Mweshi wa 2

Yesu badi na lusa lukata bwa bangi. Bantu abaadi abamono bi kifulo kyaye bwabo na abo nkuteemesha mukandu wa Bufumu. Nsaa yoso yatwitulu pa mbalo ya bangi, atwikala na mushindo wa kwibakwasha mu bulungudi. Nkinyi kilombene kwitukwasha bwa kwitula pa mbalo ya baaba batulambukisha? Bibuwa tunangushene pabitale abipusha na kupwandikisha bantu batufumankana nabo, na kwibakitshina myanda mu mushindo umune watukumina’shi betukitshine namu. (Mat. 7:12) Nangushena ku nkalo ya muntu na muntu. Tokumanga kufuba nka na mayele amune bwa kubanga mwisambo na muntu oso atufumankana naye mu bulungudi nya. Anka, atutalaa bwa kuuka myanda inayo muntu na bi mweneno a muntu na muntu. Mwele nkonko na kanemo koso bwa kuuka myanda i mwadi na bi lukumino lwaye. (Nki. 20:5) Nsaa yatwele nkonko, atupa bantu mushindo wabadya kwitulesha bwakinyi abitungu kwibalungula mukandu wibuwa. Nsaa yatuuku byabya, atwikala na mushindo wa kwitula pa mbalo yabo, bwa nkalo kampanda yabadi nayo na kwibakwasha nka bibadi abikitshi Yesu. Lesha byabidi bipushene na 1 Kod. 9:19-23. w19.03 20 ¶2; 22 ¶8-9

Adame na Eeva babakutshilwe kulesha lutumbu bwa bintu byoso bibuwa bibaadi Yehowa mwibakitshine. Atwe boso twi na mushindo wa kulesha’shi, ta twi bakumiine kitshibilo kibabadi baate. Patubatshishibwa, atulesha Yehowa shi twi bakumiine’shi e na matalwa a kwitwelela miiya pabitale ki buwa na ki bubi. Atulesha shi twi bafule Nshetu na twi bamukulupile. Lukalakashi lwatupete kunyima kwa kubatshishibwa, ndwa kutungunuka na kukita akikyebe Yehowa, kushi kyatukyebe’twe banabene. Midiyo ya bafubi b’Efile Mukulu be na nshalelo e byabya. We mulombene kwikala na nshalelo e byabya nka su, otungunuka na kutamisha mpushisho oobe a Bible, Eyi dy’Efile Mukulu; kutwela mu bisangilo; na kulungula bangi na kisumi kyoso pabitale myanda yodi mulongye kwi Nshobe. (Eb. 10:24, 25) Nsaa yokyebe kwata bitshibilo, temesha malango aakupa Yehowa mu Eyi dyaye, na ku bukwashi bwa ndumbulwilo aaye. (Yesh. 30:21) Ku nfudiilo a byoso, oobesha nshalelo obe.​—Nki. 16:20. w19.03 7 ¶17-18

Yehowa mmwitupe bidibwa bibungi bya mu kikudi. Bu kileshesho, atupetaa mayi a kulonda mu bisangilo, mu mikanda, na mu site eetu. Pangi tobopushishe mwisambo, kubadika mutwe wa mwanda kampanda, sunga kubandjila video a televizion a jw, na wamba’shi: ‘Ino myanda nka bu yabadi banfundile.’ Mbikunyi byatudya kulesha lutumbu kwi Yehowa? (Kol. 3:15) Mushindo umune, mpa kumutumbula misusa yoso mu nteko yetu bwa byabya bya buntu bibuwa. Atulesha dingi lutumbu kwi Yehowa nsaa yatulama mbalo yetu yatumulangwilaa na mankenda. Nsaa yatusuula na kulumbuula Nshibo yetu ya Bufumu misusa yoso, na nsaa i baaba abafubu ku byamo bya kutusha mayi abakitshi mwabo moso bwa kupela kwibilwisha. Patulama Nshibo yetu ya Bufumu na mankenda, ayiyisha bipwa bibungi na tayitekye mudimo ukata wa kulumbuula nya. Su twakita byabya, atulama angi makuta bwa kwibaka na kulumbuula angi Mashibo a Bufumu mu nsenga ishima. w19.02 18-19 ¶17-18

Yoobo badi mukishe nsaa ibungi atalanga bipangwa bibuwa bya Yehowa. (Yob. 26:7, 8) Badi mupushe moo nsaa ibadi anangushena pabitale nsenga, eyilu, makumbi, na tubadibadi, akupu ashingula’shi ta badi auku bibungi pabitale bipangwa bya Yehowa. Badi mwate dingi midimo ya Yehowa na muulo. Yoobo bakwile pabitale eyi dy’Efile Mukulu’shi: “Ne mupe miiya yaaye kineemo kikile.” (Yob. 23:12) Yoobo badi mukaanye ngofu pabitale Yehowa, aye nkubanga kumunemeka. Badi mufule Nshaaye na badi na lukalo lwa kumusangasha. Pa mwanda wa byabya, Yoobo baadi munyingishe kitshibilo kyaye kya kulama kululama kwaye. Abitungu tukite bibakitshine Yoobo. Atuuku bibungi pabitale bipangwa bya kukaanya kukila bantu ba mu mafuku a Yoobo. Dingi twi na Bible mushima mufundjibwe ku bukwashi bwa kikudi kiselele akitukwasha bwa kuuka kalolo bi Yehowa. Byoso byatulongo abitukwasha bwa kuusha mashimba etu na moo. Wawa moo na kanemo ketu bwa akikyebe Yehowa, abitutakula mu kumufula na kumukokyela na kutamisha lukalo lwetu lwa kulama kululama kwetu.​—Yob. 28:28. w19.02 5 ¶12

