Aperila—O se Taimi e Māʻelegā ai i Galuega Lelei!
1 A o lalata mai se afā i se vaipanoa e nonofo ai tagata, ua oo ai ina matuā faanatinati le manaʻoga ina ia lapataʻia tagata e uiga i le tulaga lamatia lea o loo faaloloʻi mai. O le latalata tele o le oo mai o le afā, o le sili atu foʻi lea ona matuā faamamafa lapataʻiga. Aiseā? Auā ua lamatia ola! Atonu sa leʻi faalogo nisi tagata i le faasalalauina mai muamua o lapataʻiga. O isi atonu na faalogo ae sa lē mananaʻo e faia se gaoioiga. E faapena foʻi i le lapataʻiga tauatua lea ua tofia ai i tatou e faalauiloa atu a o leʻi oo mai “le asiosio” o le toʻasā amiotonu o le Atua e tafiesea ai faailoga uma o lenei lalolagi amio leaga. (Faata. 10:25) Ua lamatia le ola e faavavau o le faitau piliona o tagata! E tatau ona faaleo atu le lapataʻiga. E tatau ona tatou “maelega i galuega lelei.”—Tito 2:11-14.
2 Mo le faitau sefulu o tausaga, ua uunaʻia ai pea tagata o Ieova ina ia avea le vaitaimi o le Faamanatuga ma taimi e māʻelegā faapitoa ai i le faiva. I le tau e totogo ai mea i le 1939, na aumaia ai lenei faalāʻeiʻauga i le Informant, lea ua faaigoa nei o La Tatou Faiva o le Malo, e faapea: “I le oo mai o le tau e totogo ai mea, faapea ma le lelei o le tau, e ao ai ona tatou faatalitalia le faaluaina o itula e faaaluina i le fanua e tagata talaʻi [i le faapotopotoga] ma le matuā faateleina o itula o paeonia. O Aperila o se masina e lima ona Aso Sa. E lima foʻi ona Aso Toonai. Ia avea Aso Toonai ma Aso Sa uma o le masina o Aperila . . . o se taimi e molimau faapitoa atu ai.” O se sini lena ua avea ma luʻi na faataatia mo uso i le 60 tausaga ua mavae! I le tausaga lenei e pei ona sa iai i le 1939, o le masina o Aperila e lima faaiʻuga o vāiaso. O ā au fuafuaga mo lenei masina? O ā ni faamaumauga ua e faia i lau kalena mo Aperila 2000? Fuafua ina ia faia se sao uigā i galuega lelei faatasi ma tagata uma o Ieova i lenei masina faapitoa o galuega faanatinati faaleagaga.
3 Le Mea o Tatou Faamoemoe e Faataunuuina: O le aso aupito sili ona tāua o le tausaga e 2000 e paʻū i le masina lenei. O le aso 19, o Aperila, o le faamanatuga o le maliu o Iesu. Seʻi o tatou faia ni taumafaiga faapitoa e valaaulia ai le toʻatele o tagata e mafai i le Faamanatuga. E pei ona fautuaina atu i le masina ua mavae, ina ia faia se lisi o tagata uma e ono mafai ona auai i le Faamanatuga ma vaʻai ia leai nisi e galo. E ao ona faaaofia ia i latou e valaaulia ni tagata ua lē toe talaʻi, tagata suʻesuʻe uma o le Tusi Paia, toe asiga, i latou na suʻesuʻe muamua, o ē e faigaluega faatasi, aʻoʻoga faatasi, tuāʻoi, tauʻāiga, ma isi o ē e masani. Pe e iai ni auala e faimalaga atu ai i latou uma o ē mananaʻo e auai? Afai e leai, pe e mafai ona e fesoasoani atu ma le alofa i ai? I le po o le Faamanatuga, o le a maua ai e i tatou uma se faaeaga e feiloaʻi atu ai ia i latou uma o le a auai. Pe a uma le Faamanatuga, e mafai ona tatou toe asia na tagata fiafia i le avatua o se fesoasoani faaleagaga faaopoopo ia i latou.
