දිව්‍යාණ්ඩු පුස්තකාලයක් සංවිධානය කළ හැකි ආකාරය
තමන් “නත්තල් සීයාගේ” චිත්‍ර පාට කරන්නට යන බව සිය ගුරුවරිය එම පන්තියට දැනුම් දුන්විට බුද්ධිමත් ස්පාඤ්ඤ ජාතික කුඩා දැරියක් වන, ෂෙරෙසාඩෙගේ වයස අවුරුදු හතරක් විය. එකෙණෙහිම, ඉන් වැළකී සිටින්නට ෂෙරෙසාඩෙ අවසර ඉල්ලුවාය. හේතුව පැහැදිලි කරමින් ඇය කියා සිටියේ එසේ කිරීමට තමාගේ හෘදය සාක්ෂිය ඉඩ නොදෙන බවය.
මෙසේ විරුද්ධත්වය පළ කිරීම ගැන මවිතයට පත් එම ගුරුවරිය, එය බෝනික්කෙකුගේ චිත්‍රයක් පාට කිරීම හා සමාන දෙයක් බවත් එහි වැරැද්දක් නොමැති බවත් ඈට පැවසුවාය. මෙහිදී ෂෙරෙසාඩෙ පිළිතුරු දුන්නේ, “එය බෝනික්කෙක් පමණක් නම්, ඔබගේ අවසරය ඇතිව මම බෝනික්කෙක් අඳින්නත් කැමතියි” යනුවෙනි.
වෙනත් අවස්ථාවක ජාතික කොඩිය පාට කරන හැටියට පන්තියට කියනු ලැබීය. යළිත් වරක් ඇයට වෙනත් යමක් කළ හැකිදැයි ෂෙරෙසාඩෙ ඇසුවාය. හේතුව පැහැදිලි කරමින් ඈ, ෂද්‍රක්, මේෂක්, හා අබේද්-නෙගෝගේ කථාව ගුරුවරියට පැවසුවාය.—දානියෙල් 3:1-28.
ඉන් වැඩි වේලාවක් යන්නට පෙර ඇයගේ මවිතය පළ කරන්නට එම ගුරුවරිය ෂෙරෙසාඩෙගේ මවව දුරකථනයෙන් ඇමතුවාය. “ඔබගේ දියණිය අවස්ථා කීපයක තමාගේ හෘදය සාක්ෂිය ගැන මට කථා කර තිබෙනවා” යයි ඈ කීවාය. “ඔබට එය සිතා ගත හැකිද? ඇයගේ වයසේ දැරියක් තමාගේ හෘදය සාක්ෂිය ඇයට වදදෙන හේතුව මට පැහැදිලි කිරීම! මේ බලන්න, ඔබ ඇයට උගන්වන දෙයත් සමඟ මා එකඟ වෙන්නේ නැහැ. එහෙත් ඔබ සාර්ථක වෙන බව මට සහතික විය හැකියි. ඒ වගේම මා ඔබගේ දියණියව ප්‍රශංසා කර ගෞරව කරන බව මා ඔබට දන්වන්න කැමතියි.”
අවුරුදු හතරක් වයසැති දැරියකට බයිබලය අනුව පුහුණු කරන ලද හෘදය සාක්ෂියක් අත්කර ගත හැක්කේ කෙසේද? ෂෙරෙසාඩෙට සිය නිදන කාමරයේ තමාගේම දිව්‍යාණ්ඩු පුස්තකාලය ඇති බව ඇයගේ මව වන, මාරිනා පැහැදිලි කරන්නීය. ඇය විසින් යටින් ඉරි ගසන ලද මුරටැඹ සඟරාවේ සිය පෞද්ගලික පිටපත්, දේශනා කිරීම සඳහා ඇයගේ පොත්පත්, මෙන්ම ඇයගේ උපතේ පටන් වොච්ටවර් සමිතිය විසින් මුදා හරින ලද සියලුම ප්‍රකාශන එම පුස්තකාලයට අයත් වේ. සිය පුස්තකාලයේ ඇයගේ වඩාත්ම සිත්ගත් දෙය මගේ බයිබල් කථාන්තර පොත නම් ග්‍රන්ථයේ ශ්‍රව්‍ය ටේප් පටය වන අතර, සෑම රාත්‍රියකම ඇයගේ මුද්‍රිත පිටපතෙන් එය කියවන අතර ඈ එම ටේප් පටයට සවන් දෙන්නීය. ඉහත සඳහන් කරන ලද තීරණ ගැනීමට ඇයට හැකියාව ලබා දී ඇත්තේ මෙම බයිබල් වාර්තාවන්ය.
