Mweshi wa 5

Mu mafuku ashale, bantu bebungi abekalanga basuukye mu maumbo aabo na binobino mbashale mu maumbo mwabadi basuukile. We mulombene kulonga bya kwibeela moyo mu ludimi lwabo. Na dingi, we kulonga myaku ipeela ilombene kwibatakula bwa kukumina kwisamba nobe. Kunyima we kwibalesha ma video na mikanda i mu ludimi lwabo mu jw.org. Yehowa sha kifulo mmwitupe bintu byoso byatudi nabyo lukalo bwatudya kulungula mukandu wibuwa. Bu kileshesho, myanda yatulongo mu kisangilo kya Bwina Kidishitu na Mudimo wetu ayitukwasha bwatudya kukatusha moo nsaa yatwalukila mu kutala bantu na kubanga kulonga nabo Bible. We mulombene kulongyesha bana bobe bwabadya kwikala abaluula mu bisangilo mu bishima byabo’bo banabene. Bangi bantu mbakakibwe mu bya binyibinyi nsaa ibabadi bapushe bana bakinga abaluula mu bisangilo mu bishima bipelepele na abituukila mu mashimba aabo.​—1 Kod. 14:25. w18.06 22-23 ¶7-9

Abitungu twikale atutentekyesha’shi boso bwetu atwikalanga kula n’Efile Mukulu. (Ef. 2:12) Anka Yehowa mmwitwitanyine kwadi na kifulo kyoso. (Os. 11:4; Yo. 6:44) Na Kidishitu namu mmwitutambule. Mmwitupe mushindo watudya kutwela mu kifuko ky’Efile Mukulu. Sunga twekala bantu bakutwe kupwidika, Yesu mmwitutambule na kalolo koso, ngi bwakinyi ta twi balombene kwela binangu bya kusumbushena muntu su ngumune! Bu byatukwete kunyisha kwifubwila pepi na nfudilo a uno ndumbulwilo e bubi, bantu abakanyisha kwiabuula, kwikala na ntondo na kwishikwena. (Nga. 5:19-21; 2 Tim. 3:13) Anka, atwe mwilo wa Yehowa, atukimbaa “binangu bya mwiyilu,” abitukwasha bwatudya kukatusha ntondo na kunyisha kwikala mu butaale. (Shak. 3:17, 18) Twi na muloo wa kwikala mu bukuuku na bantu ba mu angi maumbo, kukumina mushindo wabo wa kukita myanda, pangi na kulonga ludimi lwabo. Nsaa yatukitshi bino, butaale bwetu abukekala nka “bu mwela” na kululama kwetu akukekala nka bu “myeeshi ya mbuu.”​—Yesh. 48:17, 18. w18.06 12 ¶18-19

Musalayi a bena Looma tabadi mulombene kwenda mu ngoshi kushi bilato nya. Bino bilato abadi abebikitshi na myoshi isatu ya misokya, ngi bwakinyi bibadi bukopo ngofu. Anka bino bilato bibadi dingi buwa, ngi bwakinyi musalayi badi mulombene kutambuka kalolo kushi kuselemuka. Bilato bibabadi abafwala kwi basalayi ba bena Looma bibadi abibakwasha bwabadya kutshokola ngoshi, kadi bilato bya mu kifwanyi byatufwala abitukwasha bwatudya kulungula “mukandu wibuwa wa kufukama.” (Yesh. 52:7; Lom. 10:15) Anka, ingi nsaa abitungu kwikala n’eshimba dinyingye ngofu bwa kumona bya kulungula mukandu wibuwa. Bo, e na bipwa 20 akula’shi: “Nadi na moo wa kulungula mukandu wibuwa kwi bena kalasa nami. Namono’shi nadi na bufu. Pantala kumongo, ntanguku bwakinyi nadi napusha buno bufu nya. Binobino ne na muloo wa kulungula mpa na kumpala kwa bena nshibo.” Ba nsongwa bena Kidishitu bebungi mbasangane’shi abalungulaa mukandu wibuwa kalolo nsaa yabelumbuula kumpala kwa kwenda mu bulungudi. w18.05 29 ¶9-11

Yesu balungwile batumibwa baye’shi: “Nenupa butaale bwande.” (Yo. 14:27) Butaale bwa Yesu bwi kwitukwasha bwatudya kutungunuka na kulungula naminyi? Nsaa yatutungunuka na kulungula mukandu wibuwa, atupusha butaale mwanda atuuku’shi atusankisha Yehowa na Yesu. (Mis. 149:4; Lom. 5:3, 4; Kol. 3:15) Kunyima kwa Yesu kulungula batumibwa baye’shi akumina bekale na muloo, badi mwibapatulwile bwakinyi bi na muulo bwabadya kwikala na kifulo kishi kya kwikumina penda abo banabene. (Yo. 15:11-13) Akupu bakwile’shi: “Nenwitanyina bu bakuuku.” Kwikala kuuku a Yesu nyi nkya buntu kikata! Kadi batumibwa abadi balombene kushala bakuku baye naminyi? Yesu badi mupatuule’shi: ‘Ndayi nukape bikuba.’ (Yo. 15:14-16) Mu ungi ngakwilo bino abipushisha’shi tungunukayi na kulungula mukandu wibuwa. Bipwa bibidi kumpala kwa papa, Yesu balungwile batumibwa baye’shi: “Mwishinda, uukishayi’shi Bufumu bwa mwiyilu tabudi peepi.” (Mat. 10:7) Ngi bwakinyi, mu bufuku bwa muladilo wa lufu lwaye, Yesu badi mukankamikye balongi baye bwabadya kunyingiila mu mudimo wa bulungudi.​—Mat. 24:13; Mak. 3:14. w18.05 20-21 ¶15-16

