Mweshi wa 6

Uno mulayilo wa Yesu ubadi unyingishe batumibwa baye binyibinyi! Batumibwa tababadi abashinguula kalolo’shi Yesu tadi pepi na kufwa nya. Anka lufu lwaye talubadi alulesha’shi abakashala kushi bukwashi nya. Yehowa badi pepi bwadya kwalula ku nteko yabo na kwibakwasha mu mudimo wabo wa bulungudi. Na badi mukite bino binyibinyi. Mafuku apeela kunyima kwa lufu lwa Yesu, batumibwa abatekyele Yehowa bwadya kwibapa mashimba anyingye, na Yehowa balulwile ku nteko yabo. (Bik. 4:29, 31) Uno mwanda ukwete kukitshika mpa na lelo uno. Nsaa yatunyingiila mu mudimo wa bulungudi, atushala ba kuuku ba Yesu. Na dingi twi kwikala bashinkamishe’shi Yehowa e pepi bwadya kwalula nteko yetu yatumutekye bwadya kwitukwasha nsaa yatupete lukalakashi mu mudimo wa bulungudi. (Fid. 4:13) Twi na lutumbu lwibungi pa kumona’shi Yehowa aluula nteko yetu na’shi twi bakuuku ba Yesu. Bino bya buntu byabadi betupe kwi Yehowa abitunyingisha bwatudya kutungunuka na kupa bikuba.​—Shak. 1:17. w18.05 21 ¶17-18

Kunyima kwa bipwa bu bitano, kabingilo kamune kabamwekyele. Mu aa mafuku, abamwene shi efuku dya kiimu kya Yehowa kwi Yeelusaleme dibefubwila pepi. Abatundwile’shi abitungu bakatukye mu kibundji muyiile bibebalungwile Yesu. (Luk. 21:20-22; Bik. 2:19, 20) Dyadya efuku dya Yehowa dibafikile mu kipwa kya 70 pabafikile beena Looma mu kubutula Yeelusaleme. Lelo uno, twi kumpala kwa mwanda wi byabya. Efuku dya Yehowa “dikata na . . . dya kutshina bikilekile” tadidi pepi. (Yo. 2:11) Mayi a mutemuki Sefanya ngatale dingi ano mafuku eetu aamba shi: “Tadidi peepi, efuku dikata dya Yehowa; di peepi, adifiki bukidi bibi!” (Sef. 1:14) Pa mwanda wa byabya, abitungu “twikwashene ku muntu na muntu bwa kwinyingishena mu kifulo na mu mifubo ibuwa.” (Eb. 10:24) Abitungu twikale atupasukila bakwetu ngofu bwashi tumone bya kwibanyingisha nsaa y’abitungu kwibanyingisha. w18.04 20 ¶1-2

Ano mayi a Yehowa abaadi anyingishe Yooshwa ngofu kumpala kwadya kutwesha mwilo Waaye mu Nsenga ya Mulayilo! Yehowa badi dingi munyingishe mwilo waye mu ki bungi. Bu kileshesho, Yehowa badi auku’shi bena Yuuda babadi na lukalo lwa kunyingishibwa nsaa ibabadi mu bupika mu Babilone, ngi bwakinyi badi mwibanyingishe ku bukwashi bwa buno butemuki abwamba’shi: “Totshinanga, mwanda nee noobe; twekalanga na katshim’a-munda, mwanda nee Efile Mukulu oobe, nakupa bukome; oolo nakukwasha, nakukankamika na mboko yande ilume ya bululame.” (Yesh. 41:10) Kunyima, Yehowa badi munyingishe bena Kidishitu ba kumpala, na etunyingisha mpa n’atwe mu uno mushindo umune. (2 Kod. 1:3, 4) Yehowa badi munyingishe Mwan’aye. Kunyima kwa Yesu kubatshishibwa, bapushishe eyi adifiki mwiyilu adyamba’shi: “Uno Mwan’ande a-kifulo, nee na muloo pa mwanda we.” (Mat. 3:17) We kupwandikisha mushindo ubadi ano mayi anyingishe Yesu pabadi akitshi mudimo wa bulungudi pano pa nsenga su? w18.04 16 ¶3-5

Bamo bantu mbalombene kunangushena’shi Yehowa ta mupe Adame bulungantu bwa kukita kyoso kibadi akumina kukita. Anka, tabashinguula’shi bulungantu bwa kwisangwila, sunga matalwa a kusangula mwanda wabakumina kukita, ta e mumune na matalwa a kutshiba kibuwa na kibubi nya. Adame na Eeva abadi na bulungantu bwa kusangula su abakumina kukookyela Efile Mukulu sunga kupela kumukookyela. Kadi, nka penda Yehowa ngi e na matalwa a kutshiba kibuwa na kibubi. “Mutshi wa kushinguula kibuwa na kibubi” ubadi aushinkamisha Adame na Eeva uno mwanda. (Kib. 2:9) P’aye kupa Adame na Eeva mwiya wa kupela kudya kikuba kya ku uno mutshi, Yehowa badi mwibalongyeshe’shi abitungu bamukookyele bwabadya kupeta bulungantu bwa binyibinyi. Baledi betu ba kumpala abatshile kitshibilo kya kupela kukookyela. Kitshibilo kya Adame na Eeva kibadi kilongamishe bulungantu bwabo mu mushindo kampanda su? Nya. Mu kukimba kwabo kwa kwiatshila bitshibilo, babashimiishe bulungantu bubabadi bebape. w18.04 5-6 ¶9-12