Kubanga kala, bakunkushi ba bana ba bantu ababingabingaa mwilo wa Yehowa. Mbalombene kwitudimbila’shi tubakitshi “bibeshi,” aku namu mwanda oso wabadi nao mpa kumona twi basangule “kukokyela Efile Mukulu pe kukookyela bantu.” (Bik. 5:29) Twi balombene kusengibwa, kwedibwa mu lukano, sunga kukupidibwa. Ku bukwashi bwa Yehowa, tatwiobwela nya, kadi atushala na lwishinko. Tubande kutala kileshesho kyabadi betulekyele kwi bena Ebelu basatu babaabadi bende nabo mu bupika mu Babilone Hanania, Mishaele, na Azariya. Na lwishinko looso, babadi bapatulwile nfumu bwakinyi ta mbalombene kulangwila nkishi abakitshine. Babaadi bakumiine kutengyela kyoso kya kwibafwila su Yehowa atadiila’shi kibafwile. (Nda. 3:1, 8-28) Nsaa i lulamato lwetu kwi Efile Mukulu alutompibwa, mushindo kinyi watudya kwambula bena Ebelu basatu? Abitungu twikale beyishe na tukulupile’shi Yehowa etupasukila. (Mis. 118:7) Atwalula baba abetwamba’shi twi ba nkitshishi ba bubi na lwishinko, na kanemo koso. (1 Mp. 3:15) Na atupele kukita kintu kyoso kikumbene kulwisha bu kuuku bwetu na Nshetu sha kifulo. w19.02 10-11 ¶11-13

Twi balombene kunyingisha mashimba etu pa kutula binangu byetu ku lukulupilo lwabadi betupe kwi mulambu wa nkuulo wa Kidishitu. (Yo. 3:16; Ef. 1:7) Mu lubingo lwa Kitentekyesho, atwikalaa na mushindo wibuwa wa kulesha lutumbu bwa nkuulo. Mu aa mafuku, ikala obadika Bifundwe bi mu Bible pabitale Kitentekyesho na kunangushena na lutumbu ku myanda ibadi ikitshikile Yesu kumpala kwa’shi afwe. Akupu nsaa yatutwele mu Kidibwa kya Mwanana, atukapusha kalolo akipatula mukate na nfinyo ya pa Kitentekyesho na mulambu wabilesha. Nsaa yatupusha kyabadi betukitshine kwi Yesu na Yehowa na kupusha bukwashi bwatupete na bakwetu ba kifulo, na lukulupilo lwetu bwa mafuku e kumpala alutama, atwata kitshibilo kya kushala na mashimba anyingye mpa na ku nfudiilo. (Eb. 12:3) Twi na lutumbu lukata pa kumona’shi Yesu kwete kutungunuka na kulesha kwiyisha n’eshimba dinyingye bu byadi Tshiite Mwakwidi etu mukata e panundu, kwete kwitwakwila! (Eb. 7:24, 25) Bwa kulesha lutumbu, abitungu tutentekyeshe lufu lwa Yesu na lulamato looso, anka bibaadi mwambe.​—Luk. 22:19, 20. w19.01 22 ¶8; 23-24 ¶10-11

Yehowa mupe ooso a kwatudi kinemo kya kumutumbisha. Ngaluulo yatutusha mu bisangilo ngumune wa ku “milambu ayisangasha Efile Mukulu,” na takwi muntu akutusha wawa mulambu pa mbalo yetu. (Eb. 13:15) Yehowa atekaa muntu oso bwa’shi atushe mulambu sunga lwaluulo lwi mumune su? Takitaa byobyo nya! Mona bisangilo bya kakongye bu bidibwa byokwete kudya pamune na ba kuuku bebuwa. Su bakwitanyina mu kudya pamune na bena kakongye na, bakulungula’shi oteekye kidibwa kampanda, we kukita naminyi? We mulombene kupusha ka moo, anka wekala na lukalo lwa kwitatshisha bwa kutwala kidibwa akisangasha bantu boso. Yehowa, aye Mwitwitanyine, mmwitutudile mesa e na bintu bibuwa mu bisangilo byetu. (Mis. 23:5; Mat. 24:45) Na e na muloo nsaa yatutwala kyabuntu kipelepele, muyile bukome bwetu. Byabya elumbuule kalolo na otushe ngaluule muyile bukome bobe. Yaya nsaa twekala penda bu’be adi ku mesa a Yehowa nya, kadi otwala kobe kantu kanudya kwiabishena na kakongye. w19.01 8 ¶3; 13 ¶20

