විශ්‍රාම ගැනීම දිව්‍යාණ්ඩු ක්‍රියාකාරකම්වලට මඟ පාදන දොරටුවක්ද?
විශ්‍රාම ගැනීම—එය බොහෝදෙනෙකුට අධික වෙහෙසේ මෙන්ම කුපිත වීමේ දීර්ඝ කාලපරිච්ඡේදයක අවසානය වේ. වෙහෙසකර හෝ කලබලකාරි ක්‍රියා පිළිවෙළකට සිර වී සිටීමෙන් පසු, විශ්‍රාම ගැනීම, වසර ගණනාවකට පහසු ගැනීම හා පෞද්ගලික නිදහස ලබාගැනීම සඳහා විවර වන දොරටුවක් වනු ඇතැයි බොහෝදෙනෙක් බලාපොරොත්තු වෙති. කෙසේවෙතත්, එම දොරටුව බොහෝවිට නීරසභාවයට හා උදාසීනකමට මඟ පාදයි. විනෝදය සහ විනෝදාංශ තුළින්, වැඩ කිරීමෙන් ලබන තෘප්තිය සැපයෙන්නේ නැත.
යෙහෝවඃවහන්සේගේ සාක්ෂිකරුවන් සඳහා, විශ්‍රාම ගැනීම “ක්‍රියාකාරකම්වලට මඟ පාදන මහත් දොරක්” විවර කළ හැකිය. (1 කොරින්ති 16:9, NW) වයසට යෑමේදී, ගැටලු හා සීමාවන් ඇති වන නමුත්, ඇතැම් වයස්ගත අයට යෙහෝවඃවහන්සේගේ උපකාරයෙන් තම සේවය පුළුල් කරගැනීමට හැකි වී තිබෙන බව පෙනීගොස් ඇත. නෙදර්ලන්තයේ ඇතැම් වයස්ගත ක්‍රිස්තියානීන්ගේ අද්දැකීම් සලකා බලන්න. එක්දහස් නවසිය අනූපහ සේවා වර්ෂය තුළ, සේවය කළ පුරෝගාමීන් (පූර්ණ-කාලීන රාජ්‍ය ප්‍රචාරකයන්) 1,223ට වඩා වැඩි දෙනාගෙන් 269දෙනෙක්, වයස 50ක් හෝ එය ඉක්මවූ අය වූහ. මොවුන්ගෙන් 81දෙනෙක් වයස අවුරුදු 65ක් හෝ ඊට වඩා වැඩි අය වූහ.
ලෞකික රැකියාවක නිරතව සිටි කාලයේදී, ගොඩනඟාගත් කාර්ය බහුලත්වය දිගටම පැවැත්වීමෙන්, ඇතැම් අයට පුරෝගාමී සේවයේ නියැලීමට හැකි වී තිබේ. (පිලිප්පි 3:16, සසඳන්න.) කරල් නම් විශ්‍රාම ලත් ක්‍රිස්තියානියෙක් මෙසේ සිහිපත් කරයි: “ලෞකික රැකියාවක නිරතව සිටි විට, මා සාමාන්‍යයෙන් උදේ 7.30ට වැඩ ආරම්භ කරනවා. මා විශ්‍රාම ගත්තායින් පසු, එම ක්‍රියා පිළිවෙළම පවත්වාගැනීමට තීරණය කළා. මම හැම උදයකම හතට, දුම්රියපොළ ඉදිරිපිට සඟරා වීථි සේවයේ නිරත වීමෙන් දවස ආරම්භ කරනවා.”
සාවධානව සැලසුම් කිරීමද සාර්ථක වීමට මාර්ගයකි. (හිතෝපදේශ 21:5) නිදසුනක් වශයෙන්, දේවසේවයෙහි තම අවශ්‍යතා තමන්ටම සපුරාගත හැකි වන පිණිස, ප්‍රමාණවත් මුදල් වෙන් කරගැනීමට සමහරුන්ට හැකි වී තිබේ. වෙනත් අය පෞද්ගලික වියහියදම් අඩු කර, අර්ධ කාලීන රැකියාවක් ලබාගැනීමට තීරණය කර ඇත්තාහ. ටේඕඩෝ සහ ආන් සම්බන්ධයෙන් සලකා බලන්න. ඔවුන් තම විවාහ ජීවිතය පුරෝගාමීන් ලෙස ඇරඹූ අතර, පවුල් වගකීම් නිසා පුරෝගාමී සේවය නතර කිරීමට සිදු වන තුරු ඔවුහු එහි නිරත වූහ. එහෙත් ඔවුන්ගේ පුරෝගාමී ස්ප්‍රීතුව දිගටම පැවතිණ. ඔවුන්ගේ දූවරුන් වැඩෙද්දී, පුරෝගාමී සේවයේ යෙදීමට ඔවුන්ට නිතරම දිරිගන්වන ලදි. වඩාත් වැදගත් දේ නම්, ටේඕඩෝ සහ ආන් බොහෝවිට උපකාරික පුරෝගාමීන් වශයෙන් සේවය කරමින්, කදිම ආදර්ශයක් තැබීමය. ගැහැනු ළමයින් වයසින් වැඩුණු විට, ක්ෂේත්‍ර සේවයෙහි වැඩි කාලයක් යෙදවීමට හැකි වන පිණිස, ටේඕඩෝ සහ ආන් ලෞකික රැකියාවේ නිරත වන කාලය අඩු කළෝය.