හොඳින් සංවිධානය කරන ලද දිව්‍යාණ්ඩු පුස්තකාලයක් ඔබටත් ඔබගේ දරුවන්ටත් උපකාර කළ හැකිද? නිවාස පුස්තකාලයක් අවශ්‍ය වන්නේ මක්නිසාද?
“පුස්තකාලයක් කියන්නේ සුඛෝපභෝගි දෙයක් නොවේ”
“පුස්තකාලයක් කියන්නේ සුඛෝපභෝගි දෙයක් නොව එහෙත් ජීවිතයේ අත්‍යවශ්‍ය අංගවලින් එකක්” යයි හෙන්රි වෝර්ඩ් බීචර් පැවසුවේය. නිසැකවම, අප සියල්ලන්ටම වාගේ මෙම “ජීවිතයේ අත්‍යවශ්‍ය අංගවලින්” එකක් නොදැනුවත්ව වුවද තිබේ. එසේ වන්නේ මන්ද? ඊට හේතුව බයිබලය හැර අන් කිසිවක් අපට අප සතුව නොතිබෙන විට පවා, පුස්තකාලයක් යයි හැඳින්විය හැකි යමක් අප සතුව තිබීමය.
බයිබලය සැබවින්ම අතිවිශිෂ්ට දිව්‍යාණ්ඩු පුස්තකාලයකි. අප බයිබලය යනුවෙන් හඳුන්වන දේවානුභාවය ලත් පොත් සියල්ලේ එකතුව විස්තර කිරීමට, හතරවන සියවසේදී, ජෙරෝම්, බිබ්ලිඕටෙකා ඩිවිනා (දිව්‍ය පුස්තකාලය) යන ලතින් යෙදුම ප්‍රබන්ධ කළේය. යෙහෝවඃවහන්සේ මෙම ශුද්ධ පුස්තකාලය අපට සැපයුවේ, අපට ප්‍රායෝගික උපකාරය, උපදෙස්, හා මඟ පෙන්වීම ලබා දීමටය. එය නොවැදගත් ලෙස අප කිසිවිටකත් සැලකිය යුතු යමක් නොවේ. මුළු බයිබලයම අපට තිබීම අදහස් කරන්නේ අතීතයේ දේව සේවකයන් බොහොමයකට තිබුණාට වඩා පුළුල් පුස්තකාලයක් අපට ඇති බවය.
බයිබලය මිල අධික, අතින් ලියූ අත්පිටපත් තත්ත්වයෙන් පමණක් ලබා ගත හැකිව තිබූ අවදියේ, සම්පූර්ණ බයිබලයක් පෞද්ගලික නිවසක තබා ගැනීමට හැකියාව තිබුණේ නම්, එසේ හැකියාව තිබුණේ, කීපදෙනෙකුට පමණි. රෝමයේ තමාගේ අවසාන සිරගත කිරීම තුළ පාවුල්ට ශුද්ධ ලියවිල්ල ඉගෙන ගැනීමට ඕනෑ වූ විට, සුළු ආසියාවෙන් ඇකුළුම් පොත්—ඇතැම්විට හෙබ්‍රෙව් ශුද්ධ ලියවිලිවල කොටස්—කීපයක් ගෙනෙන හැටියට ඔහුට තිමෝතිගෙන් ඉල්ලා සිටීමට සිදුවිය. (2 තිමෝති 4:13) කෙසේ වෙතත්, සිනගෝගවල ඇකුළුම් පොත් බොහොමයක් තිබූ අතර, යේසුස් ක්‍රිස්තුස්වහන්සේ හා පාවුල් යන දෙදෙනාම තමන්ගේ දේශනා ක්‍රියාවලිය තුළ මෙම පුස්තකාලයන් ප්‍රයෝජනයට ගත්හ. (ලූක් 4:15-17; ක්‍රියා 17:1-3) පළමු ශතවර්ෂයේ තිබූ තත්ත්වයට වඩා දැන් ශුද්ධ ලියවිලි වඩාත් පහසුවෙන් ලබාගත හැකි තත්ත්වයක් තිබීම සතුටට කරුණකි.