Mu mafuku a kala, lusandji lubadi munkatshi mwa lulangwilo lwi bubi. (Os. 4:13, 14) Bantu bebungi babadi bafule lulangwilo lwi bubi mwanda babadi bafule kukita myanda ibutete, kadi lwalwa lulangwilo lubebapele muloo su? Nya! Daavide bambile’shi baba abalangwila b’efile ba madimi “abefwimisha malwa.” Baba bantu babadi abalambula bana babo kwi b’efile ba madimi! (Yesh. 57:5) Yehowa badi mushikwe etombo dyabo. (Yel. 7:31) Lelo uno, bipwilo bya madimi bibungi bikwete kukumina kutambuka kwa lusandji, mpa na kwifikena pepi kwa mulume na mulume, mukashi na mukashi. Nshalelo a kukita myanda ibutete mmulombene kutakula bantu mu kwipusha’shi mbalungantu, anka mu kwakula kwa kalolo “abefwimisha malwa.” (1 Kod. 6:18, 19) Bomono uno mwanda su? Byabya, anwe ba nsongwa, teemeshayi Nshenu e mwiyilu. Lesha’shi kukokyela Efile Mukulu kwi na muulo. Nangushena kalolo ku bipeta bibubi abitukila mu kukita myanda ibutete. Okamono’shi miloo ya kapindji kapela ayifwishaa masaku akile bungi.​—Nga. 6:8. w18.12 27-28 ¶16-18

Su mwina Kidishitu mwibakile batambuka lusandji, yawa shii musoole mulombene kwata kitshibilo. Yesu bakwile’shi yawa mwina dibaka shii musoole mulombene kwikala na kabingilo ka kwata kitshibilo kya kutshiba dibaka na kwibakilwa sunga kwibakila mungi. (Mat. 19:9) Byabya, su umune akumina kufwila mukwabo lusa ta bibubi nya. Osea badi mukumine kwalusha Gomere. Kunyima kwaye kwaluka kwa Osea, Osea bamulungwile’shi ta mmulombene dingi kwifikena pepi na ungi mulume nya. Kubakidile mafuku Osea “kushii kwifikena pepi” na Gomere. (Os. 3:1-3) Kadi, Osea badi mukumbene kwifikena dingi pepi na mukashi aaye. Bino bibadi abilesha mushindo ubadi Efile Mukulu mukumine’shi bena Isalele balukiile kwadi na kwalusha kipwano nabo. (Os. 1:11; 3:4, 5) Bino abitulongyesha kinyi pabitale eyibakishi lelo uno? Su mwina dibaka shi musole befikena dingi pepi na mwina dibaka naye, bino mbilombene kulesha’shi bapu kumufwila lusa. (1 Kod. 7:3, 5) Yaya nsaa te na dingi kabingilo ka kumupela nya. Kunyima kwa byabya, mulume na mukashi be na kya kukita mwabo mooso bwa kwikwashena bwa’shi bekale na mweneno a eyibakishi e mumune na a Efile Mukulu. w18.12 13 ¶13

Nsaa yatulongo, abitungu tunangushene pabitale mushindo wabamonaa myanda kwi Yehowa mwanda bino mbilombene kwitukwasha bwatudya kwata bitshibilo bibuwa. Kunyima, nsaa yoso yatukekala kumpala kwa mwanda watudi na lukalo lwa kwata kitshibilo bukidibukidi, tabikala bu mwanda ubetubasusha nya. Mukashi a Potifare pabadi atompo bwadya kuponesha Yoosefe, Yoosefe bapelele mususa umune. Abimweneka kalolo’shi, Yoosefe badi munangushene kumpala bi mmweneno a Yehowa bwa dibaka. (Kib. 39:8, 9) Yoosefe balungwile mukashi a Potifare’shi: “Mbii kunyi byandi mulombene kukita bubi bwi bino bukata, na kulwishisha Efile Mukulu?” Bino abilesha’shi badi anangushena mu mushindo aunangushenaa Yehowa. Kadi bwetu’twe? We kukita naminyi su umune a ku bena mudimo nobe shii mukashi sunga mulume oobe abanga kukumina bwa’shi nukishe nsaa pamune? Sunga’shi twi kukita naminyi su muntu etutumina mesaje sunga kifwatulo akilesha bantu be muswa mu telefone? Mbibofule bwatudya kushala na lulamato kwi Yehowa su twekala bapwe kulonga na kukumina mweneno aaye pa mwanda kampanda na su twi bapwe kwata kitshibilo kya myanda yatudi balombene kukita. w18.11 25 ¶13-14

Bangi bantu balongye myanda ya mu Bible abakumina’shi uno verse apushisha’shi: “Nakekala na muloo mwi Mwanana; nakatambuka na kusangala mwi Efile Mukulu.” Dino nyi ndilongyesha dikata kwi oso a kwatudi! Yehowa ta mmwitupe nka penda milayilo i buwa bwa mafuku aafiki nya, kadi etushinkamisha dingi’shi kubashala mafuku apeela, alombasha milayilo yaye yoso. Dilongyesha dyatupete mu mukanda wa Abakuke nyi nkukulupila mwi Yehowa. (Aba. 2:4) Bwatudya kutunguka na kukulupila mwi Yehowa, abitungu kunyingisha kipwano kyetu naye. Kyatudya kukita nkino. (1) Kutungunuka na kulungula Yehowa pabitale twinyongoshi twetu na myanda yetu. (2) Tuteemeshe kalolo ku myanda yabetulungula kwi Yehowa i mu Eyi dyaye, na kulonda buludiki bwabetupa kwi ndumbulwilo aaye. (3) Twikale na lulamato na lwishinko nsaa yatukyatutengyela Yehowa bwa’shi alombashe milayilo yaye. Bino ngi bibakitshine Habakuke. Sunga mbibadi mwinyongole ngofu nsaa ibabangile kwisamba na Yehowa, ku nfudilo, badi munyingishibwe na aye nkupeta muloo! Su tubambula Abakuke, natwe namu atukapete kusambibwa ku mushindo awitukukila Yehowa, Nshetu a mwiyilu na muloo. Nkusambibwa kukata kinyi kwatupete mu uno ndumbulwilo e bubi? w18.11 17 ¶18-19

