Pusa Fesili

◼ Pe e tatau ona tatou tatalo pe a faia se suʻesuʻega faale-Tusi Paia i le faitotoʻa?

E tele aogā e maua pe a amata ma faaiʻu se suʻesuʻega faale-Tusi Paia i se tatalo. Pe a tatalo, o loo tatou ōle atu iā Ieova mo lona agaga paia e fesoasoani mai i la tatou suʻesuʻega. (Luka 11:13) E faailoa atu ai foʻi i a tatou tagata aʻoga, e tāua le tatalo i taimi o lana suʻesuʻega faale-Tusi Paia ma aʻoaʻo o ia i le auala e tatalo ai. (Luka 6:40) O lea, e tāua le faia o le tatalo ma le tagata aʻoga a o leʻi amata le suʻesuʻega. Peitaʻi, ona e eseese tulaga, e manaʻomia ai ona faaalia le faautauta e lē o loo faia le suʻesuʻega, i le filifili pe e tatau ona faia se tatalo i se suʻesuʻega faale-Tusi Paia i le faitotoʻa.

O se tasi o mea tāua e tatau ona mafaufau i ai, o le talafeagai o le nofoaga ma pe e iai foʻi ni tagata o feoaʻi ai. Afai e lē o iai ni tagata, e mafai ona fai sina tatalo puupuu e amata ma faaiʻu ai. Peitaʻi, afai e ono tosina mai ai le vaaiga a ni tagata ma lagona ai e le tagata aʻoga ni lagona mā, e sili la ona faatoʻā fai se tatalo pe a talafeagai ma le tulaga o le nofoaga. Po o fea lava e faia ai le suʻesuʻega, e tatau ona faaaogā lo tatou faautauta i le taimi e tatau ai ona fai se tatalo.—Tagaʻi i La Tatou Faiva o le Malo o Mati 2005, i le itulau e 4.