Anwe ba nsongwa, atayi kitshibilo kya kutuula nshalelo enu ku myanda ayisangasha Yehowa na kwikala na bipatshila bya mu kikudi. Anka ba nsongwa bebungi ba bula bwenu abakumina penda kwikala abakisha nsaa ibuwa. Pangi mbalombene kwinwitanyina bwanudya kukita nabo myanda yabakitshi. Lelo sunga maloba, anukekala na lukalo lwa kukwasha bangi bwabadya kumona’shi kulombasha bipatshila bya mu kikudi ngi mwanda wi na muulo ngofu kwanudi. Tanutadilanga bangi bwa’shi benulubishe bino bipatshila. Byabya, we kukita naminyi bwa kushala munyingye nsaa yabakutakula kwi bangi bwa kukita myanda yabakitshi? Suuka myanda ilombene nkufikisha mu nshalelo akwelela bukopo bodya kupela kukita myanda yabakitshi kwi bangi. (Nki. 22:3) Nangushena pa bipeta bibubi bilombene kutuka su bokitshi myanda ibubi. Na dingi kumina na kwiyisha koso’shi we na lukalo na malango ebuwa. Teemesha ku byabakulungula kwi nshobe na nyin’obe na byabakulungula kwi bakwetu balume na bakashi be mu kakongye bapwe kumona myanda ibungi. (1 Mp. 5:5, 6) We na kwiyisha bilombene olonda ano malango su? w18.04 28-29 ¶14-16

Mu mikandu yaye kwi tungi tukongye twa mu Asie mineure, Yesu balesheshe lutumbu bwa mudimo ubakitshine balondji baye. Bu kileshesho, babangile mukandu waye kwi kakongye ka mu Thyatira mu ano mayi: “Naawuku mifubo yoobe, kifulo kyoobe, lukumiino lwobe, bufubi boobe na katshintshi koobe; mifubo yoobe ya nfudiilo ngikile ya kumpala ku bungi.” (Kibaf. 2:19) Yesu tabadi mutemune penda bukata bwa midimo yabo nya, kadi badi dingi mwibatumbule bwa ngikashi yabo i buwa, ibaadi ibatakule mu kukita mifubo i buwa. Sunga mbibadi Yesu na kepatshila ka kulanga bangi bantu mu Thyatira, badi mubangye mukandu waye na kwiufudiisha na mayi a kwibakankamika. (Kibaf. 2:27, 28) Banda kunangushena matalwa abaadi nao Yesu a bu Nfumu a tukongye. Te bya kwitutumbula bwa mudimo watukwete kumukitshina nya. Kadi sunga mbyabya, kwete kwitutumbula. Kino nkileshesho ki buwa bwi kashaa kwi bakulu mu tukongye! w19.02 16 ¶10

Mu siekele akumpala, Yehowa badi mufube na kasaka ka bakunkushi-bakulu bwa kunyingisha bena Kidishitu boso, mpa na bakwetu abadi abakunkusha tukongye. Abatumine bantu babidi ba munkatshi mwabo, Mpyeele na Yowano, bwabadya kutekyela bena Kidishitu bapya bwabadya kupeta kikudi ki selele. (Bik. 8:5, 14-17) Fidipe na bano bakwetu bapya abadi banyingishibwe ngofu p’abo kupeta bukwashi bubabadi bebape kwi kasaka ka bakunkushi-bakulu! Lelo uno, Kasaka ka Bakunkushi-Bakulu ka ba Temwe ba Yehowa kakwete kunyingisha bena Betele, bafubi ba mudimo wa nsaa yoso wi pa bwao abalungula mukandu wibuwa, na bangi bantu boso. Nka bu bakwetu ba mu siekele a kumpala, atusangala bwa kuno kunyingishibwa! Na dingi, bwa kunyingisha bantu balekye bya binyibinyi bwabadya kwalukila, mu kipwa kya 2015 Kasaka ka Bakunkushi-Bakulu nkatuushe broshire amba’shi Alukiila kwi Yehowa. w18.04 19 ¶18-20

Bangi bantu abanangushena’shi mbikile buwa kwikala na bulungantu bushi na mikalo. We mulombene kunangushena bilombene kwikala mu nsenga su ta kwi ka mwiya su nkamune? Mukanda wa The World Book Encyclopedia awamba’shi, miya ya ndumbulwilo ooso ibukopo, mwanda ayikalwilaa na kwelela bulungantu bwa bantu mikalo. Bino tabikalaa bibofule misusa yoso nya. Ngi bwakinyi atumono kwi miya ibungi, ba avocat na ba nsushi abatompo kupatulwila bantu miya na kwibalesha bya kwiyitumikila. Byabya, bwa kwikala na bulungantu bwa binyibinyi, abitungu tukite bino bintu bibidi. Kya kumpala, abitungu tukumine bya binyibinyi bibabalongyeshe kwi Yesu. Kya kabidi, abitungu tufikye balongi baye. Kukita bino bintu bibidi akuketupetesha bulungantu bwa binyibinyi. Akwitupoososha ku kinyi? Yesu bambile’shi: “Akitshi milwisho mpika a milwisho.” Aye nkwamba dingi’shi: “Su Mwana eenukuula, anwikala binyibinyi bantu balungantu.”​—Yo. 8:34, 36. w18.04 6-7 ¶13-14