Tala kangi kabingilo aketushinkamisha’shi Yehowa mmwitufule: “Efile Mukulu mmufule baa pano bikile, mu kipaso kyaadi mupaane Mwan’aye eeleka, bwa’shi muntu ooso amukumiina tashiminanga, anka ayikale na muuwa wa iikalaika.” (Yo. 3:16) Mulambu wa nkuulo wa Yesu awitushinkamisha’shi n’aye namu mmwitufule, na kino kifulo kyaye akitunyingisha. Bible akula’shi ta kwi kintu su nkimune, su “mpombo su nkinyongwa” ta “nkilombene kwitulamuuna ku kifulo ky’Efile Mukulu kitufumbwilwe mu Yesu Kidishitu.” (Lom. 8:35, 38, 39) Ingi nsaa, twi balombene kupeta myanda i bukopo ilombene kwitubofusha ku mbidi mpa na mu binangu sunga kwitukatusha muloo oso wa kufubila Yehowa. Anka patutentekyesha bukata bwa kifulo kyabadi betufule kwi Kidishitu, bino mbilombene kwitupa bukome bwa kunyingiila. (2 Kod. 5:14, 15) Kifulo kya Yesu akitupa malaka a kutungunuka na kwikala na muwa na kufubila Yehowa. Nkilombene kwitukwasha bwa’shi ta tubofulanga, sunga twekala kumpala kwa masaku aatukilaa ku bintu bipangibwe, kumpala kwa kubingwabingwa, nsungu, sunga twinyongoshi. w18.09 14 ¶8-9

Bwa kutungunuka na kutambukila mu bya binyibinyi, abitungu tukumine na kukokyela ku kintu kyoso kyabakula kwi Yehowa. Abitungu twikashe bya binyibinyi bu kintu ki na muulo ukata mu nshalelo eetu na kukokyela mayi akulonda a mu Bible mu bikitshino byetu byoso. Anka bu Daavide abitungu twate kitshibilo kya kutungunuka na kutambukila mu bya binyibinyi. Su twa kutwa kudimuka, twi kubanga kunangushena ku myanda ibatudi balekye bwa kulonga bya binyibinyi na twi balombene kukimba bya kwaluka ku yaya myanda. Byabya ta twi balombene kusangula bya binyibinyi kampanda bya mu Bible bya kufubila na bya kuleka nya. Abitungu tutambukile mu “bya-biinyibiinyi byooso.” (Yo. 16:13) Bwa kushinkamisha’shi ta twi bya kupambuka mu bya binyibinyi, abitungu tutungunukye na kufubisha nsaa yetu kalolo. Su ta twi batale kalolo, twi balombene kwipaana mu kukisha nsaa ibungi mu myanda ya kukisha kapapi, mu myanda ishi na muulo, ku internete, sunga mu kubandila televizion. Sunga’shi bino bintu ta bi nka bubi, twi balombene kufubisha nsaa yetu bwa kwilongyela na kwenda mu bulungudi. w18.11 10 ¶7-8

Ku nsaa na nsaa, kukwete kukitshika kushintuluka kwa mu kimpulunkamba mu muwa wetu, na kuno kushintuluka nkulombene kwitwinyongosha. (Nki. 12:25) Nsaa yatupusha bukopo bwa kukumina kushintuluka, twi balombene kukita kinyi bwa kulama butaale bwa mwishimba? (Mis. 131:1-3) Sunga twafumankana na myanda i naminyi mu nshalelo etu, lelo uno tukwete kumona bukitshishi bwa “butaale bw’Efile Mukulu” abulama binangu byetu. (Fid. 4:6, 7) Byabya, su tubefubwila kwi Yehowa nsaa yatudi na twinyongoshi, butaale bw’Efile Mukulu abunyingisha kitshibilo kyetu kya kulombasha mpango yetu ya mu kikudi, na kwitukwasha bwa kupela kukooka. Kukatusha kwitufukamisha mashimba, kikudi ky’Efile Mukulu akikaka binangu byetu ku ma verse akumbene kwitukwasha bwa kulama mpàngo yetu ya mu kikudi.​—Yo. 14:26, 27. w18.10 27 ¶2; 28 ¶5, 8

