Aperaamo—O se Tagata Faatuatua

O loo tū Aperaamo i fafo i se pō taaligoligoa. A o vaavaai aʻe i le malamalama o le lagi vavaloloa, sa ia manatua ai le folafolaga a le Atua o le a faatoʻateleina lana fanau e pei o na fetu. (Kenese 15:5) O fetu o loo iloa atu e Aperaamo, o faamanatuga vaaia ia o le folafolaga a Ieova, ma o faamaoniga foʻi na. Auā o le mea moni, afai o loo iā Ieova le mana e foafoaina ai lenei vateatea aoao ma mea uma o loo iai, pe e lē mafai ea foʻi la ona ia foaʻi atu se tama iā Aperaamo ma Sara? O le faatuatua lenā sa iā Aperaamo.

O LE Ā LE FAATUATUA? E pei ona taʻua i le Tusi Paia, o le “faatuatua,” o le talitonu ma le mautinoa i se mea e lē o vaaia, e faavae i faamaoniga maumaututū. O se tagata e faatuatua i le Atua, e taulaʻi atu i le faataunuuga o folafolaga a Ieova, ma talitonu ma le mautinoa e taunuu.

NA FAAPEFEA ONA FAAALIA LE FAATUATUA O APERAAMO? Na faaalia e Aperaamo lona talitonu i folafolaga a le Atua. Ona o le faatuatua, sa tuua ai e Aperaamo lona nuu na fanau ai, ma le mautinoa e faataunuu e Ieova Lana folafolaga e faasino atu iā te ia se isi nuu. O le faatuatua foʻi sa fealuaʻi ai Aperaamo i le nuu o Kanana, ma le mautinoa o le a fai lenā nuu mo lana fanau. O le faatuatua foʻi lea na usitaʻi ai Aperaamo e ofo atu lona atalii o Isaako e fai ai le taulaga, ma le mautinoa o le a toe faatūina o ia e Ieova.—Eperu 11:8, 9, 17-19.

Sa tepa taulaʻi Aperaamo i le lumanaʻi nai lo o taimi ua tuanaʻi. E ui atonu sa olioli Aperaamo ma Sara i se olaga sologa lelei i Uro nai lo o Kanana, ae “e la te leʻi mafaufau pea i le nuu na ō mai ai.” (Eperu 11:15, Today’s English Version) Nai lo o lenā, na la taulaʻi atu pea i le auala o le a faamanuia ai e le Atua i laʻua ma a la fanau i le lumanaʻi.—Eperu 11:16.

Pe na mauaa le faavae o le faatuatua o Aperaamo? E lē fesiligia lenā mea. Na tausisi Ieova i le faataunuuga o ana folafolaga uma, ma na matuā faatoʻateleina le fanau a Aperaamo ma avea ma nuu o Isaraelu. Mulimuli ane, na ō mai tagata Isaraelu ma nonofo i Kanana, le nuu na folafola atu e Ieova iā Aperaamo.—Iosua 11:23.

O Ā NI LESONA MO I TATOU? E tatou te mautinoa o le a faataunuu e Ieova ana folafolaga. E ui o nisi o nei folafolaga e foliga mai e faigatā ona faataunuu e tusa ma manatu o tagata, ae e tatou te mautinoa “e mafaia e le Atua mea uma lava.”—Mataio 19:26.

E tatou te aʻoaʻoina mai foʻi i le faaaʻoaʻoga a Aperaamo, e aua nei o tatou toe tepa i mea ua tuanaʻi, ae i mea e olioli ai i le lumanaʻi. O le mea lenā na fai e se tamāloa e suafa iā Jason. Sa mafatia Jason i se maʻi tugā, ma iʻu ina pē ai lona tino atoa. Na fai mai Jason: “E iai taimi ou te toe mafaufau ai i aso ua mavae, i nai mea lāiti e sili ona ou misia e pei o le fusi mai o laʻu avā o Amanda.”

Peitaʻi, na faatuatua atoatoa Jason o le a faataunuu e Ieova ana folafolaga. E lē o toe umi ae avea lo tatou lalolagi ma parataiso, ma maua ai e tagata faamaoni le ola e faavavau i le soifua lelei atoatoa.a (Salamo 37:10, 11, 29; Isaia 35:5, 6; Faaaliga 21:3, 4) Ua faapea mai Jason: “Ou te mafaufau pea i taimi e sili ona lelei i le lumanaʻi, ua lē o toe umi ona mavae atu lea e faavavau mafatiaga, popolega, le faanoanoa, ma le lagona o le nofosala.” Maʻeu se faaaʻoaʻoga e sili ona lelei o le faatuatua, e pei o Aperaamo!

[Faaopoopoga i lalo]