Ua Fesili Mai Talavou . . .

E Faapefea Ona Ou Taofia le Tuuaia Soo o Aʻu?

“E masani ona tuuaia aʻu. Pe afai e lē lokaina le fale pe lē tapeina le ogaumu po o le tuusese pe lē faia foi o se mea, o Rimoni lava e tuuaia!”—Rimoni.

A O AVEA oe ma talavou, e mafai i nisi taimi ona foliga mai e tuuaia lava oe e toetoe lava o so o se mea ma mea uma e sese. I se mataupu na aumai i le lomiga faa-Peretania ua tuanai atu, na tatou ioeina ai e faapea i nisi taimi i mātua e vave tele ona latou tuuaia a latou fanau.a O mafuaaga mo lenei mea e mafai ona aofia ai le manatu mamafa faamātua ua masani ai e oo atu i mafatiaga loloto tau i faalogona. Po o le ā lava le mafuaaga, ae o le tuuaia mo mea e lē o ni ou sese e mafai ona tiga ma faamasiasia ai.

O le mea moni, i le avea ma se tagata lē lelei atoatoa, o le a e faia ai measese mai lea taimi i lea taimi. (Roma 3:23) E lē gata i lena, ae ona e te laitiiti, e lē lava lou poto masani. (Faataoto 1:4) E mautinoa lou faia o ni faaiuga sese i nisi o taimi. O lea pe a e faia se measese, e matuā talafeagai ma tatau le tuuaia ai oe.—Failauga 11:9.

O lea, e tatau faapefea ona e tali atu, pe a tuuaia oe mo se mea na e faia moni lava? Ua taumafai nisi o talavou e faafoliga e peiseai ua matuā lē tonu le faasalaina o i latou. E latou te tala faamamaʻi mai faapea o o latou mātua e masani ona tuuaia i latou mo mea uma. O le ā le iuga? O mātua ua fiu e latou te maumauai e faia nisi faiga ina ia malamalama ai tamaiti. Ua aumaia e le Tusi Paia lenei fautuaga: “E ʻinoʻino tagata valelea i le poto ma le aʻoaʻoina. Loʻu atalii e, faalogo mai ia i le aʻoaʻo atu a lou tamā; aua foi e te tuulafoaiina le upu a lou tinā.” (Faataoto 1:7, 8) Pe afai e te taʻu saʻo ou sese ma faia ni suiga manaomia, e mafai ona e aʻoaʻoina mai i au measese.—Eperu 12:11.

“Talanoaga Mautinoa” ma Mātua?

E ui i lea, o se tulaga e matuā ese pe afai e tuuaia oe mo ni mea e lē o sou sese po o le faifai pea ona tuuaia oe. O le mea mautinoa, e te ono lagona le ita ma le tiga. E oo lava ina faaosoosoina oe ina ia lē pulea lau amio, i le manatu faapea o le a tuuaia lava oe po o le ā lava le mea e tupu. (Failauga 7:7) Ae peitai, o gaoioiga fia taui ma sui e ono faatiga ai i tagata uma. (Faatusatusa i le Iopu 36:18.) Ua faasino atu le Faataoto 15:22 i se auala e sili ona lelei e feagai ai ma ia tulaga, e faapea: “E faaleaogaina mafaufauga pe a leai se filifiliga, [“talanoaga mautinoa,” NW ].” Ioe, o se tasi o auala e suia ai le auala o loo e feagai ai ma ou mātua o le faailoa atu lea ia i laua o ou faalogona.

Muamua, ia saili mo le mea o taʻua e le Tusi Paia o “aso ua tatau i ai.” (Faataoto 15:23) Na fautua mai le tusitala o Clayton Barbeau: “Filifili se taimi ma se nofoaga a o toafilemu uma tagata ma o loo lelei uma o outou faalogona.” E lē gata i lena, ua lapatai mai le Tusi Paia e faapea: “O le upu faatiga e tupu ai le ita.” (Faataoto 15:1) O lea ia taumafai e agaalofa ma faaaloalo pe a talanoa atu, ae lē o le inainā. Alofia le lē pulea o lou ita. (Faataoto 29:11) Nai lo le osofaia o ou mātua (‘E te lua tuuaia lava aʻu i mea uma!’), ia taumafai e faamatala po o le ā le auala e aafia ai ou faalogona i a la tuuaiga faifai pea. (‘E leaga oʻu faalogona pe a tuuaia aʻu mo mea ia e lē o ni oʻu sese.’)—Faatusatusa i le Kenese 30:1, 2.