ඔවුන්ගේ දූවරුන් පූර්ණ-කාලීන සේවයට ඇතුල් වී නිවසින් පිට වී ගියාට පසු, ආන් පුරෝගාමී සේවයේ නියැලීම ආරම්භ කළාය. දිනක් ඈ ටේඕඩෝට ඔහුගේ රැකියාවෙන් ඉවත් වන්න කියා දිරිගැන්වූවාය. “අපි දෙන්නටම පුරෝගාමී සේවයේ යෙදෙන්න පුළුවන්,” කියා ඈ යෝජනා කළාය. ටේඕඩෝ තම අභිප්‍රාය සිය ස්වාමියාට දැනුම් දුන්නේය. ඔහුව පුදුමයට පත් කරවමින්, ඔහුගේ ස්වාමියා අර්ධ-කාලීන රැකියාවක් ලබා දීමෙන්, ඔහුට උපකාර කිරීමට ඉදිරිපත් වූයේය: “මම හිතන විදිහට, ඉහළ සිටින [ස්වර්ගයේ සිටින] ඔබගේ ස්වාමියාට පූර්ණ-කාලීනව සේවය කරන්ට ඔබට අවශ්‍ය වෙලා ඇති.” ටේඕඩෝ සහ ආන් දැන් එකට පුරෝගාමී සේවයේ යෙදීමෙන් මහත් ආස්වාදයක් ලබන්නෝය.
තම ජීවිතයෙහි මතු වූ තත්වයන් නිසා, ඇතැම් අය පුරෝගාමී සේවයේ නියැලීමට පටන්ගත්හ. ඔවුන්ගේ දියණියගේ හා මිනිපිරියගේ ඛේදජනක මරණය, එක් වයස්ගත යුවළකට තම ඉතිරි වසර ගණනාව ගත කළ යුතු ආකාරය සම්බන්ධයෙන් බරපතළ ලෙස කල්පනා කිරීමට සැලැස්සුවේය. (දේශනාකාරයා 7:2) ශෝකයෙන් යටපත් වී සිටිනවා වෙනුවට, ඔවුහු දැනට වසර අටකට වඩා වැඩි කාලයකට භුක්තිවිඳ ඇති පූර්ණ-කාලීන සේවයේ නිරත වෙමින් සිටිති.
පූර්ණ-කාලීන දේවසේවයෙහි රැඳී සිටීම සඳහා ස්ථිර අධිෂ්ඨානයක් අවශ්‍ය බව පිළිගත යුත්තකි. නිදසුනක් වශයෙන්, අර්න්ස්ට් සහ ඔහුගේ බිරිඳ රික්, තම දරුවන් නිවසින් පිට වූ විගසම පුරෝගාමී සේවයේ යෙදීමට ආරම්භ කළෝය. ඉන් කෙටි කලකට පසුව, කලින් එකට වැඩ කළ ව්‍යාපාරික හවුල්කරුවෙක් අර්න්ස්ට්ට ලාභ ලැබිය හැකි රැකියාවක් ඉදිරිපත් කළේය. අර්න්ස්ට් මෙසේ පිළිතුරු දුන්නේය: “සිටිය හැකි හොඳම ස්වාමියා අපට සිටිනවා, එනිසා අපි උන්වහන්සේගෙන් ඉවත් වෙන්න කැමති නැහැ.” අර්න්ස්ට් සහ ඔහුගේ බිරිඳ යෙහෝවඃවහන්සේගේ “සේවයේ” රැඳී සිටි නිසා, ඔවුන්ට වෙනත් සේවා වරප්‍රසාද විවෘත විය. ඔවුහු චාරිකා සේවයේ වසර 20කට වඩා වැඩි කාලයක් ගත කර ඇති අතර, මේ දක්වාම පුරෝගාමීන් වශයෙන් සේවය කරති. ඔවුන් තම ආත්ම-පරිත්‍යාගශීලී ක්‍රියාමාර්ගය සම්බන්ධයෙන් පසුතැවිලි වනවාද? යම් කලකට පෙර එම යුවළ මෙසේ ලීවේය: “එය යෙහෝවඃවහන්සේගේ කැමැත්ත වන්නේ නම්, ස්වර්ණ ජුබිලිය ලෙස බොහෝවිට හඳුන්වනු ලබන, අපගේ විවාහයේ 50වන අවුරුද්ද තව මාස තුනකින් සැමරීමට අප බලාපොරොත්තු වෙනවා. එහෙත් අප පුරෝගාමී සේවයෙහි නියැලීමට ආරම්භ කිරීමත් සමඟම අපගේ නියම ස්වර්ණමය අවුරුදු පටන්ගත් බවට, අපට ස්ථිර විශ්වාසයක් ඇතුව පවසන්ට පුළුවන්.”
