Talavou e, o Outou Agaʻigaʻi ea i Luma Faaleagaga?

A O TOE tōmanatu i tua i le taimi a o iai i lana aʻoga maualuga, na faapea mai ai Hideo: “E ui lava sa ou auai i sauniga faa-Kerisiano ae sa leʻi iai sou faanaunauga malosi e auauna iā Ieova, e masani lava ona ou faaataina aʻu o se tagata e taʻutaʻua i laʻu vasega, o loo savali faatama autū i le auala ma sau uō teine. Sa leʻi mautinoa lelei oʻu sini, ma sa lē iai foʻi sou faanaunauga e agaʻigaʻi i luma faaleagaga.” I le pei o Hideo e toʻatele talavou e foliga mai na o le tau lava ina auai i sauniga ma isi gaoioiga faaleagaga, e aunoa ma se faanaunauga e ausia ni sini e aogā pe faia foʻi se agaʻigaʻi i luma.

Afai o oe o se talavou, atonu e te fiafia tele pe a e auai i se taaloga po o se mea foʻi e te fiafia e fai. Ae pe a oo mai i gaoioiga faaleagaga, atonu e lē faapena lou fiafia. Pe e mafai la ona e naunau i sini faaleagaga? Seʻi manatu i upu nei a le faisalamo: “E faamaoni poloaʻiga a Ieova, e faapotoina ai lē ua faigofie; . . . e mamā poloaʻiga a Ieova, e malamalama ai mata.” (Salamo 19:7, 8) E mafai e le Afioga a le Atua ona faapotoina ai “lē ua faigofie” ma ‘faamalamalamaina ai ona mata.’ Ioe e mafai foʻi ona faafiafiaina oe i gaoioiga faaleagaga. Ae o le ā e manaʻomia ina ia faafiafiaina ai oe i na gaoioiga? O fea e tatau ona e amata ai?

Ia Iai se Uunaʻiga e Auauna i le Atua

Muamua e tatau ona uunaʻia e oe lava oe. Seʻi manatu foʻi i le tulaga o Iosia le tupu talavou o Iuta. Ina ua maua le tusi o le tulafono a Ieova i le malumalu, sa faitauina e Iosia ma sa pāʻia ai o ia i mea sa ia faalogo i ai. O le iʻuga, “ona aveeseina lea e Iosia o mea leaga uma i nuu uma sa i le fanauga a Isaraelu.” (2 Nofoaiga a Tupu 34:14-21, 33) O le faitauina o le Afioga a le Atua sa uunaʻia ai Iosia e gaoioi atili e faaauilumaina ai le tapuaiga moni.

E mafai foʻi ona e atiina aʻe se faanaunauga e auauna iā Ieova pe a e faitauina e lē aunoa le Tusi Paia ma mafaufau loloto i ai. O le mea lenā na uunaʻia ai Hideo. Na amata ona ia aumea vavalalata atu i se paeonia e matua atu iā te ia, o se faifeʻau faataimi atoa a Molimau a Ieova. O lea paeonia o se tagata maelega o le Tusi Paia ma sa taumafai malosi e faatatauina aʻoaʻoga a le Tusi Paia i lona olaga. Ona o le faalaeiauina i le faaaʻoaʻoga a le paeonia, sa amata ai e Hideo ona faia lea lava mea e tasi ma uunaʻia malosi ai o ia e auauna i le Atua ma isi tagata. Na ia mauaina se olaga faamalieloto ona o le agaʻigaʻi i luma faaleagaga.

O le faitauina i aso taʻitasi o le Tusi Paia o se uunaʻiga lelei lea mo talavou. Ua faamatala mai e Takahiro e faapea: “O so o se taimi lava o le a ou moe ai ae ou manatuaina e leʻi faia lau faitauga Tusi Paia mo lea aso, ou te toe nofo aʻe lava i luga e fai. O le iʻuga, sa ou lagonaina ai le taʻitaʻiga a Ieova. Sa matuā fesoasoani le faitauina o le Tusi Paia i aso uma ina ia ou agaʻigaʻi ai i luma faaleagaga. Ona o loʻu naunau e fai se sao e sili atu i le auaunaga iā Ieova, sa mafai ona ou galue ai loa o se paeonia sauatoa ina ua uma laʻu faauuga mai le aʻoga maualuga. Ma o se mea e ese loʻu fiafia i ai.”

