Ia Maelega e Faaaʻoaʻo i le Lelei!
1 A o tatou latalata atu i le vaitaimi o le Faamanatuga i le 2003, e tele māfuaaga e avea ai i tatou ma ē e “faaaʻoaʻo i le lelei.” (1 Pete. 3:13) Ae sili atu i na māfuaaga uma, o le taulaga togiola lea a Iesu Keriso. (Mata. 20:28; Ioa. 3:16) Na tusi le aposetolo o Peteru e tusa ai ma lenā manatu e faapea: “E leʻi togiolaina outou i mea e pala, o le ario po o le auro, nai la outou amio lē aogā . . . a o le toto tāua o Keriso pei o lo le tamaʻi mamoe e lē ponā lava, e leai foʻi sona ila.” (1 Pete. 1:18, 19) O le lotofaafetai i lenei alofa uigaese ua uunaia ai i tatou e faapisi o tatou olaga i le faia o le mea lelei, ma amanaia le tulaga o Iesu o “lē na foaʻiina mai o ia e ia mo i tatou, e togiola aʻi i tatou ai le solitulafono uma lava, ma ia faamamāina mai e ia e fai mona, o lona lava nuu, e maelega i galuega lelei.”—Tito 2:14; 2 Kori. 5:14, 15.
2 Pe a tatou faia le mea e fiafia i ai fofoga o le Atua, o le a tatou olioli i le iai o se faiā lelei ma ia aemaise le iai i lalo o lana puipuiga alofa. Ua faapea mai atili Peteru: “O lē fia manaʻo i le ola, ma ia iloa aso lelei, . . . Ia ʻalo ese i le leaga, a ia fai mea lelei; ia saʻili i le filemu ma tausisi i ai. Auā o fofoga o le Alii o loo faasaga i ē amiotonu, e liliu mai foʻi ona taliga i a latou faatoga.” (1 Pete. 3:10-12) I nei aso faigatā, maʻeu le faamanuiaina i le iloa faapea o loo faaauau pea ona puipuia i tatou e Ieova ma e nofosauni foʻi o ia e fesoasoani mai, ‘e leoleo iā te i tatou e pei o lona tamatamaʻimata.’—Teu. 32:10; 2 No. 16:9.
3 E ui lava i le fesagaʻi ma tofotofoga, ae sa faaalia pea e uluaʻi Kerisiano o ē na tusi atu i ai Paulo le maelega aasa, ma latou faailoa atu ai le tala lelei i le tele na latou mafaia. (1 Pete. 1:6; 4:12) O le tulaga foʻi lea o tagata o le Atua i aso nei. E ui lava o loo tatou ola i “aso faigatā” ae o le faaalia o lo tatou agaga talisapaia i le agalelei o Ieova e uunaia ai i tatou e faia le finagalo o le Atua ma le maelega. (2 Timo. 3:1; Sala. 145:7) O lea seʻi o tatou iloiloina nisi o galuega lelei e mafai ona faapisi ai i tatou i le vaitaimi o le Faamanatuga.
4 Ia Valaaulia Isi i le Faamanatuga: O se tasi o auala e faaalia ai lo tatou agaga talisapaia mo le meaalofa silisili o le togiola, o le auai lea i le faamanatuina faaletausaga o le maliu o Iesu, lea o le a faamanatuina i le aso Lulu o Aperila 16, pe a goto le lā. (Luka 22: 19, 20) I le tausaga ua mavae i le 94,600 faapotopotoga na lipotia i le lalolagi aoao, ua tatou mauaina ai se aofaʻiga atoa o i latou na auai e 15,597,746! O lona uiga sa sili atu i le 220,000 i latou na auai na i lo le tausaga i ona tua atu.
