“Ikoku Kunoreva Upenyu Husingaperi”
1 Mashoko aJesu akanyorwa pana Johane 17:3 anofanira kurangarirwa nenzira yakakomba. Iye akareva izvo akataura—kupinza zivo yaMwari naKristu kunoreva upenyu husingaperi! Asi tichatuswa noupenyu husingagumi kupfurikidza bedzi nokuva nezivo yaJehovha naJesu here? Aiwa. VaIsraeri vaiziva kuti Jehovha akanga ari Mwari wavo, asi upenyu hwavo hauna kuratidzira kudavira ikoko. Somugumisiro, vakarasikirwa nenyasha dzake. (Hos. 4:1, 2, 6) Nhasi mamiriyoni avanhu anga“shingairira Mwari, asi havaiti nokuziva.” (VaR. 10:2) Vanofanira kusvika pakuziva Jehovha, “Mwari bedzi wechokwadi,” uye kudzidza nzira yokumubatira nayo zvakafanira. Muna November mabhuku anogoverwa mabhurocha. Zvisinei, sezvo bhuku raZivo riri yamuro yedu huru yokufunda, mharidzo dzinotevera dzichanongedzerwa kuichi chinyorwa. Ungadzichinja kuti dzikodzere zvimwe zvinyorwa zvaunenge uchigovera.
2 Sezvo pfungwa yokurarama nokusingaperi pasi pano iri itsva nokuda kwavanhu vazhinjisa, iyi sumo ingabata fariro yavo:
◼ “Tiri kubvunza vavakidzani vedu mubvunzo. Kana mukakumbirwa kugara nokusingaperi munyika yakaita seino, mungagamuchira kokero yacho here? [Ratidza mufananidzo uri pamapeji 4-5 mubhuku raZivo. Bvumira mhinduro.] Ichochi chinogona chaizvoizvo kuva chinoitika chenyu chinofadza muupenyu. Asi chii chamunofunga kuti maizofanira kuita kuti muchione chichiva chinhu chaichoicho nokuda kwenyu? [Bvumira mhinduro.] Cherekedzai kuti chiitoi chinodikanwa maererano naJohane 17:3. [Rava.] Bhuku iri ririkubetsera vakawanda kuwana urwu rudzi chairwo rwezivo. Mungada kuva nekopi yenyu yomunhu oga yokuti murave here? [Bvumira mhinduro.] Pashanyo yangu inotevera, tinogona kukurukura chikonzero nei kune mufungo kudavira kuti tinogona kuwana upenyu husingaperi pasi pano chaipo.”
3 Apo unodzokera kuzoshanyira avo vawakakurukura navo Johane 17:3, ungapfuurira neiyi nzira:
◼ “Mukati meshanyo yangu yakapfuura, ndakakuravirai mashoko anofadza aJesu anowanika pana Johane 17:3, apo akativimbisa kuti kupinza zivo yaMwari neyake kunoreva upenyu husingaperi. Asi vanhu vazhinji vanodavira kuti upenyu huri nani hunogona kuwanwa bedzi mudenga. Munonzwa sei pamusoro paikoko? [Bvumira mhinduro.] Kana bhuku randakakusiyirai riri pedyo, ndingada kukuratidzai mamwe mavhesi eBhaibheri anobvumikisa kuti Paradhiso ichadzorerwa pasi pano. [Kurukurai ndima 11-16 pamapeji 9-10 mubhuku raZivo.] Pashanyo yangu inotevera, ndingada kukuratidzai chikonzero nei muchigona kuvimba neizvi zvipikirwa zvinowanika muBhaibheri. Parizvino, zvichida mungagona kurava ganhuro 2 mukopi yenyu yebhuku racho.”
