දේවසේවයේ යෙදීමට ඔබේ සහෝදරයන්ට උදව් කරන්න
1 පසුගිය සේවා වසරේ ක්‍රියාකාරකම් ගැන මුලසුන භාර අවේක්ෂකයන්ගෙන් පැමිණි වාර්තාවලින් පෙනෙන්නේ ප්‍රචාරකයන් ගණනාවක් දේවසේවයේ අක්‍රියාශීලී වී ඇති බවයි. තවත් අය සේවයේ හවුල් වී තිබෙන්නේ කඩින් කඩ පමණක් බව වාර්තා වෙනවා.
2 ඇතැම් අය සත්‍යය ගැන කතා කිරීම අඩාළ කර තිබෙන්නේ හෝ මුළුමනින්ම නවතා දමා තිබෙන්නේ ඇයි? ඒ යම් පීඩාවක් හෝ කරදරයක් නිසාද? නැත්නම් යම් දේවල් ගැන කනස්සලු වීම නිසාද? එහෙමත් නැත්නම් ධන සම්පත් රැස් කිරීමට වැඩි කාලයක් යොදවන නිසාද? (මතෙ. 13:18-23) අපගේ සහෝදරයන්ට දේවසේවයේ යෙදීම සඳහා උපකාර කිරීමට අපට කුමක් කළ හැකිද?
3 ඔබේ සභාවේ ඇතැම් අය අක්‍රියාශීලී නම්, රැස්වීම්වලට පැමිණෙන්නෙත් නැත්නම් ඔවුන්ට උදව් කිරීමට ඔබට කුමක් කළ හැකිද? ප්‍රේමයෙන් කරුණාවෙන් ඔවුන්ට උදව් කිරීමේ අටියෙන් ඔවුන්ව හමු වන්න. ඔවුන්ට කතා කිරීමට ඉඩහරින්න. ගැටලුව කුමක්ද කියා තේරුම්ගන්න. දුර්වල වී ඇති හෝ දිරිගැන්වීම අවශ්‍ය අයට උපකාර දීම අප දෙවිට කරන සේවයේ අත්‍යවශ්‍ය කොටසක්. (මතෙ. 18:12-14; ක්‍රියා 11:23) නැවතත් දෙවිට කරන නමස්කාරයේ ක්‍රියාශීලී වීමට සමහරවිට ඒ මගින් ඔවුන්ට හැකි වේවි.
4 පොත් පාඩම් අවේක්ෂකයන් ලෙස සේවය කරන සියලු වැඩිමහල්ලන් සහ සභා සේවකයන් තමන්ගේ කණ්ඩායමේ සියලුදෙනාගේ අවශ්‍යතා ගැන කල්පනාවෙන් සිටිය යුතුයි. කලින් කලට කණ්ඩායමේ අයගේ ප්‍රචාරක කාඩ්පත් පරීක්ෂා කර බලන්න. එවිට ඔවුන් දියුණු විය යුතු පැති ඔබට දැකගත හැකියි. යම් කෙනෙකුට උපකාර අවශ්‍ය නම්, පොත් පාඩම් අවේක්ෂක ඒ ගැන පෞද්ගලිකව අවධානය යොමු කළ යුතුයි. නැත්නම් වෙනත් ප්‍රචාරකයෙකු ලවා ඔහුට උදව් කළ හැකියි.
5 සහෝදරයන් නියමිත වේලාවට ක්ෂේත්‍ර සේවා වාර්තාව දමන්නේ නැත්නම් ඒ සඳහා දිරිගන්වන්න. එය නිවැරදිව කරන අන්දම කියා දෙන්න. මාසය අවසානයේදී පොත් පාඩම්වලදී මේ ගැන සඳහන් කර, එම ස්ථානයේ වාර්තා පත් තබාගෙන අවශ්‍ය අයට ලබා දෙන්න. කඩින් කඩ සේවයේ හවුල් වී ඇති අය සමඟ එක්ව සේවයේ වැඩ කිරීමට සැලසුම් කරගැනීමට වැඩිමහල්ලන්ට, සභා සේවකයන්ට හා වෙනත් ප්‍රචාරකයන්ට හැකියි. මේ මගින්, දේවකැමැත්ත කිරීමෙන් මහත් සතුටක් ලබාගැනීමට නැවතත් ඔවුන්ට හැකි වේවි.
6 චාරිකා සහ දිස්ත්‍රික් අවේක්ෂකයන් සභාවන් බැහැදකින විට, අක්‍රියාශීලී සහ කඩින් කඩ වාර්තා කරන අයට උපකාර කිරීම සඳහා කාලය මිඩංගු කරනවා ඇති. සතිය ආරම්භයේදී සංචාරක සහෝදරයා, වාර්තා පරීක්ෂා කරමින් පසුගිය මාසවලදී එවන් අයට කොතරම් උපකාර දී තිබෙනවාද, දැනට කොතරම් උපකාර දෙමින් තිබෙනවාද කියා බලයි. සතිය තුළදී ඔහුට හැකි උපරිමයෙන් එවන් අයට උපකාර කරන අතර, ඔහු සභාවෙන් පිටව ගිය පසු අමතර උපකාර දීමට වැඩිමහල්ලන්ට හැකි ආකාරය ගැන සතිය තුළදී සාකච්ඡා කරයි.
7 එමනිසා, “අපට ප්‍රස්තාව තිබෙන තාක් කල්, සියල්ලන්ටම, විශේෂයෙන්ම අපේ ඇදහිල්ලේ පවුලට අයත් අයට යහපත්කම්” කළ යුතු බව කිසිදා අමතක නොකරමු.—ගලා. 6:9, 10.