5 E toʻafia o le a auai i lenei tausaga? O le a faalagolago le toʻatele i a tatou taumafaiga maelega e faalaeiau isi ina ia faatasi ma i tatou. Ia amata i le faia o se lisi o i latou uma o loo e manaʻo e valaaulia. E tatau ona faamuamua i lau lisi tagata o lou aiga. Afai e lē talitonu lau paaga, ia faaali atu i ai lou naunau ina ia lua auai faatasi. Sa faapea mai se tane lē talitonu o le māfuaaga o lona auai i le Faamanatuga i le tausaga ua mavae, ona sa ia iloa e tāua tele i lana avā lona auai. Ia sosoo ane i lau lisi ia tagata o ou tauaiga, o tuaoi, o ē tou te faigaluega faatasi pe tou te aʻoaʻoga faatasi foʻi. Ia mautinoa ua valaaulia au suʻesuʻega faale-Tusi Paia.
6 Pe a māeʻa ona fai lau lisi, ia faatulaga se taimi e te valaaulia ai lava e oe i latou taʻitoʻatasi. Ia faaaogā pepa valaaulia o le Faamanatuga. Ina ia fesoasoani i tagata e manatuaina po o afea ma o fea foʻi e fai ai le faamanatuga, ia faaaogā se masini lomitusi pe tusi lolomi foʻi le taimi ma le nofoaga e faia ai le Faamanatuga i le pito i lalo o le pepa valaaulia. A o latalata mai Aperila 16, ia toe faamanatu atu iā i latou o loo i lau lisi e ala i lou toe asia o i latou pe telefoni foʻi i ai. Seʻi o tatou fesoasoani i le tele o tagata e mafai ai ina ia auai i lenei sauniga e sili ona mamalu.
7 Ia Fesoasoani Atu iā i Latou o Loo Auai i le Faamanatuga: O le Faamanatuga e masani lava o se sauniga e faafiafiaina ai. E tatou te maua ai le avanoa e faafeiloaʻi ai tagata taʻitoʻatasi e lē masani ona auai i a tatou sauniga. Ia fai ni faatulagaga e vave taunuu ai ma ia nofo ai i inā mo se taimi umi pe a talafeagai. Ia taulamua e faamasani i tagata fou o le aofia. Ia faaalia le māfana ma ia faaleuō.—Roma 12:13.
8 Pe e mafai ona fesoasoani i ē na auai i le Faamanatuga ina ia agaʻigaʻi i luma faaleagaga i le faia o se suʻesuʻega faale-Tusi Paia? Ia taumafai ina ia iloa suafa ma nofoaga o i latou na asiasi ane e lē o asia i le taimi nei, ina ia faaauau ai ona e fesoasoani atu iā i latou. E ala i le fesoasoani iā i latou, atonu o nisi o le a agaʻigaʻi i luma ma avea o ni tagata talaʻi lē papatisoina, a o leʻi oo atu i le Faamanatuga i le tausaga fou. Pe a toe asia i latou na auai i le Faamanatuga, ia toe valaaulia i latou i le lauga faapitoa o le a faia iā Aperila 27.
9 Pe e Mafai Ona E Paeonia Lagolago iā Mati ma Aperila? I tausaga taʻitasi o lo tatou maelega mo Ieova e uunaia atoatoa ai i tatou i le faiva i masina faapitoa o galuega faatiokarate. E mafai e taumafaiga tuufaatasi uma a se faapotopotoga i le talaʻiina ma le maelega o le tala lelei i le vaitaimi o le Faamanatuga ona aumaia ai iʻuga lelei.
10 O se tasi o faapotopotoga e 107 tagata talaʻi ae toʻa 9 paeonia sauatoa sa lipotiina mai le “mataʻina o le masina” o Aperila i le tausaga ua mavae, lea sa 53 i latou na paeonia lagolago, e aofia ai toeaina uma ma auauna o le faiva. Sa mafai faapefea e toeaina ona atiina aʻe le naunau mo le paeonia lagolago i lenā masina? Sa vave lava ona latou faalaeiauina le toʻatele e mafai ai ina ia tusia o latou suafa i le paeonia lagolago. Sa faatulaga ia feiloaʻiga mo le auaunaga i le fanua a o faagasolo le aso ina ia talafeagai ma tagata uma o le faapotopotoga. Sa faamamafa faapitoa foʻi le molimau atu i luga o le telefoni aemaise lava pe a fai o se tagata e lē o atoatoa le malosi o le tino.
