වීඩියෝ කොන්ෆරන්ස් හරහා සභා රැස්වීම් පැවැත්වීම

සමාජ දුරස්ථභාවය පවත්වගන්න කියලත් ප්‍රසිද්ධ රැස්වීම් පවත්වන්න එපා කියලත් ලෝකේ හුඟක් ආණ්ඩු මහජනතාවගෙන් ඉල්ලලා තියෙනවා. යෙහෝවා දෙවිගේ සාක්ෂිකරුවන් ඒ ඉල්ලීමට කීකරු වෙන අතරේ දිගටම එයාලගේ රැස්වීම් පවත්වන්න සැලසුම් කරලයි තියෙන්නේ. සාක්ෂිකරුවන්ගේ හුඟක් සභාවල රැස්වීම් පවත්වන්නේ Zoom වගේ වීඩියෝකොන්ෆරන්සිං ඇප් පාවිච්චි කරලයි.

හැමෝගෙම ආරක්ෂාව ගැන හිතලා දිගටම රැස්වීම් පවත්වන්න පුළුවන් වෙන විදිහේ සැලැස්මක් යොදන්න පාලක මණ්ඩලය එයාලගේ අනුමැතිය දීලා තියෙනවා. ඒ තමයි ලෝක ව්‍යාප්ත සම්මාදම් පාවිච්චි කරලා Zoom ගිණුම් මිල දී ගන්න ඇති කරපු සැලැස්ම. ඒ සැලැස්ම හුඟක් සභාවලට ප්‍රයෝජනවත් වෙලා තියෙන්නේ ඇයි? සාමාන්‍යයෙන් Zoom ගිණුමක් මිල දී ගන්න ඩොලර් 15ත් 20ත් අතර මුදලක් හෝ ඊට වැඩි මුදලක් වැය වෙනවා. ඒ වගේ මුදලක් වැය කරන්න සමහර සභාවලට හුඟක් අමාරුයි. ඒ නිසා ඒ සභාවන් කළේ නොමිලේ ලබාගන්න පුළුවන් වීඩියෝකොන්ෆරන්සිං ඇප් පාවිච්චි කරපු එකයි. ඒත් ඒ ඇප් හරහා රැස්වීම්වලට සම්බන්ධ වෙන්න පුළුවන් වුණේ ටිකදෙනෙකුට විතරයි. ඒ වගේම ඒවා ඒ තරම් ආරක්ෂාකාරිත් නැහැ. ඒත් දැන් සංවිධානයෙන් Zoom ගිණුම් මිල දී අරන් තියෙන නිසා ඒ ගිණුම් පාවිච්චි කරන සභාවලට පුළුවන් වෙලා තියෙනවා වඩාත් ආරක්ෂාකාරීව රැස්වීම් පවත්වන්න. ඒ වගේම වැඩි පිරිසකට රැස්වීම්වලට සම්බන්ධ වෙන්නත් පුළුවන් වෙලා තියෙනවා. මේ වෙද්දී රටවල් 170කට වැඩි ගාණක තියෙන සභාවන් 65,000කට වැඩි ගණනක් මේ ගිණුම් පාවිච්චි කරනවා.

ඉන්දුනීසියාවේ උතුරු සුලවෙසිවල මනැඩෝ නගරයේ තියෙන කයිරාගි සභාව කලින් පාවිච්චි කළේ නොමිලේ ලබාගන්න පුළුවන් වීඩියෝකොන්ෆරන්සිං ඇප් එකක්. ඒත් දැන් එයාලා රැස්වීම් පවත්වන්නේ සංවිධානයෙන් ලබා දෙන Zoom ගිණුමක් හරහායි. සහෝදර හාදි සන්තෝසෝ මෙහෙම කියනවා. “ඉලෙක්ට්‍රොනික උපකරණ පාවිචිචි කරන්න ඒ තරම් හැකියාවක් නැති සහෝදර සහෝදරියන්ටත් මේ ගිණුම් නිසා රැස්වීම්වලට හොඳට සහභාගි වෙන්න පුළුවන් වෙලා තියෙනවා. මොකද දැන් එයාලට කලින් වගේ රැස්වීමක් අතරතුරේ කිහිප වතාවක්ම ඒකට නැවත නැවත සම්බන්ධ වෙන්න ඕන වෙන්නේ නැහැ.”

ඉක්වදෝරයේ ගුයාකිල්වල තියෙන ගුආයකානේ ඔඑස්තේ සභාවේ වැඩිමහල්ලෙක් වන ලෙස්ටර් හිහෝන් මෙහෙම කියනවා. “අපේ රටේ ඉන්න හුඟක් සහෝදර සහෝදරියන් දුප්පත්. ඒ නිසා බලපත්‍රයක් තියෙන Zoom ගිණුමක් මිල දී ගන්න සමහර සභාවලට අමාරුයි. බලපත්‍රයක් නැති Zoom ගිණුමක් හරහා රැස්වීම් පවත්වද්දී ඒකට සහභාගි වෙන්න පුළුවන් සීමිත පිරිසකට විතරයි. ඒත් දැන් සංවිධානයෙන් බලපත්‍රයක් තියෙන Zoom ගිණුම් ලබා දෙන නිසා රැස්වීම්වලට සම්බන්ධ වෙන්න පුළුවන් අයගේ ගාණ ඉක්මවලා යන එක ගැන කරදර වෙන්න ඕනෙ නැහැ. ඒ නිසා බය නැතුව ඕන තරම් දෙනෙක්ට රැස්වීම්වලට ආරාධනා කරන්න පුළුවන්.”

සැම්බියාවේ ලුසාකාවල තියෙන උතුරු න්වේරෙරේ සභාවේ වැඩිමහල්ලෙක් වන ජොන්සන් මුවන්සා මෙහෙම කියනවා. “Zoom ගිණුම් ලබා දෙන්න සංවිධානයෙන් ඇති කරපු සැලැස්ම නිසා සහෝදර සහෝදරියන් එක්ක තවත් කිට්ටුවෙන් ආශ්‍රය කරන්න පුළුවන් වෙලා තියෙනවා කියලත් ඒකෙන් යෙහෝවා දෙවියන්ගේ ආදරය, සැලකිල්ල හොඳටම දැනෙනවා කියලත් හුඟක් සහෝදර සහෝදරියන් නිතරම අපිට කියනවා.”

සංවිධානයෙන් ඒ ගිණුම් මිල දී ගන්නේ සහන සේවා වැඩවලට වෙන් කරපු මුදල් පාවිච්චි කරලයි. සහන සේවා වැඩවලට මුදල් වෙන් කරන්නේ ලෝක ව්‍යාප්ත සේවය සඳහා ලැබෙන සම්මාදම්වලින්. ඒ සම්මාදම්වලින් වැඩි හරියක් ලැබෙන්නේ donate.jw.org හරහායි. ඔයාලා ත්‍යාගශීලීව ලබා දෙන ඒ සම්මාදම්වලට ගොඩක් ස්තූතියි.—2 කොරින්ති 8:14.