Mweshi wa 9

Yesu baadi mwitule pa mbalo ya Maata na Maariya. Pabamwene kinyongwa kibabadi nakyo mwanda wa lufu lwa mukwabo Lazaare, “Yesu nkudila.” (Yo. 11:32-35) Tabaadi mudile mwanda wa’shi bashimisha kuuku aaye a peshimba nya. Mwanda baadi auku shi amusangula ku lufu. Kadi, Yesu badidile mwanda baadi auku kinyongwa kibaadi nakyo ba loole baye mwanda wa lufu lwa Lazaare. Kuuka shi Yesu baadi apushisha bantu lusa akwitunyingisha bikata. Anka, ta twi bapwidikye bu bibaadi nya. Kadi, twibamufule mwanda baadi apushisha bangi lusa. Kuuka shi kwete kumunana bu Nfumu a Bufumu bw’Efile Mukulu akwitunyingisha. Akatusha makyenga oso binobino. Aye nyi mukumbene kukwasha bantu bwa kupwa nkalakashi yabadi bafwishe kwi Satana, mwanda Yesu baadi bu muntu pa nsenga. Eyendo, twi na mwabi ukata wa kwikala na Nfumu mulombene “kupusha bi kubofula kwetu.”​—Eb. 2:17, 18; 4:15, 16, EEM. w19.03 17 ¶12-13

Eyendo, atukumiina kwikala na nkatshinkatshi mu mudimo wetu wa bulungudi. Atukitaa wetu mudimo wa kukwasha bangi bwabadya kulonga pabitale Efile Mukulu, kadi tatukitaa byoso nya. (1 Kod. 3:6, 7) Yehowa nyi akakaa bantu kwadi. Ku nfudilo, muntu na muntu alesha bi mwishimba dyaye su akumiina mukandu wi buwa sunga kupela kwiukumiina. (Mat. 13:4-8) Tutentekyesheyi’shi bantu bebungi tababaadi batemeshe mukandu wa Yesu nya​—aku namu baadi Mulongyeshi mukile bukata! Byabya, tatubofulanga ku mashimba su bantu batukumiina kukwasha bapela kukumiina mukandu wetu nya. Atukapete bipeta bibuwa mu mudimo wetu wa bulungudi su tubekala atwitulu pa mbalo ya bangi. Atukasangela mudimo wetu ngofu. Atukapete muloo wi bungi autukila mu kupaana. Atukakwasha boso “basangulwe bwa muuwa wa iikalaika” bwabadya kukumina mukandu wibuwa. (Bik. 13:48) Byabya “patukii na nguba, tukitshiineeyi bantu booso myanda iibuuwa.” (Nga. 6:10) Kunyima atukapete muloo wakutumbisha Nshetu e mwiyilu.​—Mat. 5:16. w19.03 25 ¶18-19

Nfumu Daavide bafundjile’shi: “Yehowa mmukata, akupa ntumbo.” (Mis. 145:3) Badi mufule Yehowa, na kyakya kifulo kibamutakwile bwa kumutumbisha “munkatshy’a kakongye.” (1 Mya. 29:10-13; Mis. 40:5) Lelo uno, mushindo umune watudya kutumbisha Yehowa nyi mpa kwalulanga mu bisangilo bya beena Kidishitu. Atwe boso atusangelaa kupusha ngaluulo ilekene ku bisangilo. Atukuminaa kupusha ngaluulo ipelepele, na bishima bya mwana abitukila mwishimba. Atunyingishibwa na mayi ebuwa a muntu akula byadi mulongye bya binyibinyi. Na atusankilaa baba “abanyingi mashimba” bwa kutusha ngaluulo, sunga bekala na buufu sunga’shi bakyababanga kulonga ludimi lwetu. (1 Tes. 2:2) Twi balombene kulesha lutumbu bwa kwitatshisha kwabo naminyi? Twi balombene kwibatumbula bwa lwaluulo lwabo lubetunyingisha mu bisangilo. Ungi mushindo wa kulesha lutumbu, mpa kutusha yetu ngaluulo. Byabya mu bisangilo abetunyingishaa, atwe namu atunyingisha bangi.​—Lom. 1:11, 12. w19.01 8 ¶1-2; 9 ¶6

Bantu ekumi abaadi mu nshalelo e bukopo. Abaadi na nsudi na tababaadi na lukulupilo shi be kupanda nya. Kadi dingi efuku, abamwene Yesu, Mulongyeshi Mukata ku bula. Abaadi bapwe kupusha’shi Yesu apashaa mikumbo yoso. Abo nkwela musase’shi: “Yesu, Mulambukishi, etufwile namu lusa!” Aye nkupasha mikumbo yabo. Kushi mpaka, boso abaadi basankye bwa kalolo ka Yesu. Kadi nka penda umune a kwabadi nyi balesheshe lutumbu​—afika mu kutumbula Yesu. Eshimba dya yawa muntu, mwina Samariya, dibamutakwile bwa kutumbisha Efile Mukulu “n’eyi dii bukopo.” (Luk. 17:12-19) Nka bu yawa mwina Samariya, abitungu twikale atulesha lutumbu kwi baba be na kalolo. Yehowa mwitulekyele kileshesho ki buwa pabitale kutumbula bangi. Kipaso kimune kyakwete kwibikita mpa kwelela baaba abamusankisha myabi. (2 Sam. 22:21; Mis. 13:6; Mat. 10:40, 41) Na Bifundwe abitunyingisha bwa ‘kwambula Efile Mukulu mwanda twi bana baadi mufule.’ (Ef. 5:1) Kabingilo kakata katudya kulesha lutumbu nka’shi, atukumiina kulonda kileshesho kya Yehowa. w19.02 14 ¶1-2; 15 ¶4