4 Heino mharidzo yaungada kushandisa navanhu vanoda zvorudzidziso:
◼ “Tave tichikurukura kuvavakidzani vedu pamusoro pechikonzero nei kune marudzidziso akasiyana-siyana akawanda kwazvo munyika. Masangano orudzidziso ane 1 200 ari muUnited States moga, uye anopfuura 10 000 munyika yose. Bva, kunongova neBhaibheri rimwe bedzi. Samafungiro enyu, nei iyi vhiringidziko yamarudzidziso iripo? [Bvumira mhinduro. Vhura bhuku raZivo paganhuro 5, uye rava ndima 1.] Muchagamuchira mhinduro dzinofadza kumibvunzo iyoyo kupfurikidza nokurava ganhuro iri. Ndichafara kugovera bhuku racho kwamuri kana muchida kurinzvera.” Goverai nokuda kwomupiro wenguva dzose. Kana rikagamuchirwa, ita gadziriro chaidzo dzokudzoka, uye iti: “Apo ndinodzoka, zvichida tingagona kukurukura kana marudzidziso achingova hawo nzira dzakasiyana-siyana dzokutungamirira kunzvimbo imwe cheteyo.”
5 Apo unodzoka kuzopfuudzira kurukurirano pamusoro pechikonzero nei kune marudzidziso akawanda kwazvo, ungagona kutaura izvi:
◼ “Apo ndakapedzisira kutaura nemi, ndakabvunza mubvunzo kana marudzidziso ose achingova zvawo nzira dzakasiyana-siyana dzinotungamirira kunzvimbo imwe cheteyo. Munofungei pamusoro paikoko? [Bvumira mhinduro.] Ndingada kukuratidzai mubhuku randakakusiyirai icho Jesu akataura pamusoro penhau yacho. [Tendeukira kuganhuro 5 mubhuku raZivo, uye rava ndima 6-7, kubatanidza Mateo 7:21-23.] Mungashamisika chikonzero nei kuchikosha kwazvo kuziva chiri chaizvoizvo kuda kwaMwari. Muchawana kuti ndima dzinotevera dzinorayiridza zvikuru. Ndapota ravai yasara yeganhuro iri. Nguva inotevera pandinouya, ndichafara kukuratidzai ukoshi hwokuva nezivo yakarurama yeBhaibheri.”
6 Kusvika kwakananga kazhinji kazhinji kunobudirira mukutanga fundo dzeBhaibheri. Heino sumo inokarakadzwa inooneka papeji 12 mubhuku ra“Kurangarira”:
◼ “Ini ndiri kushanya kuzokugoverai kosi yeBhaibheri yapamusha yapachena. Kudai ndingaita, ndaizoda kushandisa maminiti mashomanene bedzi okuratidzira kuti vanhu vari mune dzimwe nyika 200 vanokurukurirana sei Bhaibheri pamusha samapoka emhuri. Tinogona kushandisa upi noupi weiyi misoro sohwaro hwekurukurirano. [Ratidza ndaza yezviri mukati mubhuku raZivo.] Ndoupi unokufadzai zvikuru?” Mirira munhu wacho kuti aite chisarudzo. Tendeukira kuganhuro rasarudzwa, uye tangai kufunda mundima yokutanga.
7 Hekuno kumwe kusvika kunobudirira kwakananga uko ungagona kuedza nokuda kwokutanga fundo:
◼ “Ndinopa zvidzidzo zveBhaibheri pachena uye ndine mikana murudungwe rwangu nokuda kwavadzidzi vokuwedzera. Iyi yamuro yefundo yeBhaibheri ndiyo yatinoshandisa. [Ratidza bhuku raZivo.] Kosi yacho inopedzwa nemwedzi mishomanene bedzi uye inogovera mhinduro kumibvunzo yakadai sokuti: Nei Mwari achibvumidza kutambura? Nei tichikwegura ndokufa? Chii chinoitika kuvadiwa vedu vakafa? Uye tinogona sei kuswedera pedyo naMwari?” Ipapo bvunza, kuti “Ndingaratidzira fundo yacho kwamuri here?” Kana chikarakadzo chefundo chikarambwa, bvunza kana munhu wacho angada kuva nebhuku raZivo kuti arave ari oga. Kana akavimbisa kurirava, govera bhuku racho nokuda kwemupiro wenguva dzose.
8 Zivo yakarurama yaMwari naKristu ipfuma yakadini nokuda kwomunhu ari wose anayo! Kuipinza zvirokwazvo kunoreva upenyu husingaperi mumamiriro ezvinhu akakwana. Ngatishandisei mukana uri wose mukati maNovember kugoverana navamwe zivo inotungamirira kuupenyu husingaperi.