මෙතෙක් සිදු කර තිබෙන විශාලතම දේශනා කිරීමේ කාර්යය
ශුභාරංචිය දේශනා කිරීමේ කාර්යය සඳහා යෙහෝවා දෙවිගේ සාක්ෂිකරුවන් කටයුතු සංවිධානය කරනු ලැබුවේ මීට අවුරුදු 100කට වැඩි කාලයකට ඉහතදීයි. (1 කොරි. 9:23) මෙතෙක් සිදු කර ඇති දැවැන්තම දේශනා කිරීමේ කාර්යය රටවල් 230කට වැඩි ගණනක භාෂා සිය ගණනකින් සිදු කරනු ලබනවා. (මතෙ. 24:14) මෙලෙස ශුභාරංචිය දේශනා කිරීම අවශ්‍ය වන්නේ ඇයි? එය ලොව පුරාම සිදු කරන්නේ කෙසේද?
ශුභාරංචිය සැමට පැවසීමට සංවිධානය වී සිටින යෙහෝවා දෙවිගේ සාක්ෂිකරුවෝ නමැති DVD තැටිය (Jehovah’s Witnesses—Organized to Share the Good News) නැරඹීමෙන් එම ප්‍රශ්නවලට පිළිතුරු දැනගත හැකියි. ලොව පුරා දේශනා කිරීමේ කාර්යය ගැන බොහෝ තොරතුරු මෙම DVD තැටියෙන් දැනගන්න පුළුවන්. ඔබ මෙය නරඹන විට මේ ප්‍රශ්න ගැන සිතා බලන්න. (1) අපේ සේවය සංවිධානය කරනු ලබන්නේ කෙසේද? (2) ලේඛන, පරිවර්තන, සේවා, චිත්‍ර හා ශ්‍රව්‍ය දෘශ්‍ය යනාදි අංශ ශුභාරංචියේ දේශනා කිරීමේ කාර්යයට දායක වන්නේ කෙසේද? (3) මහා පරිමාණයෙන් කරන මුද්‍රණ කටයුතු හා බෙදාහැරීමේ කටයුතුවල අරමුණ කුමක්ද? (යොහ. 17:3) (4) අවුරුද්දකදී කොපමණ පොත් පත් ප්‍රමාණයක් මුද්‍රණය කරනවාද? (5) බයිබලය මත පදනම් අපේ ප්‍රකාශනවලින් ඉටු කර තිබෙන කාර්යය කුමක්ද? (හෙබ්‍රෙ. 4:12) (6) දෘශ්‍යාබාධ හා ශ්‍රවණාබාධ තිබෙන අයටද දෙවි ගැන ඉගෙනගැනීමට උපකාර කරන්නේ කෙසේද? (7) අපේ වැඩකටයුතුවලට මුදල් ලැබෙන්නේ කෙසේද? (8) රෝහල් තොරතුරු අංශය, සේවා අංශය හා සමුළු අංශය යනාදියෙන් අපි ප්‍රයෝජන ලබන්නේ කෙසේද? (9) මේ DVD තැටිය නැරඹීමෙන් සාක්ෂිකරුවෙකු හැටියට පහත සඳහන් දේවල් කෙරෙහි ඔබේ අගය වැඩි වී තිබෙන්නේ කෙසේද? (අ) ශුභාරංචිය දේශනා කිරීම සඳහා දෙවිගේ සංවිධානය දරන වෑයම. (ආ) ලොව පුරා සිටින සියයකට වැඩි බෙතෙල් පවුල්වල සාමාජිකයන් කරන සේවය. (ඇ) අවේක්ෂකයන්ට හා මිෂනාරිවරුන්ට ලබා දෙන පුහුණුව. (ඈ) සෑම දවසක් ආරම්භයේදීම දිනපදය සාකච්ඡා කිරීම හා සෑම සතියකම රැස්වීම්වලට සූදානම් වීමේ වැදගත්කම. (ඉ) සමුළු ඇතුළු සියලුම රැස්වීම්වලට යෑමෙන් ලැබෙන ප්‍රයෝජන. (ඊ) පාරාදීස පොළොවේ අද්දකින ආශීර්වාද. (යෙසා. 11:9) (උ) අස්වැන්න නෙළීමේ කාර්යයේ හවුල් වීම.—යොහ. 4:35.
මෙම DVD තැටිය ඔබේ නෑදෑයන්ට, හිත මිතුරන්ට, නැවත බැලීම්වලට හා බයිබල් ශිෂ්‍යයන්ට පෙන්වද්දී ඔවුන් දැක්වූ ප්‍රතිචාර මොනවාද? මෙම DVD තැටිය හැකි ඉක්මනින් තවත් අයට පෙන්වීමට ඔබට හැකිද?—මතෙ. 28:19, 20.