Yehowa temenaa penda pa kupusha lusa bwa bafubi baye abakyenge nya. Akitaa kintu kampanda bwa kwibakwasha. Bu kileshesho, pabadi bena Isalele abakyenge mu bupika mu Ejiipitu, Yehowa bapushishe bi makyenga abo na ata kitshibilo kya kwibatusha mu bupika. Yehowa balungwile Moyiise shi: “Nápu kumona kufwambuka kwa mwilo wande . . . , napu kupusha kudila kwabo . . . nashingûla bi malwa âbo. Byabya, náiki mwanda wa kwibafungusha ku matalwa a bena Ejiipitu.” (Efi. 3:7, 8, EEM) Yehowa bebatushishe mu bupika mwanda bapushishe mwilo waye lusa. Bipwa nkama kunyima, mu Nsenga ya mulayilo, ababangile kulwisha bena Isaleele kwi beshikwanyi. Yehowa bakitshine kinyi? Yehowa “baateemeshanga kwiyaaya kwabo kumpala kwa babeebapombeshanga, naababeebafwambushanga.” Dingi, lusa lubadi lutakule Yehowa mu kukwasha mwilo waye. Batumine ba nsushi bwa kupasha bena Isaleele kwi beshikwanyi nabo.​—Bans. 2:16, 18. w19.03 15 ¶4-5

Miiya ibidi ya kumpala ya mu Miiya Ekumi, ibaadi ayitekye’shi, bena Isaleele balangwile nka penda Yehowa na ibaadi ayibadimusha bwa kupela kulangwila ma nkishi. (Efi. 20:3-6) Yaya miiya yoso ta yibadi kwankwa bwa buwa bwa Yehowa nya. Kadi ibaadi kwanka bwa buwa bwa mwilo waye. Pababadi abalangwila b’efile ba ingi miilo, abaadi abakyengye. Anka, Yehowa baadi elela bena Isaleele myabi nsaa ibabadi abashala bamulamate na abekitshishena myanda na kululama. (1 Bf. 10:4-9) Ta twi balombene kutopeka Yehowa nsaa i baaba abeamba’shi mbalangwidi baye ababepuula miiya yaye na kukyengyesha bafubi baye. Yehowa mmwitufule na amonaa nsaa yabetukitshina myanda na kukutwa kululama. Apushaa kinyongwa kwishimba ngofu kukila abipushaa nyina mwana nsaa ayikyengye mwana aaye. Sunga’shi akutwa kwitwakwila mususa umune, mu kipungo kilombane akatshibila ba nkitshishi ba bubi bashabelanga ku mashimba kiimu, mupunda byabakitshina bangi myanda. w19.02 22-23 ¶13-15

Mu mbingo ya kumpala kwa Kitentekyesho, bisangilo byetu abikambaa kushimika kasele pa kileshesho kya Yesu na kwiyisha kubadi muleshe pa kulambula muwa waye bu nkuulo. Twi na kya kwambula kwiyisha kwaye na kukita akikyebe Yehowa, sunga byetwikela bukopo. Tubande kunangushena bibadi munyingy’eshimba mwifuku dya kumpala kwa lufu lwaye. Badi auku kalolo’shi beshikwanyi baye abamwisha milongo, bamukupile, na kumwipaa. (Mat. 20:17-19) Kadi, bakuminyine kufwa. Pabalombene nsaa balungwile batumibwa baye basha lulamato babadi naye mu Getesemane’shi: “Ebweyi twende. Ngiwu winyi ampana baafiki.” (Mat. 26:36, 46) Pabafikile kisaka kya bantu bwa kumukwata, bayile kwabadi, elubula, na alungula basalayi bwa’shi balekye balondji bende. (Yo. 18:3-8) Yesu balesheshe eshimba dinyingye ngofu! Lelo uno bena Kidishitu bedibwe mwimu na baba ba mu ingi mikooko bakwete kwitatshisha bwa kwambula eshimba dinyingye dya Yesu. w19.01 27-28 ¶7-8

Kwiyisha kwi nka bi kintu kyabadi balengyeshe kalolo. Mu mushindo kinyi? Anka abikalaa muntu elaa mpentshi abungu mpentshi ya malangi ebungi bwa kulengyesha nao kalolo, abitungu tubungye ngikashi ibungi bwa kwikala na kwiyisha. Mu yaaya ngikashi mwi kwipelesha, kukokyela, kalolo, na kunyinga eshimba. Nka penda bantu basha kwiyisha nyi balombene kukokyela akikyebe Efile Mukulu. Efile Mukulu akumiina’shi twikale na lwishinko. (Mat. 5:5; Nga. 5:23) Nsaa yatukitshi akikyebe Efile Mukulu, atufiitshisha Satana munda. Byabya sunga twekala na kwiyisha na kalolo, bantu bebungi be kulupese lwa ndumbulwilo a Satana abetushikwa. (Yo. 15:18, 19) Pa mwanda wa byabya, twi na lukalo lwa kwikala n’eshimba dinyingye bwa kukambila Satana. Muntu shii na kwiyisha e na kwitatula, ekalaa na nsungu ibukopo na takokyelaa Yehowa nya. Bino abilesha abikalaa Satana. Aye mmushikwe bantu beyishe! Abalesha bubi bwaye mwanda be na ngikashi yashii nayo. Na nsaa yabalesha’shi Satana nsha madimi, kwete kupusha bubi bukile. Bwakinyi? Mwanda sunga akula kinyi, sunga akita kinyi ta mmukumbene kukutshishwa bantu basha kwiyisha bwabadya kufubila Yehowa!​—Yob. 2:3-5. w19.02 8-9 ¶3-5