Nkintu kinyi kikwete kulwishisha bantu boso? Madimi! Kudimba madimi nkwakula kintu kyouku’shi ta nky’eyendo bwa kulubisha muntu. Muntu kinyi a kumpala badi mwakule madimi? Nyi Diabulu! Yesu Kidishitu badi mumwitanyine bu “Nshee madimi.” (Yo. 8:44) Nsaa kinyi ibadi mwakule madimi a kumpala? Badi mukite bino takudi bipwa binunu na binunu mu lupango lwa Edene. Adame na Eeva abadi na nshalelo ebuwa mu Mpaladiso ababadi bebakitshine kwi Yehowa. Efile Mukulu bebalungwile’shi su babadi kikuba kya “mutshi wa kushinguula buuwa sunga bubi,” abafu. Sunga mbibadi auku uno mwanda, Satana bafubile na nyoka bwa kulungula Eeva’shi: “Taanufu’nwe.” Ano ngi madimi a kumpala abadi mwakule. Satana bambile dingi’shi: “Efile Mukulu awuku’shi efuku dyanwikidi, meeso eenu aabuuluka, dingi anwikala bu b’efile, balombeene kushinguula buuwa na bubi.”​—Kib. 2:15-17; 3:1-5. w18.10 6 ¶1-2

Bwa kwikala n’eshimba di selele, abitungu tulame binangu byetu bikale selele sunga bitookane na kukatusha malaka ebubi. Kukita bino kwi na muulo ukata su atukyebe’shi Yehowa akumine lulangwilo lwetu (2 Kod. 4:2; 1 Tim. 1:5) Yehowa bambile’shi: “Muntu tammulombeene kummona ashaala atala.” (Efi. 33:20) Byabya, bantu be na mashimba e selele mbalombene ‘kumona Efile Mukulu’ naminyi? Kishima kya mu kina Greke kyabadi baluule bu “kumona” nkilombene kupushisha dingi kunangushena, kushinguula, sunga kuuka. Byabya “kumona Efile Mukulu” akupushisha kushinguula bi bu muntu bwaye na kufula ngikashi yaye. (Ef. 1:18) Na dingi, twi balombene “kumona Efile Mukulu” nsaa yatumono mushindo wetukwasha mu muwa wetu. (Yob. 42:5) Twi balombene dingi “kumona” sunga kutula binangu byetu pa bintu bibuwa byabadi betulee kwi Yehowa byakakitshina bantu boso abashala be selele na abamufubila na lulamato. w18.09 20 ¶13, 15-16

Su tubekala atukitshi myanda yatuuku’shi ibuwa, atukekala na binangu na Yehowa aketwelela myabi. Sunga byekala’shi binangu abikalaa bimeene pa myanda yatuuku, binangu ta mpenda kushinguula myanda nya. Binangu atwibilesha mpa na mu bitshibilo byatwata. Mpa na tunyeenyeene atuleshaa binangu pa kulumbuula byakudya byato mu mafuku a eshipo. (Nki. 30:24, 25) Kidishitu, abayitanyina dingi bu “binangu by’Efile Mukulu,” akitaa myanda ayisankisha Nshaye nsaa yoso. (1 Kod. 1:24; Yo. 8:29) Efile Mukulu aketufutu mpa n’atwe namu su tubalesha binangu pa kusangula bwa kukita myanda yatuuku’shi ibuwa na kwikala beyishe. (Mat. 7:21-23) Byabya tungunuka na kwikitshisha bwa kwikasha kakongye bu mbalo ibuwa yatudi balombene kufubila Yehowa na kwiyisha. Bwa kutumikila myanda yatuuku’shi ibuwa abyataa nsaa ibungi na abitungu twikale na lwishinko. Anka su tubakitshi bino atulesha’shi twi na kwiyisha, na kwiyisha akuketwikasha na muloo kubanga binobino mpa na bwa ikalaika. w18.09 7 ¶18

Nsaa ibabapangile bantu kwi Yehowa, badi mukumine’shi bekale abafubu pamune naye. Sunga bi bantu mbakutwe kupwidika lelo uno, bantu basha lulamato mbalombene kutungunuka na kufuba pamune na Yehowa efuku dyoso. Bu kileshesho, “tukwete kufuba pamune n’Efile Mukulu” nsaa yatulungula mukandu wibuwa wa Bufumu na kwikasha bantu bu balongi. (1 Kod. 3:5-9) Nyi nkinemo kikata kyabadi betupe kwi Mupangi eetu p’aye kwitusangula bwatudya kukita uno mudimo wi na muulo ukata! Na dingi, ta nka penda kulungula mukandu wibuwa ngi mushindo watukwete kufuba pamune na Yehowa nya. Ingi mishindo yatukwete kufuba pamune naye nsaa yatukwasha bena kifuko kyetu na bantu be mu kakongye, nsaa yatukuukila benyi, nsaa yatukwasha ku midimo ya ndumbulwilo yabakwete kufuba mu nsenga ishima, na nsaa yatutamisha mudimo wetu watufubila Yehowa. (Kol. 3:23) Bantu ta be mumune. Bungi bwa bipwa byetu, mbidi, nshalelo, na ngobesha yetu ta i mumune nya. Ngi bwakinyi tokumanga kupwandikisha myanda yodi mulombene kukitshina Yehowa na yabamukitshina kwi bangi. w18.08 23 ¶1-2

