ඔවුන් යෙහෝවාගේ කැමැත්ත කළා

නිර්මල නමස්කාරයේ අභිවෘද්ධියට ස්වේච්ඡා පඬුරක්

ඉශ්‍රායෙල්වරු යෙහෝවාගේ ගැළවීමේ බලය සියැසින් දැක්කා. වියළි බිම හරහා ගොස් මිසර හමුදාවෙන් පලා යෑමට මඟ සලසමින් රතු මුහුදේ ජල කඳ ආශ්චර්යවත් ලෙස දෙබෑ වෙනවා ඔවුන් දැක්කා. එම ජල කඳම තමන්ව ලුහුබැඳ ආ මිනිසුන් මත වේගයෙන් ඇද හැළෙන ආකාරය ඔවුන් මුහුදේ අනිත් පැත්තේ සිට බලා සිටියා. ඔවුන්ගේ ජීවිත ආරක්ෂා කළේ යෙහෝවායි!—නික්මයාම 14:21-31.

ඒ වුණත් ඇතැම් ඉශ්‍රායෙල්වරුන් තමන්ගේ දෙවි කළ දේවල් සුළු කොට සැලකීම කනගාටුවට කරුණක්. මෝසෙස් සීනයි කන්දේ සිටි අවස්ථාවේදී ඔවුන් තමන්ගේ රන් ආභරණ ආරොන්ට දී තමන්ට නමස්කාර කිරීම සඳහා රූපයක් සාදන්න කියා ඉල්ලා සිටියා. මෝසෙස් ආපසු එද්දී මේ කැරලිකාර සෙනඟ කමින්, බොමින්, නටමින් හා රන් වස්සෙකු ඉදිරියෙහි වැඳ වැටෙමින් සිටිනවා දැක්කා! යෙහෝවා දුන් නියෝගයට අනුව 3,000දෙනෙකු පමණ මරා දැමුවා; සමහරවිට මේ කැරැල්ලට මුල පිරුවේ මොවුන් විය හැකියි. යෙහෝවාට තනි භක්තිය පිරිනැමීම සම්බන්ධයෙන් දෙවිගේ සෙනඟ එදා වැදගත් පාඩමක් ඉගෙනගත්තා.—නික්මයාම 32:1-6, 19-29.

මේ සිද්ධිය සිදු වී වැඩි කලක් ගත වෙන්න කලින් මණ්ඩපයක් සාදන්න කියා යෙහෝවා දුන් නියෝගය ක්‍රියාත්මක කරන්න මෝසෙස් කටයුතු පිළියෙළ කළා. මෙය එහා මෙහා ගෙන යා හැකි නමස්කාරය සඳහා යොදාගත් කූඩාරමක්. මේ ඉදි කිරීමේ වැඩයට වටිනා ද්‍රව්‍ය මෙන්ම කුසලතාවලින් පිරිපුන් කාර්මිකයන් අවශ්‍ය වුණා. මෙම අවශ්‍යතා සැපිරුණේ කොහොමද? මෙම බයිබල් වාර්තාවෙන් අපිට ඉගෙනගන්න පුළුවන් මොනවාද?

ද්‍රව්‍යය හා කුසලතාවලින් යුත් පඬුරු

මෝසෙස් මගින් යෙහෝවා ඉශ්‍රායෙල්වරුන්ට මෙසේ අණ කළා: “[යෙහෝවාට] පඬුරක් ගෙනෙන්න. කැමති සිතක් ඇති කවරෙක් නුමුත් [යෙහෝවාට] පඬුරක් [ගෙනෙන්න].” මොන විදිහේ පඬුරක්ද? මෝසෙස් සඳහන් කළ දේවල් අතර රන්ද, රිදීද, තඹද, නූල්ද, වියන ලද රෙදිද, සම්ද, ලීද, අනර්ඝ ගල්ද තිබුණා.—නික්මයාම 35:5-9.