Yehowa badi auku’shi bantu ba mu Babilone babadi na kya kupusha moo. Bena Mede na bena Perse babadi na kya kutuka bena Babilone ngoshi. Yehowa badi mukumbene kufuba na kino kilwilo bwa kutusha bantu baye mu bupika mu Babilone. (Yesh. 41:2-4) Nsaa ibadi bena Babilone na bantu ba ingi miilo bapushe’shi beshikwanyi nabo bakwete kwifubwila pepi, babatompele kunyinga mashimba abo nkwilungushena’shi: “Nyinga.” Babakitshine b’efile nkishi bebungi, bakulupila’shi ayibakwasha. (Yesh. 41:5-7) Akupu, Yehowa badi mubatamishe mashimba a bena Yuda babadi mu bupika pabambile’shi: “Obe naamu, Isaleele [kukatusha bena mutumba nobe] mufubi ande, . . . Twekalanga na katshim’a-munda, mwanda nee Efile Mukulu oobe.” (Yesh. 41:8-10) Lamina’shi Yehowa bambile’shi: “Nee Efile Mukulu oobe.” Mu byabya bishima, Yehowa badi ashinkamisha balangwidi baye basha lulamato bwa’shi tabekalakashanga​—babadi nka bantu baye. Bebalungwile’shi: “Nami enutwala . . . na enupasha.” Kushi mpaka aa mayi abadi anyingishe bena Yuda babadi mu bupika.​—Yesh. 46:3, 4. w19.01 4 ¶8

Mukanda wa Maako 1:9-11 aulesha mususa umune wa ku misusa ibaadi Yehowa mwakule kukatukila mwiyilu. Yehowa bambile shi: “Obe we mwan’ande a-kifulo kikata; nee noobe mulòo ukata.” Banda kunangushena byabibaadi bikume Yesu kwishimba p’aye kupusha eyi dya Nshaye adyakula shi mmumufule na shi mmumukulupile! Mayi a Yehowa abaadi ashinkamishe myanda isatu i na muulo ukata pabitale Yesu. Wa kumpala, Yesu Mmwan’aye. Wa kabidi, Yehowa mmufule Mwan’aye. Pabakwile’shi: “Obe we Mwan’ande.” Mu ano mayi, Yehowa baadi muleshe’shi Yesu Mwan’aye a kifulo, batwelele mu kipwano kipya naye. Pabaadi Yesu mwiyilu, baadi bu mwana a mu kikudi a Efile Mukulu. Anka pabaadi mubatshishibwe, badi mwedibwe mwimu wa kikudi ki selele. Yaya nsaa, Efile Mukulu balesheshe’shi Yesu Mmwana Aye mwedibwe mwimu, paapa baadi mupete lukulupilo lwa kwalukila mwiyilu bwa kwikala bu Nfumu na Tshite-mwakwidi Mukata abadi basangule kwi Efile Mukulu. (Luk. 1:31-33; Eb. 1:8, 9; 2:17) Byabya, efuku dya kubatshishibwa kwa Yesu, Nshaye baadi na kabingilo ka kwamba shi: “Obe we mwan’ande.”​—Luk. 3:22. w19.03 8 ¶3-4

Malango ebubi e kwanka takudi bipwa bibungi. Satana nyi muntu a kumpala batushishe elango dibubi. Balungwile Eeva’shi aye na Adame abekala na muloo wibungi su beatshila kitshibilo kya bya kwikala mu nshalelo abo. (Kib. 3:1-6) Anka Satana badi akimbi penda buwa bwaye! Lukalo lwaye lubadi lwa’shi Adame na Eeva mpa na bana babakatanda, bamukokyele na kumulangwila, pamutwe pa Yehowa. Anka Yehowa nyi badi mwibape bintu byoso bibabadi nabyo. Bebapele lupango lwibuwa lwa kushaala, na mbidi yaabo ipwidikye bwabadya kwikala na muwa wa looso. Mwanda wa malwa, Adame na Eeva babapelele kukokyela Efile Mukulu. Pababakitshine byabya, babatshibile kipwano kyabo na Yawa bebapele muwa. Nkutukye bipeta bibubi bukile. Anka abikalaa bilongo byabatshibi ku mutshi, Adame na Eeva ababangile kununupa na kufwa. Baana babo namu babadi bakyengye, mpa n’atwe boso’nyi tukwete kukyenga. (Lom. 5:12) Bantu bakile bungi lelo uno bakwete kulengula abyamba Efile Mukulu na kukita nka kyabo kyabakumina. (Ef. 2:1-3) Bipeta abituku abishinkamisha mayi e mu kifundwe kya lelo. w18.12 20 ¶3-4