මුද්‍රණාල බිහිවීමේ විපාකයක් වශයෙන්, අදදින දේව සේවකයන් සියල්ලන්ටම වාගේ—තමන්ගේ භාෂාව කුමක් වෙතත්—සාධාරණ මිලකට සම්පූර්ණ බයිබලයම ලබා ගත හැකිය. මෙම පරිශුද්ධ “පුස්තකාලය” සඳහා අනුපූරක සැපයීමේ අද්විතීය ප්‍රස්තාවද අපට ඇත. දැනට ශතවර්ෂයකට වැඩි කාලයක් පුරා, “විශ්වාසවූ නුවණ ඇති දාසයා” නියම වේලාවට ආත්මික ආහාර සැපයීමෙහි කඩිසරව යෙදී සිට ඇත.—මතෙව් 24:45-47.
එහෙත් අප පෞද්ගලිකව දිව්‍යාණ්ඩු පුස්තකාලයක් සංවිධානය නොකරන්නේ නම්, මෙම අමිල තොරතුරුවලින් අප සම්පූර්ණ ප්‍රයෝජනය ගන්නේ යයි කිව නොහැක. එය කළ හැක්කේ කෙසේද? ඇත්ත වශයෙන්ම, පළමු පියවර වනුයේ, එවන් පුස්තකාලයකට අවශ්‍ය කරවන පොත් ලබා ගැනීමය. ඒ සඳහා දරන වෑයම වටියි, මන්දයත් ගැටලු සමඟ කටයුතු කරන්නටත් බයිබල් ප්‍රශ්නවලට පිළිතුරු දෙන්නටත් අපට අවශ්‍ය කරවන නිශ්චිත තොරතුරු ක්ෂණිකව ලබා ගැනීමට එය අපට හැකියාවක් ලබා දෙන නිසාය.
මට අවශ්‍ය කරවන්නේ කුමන පොත්ද?
ඔබගේ විවාහය තුළ අදහස් හුවමාරුවේ ගැටලුවක් ඔබට විසඳිය හැකි ආකාරය හෝ මත්ද්‍රව්‍යවලට එපා කියා පැවසීමට ඔබගේ දරුවාට උපකාර කළ හැකි ආකාරය ඔබ කවදා නමුත් කල්පනා කර තිබෙනවාද? විෂාදයෙන් හෙවත් කලකිරීමෙන් පෙළෙන මිත්‍රයෙකුහට ඔබට උපකාර කළ හැක්කේ කෙසේද? දෙවියන්වහන්සේ පවතින බවට අපට තිබෙන සාක්ෂි හා උන්වහන්සේ දුෂ්ටකමට අවසර දීමට හේතුව ඔබට පැහැදිලිව පහදා දිය හැකිද? එළිදරව් 17වන පරිච්ඡේදයේ රතුපාට මෘගයා නියෝජනය කරන්නේ කුමක්ද?
