Atiina aʻe le Naunau i Toe Asiga
1 Ua talafeagai ona faatusaina le auaunaga i le faiga o se faatoaga, ma o le faia o toe asiga ua faatusaina i le atiina aʻe ma faasūsū. (Mata. 13:23; Luka 10:2; 2 Kori. 9:10) I le avea ma ē “faigaluega . . . faatasi ma le Atua,” ua i a i tatou se matafaioi e fesoasoani ai i so o se fatu fou ua oso aʻe ina ia agaʻi ina matua ma fua mai. (1 Kori. 3:6, 9) O le ā le auala sili e mafai ona tatou faataunuuina ai lenei mea?
2 Ia vave toe asia i latou uma o ē faaalia le naunau. Autalu au faamaumauga i le fale i le fale, ma filifili po o ai e asia ma po o le ā o le a talanoaina. E masani lava ona faalagolago le mataupu e talanoaina i le mataupu sa talanoaina i le uluai asiasiga. Ia fetuutuunai, ma ia iai nisi manatu faale-Tusi Paia e mafai ona faaofi atu. O se mea lelei le faaaogā pea o le Tusi Paia, ona o loo iai se malosi e pāʻia ai le loto.—Epe. 4:12.
3 Afai na e tuua le polosiua “Po o Silasila Alofa mai ea le Atua ia i Tatou?,” e mafai ona amata faapea lau faamatalaga:
◼ “E tele tagata loto faamaoni e talitonu faapea o le a faaumatiaina e le Atua le lalolagi, ae o isi ua matataʻu ina neʻi faia faapea e le tagata lava ia. O le ā sou manatu? [Faatali mo se tali.] Ua taʻu mai e le Tusi Paia e faapea, na i lo o le faaumatiaina o le lalolagi, o le a faamamāina mai ai e le Atua le amioletonu, ma avea ai o se nofoaga o le filemu ma le saogalemu.” Ia faasino i le itulau e 22, ma faitau le Faataoto 2:21, 22, lena o loo sii mai ai. Afai e faaalia le naunau, ia faamatala i ai le fuafuaga o le faia o suesuega faale-Tusi Paia i aiga po o le ofo i ai o mekasini fou, ma faia se fuafuaga e toe foi i ai e talanoa atili e faatatau i le lalolagi fou ua folafolaina mai e le Atua.
4 Afai na e tuua ai le polosiua o le “Faauta!,” e mafai ona e faapea atu:
◼ “I laʻu asiasiga talu ai, sa ta faitau ai i le Tusi Paia e faatatau i le folafolaga a le Atua ina ia faia le lalolagi ma parataiso, e pei o le ata i le faavaa o le polosiua lea na ou tuuina ia te oe. E mafai ona tatou olioli i lenei faamanuiaga e ala i le aʻoaʻoina atili e faatatau i le finagalo o le Atua ma le auala e aafia ai i tatou.” Faitau le Ioane 17:3, ona suʻe lea i le palakalafa e 52 ma le 53 i le itulau e 27. Ia talanoa puupuu le pogai e manaomia ai ona ave i fale le poto saʻo o le Afioga a le Atua.
5 Pe a toe asia se tasi e naunau i lotu na tuuina i ai le polosiua o le “Malo,” atonu e fetaui lou faapea atu:
◼ “Atonu ua e taʻua soo le Tatalo a le Alii. O ā manatu e oo mai i lou mafaufau pe a e tatalo ia oo mai le Malo o le Atua?” A maeʻa ona tali mai lē e ona le fale, ia faasino i le itulau e 26, ona faitau lea o le Tanielu 2:44. Atonu e mafai ona e faaauau le talanoaga e ala lea i le faamatalaina e faapea o le oo mai o le Malo o le Atua, o le a iu ai le amioleaga ma le puapuaga. Faamatala i ai e faapea, afai tatou te amiotonu i le silafaga a le Atua, e mafai ona tatou olioli i le ola e faavavau i le Parataiso i lenei lalolagi.
6 Ia manatua, e mafai ona faia se toe asiga i so o se tasi sa fia faalogo, e tusa lava pe na tuu ai ni lomiga pe leai. Taumafai e fai se faasologa i vaiaso taitasi mo le faia o toe asiga. O le a faamanuia e Ieova au taumafaiga maelega ina ia atiina aʻe le naunau o ē o loo e tau i ai. Talosia ia fua mai mo lona viiga.—Ioa. 15:8.