වසර 2007 “යේසුස්ව ආදර්ශයට ගනිමු” නමැති දිස්ත්‍රික් සමුළුව
1, 2. (අ) එකට එක්රැස් වී ප්‍රයෝජන ලැබීමට මෝසෙස් ඊශ්‍රායෙල්වරුන්ට දිරිගැන්වූයේ කෙසේද? (ආ) අප දැන් සිටම සුදානම් කළ යුතු සමහර දේවල් මොනවාද?
1 සෑම අවුරුදු හතකටම වරක් සියලුම ඊශ්‍රායෙල්වරුන්ට හා විදේශිකයන්ට එකට රැස්වෙන්න කියා මෝසෙස් පැවසුවා. එසේ කළ යුතු වුණේ “ඔවුන් අසා ඉගෙන” ගැනීම සඳහායි. (ද්වි. 31:10-12) දෙවි තම සෙනඟව විශාල කණ්ඩායම් ලෙස එක් රැස් කිරීමේ අවශ්‍යතාව දැක්කා. මේ කාලයේ සිටින දෙවිගේ සෙනඟද “යේසුස්ව ආදර්ශයට ගනිමු” යන තේමාවෙන් යුත් දිස්ත්‍රික් සමුළුවට දවස් තුනක් එක්රැස් වෙනවා.
2 මේ සමුළුවට යන්න ඔබ දැන් සිටම සූදානම් වෙනවාද? ඔබ රැකියා කරන ස්ථානයෙන් නිවාඩු ලබා ගැනීම අවශ්‍යද? ඔබේ බයිබල් පාඩම්වලට හා සත්‍යයේ නැති ඔබේ පවුලේ අයට ඔබ සමඟ සමුළුවට යෑමට අවශ්‍ය උපකාර සපයන්න ඔබට පුළුවන්ද? සමුළුවට යෑම සඳහා උපකාර අවශ්‍ය වෙනත් අය ඔබේ සභාවේ සිටිනවාද? ඔබ බලාපොරොත්තු වෙන්නේ ඔබේ සභාවට නියමිත සමුළුවට යන්නද නැත්නම් වෙනත් එකකට යන්නද? ඔබට නවාතැන් පහසුකම් අවශ්‍යද? පහත සඳහන් තොරතුරු සමුළුව සඳහා සුදානම් වීමේදී ඔබට උපකාරවත් වෙයි.
3. (අ) යෙසායා 25:6 අද ඉටු වෙමින් තිබෙන්නේ කෙසේද? (ආ) සිකුරාදා පැමිණෙන සංඛ්‍යාව ගැන පෙනී ගොස් තිබෙන්නේ කුමක්ද? ඔබ රැකියාවක් කරන කෙනෙක් නම් කළ යුත්තේ කුමක්ද?
3 දවස් තුනටම සහභාගී වන්න: යෙහෝවා දෙවි තම සෙනඟගේ ඇදහිල්ල ශක්තිමත් කිරීමට අවශ්‍යය පෝෂණය නොඅඩුව ලබා දෙනවා. (යෙසා. 25:6) මෙයට අවුරුදු පතා අපි භුක්ති විඳින සමුළුවත් ඇතුළත්. සිකුරාදා පැමිණෙන සංඛ්‍යාව අනිත් දවස් දෙකේ පැමිණෙන සංඛ්‍යාවට වඩා සැලකිය යුතු ප්‍රමාණයකින් අඩු බව පෙනී ගොස් තිබෙනවා. යෙහෝවා දෙවිගේ සංවිධානය මගින් අපිට සුදානම් කර තිබෙන මේ මහත් මංගල්‍යයට දවස් තුනම සහභාගී වීමට අධිෂ්ඨානයක් ගන්න. ඔබේ රැකියා ස්ථානයෙන් ඔබට නිවාඩුවක් ලබා ගන්න අවශ්‍යය නම් ඒ ගැන යාච්ඤා කරන්න. සමුළු පැවැත්වෙන දින දැනගත් වහාම ඔබේ රැකියා ස්ථානයේ ස්වාමියා සමඟ කතා කරන්න අවශ්‍ය “නිර්භීතකම” වඩවා ගන්න. (1 තෙස. 2:2; නෙහෙ. 2:4, 5) වාර්ෂිකව පැවැත්වෙන සමුළුව ඔබේ නමස්කාරයේ කොටසක් බව ඔහුට තේරුම් කර දීම ප්‍රයෝජනවත් විය හැකියි. ඔබ කල් වේලා ඇතුව ඔබේ ස්වාමියාට නිවාඩු ගැන දැනුම් දීම මගින් ඔබට නිවාඩු ලබා දීම සඳහා වැඩ සැලසුම් කිරීමට ඔහුට පහසු වේවි.