4 O le “maelega i galuega lelei” i le vaitaimi a o leʻi oo mai ma pe a uma le Faamanatuga, o se auala lelei lea e faaali atu ai ia Ieova lo tatou talisapaia moni o mea uma lava ua faia mo i tatou. Ona o le amataga o le vaitaimi e lagilelei ai le tau, o le a mafai ai e le toʻatele o i tatou ona faateleina a tatou taumafaiga i le galuega faaevagelia. Afai o e paeonia lagolago, o le a e manaʻo la e fai le mea aupito sili e te mafaia e faaalu ai le 50 itula pe sili atu i le faiva. (Mata. 5:37) Pipiimau i le faasologa na e faia i le amataga o le masina. (Fai. 3:1; 1 Kori. 14:40) Tau ina ia faia e i tatou uma lava le mea tatou te mafaia e faasalafa atu ai se lagolagosua i paeonia uma, e lē gata i le faalāʻeiʻauina ai o i latou ae i le galulue ma i latou i le fanua. (Faatusatusa i le 2 Tupu 10:15, 16.) Pe afai tatou te lūlū ma le māʻelegā ia Aperila, e mafai ona tatou faatalitalia le ʻoliʻoli tele ma se faamanuiaga mai ia Ieova. (Mala. 3:10) Atonu o le a avea lenei mea o se laasaga e oo atu ai i le faaauau pea ona paeonia lagolago po o le paeonia sauatoa. Talosia ia faaauau pea ona faalautele atu le agaʻigaʻi i luma faaleagaga lea na tatou maua ia Aperila ia oo atu i isi masina o loo mulimuli mai a o faaauau pea ona avea i tatou ma tagata talaʻi faasauatoa o le Malo.
5 E lē taumatea, e faitauafe tagata o Ieova o le a amataina nisi suʻesuʻega faale-Tusi Paia i ʻāiga i lenei masina. Pe e te manaʻo e amataina se suʻesuʻega? Ia tatalo patino lava mo se suʻesuʻega, ma galue e ōgatusa ma au tatalo. E mafai ona e mautinoa o le a talisapaia e Ieova au talosaga ma le lotomaulalo mo se fesoasoani i le sāʻilia o se tagata lotofaamaoni ina ia aʻoaʻoina.—1 Ioa. 3:22.
6 O se faafeiloaʻiga lenei i le fanua ua uma ona faataʻitaʻiina ma ua matuā taulau manuia i le faaaogāina e amataina ai ni talanoaga. E te amata lava i lou fesili atu e faapea: “I le manatunatu i faiga sauā uma ua faia i aʻoga, pe e te manatu o se iʻuga lea o ni faiga faatemoni, po ona o le leai o se toleniga a matua?” Faatali mo se tali. Afai e faapea mai le tagata o “faiga faatemoni,” ona faitau lea o le Faaaliga 12:9, 12, ma faamatilatila le vaega ua faia e le Tiapolo i le faatinoina o tulaga fesouaʻiina i le lalolagi. Ona suʻe lea o le polosiua o le Manaomia i le lesona e 4, ma fesili i ai pe sa ia tau manatu po o fea na sau ai le Tiapolo. Faaauau le faitau ma talanoa i uluaʻi palakalafa e lua. Afai e faapea mai le tagata ona “o le leai o se toleniga a mātua” o le pogai lea o faiga sauā i aʻoga, ona faitau lea o le 2 Timoteo 3:1-3 ma faasino i ai uiga e mautinoa lava e saosaolaumea i le faafitauli. Ona suʻe lea o le polosiua o le Manaomia i le lesona e 8, faitau le palakalafa e 5, ma faaauau le talanoaga. Afai e mafai ona e faia se fuafuaga e te toe foʻi atu, ua e iai la i se tulaga lelei e amataina ai se suʻesuʻega faale-Tusi Paia faifai pea ma le tagata. I le isi asiasiga e sosoo ai, fesili i le tagata pe na te silafia se isi o sē atonu o naunau i le fia faalogo i mea o ia aʻoaʻoina.
7 O le isi auala o le “maelega i galuega lelei” ia Aperila, o le auai lea i vala eseese o le talaʻiga. Po o e mafaufau e talaʻi atu i se paka po o nofoaga e paka ai taavale? I se nofoaga e faatali ai pasi, po o le uafu? Pe e te manaʻo e taumafai foʻi e molimau atu i le telefoni, i le ala tele, po o se oganuu o pisinisi? Aiseā e lē faatino ai i lenei masina mea na o loo e mafaufau i ai? O le a fesoasoani Ieova ia te oe e maua le lototele e manaʻomia. (Galu. 4:31; 1 Tesa. 2:2e) Atonu e mafai ona e faia se fuafuaga e te lua galulue ma se paeonia po o se tagata talaʻi e lava le poto masani i nei vala o le faiva.
