ඔබව දැනුවත් කරන, පොලඹවන සහ ශක්තිමත් කරන මෙවලම්
1 බයිබලය ගැන සහ යෙහෝවාගේ සාක්ෂිකරුවන් ගැන ජනයාව දැනුවත් කිරීමේදී ඒවා ප්‍රබල බලපෑමක් ඇති කිරීමට සමත් වෙනවා. සත්‍යය වෙනුවෙන් නොසැලෙන ස්ථාවරයක සිටීමට ඒවා බොහෝදෙනෙකුව පොලඹවා තිබෙනවා. එමෙන්ම, දෙවිට කැප වූ අයගේ ඇදහිල්ල ඒවා මගින් ශක්තිමත් වී තිබෙනවා. මෙහිදී ඒවා කියා හඳුන්වන්නේ මොනවාද? යෙහෝවාගේ සංවිධානය විසින් නිපදවා ඇති වීඩියෝ පටයි. සංවිධානය විසින් දැනට නිපදවා තිබෙන වීඩියෝ පට දහයම ඔබ නරඹා තිබෙනවාද? ඒවා නරඹා දැන් කොතරම් කාලයක් ගත වී තිබෙනවාද? දේවසේවයේදී ඔබ ඒවා භාවිත කරනවාද? අපේ මුළු සහෝදර සංගමය නමැති එකළොස්වන වීඩියෝ පටය මුදාහැරීම ගැන පසුගිය දිස්ත්‍රික් සමුළුවේදී නිවේදනය කළා. දැනටමත් ඔබ එය ඉල්ලුම් කර හමාරද? මෙම කදිම මෙවලම්වලින් ඔබට උපරිම ප්‍රයෝජන අත් කරගන්න පුළුවන් කොහොමද?
2 වර්ෂ 1999 ජූලි 1 මුරටැඹ සඟරාවේ පළ වූ “පවුලක් වශයෙන් නිතිපතා දෙවිගේ වචනය අධ්‍යයනය කරන්න” නමැති මාතෘකාවෙන් යුත් ලිපියේ මෙසේ නිර්දේශ කර තිබුණා. ‘සමිතියේ වීඩියෝ පටයක කොටසක් නරඹා, අනතුරුව ඒ ගැන සාකච්ඡා කිරීමට ඔබේ පාඩම් වේලාවෙන් කොටසක් වෙන් කරන්න.’ මෙම කදිම උපදේශය සැලකිල්ලට ගනිමින් මාස දෙකකට වරක් සේවා රැස්වීමේදී වීඩියෝ පටයක විශේෂාංග සලකා බලන්න යනවා. සේවා රැස්වීමේදී ඒ ගැන සාකච්ඡා කරන්න කලින්, අදාළ වීඩියෝ පටය නරඹන්න කියා සභාවේ සෑම කෙනෙකුවම දිරිගන්වන්න අපි කැමතියි.
3 සමිතිය විසින් මුලින්ම නිපදෙවූ වීඩියෝ පටය වන යෙහෝවාගේ සාක්ෂිකරුවන්ගේ සංවිධානය හඳුනාගනිමු නමැති වීඩියෝ පටයේ විශේෂාංග මේ මාසයේදී සලකා බලන්න යනවා. මතු දැක්වෙන ප්‍රශ්නවලට උත්තර සොයාගැනීම සඳහා ඒ වීඩියෝ පටය නැරඹීමේදී එයට හොඳ අවධානයක් දෙන්න.
◼ යෙහෝවාගේ සාක්ෂිකරුවන් ප්‍රසිද්ධව සිටින්නේ කුමක් සඳහාද?
◼ බෙතෙල්හි කරන සෑම දෙයක්ම එකඟ වන්නේ කුමන ශුද්ධ ලියවිලි පාඨය සමඟද?
◼ පොත් පත්වලට ඇතුළත් කිරීම සඳහා ඡායාරූප ගත කරන, අඳින හා රඟ දක්වන බයිබල් දර්ශනය කුමක්ද?
◼ අපේ පොත් පත් පිළියෙළ කරන ආකාරය සම්බන්ධයෙන් ඔබේ සිත්ගත්තේ කුමක්ද?
◼ වර්ෂ 1920 සිට 1990 දක්වා කාලය තුළ සමිතිය කොපමණ පොත් පත් ප්‍රමාණයක් මුද්‍රණය කර තිබෙනවාද?
◼ බෙතෙල් සේවය සඳහා සුදුසුකම් ලබනු ඇත්තේ විශේෂයෙන්ම දෙවිගේ සෙනඟ අතර සිටින මොන වගේ අයද?—හිතෝ. 20:29.
◼ බෙතෙල් පවුල යෙහෝවාගේ සාක්ෂිකරුවන් සියලුදෙනා සඳහා කදිම ආදර්ශයක් වන්නේ කිනම් ආකාරවලින්ද?
◼ හැකි තරම් පිරිසකට ශුභාරංචිය දැනගැනීමට සැලැස්වීම සඳහා බෙතෙල්හි සිටින අය කරන වැඩ කටයුතු ගැන ඔබට ඇති වුණේ මොන වගේ හැඟීමක්ද?
◼ ලෝක ව්‍යාප්ත වැඩයට මුදල් ලැබෙන්නේ කොහෙන්ද?
◼ අපිට ජ්වලිතව හවුල් විය හැකි සේවය කුමක්ද? තවද එහි හවුල් වීමේදී අපිට තිබිය යුත්තේ කිනම් ස්ප්‍රීතුවක්ද?—යොහන් 4:35; ක්‍රියා 1:8.
◼ යෙහෝවාගේ සාක්ෂිකරුවන්ගේ සංවිධානය ගැන ඔබට හැඟෙන්නේ කෙසේද?
◼ මෙම වීඩියෝ පටය ඔබට දේවසේවයේදී යොදාගත හැක්කේ කෙසේද?
බයිබලය—නිවැරදි ඉතිහාසය හා විශ්වාස කළ හැකි අනාවැකි අඩංගු පොතකි නමැති වීඩියෝ පටයේ විශේෂාංග දෙසැම්බර් මාසයේදී සලකා බලන්න යනවා.