Atukumiinaa kwikala munkatshi mwa bantu abetatshisha bwa byatupusha na bwa buwa bwetu. Abetulu pa mbalo yetu, bwa kuuka byatunangushena na byatupusha. Ababadila kuuka nkalo yetu na kwitupa bukwashi​—ingi nsaa mpa na kumpala kwa shi twibatekye bwanka. Atukumiinaa kwikala na bantu “abetulu pa mbalo” yetu. Bu byatudi bena Kidishitu, atukumiinaa kwitula pa mbalo ya bangi. Anka, ta mbibofule nya. Bwakinyi? Mwanda twi bakutwe kupwidika. (Lom. 3:23) Byabya, abitungu tukambile binangu bya kwisangasha nka’twe banabene. Dingi, pangi bangi ba kwatudi bakwete kwitatshisha, bwa kwikala abetulu pa mbalo ya bangi, mwanda wa kipaso kyabadi bakule sunga wa myanda yabadi bafumankane nayo. Bangi namu mpa mwanda wa bukitshishi bwa bantu bebefunyishe. Mu ano mafuku a ku nfudiilo, bantu bebungi tabakwete kwitula pa mbalo ya bangi nya. Kadi be na “kifulo anka kwi’bo banabene.” (2 Tim. 3:1, 2, Kilombeno Kipya 2014) Byabya, twi balombene kulongamisha mushindo wetu wa kwituula pa mbalo ya bangi mu kulonda kwa kileshesho kya Efile Mukulu na Mwana aaye, Yesu Kidishitu. w19.03 14 ¶1-3

Mwiya wa nfudiilo wa ku Miiya Ekumi ubaadi aukandjika kulakila, sunga kwabila kintu kyabene. (Miy. 5:21; Lom. 7:7) Yehowa batushishe mwiya bwa kwitupa dilongyesha di na muulo​—abitungu’shi bafubi baye balame mashimba aabo, na binangu byabo. Auku’shi bikitshino bibubi abibangaa na binangu bibubi. Bu kileshesho Nfumu Daavide, baponene mu wawa muteo. Mu byoso, baadi muntu e buwa. Kadi ungi mususa, babangile kulakila mukashi a bene. Lwabi lwaye lubamutakwile mu kukita mulwisho. (Shak. 1:14, 15) Daavide batambukile lusandji, akimba bya kudimba mulume a yawa mwana mukashi, aye nkumwipayisha. (2 Sam. 11:2-4; 12:7-11) Yehowa tamonaa muntu penda byadi pasha nya. Amonaa kyatudi munda, mwishimba dyetu. (1 Sam. 16:7) Ta kwi binangu sunga bikitshino bilombene kufwama kwadi. Atalaa nka byabya bibuwa bi mwatudi. Kadi akumiina’shi tutundule na kukatusha binangu byoso bibubi kumpala kwa’shi bitufishe mu kukita kintu ki bubi.​— 2 Mya. 16:9; Mat. 5:27-30. w19.02 22 ¶9, 11

Bible alesha Moyiise bu “muntu mwiyishe bikata, bishii muntu su ngumune pa nsenga.” (Mb. 12:3) Bino abilesha’shi badi mukutwe kapu, baadi apusha moo wa kwata bitshibilo, na baadi atshinyi bwa kushala munyingye nsaa yabamutombokyela kwi bangi su? Bino mbyatudi bakumbene kupwandikisha bwa muntu sha kwiyisha. Anka tabi byabya nya. Moyiise badi muntu e bukome, ata bitshibilo, mufubi a Efile Mukulu e n’eshimba dinyingye. Ku bukwashi bwa Yehowa badi mwimane kumpala kwa nfumu mukata a mu Ejiipitu, baadi mukunkushe bantu pangi 3 000 000 mu kabaaka, na akwasha mwilo wa Isaleele bwa kutshokola beshikwanyi babo.Tatukwete kufumankana na nkalakashi i mumune na ibabadi bakambile kwi Moyiise, anka kwifuku dyoso tukwete kufumankana na bantu sunga myanda ayitukutshishwa mushindo wa kwikala beyishe. Byabya, twi na bukome abwitutakula mu kulesha dino eyikashi. Yehowa mulee’shi: “beeyishe naamu, abapyaana nsenga.” (Mis. 37:11) We kwiamba bu muntu sha kwiyisha su? Bangi bantu be nkwamba bu muntu sha kwiyisha su? w19.02 8 ¶1-2

Yehowa bapeele bantu kintu ki pa bwakyo. Kino kintu nyi nkondo ketu k’eshimba. Kino ngi kintu kimune akitwikasha kunundu kwa nyema. Atuuku naminyi’shi Adame na Eeva babadi na kondo k’eshimba? Kunyima kwa’bo kutombokyela Efile Mukulu, abamufwamine. Kondo kabo k’eshimba kabadi kebatopekye. Kondo ketu k’eshimba nyi ngobesha i munda mwetu ya kuuka kibuwa na kibubi na kwitukunkusha mu muwa wetu. Muntu e na kondo k’eshimba kashii kalongyeshibwe kalolo e nka bu mashuwa e na kamo ka boussole kalwile. Lupunga na mpumo ya mema ngilombene kutuma mashuwa ku lupese. Anka kamo ka boussole akafubu kalolo akakwasha muntu atambusha mashuwa bwadya kutungunuka na kuludika mashuwa mu eshinda di buwa. Mu mushindo umune, su tubalongyesha kondo ketu k’eshimba kalolo, nkalombene kwitukunkusha kalolo. Su kondo ketu k’eshimba ta nkalongyeshibwe kalolo, taketudimusha bwa kupela kukita myanda i bubi nya. (1 Tim. 4:1, 2) Nkalombene mpa na kwitulungula kintu “kibubi’shi ki buwa.” w18.06 16-17 ¶1-3

