Ia Avea ma Faiaʻoga o le Afioga a le Atua—I le Faaaogaina o Polosiua

¹ O auauna uma lava tuuina atu a Ieova, e iai sa latou tiute tauave o le faia lea o se sao i le galuega o le aʻoaʻo atu o le Afioga a le Atua i isi. O le tāua tele o lenei tiute tauave e oo ina manino pe afai tatou te talisapaia lenei tiute tauave e faapea ua tofia mai ia i tatou e lē ua iai le pule uma lava i le lagi ma le lalolagi, ina ia ō atu “e fai nuu uma lava ma soo, . . . ia aʻoaʻo atu ia te i latou.” (Mata. 28:18-20) O lea, o le auai i le talaʻiina o le tala lelei e manaomia ai le avea o i tatou ma faiaʻoga!—2 Timo. 2:2.

² Ia Aokuso, e mafai ona tatou faaaogā o tatou tomai o ni faiaʻoga pe a ofoina atu polosiua. E mafai ona tatou filia ni manatu faale-Tusi Paia faaoso naunau mai na polosiua ma sauniuni ni nai faamatalaga e mafai ona fesoasoani ia i tatou e amata ai se talanoaga.

³ Pe a ofoina le polosiua “Po o Silasila Alofa mai ea le Atua ia i Tatou?” e mafai ona e faapea atu:

◼ “Sa matou asiasi atu i le toatele o outou tuaoi ma iloa ai o loo popole tele i latou i le matuā faateteleina o solitulafono, faiga taufaamataʻu, ma faiga sauā. O le ā sou manatu, aisea ua avea ai lenei mea o se faafitauli tele? [Faatali mo se tali.] O se fiafiaga faapitoa mo i tatou ona ua valoia e le Tusi Paia le mea lenei o le a tupu. [Faitau le 2 Timoteo 3:1-3.] Ia mātau o le mea lenei e tupu i ‘aso e gata ai.’ Ua faaalia ai e iai se mea ua toeitiiti ona faaiuina lea. O le ā sou manatu i lea mea?” Faatali mo se tali. Suʻe i le itulau e 22, faasino i le ata ma talanoa i se mau se tasi pe lua na o loo sii mai ai i le itulau. Fai ni fuafuaga e te toe foi atu i se taimi mulimuli ane e faamalamalama le pogai ua tatou talitonu ai ua lalata tele mai nei faamanuiaga.

⁴ Atonu e te manao e faaaogā lenei faafeiloaiga i le ofoina o le polosiua “‘Faauta! Ou te Faia ia Fou Mea Uma Lava’”:

◼ “E toatele tagata ua oo i tulaga faigata ona o le taumafai e saili se fuafuaga moni o le olaga. A o olioli le toaitiiti i sina fiafiaga puupuu, e toatele o loo ola i olaga ua faatumulia i le lē fiafia ma mafatiaga. Pe e te manatu o le auala lenei na fuafuaina e le Atua tatou te ola ai? [Faatali mo se tali.] Ua faaalia e le Tusi Paia e finagalo le Atua ia tatou ola i se lalolagi e pei o lenei.” Faasino i le ata i le faavaa i luma, ona suʻe lea i le itulau e 4 ma faasino i se mau se tasi pe lua mai le faamatalaga i le pito i lalo, o loo faamatalaina ai po o le ā ua folafola mai e le Atua. Laga le fesili lenei e talanoa i ai pe a e toe foi atu: “E mafai faapefea ona tatou mautinoa o le a faataunuuina e le Atua ana folafolaga?”

⁵ Atonu o le a e ofoina le polosiua “Olioli i Le Ola i Le Lalolagi e Faavavau!” i le faaalia o le ata atoa o loo i faavaa i luma ma tua ma fesili atu i ai:

◼ “E te fia ola i se lalolagi faapenei e faatumulia i tagata fiafia? [Faatali mo se tali.] Ua taʻu mai e le Tusi Paia ia i tatou e faapea, e alofa le Atua i tagata ma e finagalo o ia ina ia latou ola fiafia e faavavau i lenei lalolagi.” Suʻe i le ata numera 49, ma faitau se tasi o mau o le Tusi Paia o loo taʻua ai. Ona faasino lea i le ata numera 50, ma faamatala po o le ā e tatau ona tatou faia pe afai tatou te fia ola e faavavau i lenei Parataiso. Fai i ai e te manao e te toe foi atu ma talanoa atili i le pogai e matuā tāua tele ai le faatuatua ia Iesu Keriso.

⁶ E fiafia Ieova pe a ‘faaalia lo tatou agaigai i luma i le uaʻi totoʻa atu i a tatou aʻoaʻoga.’ (1 Timo. 4:15, 16) O a tatou polosiua, e mafai ona fesoasoani moni ia i tatou i a tatou taumafaiga e fesoasoani ia i latou o loo moomoo e fia faalogo i “le tala lelei a e logologo mai le manuia.”—Isa. 52:7.