Mpoolo mutumibwa badi na binangu bibungi, badi mulongye ngofu, na dingi badi akula ndimi ibidi. (Bik. 5:34; 21:37, 39; 22:2, 3) Anka badi musumbule binangu bya pa nsenga na badi mwate kitshibilo kimeene mu Eyi dy’Efile Mukulu. (Bik. 17:2; 1 Kod. 2:6, 7) Bu kipeta, badi mutushe bipeta bibuwa mu bulungudi na badi akulupila kupeta efuto dya ikalaika. (2 Tim. 4:8) Mu binyibinyi, binangu by’Efile Mukulu mbitabukile bya bantu ba mu uno ndumbulwilo. Su tubalondo miya y’Efile Mukulu, atukekala na muloo wa binyibinyi na atukoobesha myanda yoso yatukitshi. Yehowa tetukitshishaa pa bukopo bwatudya kunangushena bu byanangushenaa nya. Bakulu na “mpika a kishima na mupatulukye” tabetukitshisha pa bukopo nya bwatudya kuludika binangu byetu. (Mat. 24:45; 2 Kod. 1:24) Muntu oso a kwatudi e na bushito bwa kulumbuula binangu byaye bwa’shi ekale amono myanda bu byabeyimonaa kwi Yehowa. w18.11 20-21 ¶12-13

Efile Mukulu batemukile ku bukwashi bwa mutemuki Yeeshaya’shi, nsaa ayikalukila bena Isaleele mu nsenga yabo, mu nsenga amukekala butaale. Takwi muntu akapusha moo wa kukwatshibwa na nyema ibukyelo sunga na bantu. Bakulu na bakinga abekala mu butaale. (Yesh. 11:6-9; 35:5-10; 51:3) Yeeshaya batemukile dingi’shi nsenga ishima, kushi penda mwilo wa Isalele ‘ayikala iwuule na kuuka kwa Yehowa, abyuulaa meema mu mbuu.’ Lamina’shi Yeeshaya batemukile’shi bena Isalele abakatuka mu Babilone bwa kwenda kwabo t’abakebalwisha kwi nyema sunga bantu. Bambile’shi nsenga yabo ayikaulu bidibwa bibuwa mwanda akwikala mema ebungi, nka bibadi mu lupango lwa Edene. (Kib. 2:10-14; Yel. 31:12) Buno butemuki bubadya kulombana nka penda mu mafuku a baba bena Isalele su? Lamina’shi butemuki bubambile’shi mpofu, sha kilema na nshikwe abakapanda. Anka bino tabibadi bikitshikile bena Isaleele babakatukile mu Babilone baluka kwabo nya. Mwanda, Efile Mukulu badi muleshe’shi akapasha mikumbo yoso mu mafuku e kumpala. w18.12 5 ¶11-12

Atukulupila’shi atutungunuka na kutambukila mu bya binyibinyi bwa ikalaika. Nkinyi kilombene kwitukwasha bwa kunyisha kwikala na kitshibilo kya kutungunuka na kutambukila mu bya binyibinyi? Tungunuka na kulonga Bible na kunangushena ngofu ku myanda yolongo. Ikala wata mpango ya kwilongyela nsaa na nsaa. Su bonyisha kwikala welongyela, okanyinsha kufula bya binyibinyi na okanyisha kwikala na kitshibilo kya kupela kwibileka. Mukanda wa Nkindji 23:23, awitulungula bwa ‘[kuula] bya binyibinyi’ mpa na bwa kuula “binangu, elango na kapatupatu.” Kuuka bya binyibinyi bya mu Bible ta nkupwa kwa mwanda nya. Abitungu twibitumikile mu nshalelo eetu. Nsaa yatupete kapatupatu, atubungu myanda yatulongo pamune na myanda yatudi bapwe kuuka. Binangu abiketutakula bwatudya kutumikila myanda yatuuku. Ingi nsaa bya binyibinyi abitunyoko pa kwitulesha myanda ayitungu’shi tushintuule. Abitungu tukumine dino dinyoka bukidibukidi, mwanda myanda ya mu Bible i na muulo kukila kyamo ky’ebakanyi.​—Nki. 8:10. w18.11 9 ¶3; 11 ¶13-14

Nkintu kinyi ki na muulo ukata mu muwa obe? Atwe bafubi ba Yehowa, kintu ki na muulo ukata kwatudi nyi nkipwano kyetu naye. Ta twi balombene kusunga nakyo ku kintu sunga nkimune. Na dingi binyibinyi bya mu Bible bi na muulo, mwanda abitupa mushindo wa kwikala ba kuuku ba Yehowa. (Kol. 1:9, 10) Yehowa mmulongyeshi eetu Mukata, kwete kwitulongyesha bya binyibinyi bi na muulo ukata bi mu Bible, Eyi dyaye. Etulongyesha muulo wi na eshina dyaye na dingi etulungula ngikashi yaye ibuwa. Etulungula’shi mmwitufule ngofu mu kipaso kyadi mutushe mpa na Mwana aaye bwetu. Yehowa etulongyesha pabitale Bufumu bwa Mesiya na lukulupilo lwa muwa mu mpaladiiso pa nsenga. Etulongyesha mushindo watudi balombene kwikala na nshalelo e buwa. Tukwete kumona bino bya binyibinyi bu bupeta mwanda, abitukwasha bwa kwifubwila peepi na Mupangi eetu na kwitwikasha na nshalelo e buwa. w18.11 3 ¶1-2

