වසර 2005 “දෙවිට කීකරු සේවකයෝ” නමැති යෙහෝවාගේ සාක්ෂිකරුවන්ගේ දිස්ත්‍රික් සමුළුව
1 අපගේ උදාර උපදේශකයාණන් වන යෙහෝවා දෙවි ඔහුගේ මාර්ග අපට ඉගැන්වීම සඳහා අපව එක්රැස් කිරීමට කටයුතු සැලසුම් කරනවා. (යෙසා. 30:20, 21; 54:13) ඔහු මෙය කරනු ලබන්නේ විශ්වාස නුවණැති දාසයා වාර්ෂිකව සැලසුම් කරන අපගේ දිස්ත්‍රික් සමුළු වැනි රැස්වීම් තුළිනුයි. (මතෙ. 24:45-47) අපගේ හැඟීම් ගීතිකාකරුගේ හැඟීම්වලට සමානයි. ඔහු ගායනා කළේ “සභාවලදී යෙහෝවාට ආශීර්වාද කරන්නෙමි” කියායි. (ගීතා. 26:12) යෙහෝවාගෙන් ඉගෙනගැනීමේ ඇති වටිනාකම දාවිත් හොඳින් තේරුම්ගත් අතර ඔහුගේ සෙනඟ එක්රැස් වන ඕනෑම අවස්ථාවක ඔවුන් සමඟ සිටීමට ඔහු අදිටන් කරගත්තා.
2 මෙම වසරේ පැවැත්වෙන “දෙවිගේ කීකරු සේවකයෝ” නම් දිස්ත්‍රික් සමුළුවට සහභාගි වන පිරිස අතර ඔබත් සිටිනු ඇද්ද? එසේනම්, ඔබ ඊට සහභාගිවීමට සූදානම් වෙද්දී මතු දැක්වෙන තොරතුරු ඔබට උපකාරවත් වෙයි.
3 සෑම දිනකම සහභාගි වීමට දැන්ම සැලසුම් කරන්න: “කඩිසර ඇත්තාගේ සිතිවිලි අභිවෘද්ධිය පිණිසම වේ.” (හිතෝ. 21:5) සමුළුවට සහභාගිවීමට පමා නොවී සැලසුම් යෙදීමේ වටිනාකම එම වදන්වලින් අවධාරණය කරන්නේ නැද්ද? සමුළු පවත්වන දින සහ වේලාවන් දැනගැනීමට කොටුව බලන්න. දේවවචනය පිළිබඳ අවබෝධයක් ලබා දෙන මෙම වැඩසටහනේ එක් දෙයක්වත් අතපසු නොකර දින තුනටම සහභාගි වීම සඳහා දැන්ම නැණවත් ලෙස සැලසුම් යොදන්න. ඔබේ රැකියා ස්ථානයෙන් නිවාඩු ලබාගැනීමට අවශ්‍ය නම් නොපමාව ඒ ගැන ස්වාමියා සමඟ කතා කරන්න. ඔබේ නොඇදහිලිවන්ත කලත්‍රයා සමඟ මේ සම්බන්ධයෙන් කතා කිරීමට අවශ්‍ය නම් අන්තිම මොහොත වනතුරු ඉන්න එපා. ඔබ මොනයම් අභියෝගයකට මුහුණ දුන්නත් යෙහෝවාගේ උපකාරයෙන් “ඔබේ සිතිවිලි පිහිටුවනු ලබන්නේය” යන විශ්වාසය ඇතුව ඒ ගැන යෙහෝවාට යාච්ඤා කරන්න. (හිතෝ. 16:3) ඊට අමතරව, ඔබේ බයිබල් ශිෂ්‍යයන්ටත් සෑම සැසිවාරයකටම සහභාගි වීම සඳහා සූදානම් වීමට උපකාර කිරීම ප්‍රායෝගිකයි.
4 නවාතැන් පහසුකම්: ඔබේ පහසුව සඳහා සමුළු පැවැත්වෙන නගර දෙකේම නවාතැන් පහසුකම් ලබා දීමට කාමර අංශයක් පිහිටුවා තිබෙනවා. කාමර ඉල්ලුම් කිරීම සඳහා පෝරම ලබා දෙන්නේ හොඳ ස්ථාවරයක සිටින මෙන්ම හොඳින් හැසිරෙන දරුවන් සිටින ප්‍රචාරකයන්ට පමණයි.
5 විශේෂ අවශ්‍යතා: සමහර සහෝදරයන් තමාට “ශක්තිය සපයන උපකාරකයෝ වූ” බව ප්‍රේරිත පාවුල් කියා සිටියා. (කොලො. 4:7-11) ඔවුන් පාවුල්ට උපකාර කළ එක් ක්‍රමයක් නම් ඔහුගේ පෞද්ගලික අවශ්‍යතාවන් ඉටු කර දීමයි. සමුළුවට සහභාගි වීම සඳහා අන් අයට ‘ශක්තිය සපයන උපකාරකයෙක්’ වීමට ඔබට හැක්කේ කොහොමද? වයසක ප්‍රචාරකයන්ට, අබල දුබල අයට, පූර්ණ කාලීන සේවයේ නියුතු අයට සහ වෙනත් අයට ගමනාගමන පහසුකම් හෝ නවාතැන් පහසුකම් සඳහා උපකාර අවශ්‍ය විය හැකියි. මෙවැනි අයට උපකාර කිරීම සඳහා මූලික වගකීම තිබෙන්නේ ඔවුන්ගේම පවුල්වල අයටයි. (1 තිමෝ. 5:4) ඔවුන්ට එය කිරීමට හැකියාවක් නැති නම් සෙසු නමස්කාරකයන්ට හැකියි එම උපකාරය පිරිනමන්න. (යාකො. 1:27) සමුළුවට කලින් පොත් පාඩම් අවේක්ෂකයන් විසින් තම කණ්ඩායමේ විශේෂ අවශ්‍යතා ඇතුව සිටින අය ඊට සහභාගි වීම සඳහා නිසි සැලසුම් යොදා තිබෙනවාද කියා සොයා බැලිය යුතුයි.