වැඩි ක්‍රියාකාරකමක් සඳහා මඟ පාදන දොරටුව, වැඩි ප්‍රීතියකටද මඟ පාදන බව බොහෝදෙනෙකුට පෙනීයයි. වයස අවුරුදු 65 සම්පූර්ණ වී සති දෙකකට පසු පුරෝගාමී සේවය ආරම්භ කළ සහෝදරයෙක් මෙසේ පවසයි: “මා පුරෝගාමී සේවයේ නියැලුණු පසුගිය අවුරුදු දහය මෙන්, ආශීර්වාදවලින් මෙතරම් පිරුණු කාලපරිච්ඡේදයක් මා මගේ ජීවිතයේ කිසිදා අද්දැක නැති බව පැවසිය යුතුයි.” අවුරුදු හතකට වඩා වැඩි කාලයක් පුරෝගාමී සේවයේ යෙදුණු විවාහක යුවළක් මෙසේ පවසයි: “අපගේ වයසේ හා තත්වයේ සිටින යුවළක් කරමින් සිටිය යුත්තේ වෙන කුමක්ද? බලප්‍රදේශය තුළ අප වැනි අයව අපි දකිනවා—ඔවුන් සැපපහසුව නිවසේ සිටින අතර, නිකම්ම මහත් වෙමින්, වයසට යමින් හා කඩිසරව ක්‍රියා කළ නොහැකි තත්වයකට පත් වෙමින් සිටිනවා. සේවයේ යෙදීම අපව මානසිකව හා ශාරීරිකව සෞඛ්‍යසම්පන්න තත්වයක තබනවා. අප සෑමවිටම එකට සිටිනවා. අප බොහෝ සෙයින් සිනාසෙමින් ජීවිතය භුක්තිවිඳිනවා.”
ඇත්තවශයෙන්ම, වයස්ගත සියලුදෙනාටම පුරෝගාමී සේවයේ නියැලීමට තම තත්වයන් ඉඩ නොදෙනවා විය හැක. යෙහෝවඃවහන්සේගේ සේවයෙහි ඔවුන්ට කළ හැකි ප්‍රමාණය උන්වහන්සේ අගය කරන බවට මෙම ක්‍රිස්තියානීන්ට සහතික විය හැක. (මාර්ක් 12:41-44, සසඳන්න.) නිදසුනක් වශයෙන්, එක් ආබාධිත සහෝදරියක්ව සාත්තු නිවාසයකට සීමා කරනු ලැබීය. කෙසේවෙතත්, ඇයට ඒ වන විටත් ක්‍රියාකාරකම් සහිත දොරක් විවරව තිබිණ. ඇගේ කාලය ගෙවන්නේ කෙසේදැයි වෛද්‍යවරයෙක් ඇයගෙන් විමසුවේය. ඈ මෙසේ ප්‍රකාශ කරයි: “මට බොහෝවිට කාල වේලාව මදි වන බව මා ඔහුට පැවසුවා. ඔහුට මෙය තේරුම්ගැනීමට නොහැකි වුණා. මෙය මෙසේ වන්නේ මගේ ජීවිතය තෘප්තිමත් ක්‍රියාකාරකම්වලින් පිරී තිබෙන නිසා බව මා ඔහුට පැවසුවා. මට තනිකමක් දැනෙන්නේ නැහැ, එහෙත් මා තනිකමෙන් සිටින වෙනත් අයව සොයා, මනුෂ්‍යවර්ගයා සඳහා දෙවියන්වහන්සේ ගබඩා කර ඇති දේ පිළිබඳව ඔවුන්ට පැවසීමට උත්සාහ කරනවා.” කාරණා කැටි කොට දක්වමින් ඇය මෙසේ පවසයි: “වයස අවුරුදු 80ක් තරම් වන යමෙකුගෙන්, කෙනෙකුට බොහෝ දේ බලාපොරොත්තු වෙන්න බැහැ. මට තව බොහෝදෙනෙකුව යෙහෝවඃවහන්සේ වෙත ළං කරවීමට හැකිවීම සඳහා මා වෙනුවෙන් යාච්ඤා කරන්න.”
ඔබ විශ්‍රාම ගැනීමට සුදුසු වයසක සිටින්නෙහිද? පහසු ගැනීම සඳහා ආශාව ඉතා වැඩි විය හැකි මුත්, එය ආත්මික ආශීර්වාද ලබාගැනීමේ දොරටුවක් නොවේ. ඔබගේ තත්වය යාච්ඤාපූර්වකව කල්පනා කර බලන්න. එය සමහරවිට, ඔබට යෙහෝවඃවහන්සේගේ සේවයේ වැඩි ක්‍රියාකාරකම්වලට මඟ පාදන දොරටුව තුළින් යෑමට හැකි කරවනු ඇත.
[25වන පිටුවේ පින්තූර]
විශ්‍රාම ගැනීම, දේවසේවයේ ක්‍රියාකාරකම් වැඩි කිරීමට මඟ පෑදිය හැක