Basha madimi ta mbalombene kudimba Yehowa nya. Bible amba’shi “[bintu] byooso bii mwasa ku meeso kwaye. Aye ngi atudi naa kya kulubwila byooso.” (Eb. 4:13) Bu kileshesho Ananii na Safire abatompele kudimba batumibwa. Abadi baudishe efuba dyabo akupu, abo nkutusha kipindji kya makuta kwi batumibwa. Ananii na Safire abadi abakyebe kukemesha bangi bantu mu kakongye, ngi bwakinyi babalungwile batumibwa’shi abatusha makuta ooso. Anka Yehowa badi auku’shi bakwete kudimba, aye nkwibanyooka. (Bik. 5:1-10) Yehowa apushaa naminyi pabitale bantu abadimbaa? Bantu abadimbi madimi bashi’abelanga abakebeele mu “eshiba aditembe kaalo” nka bu Satana. Kwamba’shi, abakebabutula bwa ikalaika. (Kibaf. 20:10; 21:8; Mis. 5:6) Atuuku kalolo’shi Yehowa “ta mmuntu bwa kudimba” nya na’shi “Efile Mukulu t’eûku kudimba, ooo.” (Mb. 23:19; Eb. 6:18, EEM) ‘Yehowa mmushikwe . . . ludimi lwa madimi.’ (Nki. 6:16, 17) Su atukumina kumusankisha, abitungu twikale atwakula binyibinyi. w18.10 8 ¶10-13

We kukita naminyi su mukata oobe a mudimo akuteka bodya kutusha makuta bwa kukwatshishena musangelo wa bipwilo bya madimi? Pamutwe pa kutengyela bwa’shi uno mwanda ukitshikye, mbilombene kwikala buwa bwatudya kunangushena kubanga binobino bi mweneno a Yehowa pabitale uno mwanda. Kunyima, su tubafumankana na mwanda wi byabya, abikekala bipelepele bwatudya kwakula myanda ibuwa. Kunangushena ku mushindo aunangushenaa Yehowa nkulombene kwitukwasha bwatudya kushala na lulamato kwadi su twekala na maladi e bukopo. Ngi bwakinyi, atwataa kitshibilo kya kupela kwedibwa mase sunga kimune kya ku bipindji bikata bya mase. (Bik. 15:28, 29) Anka kwi ingi mishindo ya kubuka mikumbo ya mase ayitungu’shi mwina Kidishitu oso eyatshile aye nabene kitshibilo kimeene mu mayi a kulonda a mu Bible. Nsaa kinyi ibuwa yatudya kusangula kya kukita? Nsaa yatudi mu lupitaalo, pangi nsaa yatudi na mitanyo na pabetutakula bwatudya kwata kitshibilo bukidibukidi su? Ta mbyabya nya. Ino ngi nsaa ibuwa yatudya kukimbuula myanda, na kuusha esaki dyetu adipatuula kalolo myanda yatukumina, na kwisamba kalolo na munganga eetu. w18.11 24 ¶5; 26 ¶15-16

Yehowa nyi mulami mufule mikooko yaye na kwete kwiyikunkusha, Yehowa apasukilaa mwilo waye, mu mishindo ayimweneka na meeso. Ebalamaa mu bulungantu na kwibakalwila kwi beshikwanyi nabo. Bino abitunyingisha na kwitusamba ngofu bu byatukwete kwifubwila pepi na nfudilo a uno ndumbulwilo! Yehowa atungunuka na kupasukila mwilo waye mu mpombo ikata itayidi pepi. (Kibaf. 7:9, 10) Byabya, byabekala bakulu sunga bakinga, be na mbidi bukome sunga be na bilema, mwilo w’Efile Mukulu taukatshinyi sunga kupangayika mu mafuku a mpombo ikata nya. Anka abakakitshi ungi mwanda wilekene! Abakatentekyesha ano mayi a Yesu: “Bandulukaayi, na buushaayi mitwe, mwanda kukuudiibwa kwenu kwi peepi.” (Luk. 21:28) Mpa na nsaa yabakebatuku ngoshi kwi Goge, kisaka kya miilo kya makome a mu nsenga. (Es. 38:2, 14-16) Bwakinyi? Mwanda abauku’shi Yehowa tashintulukaa nya. Akeleesha Mupashi a mwilo waye sha kifulo na eupasukilaa.​—Yesh. 26:20. w18.09 26-27 ¶15-16