Abitungu tushingule na kusumbula binangu bya mu uno ndumbulwilo nsaa yabetulungula byanka mu mishindo ifwame. Bu kileshesho, ingi myanda yabakula ku bisaashi abeyakula mu mushindo aukwatshishena myanda ya politike mu bufyefye. Na ingi myanda yabalondo ayikwatshishena bipatshila na myanda yabakumina kwi bantu ba mu uno ndumbulwilo. Angi ma filme na mikanda ayikwatshishena binangu bya “kubanda kwisankisha” na “kubanda kusankisha bifuko byabo” na dingi ayilesha bino binangu bu bibuwa, abisankisha, na bilulame. Anka uno mweneno mwikutwene na abilongyesha Bible. Akula’shi, atwe na bifuko byetu twi balombene kupeta muloo wa binyibinyi nsaa yatufulu Yehowa kukila bingi bintu byoso. (Mat. 22:36-39) Bino tabilesha’shi bibubi kukisha kapapi mu mushindo wibuwa nya. Anka abitungu twiyipushe’shi: ‘Natundulaa binangu bya uno ndumbulwilo sunga byekala bifwame su? Nkwete kukalwila bana bande na kwikalwila ami nabene ku ingi miisambo ya ku televizion na mu mikanda su? Nkwete kukwasha bana bande bwabadya kwikala na mweneno a Yehowa bwabadya kupela kulonda binangu bya uno ndumbulwilo byabapusha sunga byabamono su?’ w18.11 22 ¶18-19

Yehowa alesha’shi e netu pa kwitupasukila na kwitulesha kifulo kyaye. Tala mushindo walesha kifulo kyaye kikata bwetu. Yehowa amba’shi: “We na muulo ukata ku meeso kwande. We na kineemo, na’mi nee mukufule.” (Yesh. 43:4) Ta kwi kintu mwiyilu sunga pa nsenga kikumbene kukutshishwa Yehowa kufula bafubi baye nya; lulamato lwaye kwatudi ndukile bukopo. (Yesh. 54:10) Yehowa ta mulee kukatusha nkalakashi ayikasha nshalelo bukopo, anka t’atadiila myanda i bu “myeela” bwa’shi itudye sunga kwitumina, mpa na nkalakashi i bu “kaalo” bwayidya kwitukambila bwa looso nya. Mwitushinkamishe’shi ekala netu, etukwasha bwa’shi tumone “bya kukila” na ino nkalakashi. Yehowa akakitshi kinyi? Akafukamisha moo wetu bwa’shi tulame kululama kwetu kwadi sunga twekala kumpala kwa lufu. (Yesh. 41:13; 43:2) Su tubakulupila mulayilo w’Efile Mukulu wa’shi: “Ne kala noobe,” atunyingishibwa na kwikala na bukome bwa kunyingiila mu nsaa ya nkalakashi. w19.01 3 ¶4-6

Su we nsongwa pangi we mupete malango ebungi pabitale mafuku obe e kumpala. Balongyeshi, bakunkushi abatushaa malango, na bangi bantu mbalombene nkulungula’shi abitungu wende ku kilongyelo kikata sunga kupeta mudimo aukukwasha bwa kupeta makuta ebungi. Anka Yehowa akupa elango dilekene na dyadya. Eyendo’shi, wepane ngofu ku kalasa bwashi opete mushindo wa kwikwasha mu nshalelo. (Kol. 3:23) Auku dingi’shi, pokii nsongwa we na kya kwata bitshibilo bi na bukitshishi ku mafuku obe e kumpala. Nyi bwakinyi akupa mayi a kulonda bwa nkukunkusha na nkukwasha bwashi wekale na nshalelo amusangasha mu ano mafuku a ku nfudiilo. (Mat. 24:14) Na auku kalolo patapadi nfudiilo a uno ndumbulwilo a myanda. (Yesh. 46:10; Mat. 24:3, 36) Yehowa akuuku dingi. Auku kilombene nkupa muloo na kilombene nkubungamisha. Malango a bantu ngakumbene kupushika bu e buwa, anka su taatukila Mwiyi dy’Efile Mukulu, ta ngakambe buwa nya. w18.12 19 ¶1-2

Anka, “beyishe namu, abapyaana nsenga, abasangeela mu butaale bw’eyendo.” Daavide batemukile dingi’shi: “Balulame abapete eumbo [nsenga], abemushaala looso.” (Mis. 37:11, 29; 2 Sam. 23:2) Opwandikisha naminyi pabitale bukitshishi bubadi nabo ino milayilo kwi bantu babadi abakumina kukita akikyebe Efile Mukulu? Babadi na kabingilo ka kukulupila’shi dingi efuku penda bantu balulame nyi abekala pa nsenga na’shi ayikaluka mpaladiiso nka bibadi lupango lwa Edene. Mu kwenda kwa mafuku, bena Isaleele bebungi babadi abeamba’shi mbafubi ba Yehowa babadi bamupele na kusumbushena lulangwilo lwa binyibinyi. Nyi Efile Mukulu nkulekyela bwa’shi bena Babilone bakwate mwilo waaye, balwishe nsenga yabo, na bende nabo mu bupika. (2 Mya. 36:15-21; Yel. 4:22-27) Anka batemuki b’Efile Mukulu babadi batemukye’shi mwilo waaye awalukila mwiumbo dyao kunyima kwa bipwa 70. Na ano matemuki abalombene. Kadi e na bukwashi kwatudi natwe lelo uno kukulupila’shi akwikala mpaladiiso pa nsenga. w18.12 4-5 ¶9-10