4. අපේ බයිබල් පාඩම්වල අයව හා පවුලේ සිටින සත්‍යයේ නැති අයව සමුළුව සඳහා සුදානම් කරන්නේ කෙසේද?
4 ඔබේ බයිබල් පාඩම්වලට හා පවුලේ අයට උපකාර කිරීම: ඔබ සමඟ බයිබලය පාඩම් කරන අයටත් ඔබ සමඟ සමුළුවට සහභාගී වී “මහත් සභාවේදී” සහෝදර ආශ්‍රය භුක්ති විඳින්න ලැබෙනවා නම් එය මොනතරම් ප්‍රීතිය ගෙන දෙන්නක්ද! (ගීතා. 22:25) ඔවුන්ට මේ බව කල් ඇතුව දැනුම් දීම තුළින් ඔවුන්ට ඒ දවස් වෙන් කර ගත හැකියි. සමුළුවලට සහභාගී වීමට ඔබ තුළ පෙළඹීමක් ඇති වීමට හේතු වන දේවල් ගැන ඔවුන් සමඟ කතා කරන්න. සමුළු දර්ශන ඇතුළත් වීඩියෝ පට ඔබේ බයිබල් ශිෂ්‍යයන්ට පෙන්වීම මගින් ඔවුන්ට සමුළුව ගැන යම් අදහසක් ලබා ගැනීමට හැකි වේවි. විශේෂයෙන්ම “දිව්‍ය ඉගැන්වීම් මගින් එක්සත් කරනු ලැබ” (ඉංග්‍රීසියෙන්) නමැති වීඩියෝ පටය මේ සඳහා වඩාත් උචිතයි. සත්‍යයේ නැති ඔබේ පවුලේ අයටත් ඔබේ සැලසුම් ගැන කියන්න. සමහරවිට ඔවුන් ඔබ සමඟ සමුළුවේ නාට්‍යය නැරඹීමට හෝ එක දවසක් සමුළුවට පැමිණීමට තීරණය කළ හැකියි.
5. අපට 1 තිමෝති 6:18හි පෙන්වා ඇති ත්‍යාගශීලීකම පෙන්විය හැක්කේ කෙසේද?
5 ඔබේ සහෝදර සහෝදරියන්ට උපකාර කරන්න: යම් වත් පොහොසත්කමක් තිබෙන සහෝදරයන්ට “යහපත්කම් කිරීමටත්, යහපත් ක්‍රියාවලින් පොහොසත්ව සිටීමටත්, ත්‍යාගශීලී වීමටත්, බෙදාගැනීමට සූදානම්ව” සිටින්නත් කියා පාවුල් දිරිගැන්වුවා. (1 තිමෝ. 6:17, 18) මහලු අයට, අබල දුබල අයට, පූර්ණ කාලීන සේවයේ යෙදෙන අයට, තනි මාපියන්ට හා සභාවේ සිටින උපකාර අවශ්‍ය වෙනත් අයට අත හිත දීමෙන් පාවුල් පැවසූ ආකාරයට ත්‍යාගශීලීකම පෙන්වීමට අපට හැකියි. එවැනි තත්වයන්වල සිටින අයගේ පවුලේ අය සත්‍යයේ සිටිනවා නම් ඒ අයට අවශ්‍ය දෑ සැපයීම මූලිකවම පවුලේ අයගේ වගකීම වූවත් සභාවේ වැඩිමහල්ලන්ට හා අනෙකුත් අයට අවශ්‍යතාව අනුව උපකාර සැපයිය හැකියි.—ගලා. 6:10; 1 තිමෝ. 5:4.
6. සමුළු දවස්වලදී නවාතැන් අවශ්‍ය අයට ඒවා ලබා ගැනීම සඳහා කර තිබෙන සැලසුම් මොනවාද?
6 නවාතැන් පහසුකම්: ඈත පළාත්වල සිටින සමහර අය සමුළුව කාලයේදී නවාතැන් ගැනීමට තමන් විසින් සැලසුම් කර ගත් ස්ථාන තිබිය හැකියි. ඒත් සමහර අයට එවැනි සැලසුම් කර ගත නොහැකි අතර තවත් සමහර අයට විශේෂ අවශ්‍යතා තිබිය හැකියි. එවැනි අයට උපකාර ලබා දීමට කාමර අංශය සූදානම්ව සිටිනවා. ඔබේ සභාවේ ලේකම්ගෙන් කාමර ඉල්ලුම් කිරීම සඳහා පෝර්මයක් ලබාගෙන එය පුරවා ඔහුට භාර දෙන්න. එවිට සමුළුවේ කාමර අංශයට එය භාර දීමට ඔහුට හැකි වෙයි.