Banda kunangushena bibapushishe bena Isaleele nsaa ibabadi bebalungule kwi Yehowa mayi e kunundu. Atuuku’shi muntu oso a kwatudi e na muulo ku meso kwa Yehowa. Bible etulaa’shi: “Yehowa Efile Mukulu enu e nenu bu kimankinda kya kwinupâsha. E na kusangala kukata pa mwanda wenu.” (Sef. 3:16, 17, EEM) Yehowa mmwitulee’shi anyingisha na kusamba mwilo waye sunga wekala kumpala kwa mwanda wi naminyi. Badi mwakule’shi: “Abeenwomesha, beenusemune, dingi benubombeleshe pa mikoolo. Abiikala buu bii muntu aabanyingisha kwi nyinaaye: byabya nnaami eenunyingisha.” (Yesh. 66:12, 13) Banda kunangushena bilombene kupusha mwana tooka nsaa yabadi bamusemune kwi nyin’aye sunga pakwete kwasha naye! Yehowa mmukufule ngofu na akumina’shi wepushe mu bulungantu. Twekalanga na mpaka na kupusha’shi twe na muulo ku meso kwa Yehowa.​—Yel. 31:3. w18.09 13-14 ¶6-7

Mu mishindo ilekene mu myanda ya kala ya bena Isalele, kubadi lukalo lwa bantu ba kukwasha. (Efi. 36:2; Ne. 11:2) Lelo uno, nobe namu we na mishindo ibungi ya kukwasha na nsaa yoobe, na mayele obe bwa kukwasha bakwetu balume na bakashi. Na opete muloo na myabi ibungi pa kwilumbuula bwa kukwasha bangi. Misusa ibungi, bantu abakwashaa ku midimo ya kwibaka abapetaa ba kuuku bapya. Ungi mukwetu mukashi abetanyinaa bu Margie badi mufube ku lwibako lwa Mashibo a Bufumu munda mwa bipwa 18. Mu uno mudimo, badi atala abifubu bakwetu ba nsongwakashi na kwibalongyesha bya kufuba. Akula’shi uno mudimo aupa bantu bafikye mu kukwasha ku mudimo wa lwibako mushindo wabadya kwikankamishena. (Lom. 1:12) Nsaa ibadi apete myanda ibukopo mu muwa waye, bantu babadi mudye nabo bu kuuku mu uno mudimo babadi abamukankamika. We mupwe kukwasha ku mudimo wa lwibako su? w18.08 25 ¶9; 26 ¶11

Nsaa ibadi Mpoolo mufunde bino, Timote badi pangi na bipwa 30. Anka Mpoolo badi mumupe mashito akata. Ndilongyesha kinyi dyatudi balombene kupeta pa uno mwanda? Abitulongyesha’shi ta twi balombene kutshibila bakwetu ba nsongwalume kiimu pa mwanda wa bungi bwa bipwa byabo. Banda kunangushena ku myanda ibakitshine Yesu mu mafuku abadi na penda bipwa 33! Mu bipikwa bya bangi bantu, bantu tabanemekaa ba nsongwa nya. Ngi bwakinyi, bangi bakulu mbalombene kupela kupa ba nsongwalume bushito bwa bu bafubi ba midimo sunga bu bakulu, sunga bekala bapwe kulombasha myanda itekibwe bwa kupeta ano mashito. Anka Bible takula mbalo su ngimune’shi abitungu mukwetu alombashe bungi bwa bipwa kampanda kumpala kwadya kwikala bu mufubi a midimo sunga bu mukulu nya.​—1 Tim. 3:1-10, 12, 13; Tt. 1:5-9. w18.08 11-12 ¶15-16

Bwa kwata bitshibilo bibuwa, abitungu tupete bishinkamisho by’eyendo. Ngi bwakinyi abitungu twikale badimukye nsaa yatusangula myanda ya kubadika. (Fid. 4:8, 9) Tabitungu tukishe nsaa yetu mu kubandjila bintu bi mu ma site a Internete sunga kubadika ma mesaje aapalakasha myanda ya madimi nya. Abitungu tunyishe kwikala badimukye bwa kupela kutwela mu ma site a Internete a bantu abakwatshishena binangu bya bantu basumbule lukumino. Abakumina kubofusha lukumino lwa bafubi b’Efile Mukulu na abalongyesha bya binyibinyi mu kipaso kibubi. Myanda ya madimi ayitwalaa bantu mu kwata bitshibilo bibubi. Tokumanga kupwandikisha’shi myanda ya madimi ta ngilombene kwikala na bukitshishi koodi. Mu mafuku a Moyiise, ba mpupa 12 babayile mu Nsenga ya mulayilo. Ba mpupa ekumi abafikile batusha rapore ishii buwa. (Mb. 13:25-33) Babadi bakule myanda ibungi, ngi bwakinyi mwilo wa Yehowa ubabangile kutshina na kutshoboloka. (Mb. 14:1-4, 6-10) Pamutwe pa kukimba bishinkamisho na kukulupila mwi Yehowa, mwilo ubasangwile bwa kukumina myanda ya madimi kushii kunangushena kalolo. w18.08 4 ¶4-5