E faaopoopo atu i le faitauina o le Tusi Paia, o le ā le isi mea e mafai ona uunaʻia atili ai oe e vivii atu ai iā Ieova? Ua faapea mai Tomohiro o lē sa aʻoaʻoina le upu moni mai lona tinā: “Ina ua uma ona ou suʻesuʻeina ma le māeʻaeʻa le tusi o le Life Does Have a Purpose i le 19 o oʻu tausaga, sa matuā pāʻia lou loto i le alofa o Ieova ma le taulaga togiola a Iesu. O lenā lotofaafetai mo le alofa o le Atua sa uunaʻia ai aʻu e faia nisi mea se tele i le auaunaga mo Ieova.” (2 Korinito 5:14, 15) I le pei o Tomohiro, e toʻatele talavou ua faalaeiauina e agaʻigaʻi i luma faaleagaga e ala i le toʻaʻaga e faia a latou suʻesuʻega totino o le Tusi Paia.

E ui lava i lea, ae faapefea pe afai o lenā lava e lē o iai sou faanaunauga moni e auauna ai mo Ieova? E iai se isi e mafai ona e saʻili atu ai mo se fesoasoani? Ua tusi mai le aposetolo o Paulo e faapea: “Auā o le Atua, o loo galue i totonu iā te outou, ina ia outou loto i [ai] . . . ma ia outou galulue ai.” (Filipi 2:13) Afai e te tatalo iā Ieova mo le fesoasoani, o le a ia foaʻiina mai iā te oe lona agaga paia, o le a faamalosia ai oe e lē gata ina ia e ‘galue ai’ ae ‘ia e loto i ai’ foʻi. O le uiga o lenei mea o le a mafai e le agaga o le Atua ona faateleina lou naunau e faia le mea sili e te mafai i le auaunaga a Ieova ma fesoasoani ai foʻi iā te oe e agaʻigaʻi ai i luma faaleagaga. E lē gata i lea, ia faatuatua i le mana o Ieova ma faamalosia ai lou loto!

Ia Faatutū ni Ou Lava Sini

O le taimi lava e te maumauaʻi ai e auauna atoatoa atu iā Ieova, e manaʻomia ona e faatutūina ni ou lava sini ina ia agaʻigaʻi ai i luma faaleagaga. Ua faapea mai se teine talavou e igoa iā Mana: “O le faatutūina o sini o se fesoasoani sili lea mo aʻu. Na i lo o le toe foʻi i tua, ua mafai ona ou lototele ai e agaʻi i luma. I le manatuaina o oʻu sini, sa ou tatalo faatauanau iā Ieova mo le taʻitaʻiga, ma sa ou agaʻigaʻi atoatoa ai i luma.”

E tatau ona avea ou sini o ni mea moni ma e mafai ona ausia. O le faitauina o se mataupu o le Tusi Paia i aso taʻitasi o se sini e mafai ona ausia. E mafai foʻi ona e amata i le faia o se saʻiliʻiliga. Ina ia faataʻitaʻi lenā saʻiliʻiliga e mafai ona e faaaogā se lomiga o loo maua i le gagana Samoa, atonu e te suʻesuʻeina ia uiga o Ieova na o loo lisiina mai i lalo o le tamaʻi ulutala, “Ieova,” lea o loo maua i le Faasino Mataupu mo Le Olomatamata i le itulau e 31 i le lomiga o Tesema 15 i tausaga taʻitasi. O nei saʻiliʻiliga e mautinoa o le a e vavalalata atu ai iā Ieova ma uunaʻia ai oe e faia nisi mea se tele mo ia. O isi sini e mafai ona ausia o le faia lea o se sao a sili atu pe na o se tasi i taimi o sauniga faa-Kerisiano lea e manaʻomia ai se sao a le aofia, ma ia taumafai e faamasani pe a ma se toʻatasi se tagata o le faapotopotoga i sauniga uma, ma ia aua nei misi se aso e te tatalo ai iā Ieova ma talanoa atu i isi e faatatau iā te ia.

Afai e leʻi tusia lou igoa i le Aʻoga o le Faiva Faatiokarate, atonu o se sini lelei tele lenā mo oe. Po ua faia ea sou sao i le faiva i le lautele? Afai e leai, atonu e te manaʻo e galue ina ia avea oe o se tagata talaʻi e leʻi papatisoina. O le iloiloina o le lua faiā ma Ieova ma lou tuuina atu iā te ia e mautinoa o le isi vala lenā o le a sosoo ai. E toʻatele talavou o loo taumafai malosi ina ia ola e tusa ai ma lo latou tuuina atu, e ala i le aapa atu i le auaunaga faataimi atoa.

O le iai o ni sini, o se mea lelei lea i lou olaga ae ia faaeteete i le atiina aʻe o se agaga faatautavā. O le a e mauaina le fiafia i au gaoioiga, pe a e lē faatusatusaina oe i isi.—Kalatia 5:26; 6:4.