Elango dibungi dya uno ndumbulwilo ndikutwene na abilongyesha Bible. Anka twi kwamba’shi elango dya bantu ba mu uno ndumbulwilo di buwa kukila dya mu Bible su? Yesu bambile’shi: ‘Kinangu akitundulwa bu kilulame muyiile mifubo yakyo.’ (Mat. 11:19) Sunga bantu benda kumpala mu myanda ya bu nsendwe, ta mbapete ngobesha ya kupudisha myanda ikata ayitukutshishwa kwikala na muloo nya; bu ngoshi, ntondo, na bu ntomboshi. Na dingi, bantu ba mu uno ndumbulwilo abamono lusandji bu mwanda wibuwa. Anka bantu bebungi abashinkamisha’shi lusandji alwipaa bifuko, alupa bantu mikumbo, na alutusha bingi bipeta bibubi. Twi kwamba naminyi pabitale malango a Yehowa. Bena Kidishitu abakumina mweneno a Yehowa be na muloo wibungi mu bifuko byabo, be na mbidi bukome, na be mu kipwano kibuwa na bakwabo balume na bakashi be mu nsenga ishima. (Yesh. 2:4; Bik. 10:34, 35; 1 Kod. 6:9-11) Bino abilesha’shi binangu bya Yehowa mbitabukile bya bantu boso. w18.11 20 ¶8-10

Mbinyibinyi, atutompaa kukita mwetu moso bwa kulama kipwano na bena kifuko netu na kwibalesha kalolo. Kadi ta twi balombene kuluba mayi a kulonda a Yehowa bwa kwibasankisha nya. Nsaa y’atukimbi bwa kwikala biya na bena kifuko netu, ba kuuku bebuwa atwibapete nka penda munkatshi mwa bantu bafule Yehowa. Bwa kutambukila mu bya binyibinyi, abitungu twikale bantu ba mu kikudi, sunga betooshe ku meso kwa Yehowa. (Yesh. 35:8; 1 Mp. 1:14-16) Nsaa ibatulongyele bya binyibinyi bwa musango wa kumpala, tubadi bashintuule ingi myanda mu muwa wetu bwa kukokyela mayi a kulonda a mu Bible. Bangi mbashintuule myanda ikata. Anka abitungu nka twikale badimukye bwa kupela kushintula nshalelo etu e buwa ku nshalelo e butete. Nkinyi kilombene kwitukwasha bwatudya kukambila kitompwanga kyoso kya kukita mwanda wi butete? Nangushena pabitale kintu kibabadi betupe kwi Yehowa bwa kwikala betooshe. Badi mwitupe muwa upwidikye wa mwana aye, Yesu Kidishitu! (1 Mp. 1:18, 19) Bwa kwitukwasha’shi twikale batokane ku meso kwa Yehowa, abitungu tutentekyeshe akipushisha mulambu wa nkulo wa Yesu. w18.11 11 ¶10-11

Bantu bebungi be mu mudimo wa nsaa yoso bakwete kwakula’shi kutula binangu ku mudimo wabo akwibakwasha bwabadya kwikala na muloo na binangu bibuwa sunga nshalelo aabo ashintuluka. Nka bu abilesha bileshesho byabo, su tubakimbi bya kumona myanda ibuwa mu nshalelo eetu na kukulupila mwi Yehowa n’eshimba dimune, atukapete ngobesha ya kutungunuka na kulama butaale bwa mu binangu sunga twekala kumpala kwa mwanda wi naminyi. Ingi nsaa, twi balombene kumona’shi su tubekala na nkatshinkatshi mu kushintuluka kwatupete, atunyingisha kipwano kyetu na Yehowa. Mu uno ndumbulwilo, nshalelo eetu mulombene kushintuluka mu kimpulunkamba. Mbalombene kwitushintuula mudimo mu ndumbulwilo a Yehowa, twi kupeta mukumbo, sunga kwikala na lukalo lwa kulama bena kifuko kyetu. Anka sunga twekala kumpala kwa mwanda kinyi, tukulupileyi’shi Yehowa etulombesha nkalo yetu na’shi aketukwasha pa nsaa ilombane. (Eb. 4:16; 1 Mp. 5:6, 7) Na dingi, kubanga binobino tukiteyi myanda ibuwa muyile ngobesha yetu. Twele luteko kwi Nsheetu, Yehowa, na tulongye bya kukulupila kwadi n’eshimba dyetu dyoso. Su tubakitshi byabya, sunga nshalelo eetu ashintuluka naminyi, atukatungunuka na kwikala na butaale bwa mwishimba abufiki kwi Yehowa. w18.10 30 ¶17; 31 ¶19, 22

Bible etulongyesha mushindo wi Yehowa apasukilaa mwilo waye. Bu kileshesho tala mushindo ubadi Yehowa mukwashe Samwele na kalolo koso pabadi ki mwana mukinga bwadya kulungula Eli Tshiite-mwakwidi mukata e panundu mukandu wa kiimu bu byabidi mu 1 Samwele 3:1. Mwiya wa Yehowa ubadi autekye bana bwabadya kunemeka bantu bakulu, bikishekishe baba boso be na matalwa. (Efi. 22:28; Lv. 19:32) Bibadi bilombene kwikala bukopo bwa’shi mwana mukinga bu Samwele abuukye ku namashika bwa kwenda mu kulungula Eli mukandu wa kiimu ky’Efile Mukulu kushii kutshina. Bible etulungula’shi Samwele “batshinanga kulungula Eli kyakyaky’abamufumbwidîle mu kimonwa.” Kadi, Efile Mukulu badi muukishe Eli’shi Nnaye ayitanyinanga Samwele. Ngi bwakinyi Eli balungwile Samwele’shi tamufyanga kintu su nkimune. Samwele badi mukokyele Eli ‘aye nkumulondela mwisambo ooso mayi aaye abadi epushene na mukandu wa kumpala. (1 Sam. 2:27-36) Uno mwanda awitulongyesha’shi Yehowa e na binangu na apasukilaa bangi. w18.09 23 ¶2; 24 ¶4-5