Bantu bebungi be na ndambo ya ngikashi ibuwa. Na bantu bashi’abalangwila Yehowa ta mbalombene kwikala abakitshi myanda i bubi nka nsaa yoso nya. Pangi we kuuka bantu be byabya. Bino abilesha’shi mbekale bakuuku bebuwa su? Byabya, be na bukitshishi kinyi ku kipwano kyobe na Yehowa? Abakukwasha bwa kwifubwila pepi n’Efile Mukulu su? Mmyanda kinyi i na muulo ngofu kwi baba bantu? Mmyanda kinyi yabesambaa? Abakambaa kwisamba pabitale bilamba bituukye binobino, makuta, twamo twa ku maasa, kukisha kwa kapapi, na bingi bintu bya uno mushindo su? Misusa ibungi abesambaa myanda ibubi ya bangi bantu su? Mbafule kwela miseku ya myanda ya bufu su? Yesu badi mwitudimushe’shi: “Akyamba mukanwa, nkino akituukila mwishimba.” (Mat. 12:34) Su bomono’shi bantu bokwete kushala nabo pamune bakwete kulwisha kipwano kyobe na Yehowa, kimba kya kukita! Peelesha nsaa ya kushala nabo, su abitungu leka kwikala nabo mu bukuuku.​—Nki. 13:20. w18.07 19 ¶11

Pabadi Moyiise na bipwa 80, Yehowa bamupeele mudimo wa kutusha mwilo wa Isaleele mu bupika mu Ejiipitu. (Efi. 3:10) Misusa ibungi, Moyiise bakimbile tubingilo twilekene. Anka Yehowa badi na lwishinko na aye nkumupa bukome bwa kukita bilengyeleshe. (Efi. 4:2-9, 21) Badi mulombene kufuba na bukome bwaye bwadya kutshinyisha Moyiise bwa’shi akookyele pa bukopo. Anka, Yehowa badi na lwishinko na kalolo, na dingi badi muleshe’shi akekala na mufubi aaye sha kwipelesha na sha kwiyisha. Balombeshe bino bibakwile su? Oolo! Moyiise bafikile mukunkushi mukata a mwilo w’Efile Mukulu. Badi mwikitshishe bwadya kwikala na kwipelesha na kupasukila bangi nka bibabadi bamukitshine namu kwi Yehowa. Su we na matalwa kwi bangi bantu bi na muulo bwa’shi wambule kileshesho kya Yehowa pa kwibapasukila, kwibalesha kalolo, na lwishinko nsaa ywebakitshina myanda! (Kol. 3:19-21; 1 Mp. 5:1-3) Su bwambula Yehowa Efile Mukulu na Yesu Kidishitu mwikale Moyiise mukata, okabofwisha bangi bwabadya kufika mu nkulungula myanda yabo, na okekala webakankamika.​—Mat. 11:28, 29. w18.09 24-25 ¶7-10

Mu mushindo umune, twi kutaadisha mashimba a bakwetu balume na bakashi pa kwikala na muloo na kalolo. Bino abinyisha kutwesha buumune mu kakongye. We kwikitshisha bwa kuuka bakwetu ba mu kakongye kenu kalolo su? (2 Kod. 6:11-13) Etaata dyenu ndilombene kumunyika mbalo yoso yanudi. Mwikelo oobe wi buwa ngulombene kutakula bena mutumba nobe bwabadya kulonga myanda ibungi pabitale Yehowa. Eyipushe obe nabene’shi: ‘Bena mutumba nami bakwete kunangushena naminyi pa mwanda wande? Nshibo yande ngitokye na kulumbuulwa kalolo su? Ngilombene kumweneka bibuwa kwi bena mutumba su? Nankwashaa namu bankungishanyi nami su?’ Ipusha bangi ba Temwe mushindo ubadi wikale kalolo kaabo na kileshesho kyabo kibuwa na bukitshishi kwi bakwabo, bankungishanyi, bena mudimo sunga bena kalasa naabo.​—Ef. 5:9. w18.06 24 ¶13-14

Bino ngi bibadi abipwandikisha bantu babayipayile Etshyene mulongi a Yesu. (Bik. 6:8, 12; 7:54-60) Munda mwa bipwa bibungi, bena bipwilo mbakite bibeshi bibungi, bu kwipayishena, na kwamba’shi bakwete kukita bino bwa kusankisha Efile Mukulu. Aku namu mu binyibinyi, bino bibabadi bakite mbikutwene na miiya y’Efile Mukulu. (Efi. 20:13) Abimweneka kalolo’shi, kondo kabo k’eshimba ta nkebakunkushe kalolo nya! Byabya twi kwikala bashinkamishe’shi kondo ketu k’eshimba kakwete kufuba kalolo naminyi? Miiya na mayi a kulonda a mu Bible ‘bi na mufubo wa kukwasha mu bulambukishi, kukalasheena bilubilo, kulumbuula na kuyiyisha bantu bululame.’ (2 Tim. 3:16) Abitungu twikale atulongo Bible efuku dyoso, kunangushena ngofu ku myanda yakula, na kutumikila ino myanda mu muwa wetu. Mu uno mushindo, atukalongo bya kunangushena ngofu mu mushindo aunangushenaa Yehowa. Kunyima atukashinkamisha’shi kondo ketu k’eshimba akaketukunkusha kalolo. w18.06 17 ¶3-4