මෙවැනි පරිත්‍යාගයක් කිරීමට තරම් අවශ්‍ය ද්‍රව්‍ය ඉශ්‍රායෙල්වරුන් ළඟ ඕනෑවටත් වඩා තිබුණා. ඔවුන් මිසරයෙන් පිටත්ව එද්දී, මිසරවරුන්ගේ රන් හා රිදී භාණ්ඩද, බොහෝ ඇඳුම් පැළඳුම්ද රැගෙන ආ බව මතක තබාගන්න. ඇත්තෙන්ම, ‘ඔවුන් මිසර වැසියන්ගේ වස්තුව කොල්ලකා ගත්තා.’a (නික්මයාම 12:35, 36, නව අනුවාදය) කලින් අවස්ථාවේදී ඉශ්‍රායෙල්වරුන් බොරු නමස්කාරය සඳහා යොදාගත් පිළිමයක් සාදන්න ඔවුන්ගේ රන් ආභරණ සිය කැමැත්තෙන්ම පරිත්‍යාග කළා. මේ අවස්ථාවේදී ඔවුන් සැබෑ නමස්කාරයේ අභිවෘද්ධිය සඳහා ඒ වගේම උනන්දුවක් පෙන්වාවිද?

මෝසෙස් එක් එක්කෙනා දිය යුතු නිශ්චිත ප්‍රමාණයක් නියම කළේවත්, දීම සඳහා පෙලඹීමක් ඇති කිරීමක් වශයෙන් ඔවුන් තුළ වරදසහගතබවේ හෝ ලජ්ජාවේ හැඟීමක් ඇති කළේවත් නැති බව සැලකිල්ලට ගන්න. ඒ වෙනුවට, ඔහු කළේ “කැමති සිතක් ඇති” හැමකෙනෙකුගෙන්ම ඉල්ලීමක් කිරීම පමණයි. දෙවිගේ සෙනඟට බල කිරීමක් කරන්න මෝසෙස්ට කිසිවිටකත් අවශ්‍යතාවක් නොතිබූ බව පැහැදිලියි. එක් එක්කෙනා ඔහුට හෝ ඇයට හැකි සියල්ලම දෙයි කියා ඔහුට නිසැකකමක් තිබුණා.—2 කොරින්ති 8:10-12 සසඳන්න.

කොහොමවුණත්, මේ ගොඩනැඟීමේ වැඩයට ද්‍රව්‍යමය පරිත්‍යාගවලට වඩා වැඩි යමක් අවශ්‍ය වුණා. යෙහෝවා ඉශ්‍රායෙල්වරුන්ට මෙසේද පැවසුවා: “නුඹලා අතරෙහි ප්‍රඥා සිත් ඇති සියල්ලෝ අවුත් [යෙහෝවා] අණකළ සියලු දේ සාදත්වා.” ඔව්, මේ ගොඩනැඟීමේ වැඩයට කුසලතාවලින් යුත් පුද්ගලයන්වද අවශ්‍ය වුණා. ඇත්තෙන්ම, මෙම වැඩය සම්පූර්ණ කිරීමට වඩුවන්ද, ලෝහකරුවන්ද, රන්කරුවන්ද ඇතුළුව “සියලු ආකාර ශිල්ප උගත් අය, [NW]” අවශ්‍ය වුණා. මේ ගොඩනැඟීමේ වැඩවලට හවුල් වූ අයට යෙහෝවා මඟ පෙන්වීම ලබා දුන් නිසා, මේ වැඩයේ සාර්ථකත්වය සම්බන්ධයෙන් හිමි විය යුතු ප්‍රශංසාව ලැබිය යුත්තේ ඔහුයි.—නික්මයාම 35:10, 30-35; 36:1, 2.