11 Sa iai se tuafafine e 86 tausaga o lona soifua e lē mafai ona savali ona o faafitauli tau i le soifua mālōlōina, na mafai ona avea ma paeonia lagolago. E amata ona ia molimau i le taeao i luga o le telefoni mo ni nai itula a o nofo i le laulau i le umukuka, ona mālōlō lea mo sina taimi, ia ona toe faaauau ai foʻi lea. O se tasi o tagata na ia talanoa atu i ai o se tinā ua maliu lana tane ma sana fanau tama talavou e toʻalua i tausaga e lua ua mavae atu, ma ua lē malamalama i le māfuaaga ua faatagaina ai e le Atua lenei mala e tupu. Sa avatu se molimau lelei ma amata ai se suʻesuʻega faale-Tusi Paia. O le molimau atu i le telefoni i le afiafi ma isi taimi, o se auala aogā lea e fesootaʻi ai i tagata o loo nonofo i fale ma nofoaga e faigatā ona oo atu i ai. E mafai foʻi ona fesoasoani i le ʻautalaʻi e talanoa atu ai i tagata e lē maua atu i le ao i o latou fale.
12 Sa faaiʻuina e toeaina la latou lipoti i le faapea atu: “Sa matou maua se taimi matagofie ma faaalia le agaga faafetai ona o nei faaeaga ma faamanuiaga ua foaʻiina mai e Ieova.” E ala i le faia o ni fuafuaga lelei, o le a mafai ai foʻi e la outou faapotopotoga ona olioli i na faamanuiaga.
13 Ia Faatū se Sini e Auai Uma Tagata i le Faiva: O lo tatou alofa mo le Atua ma o tatou tuaoi e uunaia ai i tatou ina ia faaaogā tatau le taimi i masina taʻitasi e tufa atu ai i isi le tala lelei. (Mata. 22:37-39) O ovasia o Suʻesuʻega Tautusi a le Faapotopotoga ma a latou fesoasoani e tatau ona taumafai e fesoasoani i tagata taʻitoʻatasi o le vaega i le faia o se sao i le faiva i masina taʻitasi. O se auala lelei e faia ai faapea, o le fuafua mamao lea e galulue ma tagata taʻitoʻatasi o le vaega i le faiva. Na i lo o le faatali seʻia oo i le faaiʻuga o le masina, e tatau ona vave fai. O le a mafai e lenei mea ona avatu ai iā te oe nisi avanoa e ofo atu ai lau fesoasoani.
14 Pe e iai ni tagata talaʻi e lē atoatoa le malosi o le tino i lau vaega o ē e faigatā ona faia sa latou sao i le faiva? Afai e iai nisi e nonofo i nofoaga mo le tausiaina pe o loo faataotolia i o latou aiga, ua faaitiitia le avanoa mo i latou e molimau atu ai. O lo latou faaaogāina lelei o le avanoa e ui ina faatapulaa e faasusulu atu ai lo latou malamalama, atonu o le a avea lenā ma uunaʻiga i ē o loo mātauina a latou galuega lelei ina ia naunau totino i le upu moni. (Mata. 5:16) E tatau i ovasia o suʻesuʻega tautusi ona faamautinoa iā i latou na, e mafai ona latou lipotia i le faiva i le fanua ia le 15 minute. O le lipotiina o le taimi o loo latou molimau atu ai e faamalosia ai nei tagata talaʻi faamaoni, ma maua ai le olioli lea e faamalieina ai. E mafai ai foʻi ona fesoasoani e faamautinoa ai o loo saʻo le lipotiina o galuega i le lalolagi aoao a tagata o le Atua.