ඔබට ප්‍රමාණවත් දිව්‍යාණ්ඩු පුස්තකාලයක් ඇත්තේ නම්, මේවාත් වෙනත් අසංඛ්‍යාත ප්‍රශ්නවලටත් පිළිතුරු දිය හැකිය. වොච්ටවර් සමිතිය ශුද්ධ ලියවිලිමය විෂයන් විශාල සංඛ්‍යාවක් පියවන්නාවූ පොත්, විවරණිකා, හා සඟරා ලිපි ප්‍රකාශයට පත් කර ඇත. ඇරත්, මෙම ප්‍රකාශන පවුලේ කටයුතු සාකච්ඡා කරමින්ද, දෙවියන්වහන්සේ හා බයිබලය කෙරෙහි ඇදහිල්ල වඩවමින්ද, අපගේ දේශනා කුසලතා වැඩිදියුණු කිරීමට අපට හැකියාව ලබා දෙන අතර බයිබල් අනාවැකි තේරුම් ගැනීමට අපට උපකාර කරන්නේය.
පසුගිය වසර 20 ඇතුළත සමිතියෙන් මුද්‍රණය කරන ලද ප්‍රකාශනවලින් බොහොමයක් තවදුරටත් ලබා ගත හැක. ඔබ මෑතක සත්‍යයට පැමිණි කෙනෙක් නම්, ඔබගේ භාෂාවෙන් ලබා ගත හැකි එවන් සියලු ප්‍රකාශන ලබා ගැනීම ඔබට ප්‍රයෝජනවත් වනු ඇත. ගතවූ වර්ෂවල මුරටැඹ සඟරාවේ බැඳි වෙළුම් ඔබගේ භාෂාවෙන් ලබා ගැනීමට හැකියාවක් තිබෙන්නට පුළුවන. ඉන්සයිට් ඔන් ද ස්ක්‍රිප්චර්ස් හා කොම්ප්‍රිහෙන්සිව් කොන්කෝඩන්ස් වැනි විශිෂ්ට ආශ්‍රේය ග්‍රන්ථ, විවිධ භාෂාවන්ගෙන් ප්‍රකාශයට පත් කර ඇත. කෙසේ වෙතත්, මෙම පොත් ලබා ගැනීම, පළමු පියවර පමණකි.
ඔබගේ පුස්තකාලය සංවිධානය කර ගන්න!
ඔබට යම් තැනක පොත තිබෙන බව දැනගැනීම එක් දෙයකි, එහෙත් ඔබට ඕනෑ කරන පොත සොයා ගැනීම තවත් දෙයකි. ඔබට අවශ්‍ය කරවන යොමු කෘතිය සෙවීමෙහිලා ඔබට සෑහෙන කාලයක් නාස්ති කරන්නට සිදුවේ නම්, බොහෝ දුරට එම විෂය ගැන අපගේ උනන්දුව හීන වන්නට පුළුවන. අනෙක් අතට, අපගේ පොත්, පහසු තැනක, අප පිළිවෙළකට අසුරා ඇත්තේ නම්, පෞද්ගලික පර්යේෂණ කිරීමට අප වැඩියෙන් නැඹුරු වෙනවා ඇත.
හැකියාවක් ඇතොත්, දිව්‍යාණ්ඩු පොත් තොගය එක් තැනක තැබීම උපකාරවත් වනු ඇත. සාදා නිම කළ පොත් රාක්ක මිලදී ගැනීමට අපට වත්කමක් නැතත්, බොහෝ විට අඩු මුදලකට, පොත් රාක්ක සාදා ගත හැකි අතර එය ප්‍රමාණයෙන් විශාලවීමද අවශ්‍ය නොවේ. පුස්තකාලයට පහසුවෙන් යා හැකිවීමද වැදගත්ය. අට්ටාලවල අසුරනු ලබන පොත් එතරම් ප්‍රයෝජනවත් නොවන අතර දූලි එකතු කරයි.
ඊළඟ පියවර විය යුත්තේ පොත් සංවිධානය කිරීමය. යම් සාධාරණ ආකාරයකට පොත් අසුරන්නට වැය කරන කෙටි කාලයක් විපාක ගෙනදෙයි.
