E Fesoasoani le Fonotaga Matagaluega iā i Tatou e Puipui Malu lo Tatou Itu Faaleagaga
1. O le ā se tasi o sauniuniga mai iā Ieova e fesoasoani iā i tatou ia faataunuu lo tatou tofiga ia folafola atu le tala lelei?
1 Ua saunia mai ma le agalelei e Ieova ia faamatalaga, le toleniga, ma faalaeiauga tatou te manaʻomia ina ia faataunuu ai le tofiga ua ia tuuina mai iā i tatou e folafola atu le tala lelei. (Mata. 24:14; 2 Timo. 4:17) O se tasi o nei sauniuniga, o la tatou fonotaga matagaluega faaletausaga. O le polokalame fou la mo le tausaga faaleauaunaga o le 2010 o le a talanoaina ai le matua “Ia Puipui Malu Lou Itu Faaleagaga,” e faavae i le Roma 8:5 ma le Iuta 17-19. Ua faatulaga e amata i le vaiaso o Aokuso 31, 2009.
2. (a) O ā auala e aogā ai le fonotaga iā i tatou? (e) Na faapefea ona fesoasoani fonotaga ua teʻa i lau faiva?
2 O Auala e Aogā ai le Fonotaga Matagaluega iā i Tatou: O le a fesoasoani le polokalame ina ia tatou mataala ai i lamatiaga, e pei o mea e faatosina ese ai lea e mafai ona alu uma ai lo tatou taimi, ma sipa ese ai la tatou uaʻi atu i mea e tāua moni. O le a tatou faamasani ai i le auala e ʻalofia ai le agaga faatuutuu, ma tatou iloiloina mea e aofia ai i le avea ma tagata faaleagaga. O le lauga faasolo i le Aso Sa o le a faaalia ai le auala mo aiga ma tagata taʻitoʻatasi e uia ai laasaga e faamalosia ai lo latou itu faaleagaga i nei taimi ua matuā faateteleina omiga ma tofotofoga mataʻutia o le faatuatua. O le a fesoasoani le polokalame iā i tatou ia puipuia o tatou loto, faatumauina lo tatou mālōlōina faaleagaga, ma ia matuā manino i le mafaufau faamanuiaga mataʻina o le a maua e i latou e leoleo malu lo latou itu faaleagaga.
3. O afea le isi a outou fonotaga matagaluega e sosoo ai, ma o le ā e ao ona e maumauaʻi e fai?
3 O le taimi lava tou te iloa ai po o afea ma po o fea foʻi e fai ai la outou fonotaga matagaluega e sosoo ai, ia amata fai loa au fuafuaga ina ia auai, ma uaʻi atu i le polokalame atoa i aso uma e lua. Ia mautinoa, e faamanuia e Ieova galuega a ē filigā.—Faata. 21:5.
4. O ā mea e mautinoa o le a tatou maua i le tatou fonotaga matagaluega o loma nei?
4 O Ieova lava ia, o Lē ua foaʻi maia lenei meaalofa lelei. O lenei polokalame ua saunia mai e le vasega o le pologa faamaoni, e matuā talafeagai lava mo i tatou ina ia faaauau ai pea ona auauna o ni Kerisiano. E tatou te loto faafetai iā Ieova mo ana sauniuniga alofa uma, e fesoasoani iā i tatou ina ia faaauau ona “tausisi e taʻutaʻu atu ma le lē maluelue i le lautele lo tatou faamoemoe.”—Epe. 10:23-25; Iako. 1:17.