Atonu e te lagona e leʻi lava sou poto masani ma e faigatā ona faatutū ni ou sini talafeagai. E manaʻomia la ona e mulimuli i le fautuaga a le Tusi Paia lenei: “[Ia] uaʻi mai ia ou taliga, ma e faalogo mai i upu a ē popoto.” (Faataoto 22:17) Ia talosaga atu i le fesoasoani a ou mātua po o isi Kerisiano taʻumatuaina. E manaʻomia i mātua ma isi ona magafagafa ma faalaeiau i lenei tulaga. O le lotomafatia ona o le faamalosia e ausia sini o loo faatutūina e isi mo i latou, e ono aveeseina ai le fiafia mai talavou ma atonu e lē taulau ai sini na faatutūina. O le mea lenā na tupu i se teine o lē na faapea mai: “Sa faatūina e oʻu mātua ia le tele o sini mo aʻu e pei o le tusiaina o loʻu igoa i le Aʻoga o le Faiva Faatiokarate, faia o se sao i le auaunaga i le fanua, le papatisoina ma le avea o se paeonia. Sa tele ni taumafaiga na ou faia ina ia ausia ai nei sini taʻitasi. Pe a ou ausiaina se sini se tasi, e lē taitai faamālō mai oʻu matua iā te aʻu, na i lo o lenā sa laʻua toe faatū foʻi se isi sini ou te taumafai e ausia. O le iʻuga, sa ou lagona le faamalosia e ausia nei sini. Sa ou lagona le fiu ma le leai o se faamalieina.” O le ā le mea na sesē? O sini uma e aogā, ae sa lē o ni sini na ia faatutūina. Ina ia taulau manuia, e manaʻomia ona e faatūina e oe, ou lava sini!

Seʻi mafaufau foʻi i le tulaga o Iesu Keriso. Ina ua afio mai o ia i le lalolagi na ia silafia lelei le mea o loo faatalitalia mai e lona tamā o Ieova mai iā te ia. O le faia o le finagalo o Ieova, sa lē na o se sini mo Iesu, ae sa avea o se matafaioi e tatau ona faataunuuina. Sa faapeʻī le tagaʻi a Iesu i lana galuega? Ua ia faapea mai: “O laʻu mea e ʻai, ia ou faia le finagalo o lē na auina mai aʻu, ma faaiʻu lana galuega.” (Ioane 4:34) Sa fiafia Iesu i le faia o le finagalo o Ieova ma soifua e tusa ma mea o loo faatalitalia mai e lona Tamā. Sa pei o se meataumafa iā Iesu—sa maua ai e ia le fiafia ma le faamalieina i le faataunuuina o le galuega na faatalitali mai iā te ia. (Eperu 10:5-10) E mafai foʻi ona e maua le fiafia pe a fai e saʻo le uunaʻiga e ala ai ona e faia le mea o loo faalaeiauina ai oe e ou mātua.

Aua le Lafoaʻia le Faia o le Mea Saʻo

O le taimi lava e te mafaufau ai i sou sini, ia taumafai e galue mamafa i ai ma ia ausia. Ua faapea mai le Kalatia 6:9: “Aua neʻi tatou faapalapala i le amio lelei; auā o ona pō e tatau ai tatou te selesele mai ai, pe afai tatou te lē faavaivai.” Aua e te faalagolago i lou lava malosi ma lou iloa. O le mea moni, e iai taimi o le a e fetaiaʻi ai ma faafitauli ma e te lagona ai le lē taulau. Ae ua faamautinoa mai iā i tatou e le Tusi Paia e faapea: “Ia e manatua [le Atua] i ou ala uma, ona faatonuina ai lea e ia lava ou ala.” (Faataoto 3:6) O le a fesoasoani Ieova iā te oe a o e galue malosi i le ausiaina o ou sini faaleagaga.

Ioe o le atiina aʻe o se faanaunauga e auauna ai iā Ieova e ala i le taumafai e ausia sini faaleagaga, o le a “iloa ai e tagata uma lou alualu i luma.” (1 Timoteo 4:15) Ona e olioli ai lea i se olaga e faatamaoaigaina i le auaunaga i le Atua.

[Ata i le itulau 9]

O le faitauina o le Tusi Paia ma mafaufau loloto i mea o loo e faitauina o le a uunaʻia ai oe e auauna iā Ieova

[Ata i le itulau 10]

Sa soifua Iesu e tusa ma mea o loo faatalitalia mai e lona Tamā