ඔබගේ පවුලේ වැඩිදෙනෙක් යෙහෝවඃවහන්සේගේ සාක්ෂිකරුවන් නොවන්නේ නම් කුමක් කිව හැකිද? ඔබ කැමති ආකාරයකට පුස්තකාලයක් සකස් කරන්නට ඔබට හැකියාවක් නොතිබිය හැකි වුවත්, අඩුතරමින් ශුද්ධ ලියවිලිමය ප්‍රකාශන කීපයක්වත් ඇති පොත් රාක්කයක් ඔබගේ කාමරයේ ඔබට තබා ගන්නට පුළුවන.
දිව්‍යාණ්ඩු පුස්තකාලයක් ආත්මිකත්වය වැඩිදියුණු කිරීමට උපකාරවත් විය හැක
අපගේ පොත් අසුරා ගැනීමෙන් අනතුරුව, එහි තොරතුරු සොයා ගැනීමට අපට ක්‍රමයක් තිබිය යුතුය. අපගේ මතකය සදොස් තත්ත්වයක පවතින අතර අපගේ දිව්‍යාණ්ඩු පුස්තකාලයේ සෑම පොතකම අඩංගු දෑ අප පෞද්ගලිකව නොදන්නවා වන්නට පුළුවන. එහෙත්, පුස්තකාලයේ සියලුම තොරතුරු වෙත පිවිසීමට මඟක් ඇත. අපගේ භාෂාවෙන් ප්‍රකාශයට පත් කර ඇත්තේ නම්, වොච් ටවර් පබ්ලිකේෂන්ස් ඉන්ඩෙක්ස් නමැති ග්‍රන්ථය කෙටි කාලයක් තුළ බොහෝ දුරට ඕනෑම විෂයක් සම්බන්ධයෙන් නිශ්චිත තොරතුරු සොයා ගැනීමට අපට හැකියාව ලබා දිය හැකිය.
සිය බාලම පුත්‍රයාට පෞද්ගලික පාඩම කිරීමට ඉගැන්වීමෙහිලා ඉන්ඩෙක්ස් පොත අමිල උපකාරයක් බැව්, විශේෂ පුරෝගාමියෙක් හා වැඩිමහල්ලෙක් හැටියට වසර ගණනාවක් සේවය කර ඇති චූල්යාන් පැහැදිලි කරයි. “අවුරුදු හතක් වයසැති, චයිරෝ, නුදුරු දිනක පාසැලෙන් ගෙදර පැමිණ, ‘තාත්තේ, ඩයිනොසෞරියන් ගැන සමිතිය පවසා ඇත්තේ කුමක්ද?’ කියා මගෙන් ඇසුවා. අප කෙළින්ම ඉන්ඩෙක්ස් පොත ගෙන ‘ඩයිනොසෝර්’ යන වචනය සෙව්වා. එවිට එම විෂය ගැන ලියවුණු පිබිදෙව්! මුල් ලිපි මාලාවක් තිබෙන බව අපට සොයාගන්නට පුළුවන් වුණා. [1990, පෙබරවාරි 8] ඒ දවසේම, චයිරෝ එය කියෙව්වා. අපගේ දිව්‍යාණ්ඩු පුස්තකාලයේ බොහෝ දුරට සෑම විෂයක් සම්බන්ධයෙන්ම ප්‍රයෝජනවත් තොරතුරු තිබෙන බව දැනටමත් ඔහු දන්නවා. පෞද්ගලිකව, මා විශ්වාස කරන්නේ අපගේ දරුවන් දිව්‍යාණ්ඩු පුස්තකාලයෙන් හොඳ ප්‍රයෝජන ගන්නට ඉගෙන ගන්නා විට, එය ආත්මිකව වැඩිදියුණු වීමට ඔවුන්ට උපකාර කරන බවයි. ඔවුන් හේතු විමසා නිගමනයන්ට එළඹීමට ඉගෙන ගන්නා අතර, ඊටත් වැඩියෙන්, පෞද්ගලික පාඩම ප්‍රීතිමත් දෙයක් විය හැකි බව ඔවුන් සොයා ගන්නවා ඇත.”