Madimi ngapalakane mbalo yoso lele uno. Mwisambo wa Yudhijit Bhattacharjee, wi na mutwe wa mwanda awamba’shi: “Akitutakulaa mu kudimba,” awamba’shi: “Mbasangane’shi madimi nyi eyikashi adikalaa dishimate ngofu mwi bantu.” Mu ungi ngakwilo, bantu abanangushena’shi madimi nyi mwanda wabadi betupangye nao na’shi ta e bubi nya. Bantu abadimbaa misango ibungi pa mwanda wa kudila kwikalwila, pangi bwa kudila kufya bilubilo sunga bibeshi byabadi bakite. Na dingi abadimbaa bwabadya kupeta makuta sunga kupeta buwa kampanda. Uno mwisambo awamba dingi’shi bangi bantu tabapushaa bibubi nsaa yabadimbi “bantu beenyi, bena mufubo nabo, bakuku sunga baloole babo, na bantu babadi bafule nya.” Ano madimi aatusha bipeta kinyi? Takwi mushindo wa kwikulupishena sunga kipwano kya bantu akilwila. Daavide batekyele Yehowa’shi: “Obe okyebâ’shi munda mwa muntu mwikale bya bînyibînyi.” (Mis. 51:6) Daavide badi auku’shi ki na muulo ngofu mbyatudi munda mwetu. Bena Kidishitu ba binyibinyi ‘abelungushenaa myanda ya biinyibiinyi’.”​—Sek. 8:16. w18.10 7 ¶4; 8 ¶9-10; 10 ¶19

Bena Isaleele babakatukile mu Ejiipitu mu kipwa kya 1513 kumpala kwa Kidishitu, babadi bakile pa midiyo isatu. Mu kino kisaka mubadi bana bakinga, bantu bakulu, pangi kubadi mpa na bantu be na maladi na balemane. Kino kisaka kikata kya bantu kibadi na lukalo lwa Mukunkushi ebapasukila na ebapushiisha. Yehowa badi muleshe ino ngikashi ku bukwashi bwa Moyiise. Ngi bwakinyi bena Isaleele abadi abepusha mu bulungantu nsaa ibabakatukile mu mashibo aabo ababadi bashale mu Ejiipitu. (Mis. 78:52) Yehowa badi mukwashe mwilo waye bwaudya kwipusha mu bulungantu naminyi? Pababakatukile mu Ejiipitu, Yehowa badi ‘mwibalongye bu mu ngoshi.’ (Efi. 13:18) Bu bibabadi belumbuule kalolo mu uno mushindo, babadi balombene kumona patooka’shi Efile Mukulu aabo kwete kwibakunkusha. Yehowa badi mwibape dingi “ekumbi” mu kaanya, na ‘bufuku boso namu, etâta dya kâlo’ bwa kwibatentekyesha’shi e nabo, kwete kwibakunkusha na kwibakalwila. (Mis. 78:14) Mwilo wa bena Isaleele ubadi na lukalo lwa bino bishinkamisho bwabadya kushala na mashimba anyingye mu myanda ibadi ayibatengyela. w18.09 26 ¶11-12

Mu mafuku a kala, bangi bafubi b’Efile Mukulu basha lulamato babadi bapushe bibubi pa mwanda wa myanda ibabadi nayo abo nkwela binangu bya kwiyipaa. Bu kileshesho, Yoobo badi mupushe kinyongwa kibukopo ngibwakinyi bambile’shi: ‘Bi tusepo! Ntan[tungunuka na] kushaala na muwa’mi.’ (Yob. 7:16) Yoona bapushishe kinyongwa kibukopo mu kipaso kibambile’shi: “Binobino Yehowa, nakusendeela ongaate muuwa; bwande’mi mbikile buwa kufwa pe kwikala na muuwa!” (Yon. 4:3) Mutemuki Eliya badi mushimishe lukulupilo mu kipaso kibadi mwambe’shi: “Ntshikii na mushindo dimo! Binobino, Yehowa, ata muuwa wande.” (1 Bf. 19:4) Anka Yehowa badi mufule bano bafubi baye basha lulamato na badi akumina bwa’shi batungunukye na kwikala na muwa. Tabadi mwibatopekye bwa bino bibabadi bapushe nya. Anka, badi mwibakwashe bwabadya kupetuula muloo wa kutungunuka na kwikala na muwa bwa’shi batungunukye na kumufubila na lulamato. w18.09 13 ¶4