Yehowa baadi mushinkamishe Abakuke’shi aluula ku nkonko ibeele n’eshimba dyaye dyooso. Abakuke badi na kya kusambibwa ku twinyongoshi twaye. Bibadi nka bu Yehowa badi alungula mutemuki’shi: “Tengyela na lwishinko na tungunuka na kunkulupila. Nakaluula luteko lobe, sunga byamweneka bu kubayisha kipindji ki bula.” Yehowa badi atentekyesha Abakuke’shi badi mupwe kwata kitshibilo kya kulombasha milayilo yaaye. Ngi bwakinyi badi munyingishe Abakuke bwadya kutungunuka na kutengyela. Byabya, mutemuki tabadi mulombene kutshoboloka nya. Natwe namu twi na lukalo lwa kutengyela Yehowa bwa’shi aluule ku nteko yetu. Na dingi abitungu tuteemeshe kalolo myanda yoso y’etulungula. Su tubakitshi byabya, atwikala na lukulupilo na butaale bwa mwishimba sunga twapeta nkalakashi ibukopo bwi naminyi. Yesu badi mwitukankamikye bwa kupela kutula binangu byetu pabitale “nguba na kipungo” byabashii betulungule kwi Efile Mukulu. (Bik. 1:7) Abitungu tukulupile’shi Yehowa auku nsaa ibwa yadya kwalula. Byabya ta twi balombene kukooka nya, anka abitungu twikale beyishe na basha lwishinko na lukumino mwi Efile Mukulu. Pano patuki’atutengyela, abitungu tufube na nsaa yetu kalolo bwa kufubila Yehowa muyiile ngobesha yetu.​—Mak. 13:35-37; Nga. 6:9. w18.11 16 ¶13-14

Mumune na bena Yuda ba mu mafuku aaye, Mpyeele bakudile na binangu bya’shi bantu ba bingi bisamba be butete. Anka, Mpyeele bafumankene na myanda ibadi ayitungu’shi ataluule mweneno aaye. Kileshesho, Mpyeele bapetele kimonwa kya kukanya. (Bik. 10:9-16) Anka bu Mpyeele, abitungu twitaluule atwe banabene na kukumina bukwashi bwa’shi tumone bya kutundula su kwi kantu ka ntondo su nkapeela kashale munda mwetu. Nkingi kintu kinyi akitungu tukite? Su “eshimba dyeetu ndifungulwe dyooso,” twi balombene kukatusha ntondo mwanka na kwiyipyanyisha na kifulo. (2 Kod. 6:11-13) Okuminaa kushala pamune nka na bantu be na elangi dy’ekoba di mumune na dyobe, ba mu eumbo dyenu, ba mu kisamba kyenu, sunga abakula ludimi lwenu su? Su mbyabya, ekitshishe bwa kukisha nsaa pamune na bangi bantu. We kwitanyina bakwetu balume na bakashi abafiki mu maumbo elekeene bwa kufuba noobe mu mudimo wa bulungudi. Sunga’shi we kwibetanyina ku nshibo yoobe bwa kudya nabo kya kudya pamune. (Bik. 16:14, 15) Yaya nsaa, eshimba dyobe adikekala dyule ndaa na kifulo na tamwikala dingi kantu ka ntondo su nkapeela. w18.08 9 ¶3, 6; 10 ¶7

Bangi ba Temwe bena ingi myanda yabash’abandile kulesha kalolo’shi mbelekene na bantu ba mu uno ndumbulwilo. Bu kileshesho, nsaa yabende ku misangeelo, bamo bakwete kusha na kukita myanda mu mushindo ushi ulombene bena Kidishitu. Bangi mbele bifwatulo byabo ku Internete na kufunda myanda ayilesha’shi be na binangu bya ku mbidi. Anka, mbalombene kwikala na bukitshishi bwi bubi kwi bakwabo balume na bakashi bakwete kwikitshisha bwa kwikala belekene na bantu ba mu uno ndumbulwilo. (1 Mp. 2:11, 12) Bintu byoso byabatusha mu uno ndumbulwilo mbebikite bwa kwitutakula mu kwipana ngofu ku “ndakalaka ya mbidi, ndakalaka ya meeso na lwabi lwa kwisadikila mu bupeta.” (1 Yo. 2:16) Atwe twi bantu ba Yehowa, ngi bwakinyi twi belekene na bantu ba mu uno ndumbulwilo. Atusumbushena “bubi na lwabi lwa bintu bya pa nsenga,” na ‘atushala mu kino kipungo na kwiyeesha, bululame na kishima kwi Efile Mukulu.’ (Tt. 2:12) Nshalelo eetu oso mushima, mpa na ngakwilo eetu, ndiilo, ntomeno, nfwadilo, na nfubilo eetu, abitungu aleshe patooka kwi bantu boso’shi twi bantu ba Yehowa. w18.07 25 ¶13-14

Su tubatungunuka na kutala kwi Yehowa, tatukalwisha kipwano kyetu naye sunga kufita munda pa mwanda wa myanda yabakitshi kwi bangi nya. Bino bi na muulo bikishekishe patudi na mashito mu ndumbulwilo a Efile Mukulu bu bibadi Moyiise. Byabya, abitungu’shi oso a kwatudi ekitshishe ngofu na kukookyela Yehowa bwadya kupashibwa. (Fid. 2:12) Anka, su tubapete mashito ebungi, Yehowa namu aketutekye bibungi. (Luk. 12:48) Su twi bafule Yehowa binyibinyi, ta kwi kintu su nkimune kilombene kwitukokosha sunga kwitwabuula kula na kifulo kyaye nya. (Mis. 119:165; Lom. 8:37-39) Twi mu kipungo kibukopo mwatufumankana na nkalakashi ibungi. Ngi bwakinyi bi na muulo ngofu bwa’shi tutungunukye na kutala meeso eetu kwi Yehowa, aye “mushikame mwiyilu,” bwatudya kushinguula myanda yakumina’shi tukite. (Mis. 123:1) Tatutadilanga bikitshino bya bangi bwabidya kulwisha bukuuku bwetu na Yehowa. w18.07 16 ¶19-20

