යෙහෝවාගේ සාක්ෂිකරුවන්ගේ “ගැලවීම අත ළඟයි!” නමැති 2006 දිස්ත්‍රික් සමුළුව
1. ඉපැරණි කාලවල විසූ දෙවිගේ ජනයා සැබෑ නමස්කාරයට තම අගය පළ කළේ කෙසේද? ඒ හා සමානව අද දිනත් අපට තිබෙන ප්‍රස්තාව කුමක්ද?
1 ඉපැරණි යූදා රාජ්‍යයේ හෙසකියා රජ, ධාවකයන් අත සෙනඟට ලියුම් යවමින් යෙරුසලමට රැස් වෙන ලෙස ඇරයුම් කළා. (2 ලේක. 30:6, 13) ජනයා දැක්වූ ප්‍රතිචාරයෙන්, සැබෑ නමස්කාරය ගැන ඔවුන්ගේ ආකල්පය හෙළි වුණා. (2 ලේක. 30:10-12) ඒ හා සමානව, ඉදිරි මාසවලදී අද සිටින යෙහෝවාගේ ජනයාට ප්‍රස්තාවක් උදා වෙනවා. එකට එකතු වී යෙහෝවාට නමස්කාර කිරීමට තිබෙන වරප්‍රසාදයට තමන්ගේ හෘදයාංගම අගය කිරීම පෙන්වන්නටයි එම ප්‍රස්තාව උදා වෙන්නේ. “ගැලවීම අත ළඟයි!” නම් වූ දිස්ත්‍රික් සමුළුවට පැමිණෙන මෙන් ආරාධනා කොට ඔබේ සභාවන්ට ලිපියක් එවා තිබෙනවා. ඔබ ඒ ආරාධනයට ප්‍රතිචාරය දක්වන්නේ කෙසේද?
2. සමුළුවෙන් පූර්ණ ප්‍රයෝජන ගැනීමට අපට දැන් කුමක් කළ හැකිද?
2 දැන් සිටම සූදානම් වෙන්න: අප වෙනුවෙන් ඉතා ප්‍රේමණීය ලෙස සූදානම් කර තිබෙන මෙම වැඩසටහනින් උපරිම ප්‍රයෝජන ගැනීමට නම්, අප මුළු වැඩසටහනටම සහභාගි විය යුතුයි. ඔබේ මුළු පවුලම දවස් තුනටම සහභාගි වන පිණිස දැන් සිටම සැලසුම් කරන්න. (හිතෝ. 21:5) රැකියාවෙන් නිවාඩු ලබාගැනීමට දැන්ම කටයුතු කරන්න. ඔබේ සැමියා හෝ බිරිඳ සාක්ෂිකරුවෙක් නොවේ නම්, දැන් සිටම ඔහු හෝ ඇය සමඟ ඒ ගැන කතා කරන්න. නවාතැන් පහසුකම් සලසා ගන්න. ඔබේ බයිබල් ශිෂ්‍යයන්ටද සෑම දවසකම සහභාගි වීමට දිරිගන්වන්න. මේ වැදගත් කාරණා අන්තිම මොහොතට දමාගන්න එපා. ඒ ගැන යෙහෝවා දෙවිට යාච්ඤා කරන්න. “ඔහු එය ඉෂ්ට කරන්නේය.”—ගීතා. 37:5.
3. නවාතැන් සොයා ගැනීමට බැරි අයට ලබාගත හැකි උපකාරය කුමක්ද?
3 නවාතැන් සූදානම් කරගන්න: බොහෝදෙනෙක් කොළඹ හා යාපනයට වසර ගණනාවක් මුළුල්ලේ සමුළු සඳහා පැමිණ තිබෙනවා. ඒ නිසා සමුළු පැවැත්වෙන දිනවල සෑම වසරකම නවාතැන් දෙන මිත්‍රයන් හා වෙනත් අය ඔවුන්ට සිටිනවා. හැකිනම් තමන්ගේම නවාතැන් සූදානම් කරගන්නා ලෙසයි අපි හැකි සෑම කෙනෙකුගෙන්ම ඉල්ලා සිටින්නේ. තමන්ටම නවාතැන් සපයා ගන්න හැකියාවක් නැති අයට සහ විශේෂ අවශ්‍යතා ඇති අයට නවාතැන් සොයා දීමට නවාතැන් භාර අංශයට හැකි වේවි. කාමර සඳහා ඉල්ලුම් පත් කිහිපයක් සෑම වැඩිමහල්ලන්ගේ මණ්ඩලයකටම යවනවා. නවාතැන් අවශ්‍ය අයට ඉල්ලුම් කිරීම සඳහා සහය වීමට සභා ලේකම්ට හැකියි. ඒ වගේම ඉල්ලුම් කළ අයගේ නවාතැන් අයදුම් පත් පෝරමයේ සඳහන් උපදෙස්වලට අනුව, අනුමත කළ හැකිදැයි සේවා කමිටුව සොයා බලනවා. මෙසේ අයදුම් කළ හැක්කේ යහපත් හැසිරීමක් පෙන්වන ආදර්ශවත් ප්‍රචාරකයන්ට පමණයි. ඔවුන්ට දරුවන් සිටී නම්, ඔවුන්ද හොඳින් හැසිරෙන දරුවන් විය යුතුයි. යම් ඉල්ලීමක් පිළිබඳව යම් තොරතුරු දැනගැනීමට අවශ්‍ය නම්, ඒ ගැන නවාතැන් භාර අංශය සභා ලේකම්ගෙන් විමසනවා ඇති.
4. විශේෂ අවශ්‍යතා ඇති අයට සැලකිල්ල දැක්විය හැක්කේ කොහොමද?