Bantu abafubu pamune n’Efile Mukulu abaukibwa bwa kyubishi kyabo kya kukuukila benyi. Mu Bible, kishima kya mu kina Greke kyabadi baluula bu “kukuukila benyi” akipushisha kulesha “kalolo, kwi bantu benyi.” (Eb. 13:2) Mu Eyi dy’Efile Mukulu, mwi bileshesho abitulongyesha mushindo watudi balombene kwikala na kalolo ka uno mushindo. (Kib. 18:1-5) Twi balombene na dingi abitungu twikale atukwasha bangi mu nsaa yoso yatudi na mushindo wa kwibakwasha, byabekala “bakwetu mu lukumiino” sunga bangi bantu. (Nga. 6:10) We kufuba pamune na Yehowa pobe kukuukila bakwetu abafubu mufubo wa nsaa yoso be na lukalo lwa mbalo ya kushala su? (3 Yo. 5, 8) Nsaa yatukitshi byabya, abo abapete miloo mpa n’atwe namu. Bible ayitanyina bino bu ‘kwikankamishena.’ (Lom. 1:11, 12, EEM) Eyi dy’Efile Mukulu adikankamika bana balume be mu kakongye bwabadya kufuba pamune na Yehowa pa kufubila bangi bu bafubi ba midimo na bu bakulu. (1 Tim. 3:1, 8, 9; 1 Mp. 5:2, 3) Bantu abafubu bino abakumina kukwasha bangi ku mbidi mpa na mu lulangwilo lwabo. (Bik. 6:1-4) Bakwetu balume abakwasha ku midimo i na muulo mu kakongye abakula’shi be na muloo wa kufuba ino midimo. w18.08 24 ¶6; 25 ¶7, 10

Sunga mbibadi Timote na matalwa kwi bakwetu babadi bamukudile, bibadi abitungu’shi ekale nka etuulu pa mbalo yabo na kwibanemeka. Bi kwikala naminyi su muntu mununu bakitshi mulwisho sunga kukwatshishena mwanda ushi’ausankisha Yehowa? Yehowa tatadilaa muntu akitshi mulwisho wauku, sunga uno muntu ekala mukulu na anemekibwa ngofu. Banda kutala dino eyi dya kulonda di mu Yeeshaya 65:20, NWT: “Muntu akitshi mulwisho akedibwa mulwaa, sunga ekala na bipwa lukama.” Atupete dingi eyi dya kulonda di bino mu kimonwa kya Esekyele. (Es. 9:5-7) Byabya nkinyi ki na muulo ngofu? Ki na muulo nkunemeka Yehowa, aye mwikale mukulu a mafuku. (Nda. 7:9, 10, 13, 14) Kanemo katudi nako bwaye aketupa mashimba anyingye atudi nao lukalo bwa kukwasha muntu e na lukalo lwa bukwashi, sunga ekala na bipwa bi bungi bwi naminyi.​—Nga. 6:1. w18.08 11 ¶13-14

Eyendo boso bwetu twi na lukalo lwa kuuka myanda na kuuka mushindo wa kwiyitaluula na kufuba nayo bwa kumona bya kwata bitshibilo bibuwa. (Nki. 3:21-23; 8:4, 5) Bisumanga, Satana na ndumbulwilo aaye mulombene kulwisha binangu byetu. (Ef. 5:6; Kol. 2:8) Byabya, bwatudya kwata bitshibilo bibuwa, abitungu tupete bishinkamisho byoso bilombane. Lelo uno, kwi myanda ibungi yabetulungula kwi bantu be mu ma mbalo elekene. Abetulungula yanka ku Internete, ku televizion, na ku ingi mishindo ya kuukisha bantu myanda. Twi balombene kupeta ma mesaje ku Internete, mu telefone. Ingi nsaa abimweneka’shi ino myanda yoso yabetulungula ta i na nfudilo nya. Ngi bwakinyi abitungu twikale badimukye. Pangi ba kuku sunga balole betu be kwikala na binangu bibuwa, anka kwi bangi bantu abakuminaa kupalakasha myanda i bubi sunga kushintuula myanda. w18.08 3 ¶1, 3

Yehowa basangwile Madiya nsongwakashi sha kwiyisha bwadya kwikala nyinaye na Mwanaye Yesu. Madiya badi mushale mu ka musoko kapela kababadi abetanyina bu Naazarete, kabadi kula na ku Yeelusaleme kubadi Ntempelo ebuwa ngofu. (Luk. 1:26-33) Twi balombene kumona’shi badi na kipwano kibukopo na Yehowa kukiila ku myanda ibabadi bamulungule kwi mukwabo Elizabete. (Luk. 1:46-55) Yehowa badi mumone Madiya, aye nkumwelela mwabi mu kipaso kyashii badi apwandjikisha mwanda badi na lukumino mwadi. Nsaa ibabadi batande Yesu, ba nnanyi bababadi balungule kwi Yehowa pabitale kutandikwa kwaye? Ta mulungule muntu su ngumune e na matalwa sunga mukunkushi a mu Yeelusaleme na mu Beeteleeme nya. Anka, badi mutume ba mwikeeyilu kwi balami ba mikoko basha kwiyisha babadi abalama mikoko mu kisuku pasha pa kibundji kya Beeteleeme. (Luk. 2:8-14) Akupu, bano balami ba mikoko babadi bakafikye mu kutala Mwana batandjikwa. (Luk. 2:15-17) Madiya na Yoosefe babadi balombene kukema pa kumona abapa Yesu kinemo mu uno mushindo. w18.07 9-10 ¶11-12