15 O Talavou o Loo Pisi i Galuega Leleiry! Maʻeu le faafiafiaina i le vaaia o talavou Kerisiano o faaaogāina lo latou malosi i le auaunaga iā Ieova! (Faata. 20:29) Afai e te laʻitiiti, e faapefea ona faaalia lou maelega mo Ieova i nei masina o galuega faapitoa?
16 Afai e leʻi avea oe ma tagata talai e leʻi papatisoina i le faapotopotoga, pe mafai ona e aapa atu i lenā faaeaga? Ia fesili ifo iā te oe lava i fesili nei: ‘Pe ua ou mauaina ea le poto faavae i upu moni o le Tusi Paia? Pe ou te manaʻo e auai i le auaunaga o le Malo? Faamata e avea aʻu ma faataʻitaʻiga lelei i laʻu amio? Pe ua mafai ona ou fai atu lava e aʻu ia se faamatalaga e faatatau i loʻu faatuatuaga i le talanoa atu i isi e uiga i le tala lelei? Po o uunaia ea aʻu e loʻu loto ina ia faia faapea?’ Afai o lau tali i nei fesili o le ioe, e tatau la ona e talanoa atu i ou mātua e faatatau i lou faanaunauga i le avea ma se tagata talaʻi. E mafai e ou mātua ona talanoa atu i se toeaina o le komiti o le auaunaga.
17 Afai o lenā ua avea oe ma tagata talaʻi o le tala lelei, e mafai ona e faaaogāina avanoa o tuuaga o aʻoga e faatele ai sou sao i le faiva? O le faia o se faasologa lelei faatasi ma le lagolagosua a mātua ma isi, ua mafai ai ona paeonia lagolago le toʻatele o talavou papatiso. Afai e lē mafai, ona fai lea o ni taumafaiga e faatele ai sou sao i le faiva i le fanua. Ia faatū sou sini. I le faaopoopo atu i lou sini e faaalu se aofaʻiga patino o itula i le faiva, ia faatū se isi sini e mafai ona fesootaʻi atu i le faaleleia o lau faiva. Atonu e te taumafai e faitau atu se mau i fale uma e te afea, ia faaleleia le auala e faia ai au toe asiga, ia amata se suʻesuʻega faale-Tusi Paia, pe faalautele atu foʻi lau faiva i le molimau atu i le telefoni, po o isi vala o le auaunaga. Ae faapefea le sini o le iai lea o se tuaoi, se tagata e te lua aʻoaʻoga faatasi po o se tauaiga foʻi e te lua ō mai faatasi i le Faamanatuga i lenei tausaga? O le faia o se sao atoatoa i galuega faatiokarate o le a tauia ma e mautinoa foʻi le faalaeiau ai o isi i le faapotopotoga.—1 Tesa. 5:11.
18 Ia Fesoasoani i Tagata Fou Ina ia Agaʻigaʻi i Luma: I le tausaga faaleauaunaga ua mavae atu sa iai se fua faatatau e 440 o suʻesuʻega faale-Tusi Paia i aiga sa faia i masina taʻitasi i Samoa ma Amerika Samoa. O le toʻatele o tagata aʻoga o le a mafai ona oo atu i le tulaga o le tuuina atu ma le papatisoga. Peitaʻi ae latou te leʻi ausiaina lenā sini, e tatau ona tatou fesoasoani atu iā i latou ina ia avea o ni tagata talaʻi agavaa o le tala lelei. O se auala tāua tele lenei i le aʻoaʻoina o tagata fou ina ia avea o ni ē e mulimuli atu iā Iesu Keriso. (Mata. 9:9; Luka 6:40) E i ai se tagata o loo lua suʻesuʻe o loo sauni atu e laasia lea tulaga?