6 වෙනත් සමුළුවකට යෑම: ප්‍රමාණවත් ආසන, පොත් පත් යනාදියේ හිඟයක් ඇති නොවීම සඳහා තමන්ගේ සභාවට නියමිත සමුළුවට සහභාගි වන්න කියා ප්‍රචාරකයන්ට දිරිගන්වන්න කැමතියි. මෙය විශේෂයෙන්ම අදාළ වන්නේ එක්රැස්වීම් ශාලාවේ මුලින්ම පැවැත්වෙන සමුළු තුනටයි. යම් තත්වයන් නිසා ඔබට වෙනත් සමුළුවකට යෑමට සිදු වෙනවා නම් ඔබේ සභාවේ ලේකම්ගෙන් ඔබ යෑමට බලාපොරොත්තු වන සමුළුව පැවැත්වෙන ස්ථානය හා වේලාව දැනගන්න.
7 ස්වේච්ඡා සේවකයන් අවශ්‍යයි: අන් අයගේ අවශ්‍යතා කෙරෙහි යටහත් පහත් ලෙස අවධානය දීමෙන් යේසුස් පරිපූර්ණ ආදර්ශයක් තැබුවා. (ලූක් 9:12-17; යොහ. 13:5, 14-16) සමුළු තුළ ස්වේච්ඡාවෙන් වැඩ කිරීමට කැමති අයත් පිළිබිඹු කරන්නේ එවැනිම ස්වභාවයක්. සමුළු අංශවල අවශ්‍යතා සැපිරීම සඳහා සමුළු කමිටු විසින් තමන් සමඟ වැඩ කිරීමට වෙනත් අයටත් ළඟදීම ආරාධනා කරයි. වැඩිමහල්ලන් ස්වේච්ඡාවෙන් ඉදිරිපත් වී පැවරුම් පිළිගැනීමේ විශේෂ අවශ්‍යතාවක් තිබෙනවා. ඔවුන්ගේ ස්වේච්ඡාවෙන් ඉදිරිපත් වීමේ ස්වභාවය සභාවේ සිටින සෑම කෙනෙකුටම කදිම ආදර්ශයක් සපයනවා.—1 පේතෘ. 5:2, 3.
8 යෙහෝවා දෙවි “විශ්වාසවන්ත සේවකයා” මගින් තම සෙනඟට බයිබල් උපදෙස් ලබාගැනීම සඳහා එක්රැස්වීමට කටයුතු සැලසුම් කර තිබෙනවා. (ලූක් 12:42) දින තුනටම සහභාගිවීම සඳහා සූදානම් වීමට වෑයමක් දැරිය යුතු වුවත් එයින් ලැබෙන ප්‍රයෝජන මිල කළ නොහැකියි. “දෙවිගේ කීකරු සේවකයෝ” නමැති මෙම වසරේ දිස්ත්‍රික් සමුළුව අප යෙහෝවාට දැනුත් සදහටත් සේවය කිරීමට ගෙන තිබෙන අදිටන ශක්තිමත් කරන බව නිසැකයි. “දෙවිට සභාවලදී ආශීර්වාද කරන්න” කියා ගීතිකාකරු දුන් අවවාදය පිළිපැදීමට අපි අධිෂ්ඨාන කරගනිමු.—ගීතා. 68:26.
[Box on page 3]
වැඩසටහන් පැවැත්වෙන වේලාව
සිකුරාදා සහ සෙනසුරාදා
පෙ.ව. 9:30 - ප.ව. 5:05
ඉරිදා
පෙ.ව. 9:30 - ප.ව.4:10
සමුළු පැවැත්වෙන දින
[Box on page 4]
ජූලි 19-24 #1 කොළඹ 3C සහ 3B (සිංහල)*
ජූලි 26-31 #2 කොළඹ 3A සහ 2B (සිංහල)*
අගෝ. 2-7 #3 කොළඹ 1A , 1B සහ සංඥා භාෂාව (සිංහල)*
අගෝ. 9-14 #4 කොළඹ 2A (ඉංග්‍රීසි)*
අගෝ. 16-21 #5 කොළඹ 4A, 4B සහ 4D (දෙමළ)*
අගෝ. 23-28 #6 යාපනය 4C (දෙමළ)*
* පැවැත්වෙන්නේ යෙහෝවාගේ සාක්ෂිකරුවන්ගේ එක්රැස්වීම් ශාලාවෙයි. 44 අගරදගුරු පාර, ඒකල, ජා-ඇල.
* පැවැත්වෙන්නේ යාපනයේ වීරසිංහම් ශාලාවෙයි.