7, 8. සමුළුවක් ආරම්භ කිරීමට පෙර මොන වගේ දේවල් සැලසුම් කළ යුතුද? (ආ) අප වෙනුවෙන් වෙහෙස මහන්සි වී කර තිබෙන වැඩවලට අපේ කෘතඥතාව පෙන්විය හැක්කේ කෙසේද? (හෙබ්‍රෙ. 13:17 කියවන්න.)
7 සැලසුම්වලට සහයෝගය දක්වන්න: සමුළු භූමියට ඇතුල් වන විට සමුළුව සංවිධානය කිරීම සඳහා මහත් වෙහෙසක් දරා තිබෙන බව ඔබට දැකිය හැකියි. පරිවාරකයන් ලෙස සේවය කරන ප්‍රේමණීය සහෝදරයන් අපිව පිළිගෙන, වැඩසටහන් පත්‍රිකාවක් ලබා දෙනවා පමණක් නොව ආසනයක් සොයා ගැනීමටද උපකාර කරනවා. සහෝදර සහෝදරියන් එම ස්ථානය පිරිසිදු කර අලංකාර වේදිකාවක් නිම කර තිබෙනවා ඔබට දැකිය හැකියි. අපට නොපෙනුණද ඒ වැඩසටහනේ කොටස් සුදානම් වීමට හා වෙනත් අවශ්‍යතා ඉටු කිරීම සඳහා සහෝදරයන් බොහෝ වෙහෙස මහන්සි වී තිබෙනවා.
8 සමුළුවක් සුදානම් කිරීම සඳහා බොහෝදෙනෙක් මාස ගණන් වෙහෙස වී වැඩ කරනවා. මෙලෙස වෙහෙස මහන්සි වන අයගේ පවුලේ අය ඔවුන්ට සහයෝගය දැක්වීම තුළින් ඔවුන්ද මේ වැඩවලට සහභාගී වී තිබෙනවා කියා කිව හැකියි. අපට සමුළුවෙන් ප්‍රයෝජන ගැනීම සඳහා මොවුන් කර තිබෙන පරිත්‍යාගයන් අප අගය කළ යුතුයි. අපිට මේ ලිපියෙන් මෙන්ම අනාගතයේදී සමුළුව සම්බන්ධයෙන් ලැබෙන උපදෙස්වලටද අවනත වීම මගින් අපේ කෘතඥතාවය පෙන්විය හැකියි. (හෙබ්‍රෙ. 13:17) හැමෝම සහයෝගය දීම තුළින් “සියල්ල විනීතවද පිළිවෙළකටද” කළ හැකි වෙයි.—1 කොරි. 14:40.
9. අපේ කාලයේදී දෙවිගේ සෙනඟ එක් රැස්වීම මෙතරම් වැදගත් මන්ද? (ආ) අප එක් එක්කෙනාට දැන් සිටම කළ හැක්කේ කුමක්ද?
9 “ඒ දවස ළං වන”බැවින් දෙවිගේ සෙනඟට මෙවැනි රැස්වීම් ඉතා අවශ්‍යයි. (හෙබ්‍රෙ. 10:25) යෙහෝවා දෙවි ඔහුගේ ‘සියලු වචන පැවැත්වීම’ අපෙන් බලාපොරොත්තු වෙනවා. අපේ සමුළුවලදී විශ්වාසවන්ත නුවණැති දාස පංතිය මේ සඳහා අවශ්‍ය උපකාරය සපයනවා. (ද්වි. 31: 13) “යේසුස්ව ආදර්ශයට ගනිමු” යන දිස්ත්‍රික් සමුළුවේ දවස් තුනටම සහභාගී වීමට දැන් සිටම සැලසුම් කරන්න. ඔබ දවස් තුනම සහභාගී වෙනවා නම් ඔබේ ඇදහිල්ල ශක්තිමත් කරන බොහෝ දේවල් ඉගෙනගත හැකි අතර සහෝදරයන්ව ආශ්‍රය කිරීමෙන් මහත් ආස්වාදයක්ද ලැබෙනවා නිසැකයි!
[3වන පිටුවේ කොටුව]
වැඩසටහන් පැවැත්වෙන වේලාව
සිකුරාදා සහ සෙනසුරාදා
පෙ.ව. 9:20-ප.ව. 5:05
ඉරිදා
පෙ.ව. 9:20-ප.ව. 4:10