ඔබ ස්ථාවර පුරෝගාමි සේවය නතර කළ කෙනෙක්ද?

1. බොහෝදෙනෙක් ප්‍රීතියෙන් හවුල් වී තිබෙන්නේ කුමන කාර්යයේද? සමහරුන්ට නැවත සිතා බලන්න පුළුවන් කුමක් ගැනද?

¹ අවුරුදු ගණනාවක් පුරා බොහෝදෙනෙක් ‘ශුභාරංචිය ප්‍රකාශ කිරීමේ හා ඉගැන්වීමේ කාර්යයෙහි’ පූර්ණකාලීනව හවුල් වී තිබෙනවා. (ක්‍රියා 5:42) නමුත් සමහරුන් විවිධ හේතු නිසා ස්ථාවර පුරෝගාමි සේවය නතර කර තිබෙනවා. ඔබත් එවැනි කෙනෙකු නම් එම සේවය නැවත ආරම්භ කිරීම ගැන සිතා බලන්න පුළුවන්ද?

2. කලින් පුරෝගාමි සේවය කළ අය නැවත ඒ ගැන කල්පනා කළ යුත්තේ ඇයි?

² තත්වයන් වෙනස් වෙයි: එදා පුරෝගාමි සේවය නතර කිරීමට ඔබට හේතු වූ දෙය දැන් වෙනස් වී ඇති. ඔබ එය නතර කළේ පැය 90ක අවශ්‍යතාව සපුරාගැනීමට නොහැකි නිසා නම් දැන් එය පැය 70 දක්වා අඩු කර තිබෙන නිසා නැවතත් ඔබට එහි හවුල් විය හැකිද? නැවත පුරෝගාමි සේවය කිරීමට හැකි වන පරිදි ඔබේ පවුලේ වගකීම් අඩු වී තිබෙනවාද? නැත්නම් රැකියාවට යෙදවූ කාලය අඩු කරගැනීමට හැකි වී තිබෙනවාද? අසනීප නිසා පුරෝගාමි සේවය නතර කළ සහෝදරියක් 89වන වියේදී නැවත එය ආරම්භ කළා. ඊට හේතුව රෝහල්ගත වීමට තරම් අසනීපයක් අවුරුද්දකට වැඩි කාලයක් පුරා ඇයට නොතිබීමයි. ඒ නිසා පුරෝගාමි සේවය කිරීමට ප්‍රමාණවත් සෞඛ්‍යයක් දැන් තමන්ට තිබෙන බව ඇය පැවසුවා.

3. එක් අයෙකුට හෝ පුරෝගාමි සේවයේ හවුල් වීමට පවුලේ අනික් අයට සහාය වෙන්න පුළුවන් කොහොමද?

³ සමහරවිට ඔබ කලින් ස්ථාවර පුරෝගාමි සේවය කර නැතුව ඇති. නමුත් එහි හවුල් වී එය නතර කළ කෙනෙක් ඔබේ පවුලේ සිටිනවා විය හැකියි. ඊට හේතු වුණේ අසනීපව සිටින පවුලේ කෙනෙකුව හෝ මහලු දෙමාපියන්ව බලාගැනීමට සිදු වීම විය හැකියි. (1 තිමෝ. 5:4, 8) එසේනම් ඔහුට හෝ ඇයට නැවත පුරෝගාමි සේවය කිරීම සඳහා සහාය වීමට ඔබට හෝ පවුලේ අනික් අයට පුළුවන්ද? පවුලක් ලෙස ඒ ගැන සාකච්ඡා කිරීමට ඔබට හැකිද? (හිතෝ. 15:22) පවුලේ එක් අයෙකුට හෝ පුරෝගාමි සේවය කිරීමට හැකි වන ලෙස අනික් අයට ඊට සහාය විය හැකිද? එසේ කරන විට තමන්ද පුරෝගාමි සේවයට දායක වුණා යන හැඟීම ඇති කරගන්න ඔවුන්ට පුළුවන්.

4. දැන් ඔබට පුරෝගාමි සේවයේ හවුල් වීමට නොහැකි නම් කුමක් කළ හැකිද?

⁴ ඔබ දැන් සිටින තත්වයට අනුව නැවත ස්ථාවර පුරෝගාමියෙකු වීමට නොහැකි නම් ඒ ගැන අධෛර්යය වෙන්න එපා. ඒ සඳහා ඔබේ ආශාව ගැන යෙහෝවා දෙවි හුඟක් සතුටු වෙනවා. (2 කොරි. 8:12) කලින් පුරෝගාමි සේවය කරද්දී ඔබ ලැබූ පුහුණුව උපරිමයෙන් යොදාගන්න. ඔබේ ආශාව ගැන දෙවිට පවසන්න. නැවත පුරෝගාමි සේවය කිරීමට උදා වන ප්‍රස්තා ගැන හොඳ අවධානයකින් සිටින්න. (1 යොහ. 5:14) සමහරවිට ඉදිරියේදී ඔබට නැවත ස්ථාවර පුරෝගාමියෙකු ලෙස “සේවය කිරීම සඳහා විශාල ප්‍රස්තාවක්” යෙහෝවා දෙවි උදා කර දෙයි.—1 කොරි. 16:9.