Basalayi ba bena Looma abadi na mpete i bula bwa centimetre 50. Bano basalayi abadi abauku kufubisha mpete yabo kalolo mwanda abadi abalongo bya kwiyifubisha efuku dyoso. Mpoolo mutumibwa bambile’shi Eyi dy’ Efile Mukulu di nka bu lupete. Yehowa ngi mwitupe dyanka. Anka abitungu tulongye bya kwidifubisha kalolo na kukalwila lukumino lwetu sunga kulumbuula ngyelelo eetu a binangu. (2 Kod. 10:4, 5; 2 Tim. 2:15) Ta twi balombene kutshina Satana na ba demo nya. Eyendo’shi be na bukome, anka ta be na bukome kukila Yehowa nya. Na dingi tabekala kwanka bwa ikalaika. Abakedibwa mu lukano na tabakekala na mushindo wa kukyengyesha muntu su ngumune munda mwa Bipwa kinunu bya kumunana kwa Kidishitu, kunyima kwa papa abakabutudibwa. (Kibaf. 20:1-3, 7-10) Atuuku mwishikwanyi netu, mayele aaye, na kepatshila kaye. Ku bukwashi bwa Yehowa, twi balombene kumukambila! w18.05 30 ¶15; 31 ¶19-21

Adame badi auku’shi nyoka ta ngilombene kwakula nya. Byabya pabapushishe’shi nyoka bakula na Eeva, pangi Adame baukile’shi nyi muntu a mu kikudi besamba naye. (Kib. 3:1-6) Adame na Eeva tababadi abauku’shi uno muntu a mu kikudi mmuntu kinyi nya. Anka, Adame basangwile bwa kukila ku lupese lwa uno muntu mwenyi na kutombokyela Nshaye a mwiyilu sha kifulo. (1 Tim. 2:14) Mususa umune, Yehowa babangile kufumbula myanda ibungi itale uno mwishikwanyi na kulaa’shi uno mwishikwanyi akabutudibwa. Anka Yehowa badi muukishe’shi kumpala kwabadya kumubutula, uno muntu a mu kikudi badi mwisambe kukiila kwi nyoka akekala na mushikwa kwi bantu boso bafule Efile Mukulu. (Kib. 3:15) Yehowa ta mwitulungule eshina dinabene dya mwikeyilu badi mumutombokyele nya. Anka bipwa 2 500 kunyima kwa’bo kutombokyela Yehowa mu lupango lwa Edene ngi pababadi betufumbwile uno muntu kwi Yehowa.​—Yob. 1:6. w18.05 22 ¶1-2

Tobandile kupusha kutshoboloka pa mwanda wa’shi bantu be mu teritware eenu tabakumina kuteemesha mukandu wa Bufumu su? Su mbyabya, okapusha bibapushishe Mpoolo mutumibwa. Badi mulungule mukandu wibuwa munda mwa bipwa bifikye ku 30, na badi mukwashe bantu bebungi bwabadya kufika bena Kidishitu. (Bik. 14:21; 2 Kod. 3:2, 3) Anka, tabadi na mushindo wa kukwasha bena Yuuda bebungi bwabadya kufika bena Kidishitu nya. Pamutwe pa byabya, bebungi ba kwabadi abapelele kuteemesha Mpoolo, na bamo ba kwabadi abadi bamubingye-bingye. (Bik. 14:19; 17:1, 4, 5, 13) Mpoolo badi mupushe naminyi? Bambile’shi: “Ne na kinyongwa kikata na kushidik’eshimba.” (Lom. 9:1-3) Bwakinyi bapushishe bino? Mwanda badi mufule mudimo wa kulungula mukandu wibuwa na badi mufule bantu. Mpoolo badi ekalakasha binyibinyi bwa bena Yuuda na badi apusha bibubi nsaa ibabadi abapele lusa lw’Efile Mukulu. Anka bu Mpoolo, atulambukisha bantu mwanda wa kifulo kya mwishimba dyetu.​—Mat. 22:39; 1 Kod. 11:1. w18.05 13 ¶4-5

Mpoolo badi muleshe patoka’shi mpa na baba abanyingishaa bangi be na lukalo lwa kunyingishibwa namu. Badi mufundjile bakwabo ba mu Looma’shi: “Nee na lukalo lukata lwa kwinumona, bwa kwinutwadila kya buntu kampanda kya mu kikudi, bwa’shi nwikale bakankamane; twambe’shi nakyebe namu kunyingishwa pamune nenu, kwakwa kwenu kwi lukumino lumune lwatudi nalo, anwe n’ami.” (Lom. 1:11, 12) Byabya mpa na Mpoolo mutumibwa badi na lukalo lwa kunyingishibwa ingi nsaa. (Lom. 15:30-32) Lelo uno, twi balombene kunyingisha baba abafubila Yehowa nsaa yoso, bu ba mbala-mashinda. Abitungu tunyingishe bakwetu balume na bakashi bakumine kushala bukupi mwanda wa kutumikila mwiya wa Yehowa wa kwiyibakishena “nka penda mu Mwanana.” (1 Kod. 7:39, NWT) Beena Kidishitu bakwete kunyingiila kubingwabingwa na mikumbo be na lukalo lwa kunyingishibwa.​—2 Tes. 1:3-5. w18.04 21 ¶3-5