන කථාව “යෙහෝවඃ වහන්සේගේ සංවිධානය හඳුනා ගැනීම හා ඒ සමඟ ක්‍රියා කිරීම” යන තේමාවෙන් යුක්ත විය. ලෝකයේ සංවිධානයන් හා සමිති දහස් සංඛ්‍යාවක් ඇතිමුත්, මින් එකක් පමණක් ලෝකයෙන් හට නොගන්නා බව සහෝදර ජේරැස් පැවසී ය. යෙහෝවඃ වහන්සේ නියෝජනය කරන එක හඳුනා ගන්නේ කෙසේ ද? හඳුනා ගැනීමේ ලකුණු දේව වචනය සපයයි. උන් වහන්සේගේ ස්වර්ගික මැවිලි හොඳින් සංවිධානය වී සිටින බව බයිබලය පෙන්වා දෙයි. (ගීතාවලිය 103:20, 21; යෙසායා 40:26) යෙහෝවඃ වහන්සේගේ භූමික සංවිධානය, එහි ක්‍රමවත් භාවයෙන් මෙන් ම ලෝකයෙන් වෙන් ව සිටීමෙන්, බයිබල් ප්‍රතිපත්තිවලට එය තදින් ඇලී සිටීමෙන්, එහි ඉහළ පරිමාණයේ සදාචාරමය පවිත්‍රත්වයෙන්, හා එහි සාමාජිකයන් අතර පවත්නා ප්‍රේමයෙන් හඳුනා ගත හැකි ය. සිය පැවරුම්වල දී හැකි තරම් අයට ශුද්ධ ලියවිලිමය වශයෙන් යෙහෝවඃ වහන්සේගේ සංවිධානය හඳුනා ගැනීමට උපකාර කරන්නැයි සහෝදර ජේරැස් ගිලියඩ් ශිෂ්‍යයන්ගෙන් උදක් ම ඉල්ලා සිටියේ ය. ඒ සම්බන්ධයෙන් හෙතෙම, මෙවන් හද දනවන නිවේදනයක් නිකුත් කළේ ය: ගිලියඩ් පාසල ඉක්මනින්, 93වන පන්තිය වන විට ශිෂ්‍යයන් 50 දෙනෙක් පමණට දෙගුණ වන්නට යන්නේ ය! තව ද ජර්මනියේ ගිලියඩ් ව්‍යාප්තිකරණ පාසලේ පන්ති එම කාලයේ දී පමණ ආරම්භ වනු ඇත. එවිට නැඟුණු අත්පොළසන් හඬ බොහෝ වේලාවක් ගිගුම් දුණි.
උදෑසන උච්චාවස්ථාව වශයෙන්, ගිලියඩ් ශිෂ්‍යයන් 24 දෙනා ම ඩිප්ලෝමා ලදහ. ඉතා ඉක්මනින් ඔවුන් ලොව වටා විවිධ රටවල් 12කට සිය ගමන් අරඹනු ඇත. එම පන්තිය පාලක මණ්ඩලයටත් බෙතෙල් පවුලටත් ස්තුති කරමින්, හෘදයාංගම අධිෂ්ඨානයක් ඉදිරිපත් කළේ ය. දිවා ආහාරයෙන් පසු, වොච්ටවර් ගොවිපොළ කමිටුවේ සහෝදර චාල්ස් ජේ. රයිස් සංක්ෂිප්ත මුරටැඹ පාඩමක් මෙහෙයවී ය. අනතුරුව උපාධිධාරීහු න්‍යූ යෝක්, වෝල්කිල් හි සිය මාස පහේ ක්ෂේත්‍ර සේවය තුළ තමන් ලැබූ අත්දැකීම් සමහරක් ඇතුළත්, රසවත් වැඩසටහනක් පැවැත් වූහ. ඉන් පසු ව, එම ප්‍රදේශයේ සභාවන් කීපයක් නියෝජනය කරන ප්‍රචාරකයෝ යුත්ස් හූ රිමෙම්බර් දෙයා ක්‍රියේටර් නෞ (දැන් සිය මැවුම්කරුවාණන් සිහි කරන යෞවනයෝ) යන නාමයෙන් යුත් නාට්‍යයක් ඉදිරිපත් කළහ.
වැඩසටහන නිමා කිරීමට, පාලක මණ්ඩලයට අයත් අවුරුදු 95ක් වයසැති සහෝදර ජෝජ් ගැන්ජස්, ලාක්ෂණික ව පණ ගැන්වූ යාච්ඤාවක් යෙහෝවඃ වහන්සේට ඉදිරිපත් කළේ ය. සබයේ සිටි සෑම කෙනෙක් ම, සමස්ත ලෝක අස්වැන්න රැස්කිරීමේ කටයුත්තේ වැඩි කාර්ය භාරයක් ඉටු කිරීමට පෙලඹීමක් සහිත, ප්‍රමුදිත ස්වභාවයෙන් ඉවත් ව ගිය බවට කිසි ම සැකයක් නැත. w91 12/1
[22වන පිටුවේ කොටුව]
පන්තියේ සංඛ්‍යා ලේඛන
නියෝජනය කළ රටවල් සංඛ්‍යාව: 6
පත්කරන ලද රටවල් සංඛ්‍යාව: 12
ශිෂ්‍යයන් සංඛ්‍යාව: 24
විවාහ යුවළ සංඛ්‍යාව: 12
වයස සාමාන්‍යය: 33.4
සත්‍යය තුළ වර්ෂ සාමාන්‍යය: 16.13
පූර්ණ-කාලීන සේවයේ වර්ෂ සාමාන්‍යය: 11.3
[23වන පිටුවේ පින්තූරය]
වොච්ටවර් බයිබල් ස්කුල් ඔෆ් ගිලියඩ් හි 91වන උපාධිලාභී කණ්ඩායම
පහත ලැයිස්තුවේ පේළි ඉදිරියේ සිට පසු පසට අංකනය කර ඇති අතර, එක් එක් පේළිවල නම් වමේ සිට දකුණට ලැයිස්තු ගත කර ඇත.
(1) මැක්ඩවල්, ඒ.; යොංක්විස්ට්, එල්.; ස්කෝකන්, බී.; වාග්නියෙර්, එන්.; මිලර්, වයි.; මුනොස්, එම්. (2) බේල්ස්, එම්.; පෙරෙස්, ඩී.; ඇටික්, ඊ.; වයිනිකයිනෙන්, ඒ.; මොස්ට්බර්ග්, කේ. (3) ඩෙප්‍රීස්ට්, ඩී.; ඩෙප්‍රීස්ට් ටී.; පෙරෙස්, ආර්.; වාග්නියෙර්, ජේ.; මුනොස්, ජේ.; මිලර්, ජේ. (4) මැක්ඩවල්, එස්.; බේල්ස්, ඩී.; ස්කෝකන්, එම්.; ඇටික්, සී.; යොංක්විස්ට්, ඩබ්ලිව්.; වයිනිකයිනෙන්, ජේ.; මොස්ට්බර්ග්, එස්.