නව විවරණිකාව බෙදාහැරීම සඳහා විශේෂ වැඩ පිළිවෙළක්
1 අද බොහෝදෙනෙක් ලෝක තත්වය ගැන කරදර වෙනවා. ඇයි දේවල් මේ විදිහට සිදු වෙන්නේ, අනාගතය කොයි වගේ වෙයිද, පැමිණෙන්නට නියමිත විනිශ්චයෙන් ගැලවීමට නම් තමන් කොයි ආකාරයේ ක්‍රියා මාර්ගයක් ගත යුතුද වැනි කාරණා ගැන අවබෝධයක් තිබෙන්නේ සුළු පිරිසකට විතරයි. (එස. 9:4) ඔවුන්ට අපේ කාලය ගැන යම් අවබෝධයක් ලබා දීමට සෝදිසියෙන් සිටින්න! යන නව විවරණිකාව බෙදාහැරීමේ විශේෂ වැඩ පිළිවෙළක් ඔක්තෝබර් මස 18වන සඳුදා සිට නොවැම්බර් 14වන ඉරිදා දක්වා ක්‍රියාත්මක කිරීමට නියමිතයි.
2 මෙම විවරණිකාව ගෙයින් ගෙට සේවයේදී, නැවත බැලීම් කිරීමේදී, අවිධිමත් හෝ පොදු ස්ථානවල සාක්ෂි දැරීමේදී ඉදිරිපත් කිරීමට පුළුවන්. සෝදිසියෙන් සිටින්න! යන විවරණිකාව නිකම් බෙදාගෙන බෙදාගෙන යෑම නොකළ යුතුයි. එසේ නොකර ලෝක තත්වය ගැන බයිබලයේ සඳහන් කාරණාවලට සැබෑ උනන්දුවක් දක්වන අයට, එම විවරණිකාව ලබා දිය හැකියි. පණිවිඩයට අඩු උනන්දුවක් පෙන්වන අයට පත්‍රිකාවක් දීමට පුළුවන්.
3 කෙනෙකුගේ අවධානය ඇදගැනීමට ඔබට පුළුවන් මෙවැනි දෙයක් පවසන්න:
◼ “අද දකින්න තිබෙන දරුණු ගැටලු සහ හද සලිත කරවන සිද්ධීන් ගැන හුඟදෙනෙක් සැලකිලිමත් වෙනවා. [ප්‍රදේශයේ සිදු වූ සිද්ධියක් සඳහන් කරන්න.] මෙවැනි සිදුවීම් සිදු වෙන බව බයිබලයේ පුරෝකථනය කර තිබෙනවා කියලා ඔබ දන්නවාද? [පිළිතුරු දීමට ඉඩ දෙන්න. පසුව ඔබ සඳහන් කළ සිද්ධියට ගැළපෙන බයිබල් පදයක් සඳහන් කරන්න. මතෙව් 24:3, 7, 8; ලූක් 21:7, 10, 11; හෝ 2 තිමෝති 3:1-5] අපගේ කාලය හා මනුෂ්‍යවර්ගයාගේ අනාගතය සම්බන්ධයෙන් බයිබලයේ පැහැදිලි විස්තරයක් තිබෙනවා. ඔබ කැමතිද වැඩි විස්තර දැනගන්න? [පිළිතුරු දීමට ඉඩ දෙන්න. සැබෑ උනන්දුවක් පෙන්වනවා නම් විවරණිකාව දෙන්න.] මෙම විවරණිකාව අය කිරීමක් නැතුවයි බෙදාහරින්නේ. ඔබ සතුටු නම් ලෝක ව්‍යාප්ත සේවය වෙනුවෙන් සුළු සම්මාදමක් කරන්න පුළුවන්. අපි එය භාරගන්න කැමතියි.”
4 එසේ නැතහොත් මෙම ක්‍රමය සාර්ථක එළඹීමක් විය හැකියි:
◼ “හුඟදෙනෙක් සමාජයේ සිදු වන හද කම්පා කරවන සිද්ධීන් නිසා, එහෙමත් නැත්නම් තමන්ට සිදු වන දුක් මුසු සිද්ධීන් නිසා සිත් තැවුලෙන් සිටිනවා. මෙවැනි දේවල් වළක්වන්න දෙවි කිසි ක්‍රියාමාර්ගයක් නොගන්නේ ඇයි කියලා සමහරෙකු කල්පනා කරනවා. බයිබලයේ සහතික වශයෙන්ම අපට කියා තිබෙනවා, දෙවි ඉතාමත් ඉක්මනින් මිනිසාගේ දුක් මුසු තත්වය ඉවත් කිරීමට කටයුතු යොදනවා කියලා. මිනිස්වර්ගයාට දෙවි දීමට බලාපොරොත්තු වන යහපත් දේවල් මොනවාද කියලා ටිකක් බලන්න. [ගීතා. 37:10, 11, කියවන්න.] ඔබ කැමතිද වැඩි විස්තර දැනගන්න.” කලින් යෝජනාවේ සඳහන් කළ විදිහට අවසන් කරන්න.
5 විවරණිකා ලබාගත් සෑම කෙනෙකුගේම නම සහ ලිපිනය ලබාගන්න වෑයම් කරන්න. උනන්දුව වර්ධනය කිරීමට නැවත ගොස් බලන්න. උනන්දුව වර්ධනය කරන ආකාරය පිළිබඳ යෝජනා 2004 නොවැම්බර් රාජ්‍ය සේවාවේ සඳහන් වෙයි. පළමු නැවත බැලීමේදී යම් පුද්ගලයෙක් තවදුරටත් උනන්දුවක් පෙන්වන්නේ නම් එම අවස්ථාවේදීම සෝදිසියෙන් සිටින්න! නැතහොත් ඕනෑ කරන්නේ විවරණිකාව වැනි වෙනත් ප්‍රකාශනයකින් බයිබල් පාඩමක් පටන්ගන්න.
6 නව විවරණිකාවේ පිටපත් මෙම ලිපිය සාකච්ඡා කරන සේවා රැස්වීමට පසුව ලබාගත හැකියි. පුරෝගාමීන් සහ ප්‍රචාරකයන්ට මෙම විශේෂ වැඩසටහනේ මුල් දිනයන් තුළ ඔවුන් බෙදාහැරීමට බලාපොරොත්තු වන ප්‍රමාණය පමණක් ලබාගන්න කියා යෝජනා කර තිබෙනවා. යෙහෝවාගේ මහිමය උදෙසාත් සෑම තැනම සිටින අවංක හදවත් ඇති අය උදෙසාත් කරන මෙම විශේෂ වැඩසටහනට ඔහු ආශීර්වාද කරනු ලැබේවා.—ගීතා. 90:17.