4 විශේෂ අවශ්‍යතා: හිතෝපදේශ 3:27 මෙසේ කියනවා. “ඔබට පුළුවන්කම තිබෙන විට ලැබිය යුතු අයගෙන් යහපත නොවළක්වන්න.” සමුළුව සම්බන්ධයෙන් කල්පනා කරද්දී, අනුන්ට යහපතක් කිරීමට ඔබට හැක්කේ කොහොමද? වයසක අයට, ආබාධිත අයට, පූර්ණ කාලීන සේවය කරන අයට සහ තවත් සමහර අයට ප්‍රවාහන හෝ නවාතැන් ඇතුළු ප්‍රායෝගික උපකාර අවශ්‍ය වෙන්න පුළුවන්. එවැනි අයගේ අවශ්‍යතා ඉටු කරන්න මූලිකව වගකීම් තිබෙන්නේ පවුලේ අයටයි. (1 තිමෝ. 5:4) ඒ අයට නොහැකිනම්, අනෙක් සහෝදර සහෝදරියන්ට හැකියි ඒ සඳහා උපකාර පිරිනැමීමට. (ගලා. 6:10) සභා පොත් පාඩම් අවේක්ෂකයන් තමන්ගේ කණ්ඩායමේ විශේෂ අවශ්‍යතා ඇති අය ගැන සොයා ඒවා සපුරා දීමට පියවර ගැනීම අවශ්‍යයි. එමෙන්ම විශේෂ අවශ්‍යතා ඇති අයට සැලකිල්ල දැක්වීම සභා සේවා කමිටුවේද වගකීමක්.
5. සමුළුවේදී වැඩි ප්‍රීතියක් අද්දැකීමට අපට හැකි එක් ක්‍රමයක් කුමක්ද?
5 ස්වේච්ඡා සේවකයන්: සමුළුවට පැමිණ වැඩසටහන භුක්ති විඳීමෙන්ද සහෝදර සහෝදරියන් සමඟ ඇසුරු කිරීමෙන්ද මහත් ප්‍රීතියක් හැමෝටම ලැබෙන බව නිසැකයි. එමෙන්ම සමුළුව සාර්ථක කරගැනීමට කළ යුතු වැඩ කටයුතුවලට ස්වේච්ඡාවෙන් හවුල් වන අයට ඊටත් වඩා ප්‍රීතියක් ලැබිය හැකියි. (ක්‍රියා 20:35) සමුළු කමිටු විසින් මේ සඳහා බොහෝදෙනෙකුට ළඟදීම ආරාධනා කරාවි. මේ සඳහා ඔබටත් ඉදිරිපත් වෙන්න පුළුවන්ද?—ගීතා. 110:3.
6. දිස්ත්‍රික් සමුළුව ඔබ අගය කරන්නේ ඇයි? ඔබේ අධිෂ්ඨානය කුමක් විය යුතුද?
6 දිස්ත්‍රික් සමුළුවට සහභාගි වී සිටි පස් හැවිරිදි දරුවෙක් මෙසේ කීවා. “මං හරිම ආසයි සමුළුවට ඇවිල්ලා යෙහෝවා දෙවිට නමස්කාර කරන්න.” මේ කුඩා දරුවාගේ හෘදයාංගම වචනවලින් අපට වැටහෙන්නේ මොනවාද? අපටත් සමුළුවලින් කොතරම් ප්‍රීතියක් භුක්ති විඳිය හැකිද යන්නයි. ගීතිකාකාර දාවිත් ගායනා කළෙත් මෙසේයි. “ඔබගේ මණ්ඩපවල එක් දවසක් දවස් දහසකට වඩා යහපත.” (ගීතා. 84:10) ‘යෙහෝවාගේ අලංකාරය දකින්ටත් ඔහුගේ මාලිගාවේදී භාවනා කරන්ටත් ඔහුගේ ජීවිතයේ සියලු දවස්වලදී යෙහෝවාගේ ගෘහයේ වාසය කිරීමටත්’ දාවිත් ගීතිකාවෙන් තම ආශාව පළ කළා. (ගීතා. 27:4) යෙහෝවාට නමස්කාර කරන අය අතර සිටීමට දාවිත් මහත් ආශාවක් දැක්වුවා. අපිත් එසේ වෙමු. “ගැලවීම අත ළඟය!” දිස්ත්‍රික් සමුළුවේ දවස් තුනටම සහභාගි වෙමින් අපිත් සැබෑ නමස්කාරයට අපේ හෘදයාංගම අගය පළ කරමු.
[4වන පිටුවේ කොටුව]
වැඩසටහන් වේලාවන්
සිකුරාදා සහ සෙනසුරාදා
පෙ.ව. 9:30 - ප.ව. 5:05
ඉරිදා
පෙ.ව. 9:30 - ප.ව. 4:10
[4වන පිටුවේ කොටුව]
“ගැලවීම අත ළඟයි!” දිස්ත්‍රික් සමුළුව පැවැත්වෙන දිනයන් හා ස්ථාන
වර්ෂ 2006 අගෝස්තු 11-13
කොළඹ, ප්‍රේමදාස ක්‍රීඩාංගණය, ඛෙත්තාරාම පාර, කොළඹ 14
භාෂාව: ඉංග්‍රීසි, සිංහල, දෙමළ (සංඥා භාෂාවද ඇතුළුව)
චාරිකා: 1A, 1B, 2A, 2B, 3A, 3B, 3C, 4A, 4B, 4D
වර්ෂ 2006 අගෝස්තු 25-27
යාපනය, වීරසිංහම් ශාලාව, යාපනය
භාෂාව: දෙමළ
චාරිකා: 4C