Bwakinyi Yehowa baadi mufiitshile Solomone nsungu? Bible amba shi: “Bafitshiile Salomone munda mwanda eshimba dyaaye dibaadi dyende kula na Yehowa . . . , baadi mumumwekyele misuusa ibidi, na badi mumutumine eyi dya kuleka kulamata bangi b’efile. Anka Salomone tabaalamine kibadi Yehowa mumutekye.” Pa mwanda wa byabya, badi mushimishe bukuuku bwaye n’Efile Mukulu na byoso bibadi amukwatshishena. Yehowa ta mutadile bwa’shi bana ba Salomone batungunukye na kumuna mwilo wa Isaleele oso ushima nya, na babadi bapete myanda i bukopo munda mwa bipwa bibungi. (1 Bf. 11:9-13) Nkinyi kibadi kifikile Salomone pabadi mukutwe kuteemesha bibabadi bamudimushe kwi Efile Mukulu? Su tubasangula bakuuku bashi’abapusha sunga kuneemeka miya y’Efile Mukulu, mbalombene kwitutakula mu kwambula binangu byabo na kulwisha bukuuku bwetu na Yehowa. Mbalombene kwikala mu kakongye, anka ta be na kipwano kibukopo na Yehowa nya. Sunga’shi be kwikala bakwetu ba mu kifuko, ba nkungishanyi netu, bena mudimo netu, sunga bena kalasa netu bashi’abalangwila Yehowa. Su bantu batushala nabo pamune tabatumikila miya ya Yehowa, be kwikala na bukitshishi kwatudi mu kipaso kyatudi balombene kushimisha mpa na kipwano kyetu n’Efile Mukulu. w18.07 19 ¶9-10

Satana afubu na ma filme na bintu byabalesha ku televizion bwa kupalakasha binangu byaye. Auku’shi kulonda myanda kwi na bukitshishi bwibungi kukila kukisha kwetu kwa kapapi; akwitulongyesha bya kwela binangu, bya kupusha na kukita. Yesu badi alondo myanda bwa kulongyesha bantu. Banda kwata kileshesho kya mwina Samadiya na kya mwana bakatukile kwabo enda akalwisha bupyanyi bwaye. (Mat. 13:34; Luk. 10:29-37; 15:11-32) Byabya, baba babadi balwishe kwi Satana mbalombene kulondanga miisambo bwa kwitulwisha. Bibuwa twikale na mweneno ebuwa. Ma filme na bintu byabalesha ku TV twi kukisha nabyo kapapi kushi’byo kulwisha binangu byetu. Anka bibuwa tudimukye. Kumpala kwa kusangula bya kukisha kapapi, bibuwa twiyipushe’shi: ‘Uno filme sunga kintu kyabalesha ku TV akindongyesha’shi bibuwa nkite abintakula mbidi yande su?’ (Nga. 5:19-21; Ef. 2:1-3) We mulombene kukita kinyi su bomono’shi byabalesha abipushena na binangu bya Satana? Ebipele nka byodya kusuuka mukumbo wa lwambu! w19.01 15-16 ¶6-7

Nka bu bi kifulu akikalwilaa bongo bwa musalayi, ‘lukulupilo lwa kipandjilo’ kyetu alukalwilaa binangu byetu. (1 Tes. 5:8; Nki. 3:21) Satana e kwitutakula bwatudya kufuula kifulu kyetu naminyi? Nangushena ku bibakyebele kutakula Yesu bwa’shi akite. Satana badi auku’shi Yesu akafiki nfumu a bantu boso. Anka kumpala kwa byabya, bibadi abitungu’shi Yesu abande kukyenga na kufwa. Kunyima bibadi abitungu’shi atengyele kingi kipindji bwadya kufika Nfumu mu kipungo kibabadi batshibe kwi Yehowa. Byabya Satana bamulesheshe’shi kwi mushindo wadya kubanga kumunana binobino. Satana balayile’shi, su Yesu badya kukita penda kantu kamune akalesha’shi bamulangwila, badya kufika nfumu a nsenga musango umune. (Luk. 4:5-7) Satana auku dingi’shi Yehowa mulee’shi, aketupa bintu bibuwa mu ndumbulwilo mupya. Anka abitungu’shi tubande kutengyela kulombana kwa uno mulayilo, na patuki’atutengyela twi kufumankana na myanda ibungi. Byabya Satana atompo kwitupa mushindo wa kupeta nshalelo ebuwa binobino. Akumina’shi tutule nshelelo etu e buwa pa mbalo ya kumpala kadi tutuule Bufumu bw’Efile Mukulu pa mbalo ya kabidi.​—Mat. 6:31-33. w18.05 30-31 ¶15-17

Yehowa akumina’shi wekale na muloo pokii mukinga. Ikala mutuule meso pa bipatshila byobe bya mu kikudi na kulonda elango dya Yehowa mu myanda yoso yopwandikisha kukita na mu bitshibilo byobe. Su bokitshi bino bukidibukidi mu muwa oobe, okamono bukunkushi bwa Yehowa, akulama, na akwelela myabi. Tentekyesha malango oso ebungi aadi mukupe mu Eyi dyaye, na ofubile dino elango: “Dingi tentekyesha mukupangye mafuku a bukinga boobe.” (Mul. 12:1) Ba nsongwa mbalombene kusaamunyibwa mwanda nwi batuule muwa wenu bwa kufubila Yehowa. Anwiatshila bipatshila bya mu kikudi, na nukwete kumona mudimo wa bulungudi bu mwanda wi na muulo ngofu mu muwa wenu. Na dingi, tanutadilanga bwa’shi uno ndumbulwilo enulubishe bipatshila byenu nya. Ikalayi bashinkamishe’shi mudimo wenu wi bukopo wanukitshi, ta ngwa bisumanga nya. Nwi na bakwenu balume na bakashi bakwete kwinukwatshishena. Ngi bwakinyi lubwila Yehowa byokyebe kukita, byabya byoodi mupwandjikishe abikumbana. w18.04 29 ¶17, 19