Po o E Loto Faamagalo Ea?

O PILI ma lona afafine e 16 tausaga o Lisa, sa matuā faigata lava ona mafuta. O nai mea iti e lē femalilieaʻi ai i lo la va, sa masani ona avea o ni taugaupu leo tetele. Sa oo ina faatetele lenei tulaga lē fiafia, ma iu ai ina faatonuina Lisa e alu ese ma le aiga.a

Ina ua mavae sina taimi, sa oo ina iloa e Lisa, o ia ua sese ma sa saili ai loa le faamagaloga a lona tamā. Ae na i lo o le faagaloina o mea sese na faia e Lisa i aso ua mavae, sa teena e lona tamā loto tiga ana taumafaiga ina ia faia se faaleleiga. Seʻi manatu i ai! Sa lē manao o ia e faaalia le alofa mutimutivale i lona lava afafine!

I senituri ua mavae, na faasalaina ai i le oti se tagata e leai sana sala ona o se solitulafono na te leʻi faia. Na tuuina atu e molimau se molimau pepelo, ma sa faapiʻo e faipule faalemalo le faia o le faamasinoga tonu. O lena tagata e lē sala o Iesu Keriso. I sina taimi puupuu lava a o leʻi maliu o ia, na ia talosaga atu i le Atua i le tatalo e faapea: “Loʻu Tamā e, ia e faamagaloina atu ia te i latou; auā ua latou le iloa le mea ua latou faia.”—Luka 23:34.

Sa faamagalo moni lava e Iesu mai lona loto, ma sa uunaia foi ona soʻo ina ia faaaʻoaʻo i a te ia e tusa ai o lenei mea. (Efeso 4:32) Ae peitai, i le pei o Pili, e toatele ua aunoa ma se alofa ma ua lē mananao e faamagalo. O ā ni ou uiga faaalia e tusa ai ma lenei mea? Po o le a e loto malie e faamagalo isi pe a agasala atu i a te oe? Ae faapefea agasala matuiā? Pe tatau foi ona faamagalo nei agasala?

O le Faamagalo o se Luʻi

O le faamagalo atu, e lē faigofie pea. Ma i nei aso faigata, ua sili atu ai ona avea faiā faaletagata ma faafitauli. Ae maise lava i le olaga i aiga, e masani ona tumu i faigata ma omiga. Ua leva lava ona taʻua e le aposetolo Kerisiano o Pauro e faapea, o tulaga na o le a taatele i “aso e gata ai.” Na ia faapea mai: “E avea tagata ma e alolofa i latou ia i latou, o e mananao i tupe, o e loto vii, o e faamaualuga, . . . o e le alolofa i tagata amio lelei, o e faalata, o e soona fai, o e ua faafefeteina.”—2 Timoteo 3:1-4.

I se tulaga lē maalofia la, ua fesagai ai i tatou uma lava ma omiga mai i fafo e tofotofoina ai lo tatou tomai e faamagalo atu i isi. E faaopoopo i lena, o loo tatou tauivi foi ma o tatou lava faalogona malolosi. Na auē Pauro e faapea: “Auā ou te le faia le mea lelei ou te loto i ai, a o le mea leaga ou te le loto i ai, o le mea lea ou te faia. Afai foi ou te faia le mea ou te le loto i ai, ua le o aʻu e toe faia, a o le agasala o loo nofo i totonu ia te au.” (Roma 7:19, 20) O le iuga, o le toatele o i tatou e lē o loto faamagalo e pei ona tatou mananao ai e faia. Ae ui i lea, o le lē lelei tuufaasolo ma le agasala ua uunaia ai se taaʻiga malosi i a i tatou uma lava ma iu ai ina faoa lo tatou tiga alofa mo uso a tagata i nisi taimi.

Ina ua faalaeiauina ina ia faamagalo e le tasi le isi i ni nai mea iti, na tali mai se tasi fafine e faapea: “E lē aogā i se tasi ona taumafai e faamagalo.” I le vaaiga i fafo, o lena faamatalaga atonu e foliga mai e lē alofa, leai se tiga alofa, po o le lē faatuatuaina. Ae peitai, i le tulaga loloto, tatou te iloa ua faaalia ai le lē fiafia lea e masani ona lagona e le toatele o tagata pe a latou fesagai ma se lalolagi ua latou vaai i ai e manatu faapito, lē popole i isi, ma le taui ma sui. Na faapea mai se tasi tamaloa: “E faaaogā sese e tagata oe pe a e faamagaloina i latou. E pei lava ua soli oe.”

E lē o se mea la e ofo ai, e faapea o le atiina aʻe o se uiga faamagalo i nei aso e gata ai, e matuā faigata lava. Ae o loo faamalosiau mai pea le Tusi Paia i a i tatou ina ia faamagalo atu ma le agalelei. (Faatusatusa i le 2 Korinito 2:7.) Aisea e ao ai ona tatou loto faamagalo?

[Faaopoopoga i lalo]