8 So o se tasi e naunau ina ia faateleina sona sao i le galuega o le molimau atu o le a manaʻo e auai i le molimau lē fuafuaina. E na o le pau lava le mea e manaʻomia e tusa ai ma le tulaga masani, o le faaaafia lea o le tagata i se talanoaga faaleuō. E na ona laga lava o se mataupu e masani ona fiafia i ai tagata, atonu e faaaogā ai le faafeiloaʻiga lea e faamatilatila mai i le palakalafa e 6. Taumafai ina ia faaaogā lelei e oo lava i nai taimi pupuu auā a lē faia faapea e ono mafai ona maʻimau. E tatou te lē lafoaʻia ni 5 sene, 10 sene, po o ni 20 sene ona e lē o ni tālā atoatoa. Aiseā e lē faaaogā tatau ai e oo lava i sina lima minute, sefulu minute, po o se kuata itula e molimau lē fuafuaina ai?
9 Se Taimi e Toe Manatunatu Ai: Seʻi toe tomānatu i manatu mālolosi na faamatilatila mai i le tala na faia i le Tauaofiaga Itumalo o “Afioga Faavaloaga a le Atua” i le tausaga ua mavae. O le matua o le tala e faapea, Talisapaia o lo Tatou Tofi Faaleagaga, na uunaʻia ai i tatou e mafaufau ma le faaeteete i le eseesega i le va o Iakopo ma Esau. Na faapea mai Esau i le pei o Iakopo, sa naunau foʻi o ia i mea faaleagaga, ae sa leʻi faaalia ai lea naunau i gaoioiga a Esau. (Kene. 25:29-34) Maʻeu se lapataʻiga mālosi mo i tatou! I le pei o Iakopo, seʻi o tatou nofosauni e faia se tauiviga mo le faamanuiaga a Ieova. (Kene. 32:24-29) Aiseā e lē faaaogā ai Aperila ma isi masina uma o loo mulimuli mai e toe faafou ai lo tatou māʻelegā, ʻaua lava neʻi manatu māmā i lo tatou tofi faaleagaga matagofie?
10 “O loo latalata mai le aso tele o Ieova, e lata mai lava, o loo matuā tele vave mai lava.” (Sefa. 1:14) E tatau ona faalauiloa atu le tala lelei o le Malo. O loo lamatia ola o tagata! Tau ina ia avea lenei masina o se masina o faamanuiaga mo tagata uma o Ieova a o tatou faailoa atu ma le autasi e faapea, o i tatou e “maelega i galuega lelei.”
[Pusa i le itulau 4]
Mea ia Manatua mo le Faamanatuga
O le faamanatuina o le Faamanatuga i le tausaga nei e paʻū i le Aso Lulu, Aperila 19. E tatau i toeaina ona uaʻi totoʻa i mea nei:
◼ I le faatulagaina o le taimi mo le sauniga, ia faamautinoa o le a lē tufaina atu le areto ma le uaina seʻiloga ua goto le la.
◼ E tatau ona faailoa atu i tagata uma lava e aofia ai ma le failauga le taimi tonu ma le nofoaga e fai ai le faamanatuga.
◼ O le ituʻāiga o areto ma le uaina talafeagai e tatau ona maua ma sauniunia.—Tagaʻi i Le Olomatamata, Aokuso 1, 1985, itulau 19.
◼ E tatau ona aumai ni ipu māfolafola ma ni ipu malamalama, se laulau talafeagai ma se ie laulau i le maota ma ia muaʻi faatulaga a o leʻi amataina le sauniga.
◼ E tatau ona muaʻi faamamā lelei le Maota o le Malo po o se isi nofoaga mo le sauniga.
◼ E tatau ona muaʻi filifilia le ʻautautua ma i latou e tufaina atu le areto ma le uaina ma faatonu lelei e uiga i o latou tiute ma taualumaga saʻo.
◼ E tatau ona faia ni fuafuaga e faaoo atu le areto ma le uaina i nisi o le vaega totoe o ē o loo lē atoatoa le mālosi o le tino ma ua lē mafai ona auai.
◼ Afai e sili atu i le tasi le faapotopotoga o fuafua e faaaogāina le Maota o le Malo e tasi, e tatau ona iai ni feutagaʻiga lelei i le va o faapotopotoga ina ia ʻalofia le soona tumutumu fua i le nofoaga e ulufale mai ai i le maota, le faitotoʻa, le auala e ulufale mai ai, ma mea e paka ai taavale.