තමන් සතු සම්පත් මෙන්ම කුසලතා ලබා දීමට කළ ඇරයුමට ඉශ්‍රායෙල්වරුන් මහත් උනන්දුවෙන් ප්‍රතිචාරය දැක්වුවා. බයිබල් වාර්තාවේ මෙසේ සඳහන් වෙනවා: “තමුන්ගේ සිත් පොලඹවනලද්දාවූ තමුන්ගේ ආත්මයෙන් කැමති කරනලද්දාවූ සියල්ලෝ අවුත් සම්මුඛවීමේ කූඩාරමේ කර්මාන්ත පිණිසද ඒකේ සියලු මෙහෙය හා ශුද්ධ වස්ත්‍ර පිණිසද [යෙහෝවාට] පඬුරු ගෙනාවෝය. කැමති සිත් ඇති සියලු පුරුෂයෝද ස්ත්‍රීහුද [ආවෝය].”—නික්මයාම 35:21, 22.

අපිට ගත හැකි පාඩම

අදදින දෙවිගේ රාජ්‍යයේ ශුභාරංචිය දේශනා කිරීමේ අතිවිශාල කාර්යය ඉටු කරනු ලබන්නේ කැමැත්තෙන්ම ඉදිරිපත් කරනු ලබන පරිත්‍යාග යොදාගෙනයි. බොහෝ අවස්ථාවලදී සිදු කෙරෙන්නේ මුදල් පරිත්‍යාගයන්ය. තවත් අවස්ථාවලදී ක්‍රිස්තියානි සහෝදර සහෝදරියන් රාජ්‍ය ශාලා, එක්රැස්වීම් ශාලා හා ශාඛා කාර්යාල ඉදි කිරීම්වලට සහය වෙමින් ඔවුන් සතු අද්දැකීම් සම්භාරය ඒ සඳහා යොදවනවා. මීට අමතරව, ලොව පුරා සියගණනකට වැඩි බෙතෙල් නිවාසවල විවිධ කුසලතා අවශ්‍ය කරන වැඩ සිදු කෙරෙනවා. තමන් වෙහෙස මහන්සි වී කරන වැඩය යෙහෝවා අමතක කරන්නේ නැති බවට එම වැඩවලට ඉදිරිපත් වන කැමති සිත් ඇති සියලුදෙනාටම නිසැක වෙන්න පුළුවන්.—හෙබ්‍රෙව් 6:10.

ක්‍රිස්තියානි දේවසේවයේ අපි එක් එක්කෙනාගේ දායකත්වය සම්බන්ධයෙන්ද ඒ දෙයම අදාළ වෙනවා. දේශනා කිරීමේ වැඩයෙහි ජ්වලිතව හවුල් වීම සඳහා කාලය මිල දී ගන්න කියා සියලුදෙනාගෙන්ම මහත් ඕනෑකමින් ඉල්ලා සිටිනවා. (මතෙ. 24:14; එපීස 5:15-17) සමහරු මෙය කරන්නේ පූර්ණ-කාලීන එවන්ජලිස්තවරුන් හෝ පුරෝගාමීන් හැටියට සේවය කිරීමෙනුයි. වෙනස් තත්වයන් නිසා පුරෝගාමීන් වගේ අනිත් අයට සේවයේ එතරම් කාලයක් ගත කරන්න බැහැ. ඒ කොහොමවුණත්, ඔවුනුත් යෙහෝවාව සතුටු කරමින් සිටිනවා. මණ්ඩපයේ පඬුරු වගේ යෙහෝවා එක් එක්කෙනා දිය යුතු නිශ්චිත ප්‍රමාණයක් නියම කරන්නේ නැහැ. ඒ වුණත්, ඔහු අපෙන් ඉල්ලා සිටින්නේ අපි එක් එක්කෙනා අපේ මුළු හෘදයෙන්ද, ප්‍රාණයෙන්ද, මනසින්ද, ශක්තියෙන්ද ඔහුට සේවය කරන්න කියායි. (මාර්ක් 12:30) අපි මෙසේ කරනවා නම්, සැබෑ නමස්කාරයේ අභිවෘද්ධිය වෙනුවෙන් අපි කැමැත්තෙන්ම දෙන පඬුරු සඳහා ඔහු ආශීර්වාද කරන බවට අපිට නිසැක වෙන්න පුළුවන්.—හෙබ්‍රෙව් 11:6.

[පාදසටහන]