Twi na muloo wibungi wa kupusha’shi bafubi b’Efile Mukulu bakwete kumunyika etaata dyabo! Mu kipwa kya 2017, ba Temwe ba Yehowa mbalongye Bible na bantu bakile pa 10 000 000. Bantu midiyo abakumina kwituteemesha mbafikye ku Kitentekyesho kya lufu lwa Yesu na mbalongye myanda ibungi pabitale mulambu wa nkuulo wabadi betupe bu kya buntu kya kifulo kwi Yehowa. (1 Yo. 4:9) Mu nsenga ishima, ba Temwe ba Yehowa abakula ndimi ilekene. Anka, bino tabitukutshishwa kutumbisha Yehowa bu mwilo wi mu buumune nya. (Kibaf. 7:9) Sunga twekala atwakula ludimi kinyi na bashale mu mbalo kinyi, twi balombene kumunyika etaata dyetu bu “bimunyi by’etaata pano pa nsenga.” (Fid. 2:15) Mudimo wetu wa bulungudi, buumune bwetu bwa bena Kidishitu, na binangu byetu bya kufuba bukidibukidi, ino myanda yoso ayitumbisha Yehowa. w18.06 21 ¶1-3

Yesu badi na muloo wa kwisamba na uno mwana mukashi mu kipaso kibadi mumone kudya bu mwanda ushi na muulo ngofu ku meso kwaye. Nshaaye badi akumina’shi alungule mukandu wibuwa, na kukita kikyebe ky’eshimba Dyaaye, mpa na kulungula mukandu wibuwa kwi mwana mukashi a mu Samariya, kubadi nka bu byaye bya kudya. (Yo. 4:32-34) Shake na Yowano tababadi bapushe dino dilongyesha di na muulo kalolo nya. Balongi pababayile na Yesu mu bibundji bya mu Samariya, abakimbile mbalo ya kulala mu ungi musoko wa mu Samariya. Anka bena Samariya abapelele kwibapa mbalo ya kulala. Shake na Yowano abafitshile munda ngofu abo nkuteka Yesu bwadya kwibapa matalwa a kutuma kaalo ka mwiyilu bwakadya kushika uno musoko ushima. Yesu badi mwibape elango di bukopo. (Luk. 9:51-56) Pangi Shake na Yowano tababadya kufita munda ngofu bino su uno mwanda ubadya kukitshika mu kipindji kya nsenga kya Ngalelileya eumbo dyabo dya butandwa nya. Babafitshile munda ngofu bino pangi pa mwanda wa’shi babadi na ntondo. Kunyima, pabadi Yowano alungula mukandu wibuwa kwi bena Samariya na pababadi bamuteemeshe kwi bantu bebungi, pangi bapushishe bufu bwa bibakitshine kumpala kwa mafuku.​—Bik. 8:14, 25. w18.06 10-11 ¶12-13

Pa mwanda wa’shi bya binyibinyi bya mu Eyi dy’Efile Mukulu bi na muulo kwatudi, atukookyela abitulungula Bible’shi abitungu twikale atwakula bya binyibinyi mu myanda yoso. Madimi, ngimune ya ku ma mputu akata a Satana. Madimi aalwishisha muntu eatemesha na yawa eakumina. (Yo. 8:44) Ngi bwakinyi sunga twekala bantu bakutwe kupwidika, atwikitshisha na mwetu moso bwa kupela kudimba. (Ef. 4:25) Kukita bino nkulombene kwikala bukopo. Abigail, e na bipwa 18 akula’shi: “Kwakula bya binyibinyi ta kwi nka buwa nsaa yoso nya, bikishekishe mu nsaa ayitungu’shi bwa kutuuka mu mwanda wi bukopo abitungu’shi odimbe.” Bwakinyi bibuwa kwakula bya binyibinyi? Victoria, e na bipwa 23, akula’shi: “Nsaa ywakula bya binyibinyi na kushala mulamate ku malongyesha odi mukumine, we kufumankana na bantu abakutshinyisha. Sunga mbyabya okapete nka myabi ibungi: Bantu abekala abakukulupila, wepusha pepi na Yehowa, na baba bakufule abekala abakunemeka.” Bomono bwakinyi bi na muulo bodya kwikala mufwale “biinyibiinyi bu mukoba” nsaa yoso su? w18.05 28 ¶3, 5

