යහපත් ක්‍රිස්තියානීන් වෙමු
සාකච්ඡාවකට යෝජනා ප්‍රයෝජනයට ගන්න පුළුවන් කොහොමද?
2018 ජනවාරි මාසයේ ඉඳන් ‘ක්‍රිස්තියානි ජීවිතය සහ දේවසේවය වැඩපොතේ’ මුල් පිටුවේ සාකච්ඡාවකට යෝජනා පළ වෙනවා. ඒවා ප්‍රයෝජනයට ගන්න පුළුවන් කොහොමද?
ශිෂ්‍ය පැවරුම් ඉටු කරද්දී: පැවරුම කරද්දී ඒකට අදාළව සාකච්ඡාවකට යෝජනාවේ තියෙන ප්‍රශ්නය, බයිබල් පදය සහ ඊළඟ හමු වීමට ප්‍රශ්නය ඔයා යොදාගන්න ඕනේ. හැබැයි සාකච්ඡාවකට යෝජනා සඳහා සකස් කරලා තියෙන වීඩියෝ එකේ හැම වචනයක්ම ඒ විදිහටම කියන්න ඕනෙ නැහැ. පැවරුමට යොදාගන්න පසුබිම, හැඳින්වීම, තර්කයන් වගේ දේවල් කැමති විදිහට සකස් කරගන්න පුළුවන්. ඉගැන්වීම් කට්ටලයෙන් ප්‍රකාශනයක් ඉදිරිපත් කරන්න කියලා වැඩපොතේ සඳහන් වෙලා නොතිබුණත් එයින් එකක් ඉදිරිපත් කරන්න පුළුවන්.
සේවයේ හවුල් වෙද්දී: සාකච්ඡාවකට යෝජනා සකස් කරලා තියෙන්නේ සේවයේ හවුල් වෙන්න පුළුවන් විදිහ ගැන යම් අදහසක් ලබා දෙන්නයි. කෙනෙක් උනන්දුවක් දක්වනවා නම්, ප්‍රශ්න අහනවා නම් සාකච්ඡාව දිගටම කරගෙන යන්න පුළුවන්. කැමති නම් නැවත බැලීමට අදාළ යෝජනාවේ සඳහන් තොරතුරුත් සාකච්ඡාවට ඇතුළත් කරන්න පුළුවන්. පුද්ගලයන්ට ගැළපෙන විදිහට සාකච්ඡාවට යෝජනාවේ තියෙන තොරතුරු සකස් කරගන්නත් වෙනස්ම විෂයක් ගැන කතා කරන්නත් ඔයාට පුළුවන්. පහුගිය මාසයක වැඩපොතේ සඳහන් වුණු විෂයක් හරි බයිබල් පදයක් හරි සේවයේ යන ප්‍රදේශයේ ඉන්න අයට හොඳින්ම ගැළපෙනවා කියලා හිතෙනවා නම් ඒවා පාවිච්චි කරන්නත් පුළුවන්. මෑතකදී සිද්ධ වුණු දෙයක් ගැන නැත්නම් ප්‍රවෘත්තිවල සඳහන් වුණු දෙයක් ගැන කතා කරන්න මිනිසුන් උනන්දුවක් පෙන්වනවා නම් ඒ වගේ දෙයකින් සාකච්ඡාවක් ආරම්භ කරන්නත් පුළුවන්. සාකච්ඡාවකට යෝජනාවේ සඳහන් තොරතුරු ඔයා මොන විදිහට යොදාගත්තත් ඔයාගේ ඉලක්කය වෙන්න ඕනෙ ‘ශුභාරංචිය සියලුදෙනාටම ප්‍රකාශ කරන එකයි.’—1කොරි 9:22, 23.