Le Aʻoga o le Faiva Faatiokarate mo le 2000
1 Ua faamaonia le avea o le Aʻoga o le Faiva Faatiokarate ma faamanuiaga tele mo tagata o Ieova. I le silia ma le 50 tausaga ua mavae, ua fesoasoani ai lenei aʻoga i le faitau miliona e atiina aʻe o latou tomai o ni failauga i le lautele ma ni faiaʻoga o upu moni o le Tusi Paia. (Sala. 145:10-12; Mata. 28:19, 20) Po o mafai ea ona e iloaina le auala o fesoasoani ai lenei aʻoga ia te oe? E mafai ona aogā pea mo oe a o faagasolo le 2000 pe afai e faia ai sou sao atoatoa ma faatatauina fautuaga o loo tuuina mai.
2 O taʻiala e faatatau i tofiga ma lomiga o le a faaaogāina ua lisiina mai i le itulau muamua o le faasologa o le aʻoga mo le 2000. O loo talanoaina ai le taimi faatulagaina mo vaega taʻitasi, lomiga e maua ai lauga, le auala e tauaaoina atu ai le mataupu, faapea ma isi lava faamatalaga. Faamolemole ia faaalu le taimi e faitauina ai taʻiala ma le faaeteete ma faatatauina. Mo lauga e faavae mai se tagata o loo taʻua i le Tusi Paia, e tusa lava pe e te lē malamalama i le faa-Peretania, ae mafai ona e faaaogā mau o loo faasino mai i le mataupu o le Insight e fafau mai ai lau lauga, auā o loo mafai ona e faitauina na mau i lau Tusi Paia faa-Samoa. Atonu foʻi e iai se tala e uiga i lena tagata i Laʻu Tusi o Tala o le Tusi Paia, po o se uso foʻi e malamalama i le faa-Peretania e mafai ona fesoasoani atu e faamalamalama ia te oe le mataupu o loo iai i le Insight.
3 Faitau Tusi Paia Faalevaiaso: E lua ni polokalame eseese mo le faitau Tusi Paia faalevaiaso o loo lisiina mai i le faasologa o le aʻoga. O le tasi o le polokalame faatulagaina o le faitau tusi e faaaofia ai itulau e lima o le Tusi Paia. E faavae mai manatu tāua mai le Tusi Paia i lenei faitau tusi. E iai le isi polokalame faaopoopo mo le faitau tusi ma e faaluaina le telē o le vaega e faitauina. O le mulimuli atu i lenei polokalame, o le a mafai ai ona e faitauina le Tusi Paia atoa i totonu o le tolu tausaga. O le tulaga malamalama e faapea o nisi atonu e mananaʻo e faitau e sili atu ma le mea ua faatulagaina i le polokalame faaopoopo, ae atonu o nisi e lē mafai ona latou tausisia lena faasologa. Na i lo le faatusatusa atu o oe i isi, ia maua le ʻoliʻoli i le mea e te mafai ona fai. (Kala. 6:4) O le mea e sili ona tāua o le faitauina lea o le Afioga a le Atua i aso taʻitasi.—Sala. 1:1-3.
4 Ina ia auai i le Aʻoga o le Faiva Faatiokarate, e tatau ona e talanoa atu i le ovasia o le aʻoga. Faamolemole ia e manatu mamafa i ou tofiga, ae aua le tolopōina ona o ni māfuaaga lē talafeagai. Ia talisapaia le aʻoga o se sauniuniga mai ia Ieova. Ia sauniuni lelei, ia e matuā faamasani i mataupu ua tofia ai oe, ma tautala atu mai le loto, ma faapea ai ona maua aogā atoatoa mai lenei aʻoga e lē mafaatusalia.