Abitungu twikale bapasukye binobino kukila byatwikalanga bapasukye kumpala. Myanda ya mu uno ndumbulwilo ikwete kwenda na kunyisha kulwila. Anka atuuku’shi nfudilo ayikafiki pa nsaa yabadi bapwe kutshiba kwi Yehowa. (Mat. 24:42-44) Patuki’atutengyela, abitungu twikale na lwishinko na kutula binangu byetu ku myanda yatutengyela. Ikala obadika Bible efuku dyoso, kushi kwimika kuteka Yehowa. (1 Mp. 4:7) Longyela ku bileshesho bya bakwetu balume na bakashi abapu kufubila Yehowa munda mwa bipwa bibungi. Ikala na myanda ibungi ya kukita mu mudimo wa Yehowa. Kitshina bangi myanda ya kalolo, na wekale oshala pamune na bakwenu balume na bakashi. Su bokitshi byabya, okekala na muloo, na okamono’shi nsaa ikwete kukila lubilolubilo. (Ef. 5:16) Sunga twakita bilubilo bibungi, Yehowa etupa mushindo wa kutungunuka na kumufubila. Bwa kwitukwasha, mmwitupe “bantu [bekale] bya buntu,” bakulu mu kakongye. (Ef. 4:8, 11, 12) Byabya, nsaa yabafiki mu nkutala kwi bakulu, kimba mushindo odi mulombene kufuba na ino nsaa bwa kupeta malongyesha ku binangu na ku elango dyabakupa. w18.06 24-25 ¶15-18

Yesu balungwile balondji baye’shi abitungu ‘kushala mu kifulo kyaaye.’ Bwakinyi Yesu badi mwakule bino? Mwanda badi muukye’shi balondji baye be na lukalo na kunyingishibwa bwabadya kushala bu bena Kidishitu ba binyibinyi. Sunga mbyabya, mu Yowano 15:4-10, atumono’shi Yesu badi mufube na kishima “kushaala” kebungi bwa kukwasha balondji baye baukye’shi abitungu bekale na kunyingiila. Twi kulesha naminyi’shi atukumina kushala mu kifulo kya Kidishitu na kukuminyibwa naye? Nka nsaa yatumukokyela. Yesu etutekye bwatudya kukita kibadi mukite aye nabene. Bakwile’shi: “[Ne] mu kifulo kya Nshami, pa kulama mayi aaye.” Yesu mmwitulekyele kileshesho. (Yo. 13:15) Nsaa yatukookyela mwiya wa Yesu wa kulungula mukandu wibuwa, atulesha’shi twi bafule mpa na Yehowa. (Mat. 17:5; Yo. 8:28) Na dingi nsaa yatulesha Yehowa na Yesu’shi twi bebafule, abetulama mu kifulo kyabo. w18.05 18 ¶5-7

Pokii mukinga, we na bitshibilo bibungi abitungu’shi wate. Su ouku mbalo ywende, abikekala bibofule bodya kusangula eshinda dya kwenda. Mu mushindo umune, su ouku bipatshila byobe, abikekala bibofule bodya kwata bitshibilo bibuwa. Su bopwandjikisha myanda kumpala pa kwata bipatshila bibuwa, okebikumbasha bukidibukidi. Ba nsongwa binunu na binunu be mu nsenga ishima bakwete kukita myanda ibuwa na twi balombene kwibakampula. Kipwano kyabo na Yehowa na bipatshila byabo bya mu kikudi ngi myanda i na muulo ngofu mu muwa wabo. Bano ba nsongwa be na muloo wa binyibinyi mu muwa wabo na bakwete kulonga bya kulonda bukunkushi bwa Yehowa mu myanda yoso. Mbitale dingi mpa na shalelo a mu kifuko. Salomone bambile’shi: “Kulupila kwi Yehowa n’eshimba dyoobe dyooso.” Aye nkwamba dingi’shi: “Mu mwikeelo oobe ooso, omutentekyeshe, aye alumbuula mashinda oobe ooso.” (Nki. 3:5, 6) Anwe ba nsongwa, Yehowa mmwinufule ngofu! Nwi na muulo ukata ku meso kwaye, na aye namu akenukalwila, enukunkusha, na kwinwelela myabi. w18.04 26 ¶7; 27 ¶9

Yowano mutumibwa badi munkatshi mwa bantu abadi abakunkusha kakongye ka bena Kidishitu ba kumpala. Badi mufunde evanjile mubadi mulonde myanda ibakitshine Yesu mu mudimo waye wa bulungudi. Uno mukanda wa mu Bible ubadi unyingishe bena Kidishitu munda mwa bipwa nkama na nkama na uki’autungunuka na kwitunyingisha atwe be lelo uno. Bu kileshesho, nka penda mu mukanda wa Yowano ngi mwatubadika mayi a Yesu aalesha’shi kifulo nyi nkitundwilo kya balongi ba Yesu ba binyibinyi. (Yo. 13:35) Mikanda isatu ibabafundjile kwi Yowano i na ingi myanda ya binyibinyi i na muulo. Nsaa yatubofula pa mwanda wa bilubilo, atunyingishibwa patubadika’shi mulambu wa nkuulo wa Yesu ‘awitutumpu ku milwisho yooso.’ (1 Yo. 1:7) Na dingi su atutungunuka na kwikalakasha pa mwanda wa milwisho ya kala, atusambibwa nsaa yatubadika’shi “Efile Mukulu mmukile mashimba eetu ku bukata.” (1 Yo. 3:20) Nka penda Yowano ngi mufundji a Bible bafundile’shi “Efile Mukulu nyi nkifulo.” (1 Yo. 4:8, 16) Mukanda waye wa kabidi na wa kasatu ayikampula bena Kidishitu abatungunuka na kutambuka mu “bya binyibinyi.”​—2 Yo. 4; 3 Yo. 3, 4. w18.04 18 ¶14-15