දිව්‍යාණ්ඩු පුස්තකාලයක් පාවිච්චි කිරීමට දරුවන් පුහුණු කිරීම බාල කාලයේ පටන්ම ඇරඹිය හැකි බව, මුලදී සඳහන් කළ ෂෙරෙසාඩෙගේ පියා වන, ෆවුස්ටෝ, විශ්වාස කරයි. “ඉන්ඩෙක්ස් පොත පාවිච්චි කරන ආකාරය, දැන් අවුරුදු හයක් වයස්ව සිටින ෂෙරෙසාඩෙට අප පෙන්වා දෙනවා” යයි ඔහු පැහැදිලි කරයි. “භූමික පාරාදීසයක අපේක්ෂාවෙන් ඇය ප්‍රීතියට පත්ව සිටින නිසා, ඉන්ඩෙක්ස් පොතේ ‘පාරාදීසය’ යන වචනය පෙන්වීමෙන් හා එහි දක්වා ඇති මුරටැඹ ලිපි සොයා කියවීමෙන් අපි එය පටන් ගත්තා. සාමාන්‍යයෙන් අපි ඇයට එහි තිබෙන පින්තූර පෙන්වනවා. කෙසේ වෙතත්, ඇය මෙයාකාරයෙන් දැන ගත්තේ අපගේ නිවාස පුස්තකාලයේ තොරතුරු සොයා ගැනීමට මඟ ඉන්ඩෙක්ස් පොත බවයි. ඇය එම මූලික කරුණ වටහා ගෙන තිබූ බව අප දැනගත්තේ, දිනක් ඇය පාස්කුව උත්සවාකාරයෙන් පැවැත්වීම පිළිබඳ ප්‍රශ්න සමඟින් නිවසට පැමිණි විටයි. ‘ඉන්ඩෙක්ස් පොතේ ඒ ගැන යමක් තිබෙනවාද කියා අපි බලමුද?’ යනුවෙන් ඈ සිය මවගෙන් ඇසුවාය.”
අපගේ වයස කුමක් වුවත්, බයිබලය අපට දිරිගන්වන්නේ “සියල්ල සෝදිසිකර බලා, යහපත් දේ තදින් අල්ලාගනිල්ලා” යනුවෙනි. (1 තෙසලෝනික 5:21) මින් ඉල්ලා සිටින්නේ ශුද්ධ ලියවිලි පවසන දෙය අප සෝදිසි කර බැලීමයි. (ක්‍රියා 17:11) හොඳින් සංවිධානය කළ දිව්‍යාණ්ඩු පුස්තකාලයක් අපට තිබෙනවා නම්, මෙවන් පරීක්ෂණයන් ප්‍රීතියක් වන්නට පුළුවන. කථාවක් සූදානම් වීමට, යම් ගැටලුවක් සමඟ ක්‍රියා කිරීමේදී ප්‍රායෝගික උපදෙස් සෙවීමට, නැතහොත් සිත්ගන්නා තොරතුරු සෙවීමට අප අපගේ පුස්තකාලය පාවිච්චි කරන සෑම වතාවකම, අපගේ පුස්තකාලයේ ප්‍රායෝගික වටිනාකම පිළිබඳ තහවුරුවක් එය අපට ලබා දෙනවා ඇත.
ෂෙරෙසාඩෙගේ මව්පියෝ පැහැදිලිව මෙසේ පවසති: “ක්‍රිස්තියානි නිවසක, දිව්‍යාණ්ඩු පුස්තකාලයක් නිශ්චිත වශයෙන්ම සුඛෝපභෝගී යමක් නොවේ!”
[30වන පිටුවේ කොටුව]
ඔබගේ පොත් ඔබට අසුරා ගත හැක්කේ කෙසේද?