19 Afai e te lē o mautinoa i le agaʻigaʻi i luma o lau tagata aʻoga, ia saʻili atu mo se fesoasoani i lau ovasia o le suʻesuʻega tautusi po o le ovasia o le auaunaga. Atonu e mafai ona e valaauliaina o ia ina ia auai i le suʻesuʻega. O nei uso e iai lo latou tomai ina ia fesoasoani e iloa ai le agaʻigaʻi i luma faaleagaga o le tagata aʻoga. Atonu e iai ni o latou fautuaga e mafai ona fesoasoani i le tagata aʻoga e faaauau ai ona agaʻigaʻi i luma faaleagaga.
20 Pe afai ua manaʻo lau tagata aʻoga e avea ma se tagata talaʻi e leʻi papatisoina ma ua e manatu ua agavaa o ia, ia talanoa atu i le ovasia taʻimua. O le a ia fuafuaina ni toeaina se toʻalua e tou te talanoa faatasi ma le tagata aʻoga ina ia tilofaʻia pe ua agavaa, e faaaogā ai faamatalaga o loo i le itulau e 98-99 o le tusi, La Tatou Faiva. (Tagaʻi i Le Olomatamata o Iuni 1, 1989 itulau 29.) Afai ua faamaonia le avea o le tagata aʻoga ma tagata talaʻi, e tatau la ona amata loa ona e toleniina. O le taimi lava e tuuina atu ai lana lipoti i le auaunaga i le fanua, e tatau loa ona faailoa atu i le faapotopotoga e faapea, ua avea nei le tagata aʻoga ma se tagata talaʻi e leʻi papatisoina. E tatou te faamoemoe ina ia mafai e le faitau afe o tagata talaʻi fou, talavou pe matutua ona ausia lenei tulaga tāua o le agaʻigaʻi i luma faaleagaga i nei masina o galuega faapitoa.
21 E Fesoasoani le Faia o Fuafuaga i le Faataunuuina o Mea Lelei: O le faia o ni fuafuaga mamao e mafai ona fesoasoani i le taulau manuia o a tatou galuega faatiokarate i le vaitaimi o le Faamanatuga. (Faata. 21:5) E tele mataupu e manaʻomia ona uaʻi totoa i ai le ʻautoeaina.
22 Ina ia fesoasoani i le faapotopotoga e faataunuu mea i le tele e mafai ai i le faiva, e ao i toeaina ona faia ni fuafuaga talafeagai e feiloaʻi ai mo le galuega talaʻi a o faagasolo le vaiaso ma faaiʻuga foʻi o le vaiaso. E tatau i le ovasia o le auaunaga ona taʻimua i le faia o nei fuafuaga. Pe mafai ona faia ni feiloaʻiga faaopoopo i le taeaopō po o le afiafi? E tatau ona faailoa atu i le faapotopotoga nei fuafuaga. Atonu o le a fesoasoani pe a faapipii le faasologa i luga o le laupapa mo faasilasilaga.
23 E tatau i toeaina ona faamautinoa ua faia fuafuaga uma mo le Faamanatuga a o leʻi taitai oo atu iā Aperila 16. E aofia i lenei mea le galulue faatasi i le faaaogāina o le Maota o le Malo ma isi faapotopotoga o loo fuafua e feiloaʻi ai i inā, ia faamamā le Maota o le Malo, ia filifili ni tautua ma i latou e tufatufaina le uaina ma le areto ma ia faamautinoa ua iai na mea. E tatau ona faailoa atu i le faapotopotoga le taimi ma le nofoaga e faia ai le Faamanatuga ma nisi suiga i le faasologa o sauniga mo le vaiaso. O le lelei o le faatinoina o nei mea e mafai ona faamanatuina ai le Faamanatuga i se auala ‘matagofie ma ia saunia lelei.’—1 Kori. 14:40.