E fetaui lelei nei fautuaga i taimi ia pe a lē fiafia ou mātua ona o ni lē femalamalamaiga. Na iai se taimi na lē fiafia ai mātua o le talavou o Iesu ina ua lē iloa le mea sa iai o ia. Ae sa lei tomumu pe faitio ai Iesu. I le toafilemu, na ia faamalamalama atu ai lea tulaga. (Luka 2:49) Aisea e lē taumafai ai e feutagai ma ou mātua i se uiga faatagata matua pe a fetaiai ma se faafitauli? Ia e iloaina e faapea e ala ona la lē fiafia ona o loo manatu mamafa mo oe! Faalologo ma le faaaloalo. (Faataoto 4:1) Faatali seʻi toʻamalie mea ona faatoʻā fai atu lea o lau faamatalaga.

‘Ia Faamaonia i Au Lava Galuega’

E ui i lea, aisea ua mātele ai i nisi mātua le muamua lava vave ona faia o se faaiuga sese i a latou fanau? O le mea moni, o nisi taimi e faia ai e talavou mea e māfua ai ona masalosalo o latou mātua. Ua taʻua e le Faataoto 20:11: “E mafai ona iloa o le tama i lana amio; pe sao ona lelei ma le tonu o lana mea e fai.” O le ā le talaaga lea ua e faia mo ou mātua? Po o au “amio” e faaalia ai o oe e “tonu” ma faamaoni pe faatalale ma lē maufaatuatuaina? Pe afai e te faatalale ma lē maufaatuatuaina, aua e te ofo ai pe afai e masani ona la faia vave se faaiuga sese e uiga ia te oe. Ua faapea mai Rimoni, le alii talavou lea na taʻua muamua, e faatatau i le faitioga a ona mātua, “E tatau ia te au lava ia ona ou faamaoni. I nisi o taimi e iai sina faamaoniga o o la masalosaloga.”

Afai e moni lea i lou tulaga, atonu e itiiti se mea e te mafai ona faia ae pau le mea e fai o le taumafai lea e fai se olaga fou e faaleaogaina ai le olaga tuai. I le faavaeina o se ituaiga o amio e maufaatuatuaina ma faamoemoeina, e ono faasolosolo mālie ai ona e faatalitonuina ou mātua e faapea ua e faia suiga ma e mafai ona maufaatuatuaina oe.

O le mea na tupu ia Rimoni ua faailoa mai ai lenei manatu. O ana uo ma lona aiga e lelei o latou uiga e latou te faaigoaina o ia o se polofesa loto galo ona o lona uiga e galogalogofie mea. Pe na faaigoa oe e ou mātua i se igoa faalemanuia e pei o le “amio faatamaitiiti” po o le “lē aogā?” E pei ona matauina e le tusitala o Kathleen McCoy e faapea, e manatu mātua e faapea o ia igoa e faia “ina ia faamatilatila atu ai le sese i le talavou ina ia mafai ona ia iloa ma faia ai se suiga.” Peitai, o le mea moni, o ia igoa e masani ona faapogaia le tele o le loto tiga. E ui i lea, na oo ina iloaina e Rimoni e faapea o le igoa fai na faaigoa ai o ia na maua ai se manatu aogā. Na ia tautino mai: “E masani e taulai atu loʻu mafaufau i le mea e tasi, o lea e tele ina ou tiaia mea e pei o ki po o aʻu meaaʻoga po o le galo o aʻu galuega masani e fai i le fale.”

O lea sa amata loa ona faia e Rimoni ni suiga. Ua ia faapea mai: “Na amata loa ona ou aʻoaʻoina tiute tauave ma mea e tatau ona faamuamua. Na ou faia se faasologa ma amata loa ona ou matuā uaʻi atu i le faia o suesuega totino faale-Tusi Paia. Na ou aʻoaʻoina e faapea e faatāua e Ieova mea laiti e oo lava i mea tetele.” (Luka 16:10) E ala i le faatatauina o mataupu silisili faale-Tusi Paia, na mulimuli ane aveesea ai le talaaga loto galo o Rimoni. Aisea e lē taumafai ai e faia lea lava mea e tasi? Ma pe afai o se talaaga po o se igoa fai e matuā lē logolelei ia te oe, talanoa faatasi i ai ma ou mātua. Atonu o le a la malamalama i le itu o loo e manatu ai.