ඔබගේ පොත් සකස් කළ යුතු ආකාරය පිළිබඳ දැඩි නීති කිසිත් නැත. එහෙත්, පහත දැක්වෙන තර්කානුකූල බෙදීම් පැහැදිලි කරන්නේ, ඔබගේ පොත්වල අඩංගු දෑ අනුව ඔබට ඒවා සකස් කළ හැකි එක් ආකාරයකි.
1. බයිබලයේ ඇතැම් කොටස්වල වගන්තියෙන් වගන්තියට විස්තර කිරීමක් අඩංගු පොත්
(උදාහරණ: ද ග්‍රේටස්ට් මෑන් හූ එවර් ලිව්ඩ්, එළිදරව්ව එහි උදාර උච්චාවස්ථාව අත ළඟය!, “ද නේෂන්ස් ෂැල් නෝ දැට් අයි ඇම් ජෙහෝවා”—හව්?, “යෝර් විල් බී ඩන් ඔන් ඒර්ත්”)
2. පවුල් ජීවිතයට සම්බන්ධ පොත්
(උදාහරණ: ඔබගේ පවුල් ජීවිතය සන්තෝෂවත් කරගැනීම, යෞවනයන් අසන ප්‍රශ්න—ක්‍රියාවට නැගිය හැකි පිළිතුරු, මගේ බයිබල් කතන්දර පොත)
3. බයිබල් හා ආශ්‍රේය ග්‍රන්ථ
(උදාහරණ: නිව් වර්ල්ඩ් ට්‍රාන්ස්ලේෂන් ඔෆ් ද හෝලි ස්ක්‍රිප්චර්ස්—විත් රිෆරන්සස්, වෙනත් බයිබල්, වොච්ටවර් පබ්ලිකේෂන්ස් ඉන්ඩෙක්සස්, කොම්ප්‍රිහෙන්සිව් කොන්කෝඩන්ස්, ඉන්සයිට් ඔන් ද ස්ක්‍රිප්චර්ස්, ද කිංඩම් ඉන්ටර්ලීනියර් ට්‍රාන්ස්ලේෂන් ඔෆ් ද ග්‍රීක් ස්ක්‍රිප්චර්ස්, හොඳ ශබ්දකෝෂයක්)
4. දැන් සභා පොත් පාඩමෙහි හා දිව්‍යාණ්ඩු සේවා පාසැලේ පාවිච්චි කරනු ලබන පොත්
5. ශ්‍රව්‍ය කැසට්පට හා වීඩියෝ පට
6. මුරටැඹ හා පිබිදෙව්! බැඳි වෙළුම්
7. යෙහෝවඃවහන්සේගේ සාක්ෂිකරුවන්ගේ ඉතිහාසය
(උදාහරණ: යියර් බුක් ඔෆ් ජෙහෝවා’ස් විට්නසස්, ජෙහෝවා’ස් විට්නසස්—ප්‍රොක්ලෙයිමර්ස් ඔෆ් ගෝඩ්’ස් කිංඩම්)
8. අපගේ දේව සේවයේ අප නිතිපතා පාවිච්චි කරන පොත් හා විවරණිකා
(උදාහරණ: පාරාදීස පොළොවක සදාකල් ජීවත්වන්ට ඔබට හැක, රීසනිං ෆ්‍රොම් ද ස්ක්‍රිප්චර්ස්, ලයිෆ්—හෞ ඩිඩ් ඉට් ගෙට් හියර්? බයි එවලූෂන් ඕර් බයි ක්‍රිඒෂන්? මෑන්කයින්ඩ්ස් සර්ච් ෆෝර් ගෝඩ්, එකම සැබෑ දෙවියන්වහන්සේ නමස්කාරයෙහි එක්සත්වීම)
[31වන පිටුවේ පින්තූරය]
ෂෙරෙසාඩෙ දැනටමත් හොඳ බයිබල් ශිෂ්‍යාවක්ව සිටින්නීය
[31වන පිටුවේ පින්තූරය]
ළාබාලව සිටියද, මෙම පිරිමි දරුවා දිව්‍යාණ්ඩු පුස්තකාලයක් පාවිච්චි කරයි