24 Atonu e mafai e ulu o aiga ona faaaogā se vaega o la latou suʻesuʻega faaleaiga e talanoaina ai le auala e faateleina ai so latou sao i galuega i le vaitaimi o le Faamanatuga. Pe mafai e lou aiga atoa ona paeonia lagolago? Faamata e mafai ona lagolagoina e le aiga se tagata se toʻatasi pe sili atu foʻi o le aiga ina ia paeonia lagolago? Afai e lē mafai, ia faatutū ni sini patino mo le aiga e faateleina ai le taimi i le faiva. Pe e iai se tagata laʻitiiti o le aiga o lē e mafai ona avatu iai se faalaeiauga ma se lagolagosua, e agavaa ai e avea ma tagata talaʻi e leʻi papatisoina? E toʻafia tagata e mafai e lo outou aiga ona valaaulia i le Faamanatuga i lenei tausaga? O le faia o ni fuafuaga lelei o le a aumaia ai le tele o faamanuiaga ma le olioli i lou aiga.
25 Ia Faaaogā Tatau le Taimi o Loo Totoe: I le tusi atu i uluaʻi Kerisiano, na faamanatu atu ai e Paulo iā i latou le utiuti o le taimi, ona o le iʻuga o le faiga o mea faa-Iutaia ua latalata mai. (1 Pete. 4:7) O faamaoniga uma o mea o loo tutupu i aso nei, ua mafai ona iloa ai o le iʻuga o faiga o mea o loo iai nei ua lata mai. E tatau ona faaalia i le auala o loo tatou ola ai i aso uma le moni o lenā talitonuga. I le avea ai ma auauna maelega a Ieova, e tatau ona tatou uaʻi atu i le galuega faanatinati o le faalauiloaina o le tala lelei.—Tito 2:13, 14.
26 O le taimi lenei e ao ona gaoioi ai ma faaalia le maelega! Ia mafaufau loloto i le mea ua faia e Ieova mo oe, o lou aiga ma le faapotopotoga. Ona o mea lelei ua foaʻi mai e Ieova mo i tatou, e mafai ona auauna iā te ia ma o tatou loto atoa, e ui e lē mafai ona toe taui atu. (Sala. 116:12-14) O le a tauia uma a tatou taumafaiga filigā i faamanuiaga mai iā Ieova. (Faata. 10:22) Tau ina ia avea uma i tatou o ni ē e maelega e “faaaʻoaʻo i le lelei” i lenei vaitaimi faapitoa o le faatelega o galuega, “ina ia viia le Atua i mea uma lava, ona o Iesu Keriso.”—1 Pete. 3:13; 4:11.
[Pusa i le itulau 3]
Aofaʻiga o Ē na Auai i le Faamanatuga i le Lalolagi Aoao
1999 14,088,751
2000 14,872,086
2001 15,374,986
2002 15,597,746
[Pusa i le itulau 4]
O Ai o le a E Valaauliaina i le Faamanatuga?
□ O lou aiga ma ou tauaiga
□ O ou tuaoi ma tagata e te masani i ai
□ O tagata tou te faigaluega faatasi ma aʻoʻoga faatasi
□ O asiga ma suʻesuʻega faale-Tusi Paia
[Pusa i le itulau 5]
Ia Fesoasoani iā i Latou o Loo Auai i le Faamanatuga
□ Ia faafeiloaʻi ma le māfana
□ Ia toe asia i latou i se taimi vave
□ Ia ofo atu iā i latou se suʻesuʻega faale-Tusi Paia
□ Ia valaaulia i latou i le lauga faapitoa
[Pusa i le itulau 5]
O ā ou Sini mo le Vaitaimi o le Faamanatuga?
□ Ia auai se tasi na e valaauliaina i le Faamanatuga
□ Ia avea o se tagata talaʻi o le tala lelei
□ Ia faaalu se aofaʻiga patino o itula i le faiva
□ Ia faaleleia nisi vala o le faiva
□ Ia auauna o se paeonia lagolago