Pe a Foliga Mai e Faitama Faapito

I nisi taimi e foliga mai o le faitama faapito e māfua ai le tuuaiga. Na manatua e Rimoni e faapea: “O oʻu uso ma tuafāfine matutua e lē tāitai ona afaina pe a tuai mai i le fale. Ae a ou tuai mai ou te matuā pagatia lava.” Na taʻua e se tamaloa Guyan e igoa ia Alapati e faapea na iai foi ona faalogona faapena a o ia tuputupu aʻe. E foliga mai ia te ia e sili atu ona aoaia mamafa o ia e lona tinā nai lo ona uso.

Ae peitai, e foliga mai e lē o le tulaga lea o mea. E masani i mātua ona tuu atu le saolotoga tele i tamaiti matutua, e lē faapea ona o le faitama faapito, ae ona la te lagona o le a maufaatuatuaina i latou. Pe atonu e iai ni tulaga faapitoa e aofia ai. Na faailoa mai e Alapati e faapea sa lē tāitai oo se sasa i lona uso ona e “tino laitiiti ma maʻi o ia.” Po o se faitama faapito ea la o mātua le iloaina o manaoga po o tapulaa faapitoa o loo iai i se tamaitiiti?

O le mea moni, o mātua i nisi taimi e iai tamaiti e sili ona fiafia i ai. (Faatusatusa i le Kenese 37:3.) Na faapea mai Alapati e uiga i lona uso maʻi: “E faapitoa le alofa o Tinā ia te ia.” O le mea e lelei ai o Kerisiano e faalautele atu lo latou alofa. (2 Korinito 6:11-13) O lea e tusa lava pe afai o ou mātua e “faapitoa le alofa” mo se tasi o ou tei, e lē uiga ai faapea ua leai se alofa o totoe mo oe. O le tulaga moni, Pe e lē o saʻo ea le faiga o oe, tuuaia oe ona o le alofa valea mo isi ou tei? Pe afai e aliali mai o le tulaga lena, ia faailoa atu ia i laua ou faalogona. I se uiga agamalu, uiga faautauta, avatu ia i laua ni faaaoaoga patino i le auala e māfua ai ona e lagona la te faitama faapito. Atonu o le a la faalogo mai.

Aiga e Iai Faafitauli

O le mea moni, e lē o tulaga uma e faigofie ona suia. Mo nisi o mātua, o le faamasiasia ma le tuuaia ua avea ma uiga masani. O lenei masani e ono iai i mātua o ē e iai faafitauli tau i faalogona po o loo tauivi ma ni masaniga leaga. I lalo o na tulaga, e itiiti se aogā e ono maua mai i taumafaiga ina ia faamalamalama ai se mataupu. Pe afai o lenei mea e foliga mai e moni i lou tulaga, i le iloaina e faapea o faafitauli o ou mātua ua i se tulaga e lē mafai ona e faaleleia ma e foliga mai e na o se fesoasoani mai i se isi i fafo atu o le aiga e mafai ona foia ai. O le mea atonu e sili atu ona e faia o le avatu lea ia i laua o le āva ma le faaaloalo tatau ma taumafai e alofia ni feainaiga lē manaomia. (Efeso 6:1, 2) Ua faapea mai le Faataoto 22:3: “O le ua faautauta, na te iloa atu le leaga, ma lafi ai.”b

I le taimi e tasi, tāpā se fesoasoani mai fafo atu o le lio o le aiga. Talanoa ma se tagata matua taumatuaina, pe atonu o se toeaina Kerisiano. O le uaʻi mai ma le agaalofa o sea tagata e mafai ai ona fesoasoani tele e faafetaiaia ai faalogona faapea o oe lava e tuuaia i mea sese. I le taimi e tasi, “faalatalata atu i le Atua.” (Iakopo 4:8) A o tuuaia ma le lē saʻo oe e isi, “E le aoai mai pea lava [le Atua]; e le faamoemoe foi lona toasa e faavavau. Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:9, 14) I le iloaina e faapea e tāua oe i le silafaga a Ieova e mafai ai ona fesoasoani ia te oe e onosaia tuuaiga lē saʻo.

[Faaopoopoga i lalo]

[Ata i le itulau 23]

O le taʻu saʻo o o tatou sese e fesoasoani ai ia i tatou e aʻoaʻoina mai i a tatou mea sese