Nsongwakashi e ku kalasa apele na kanemo kooso kupetekyelwa ku musangelo kampanda w’eumbo sunga wa bipwilo bya madimi wawa musangelo tausangasha Efile Mukulu. Nsongwalume sha buufu, e mu bulungudi bwa ku nshibo na nshibo akookola ku kibelo kya mulongi naye badi asepe ba Temwe ba Yehowa. Muntu kwete kufuba ngofu bwa kulombasha nkalo ya ba mu kifuko kyaye, dingi efuku mukata aaye a mudimo bamutekye bwa kukita mwanda wi bubi. Sunga shi badya kushimisha mufubo su apela kukita abimulungula mukata aaye, uno muntu balungula mukata aaye’shi akumiina kwikala mululame na kukokyela mwiya mwanda byabya nyi abitekye Efile Mukulu kwi bafubi baye. (Lom. 13:1-4; Eb. 13:18) Eyikashi kinyi dibomono mwi bano bantu basatu? Pangi bomono ngikashi ibungi bu, eshimba dinyingye na kululama. Kadi kwi eyikashi dimune dibuwa dibabalesha​—dino eyikashi nyi nkululama. Oso a kwabadi mmushale na lulamato kwi Yehowa. Boso abapele kutupilwa ku miiya y’Efile Mukulu. Kululama akutakulaa bantu bwa kukita nka byabya bibabakitshi. Yehowa asanka na ese a kwabadi mwanda boso abalesha dyadya eyikashi. Atwe namu atukumiina kusangasha Nshetu e mwiyilu. w19.02 2 ¶1-2

Mwiya ubadi aukalwila baba bashibadi na mushindo wa kwikalwila, bana ba nshiye, bakashi kilele, na bantu beenyi. Abaadi balungule ba nsushi ba mu Isaleele’shi: “Tanutweshakashanga kilumbu kya mwenyi sunga mwan’a nshiye. Twatanga kilamba kya mukashi kilele bu kyeeko.” (Miy. 24:17) Yehowa baadi etatshisha ngofu bwa baaba bashibaadi na a kwibakwila. Na baadi anyoko boso abaadi abebakyengyesha. (Efi. 22:22-24) Yehowa akumiina’shi baaba baadi mupe matalwa, bakitshine bantu babakunkusha myanda na kifulo. Mmushikwe bibeshi bya kutambuka masandji na akumiina’shi bantu boso, bikishekishe baaba bashii na a kwibakwila, bebakitshine myanda na kululama na bebakalwile. (Lv. 18:6-30) Nsaa yatumono’shi Yehowa kwete kwitukitshina myanda na kululama, kifulo kyetu bwaye akitama. Na nsaa yatufulu Efile Mukulu na miiya yaye ya kululama, byabya abitutakula bwa kufula bangi, na kwibakitshina myanda na kululama. w19.02 24-25 ¶22-26

Banda kwata kileshesho kya mushindo watudya kwikalwila ku bukunkushi bwa binangu bya Satana. Yehowa mwitulongyeshe’shi, “tambipwandjikile myanda ya lusandji sunga i butete . . . yapushika munkatshi [mwetu] ooo.” (Ef. 5:3, EEM) Kadi twi kukita kinyi su bena mudimo netu sunga bena kalasa netu babanga kwisamba myanda ya lusandji? Nsaamo, kondo k’etu k’eshimba nkakumbene kwitudimusha ku masaku. (Lom. 2:15) Twi kwikapushiisha su? Twi kutompibwa na kubanga kutemesha benetu sunga kutala bifwatulo byabalesha. Kadi ino ngi nsaa yatudya kushita biibi byetu pa kushintuula mwisambo sunga kukatuka. Abitekye kunyinga eshimba bwa kukambila bukitshishi bwa benetu bwa kunangushena ku byanka na kukita myanda ibubi. Twi balombene kushinkamisha’shi Yehowa kwete kumona byoso byatukitshi, na etupa bukome na binangu bya kukambila mweneno a Satana.​—2 Mya. 16:9; Yesh. 40:29; Shak. 1:5. w19.01 17-18 ¶12-13

Salomone badi umune a ku ba mpeta bakata na muntu badi bukome kukila bangi, bamwene uno mwanda. Beambile’shi: “Nyipâne mu kukitanga kwa myanda ya mulô, ntale su bibuwa.” (Mul. 2:1-10, EEM) Byabya Salomone bebakile mashibo akile buwa, nkukita mpango na mafuba ebuwa, na bakitshine kyoso kibadi mukumine. Badi mupete muloo na disanka su? Salomone nabene etulungula byanka mu kifundwe kya lelo. Bopete elango ku kileshesho kya Salomone su? Bangi bantu abapetaa malango mu nshalelo kunyima kwa kukita bilema na kukyenga mwanda wa bipeta bibubi bitukye. Yehowa t’akumina’shi bino bikufikile. Akumina’shi omupushishe na omukokyele. Bino abitekye kwikala na lukumino, anka twe mulombene kwinyongola bwa bitshibilo bywata mu nshalelo obe mwanda wa lukumino lobe nya. Na Yehowa ta mulombene kuluba ‘kifulo kyodi muleeshe bw’Eshina dyaaye.’ (Eb. 6:10) Byabya etatshishe ngofu bwa kunyingisha lukumino lobe. Paapa wata bitshibilo bibuwa mu nshalelo na wemwena’shi Nshobe e mwiyilu akumina’shi wekale bibuwa.​—Mis. 32:8. w18.12 22 ¶14-15

Muntu mulamate ku myanda ya mu kikudi ekalaa na lukumino mwi Efile Mukulu na akimbaa bya kumona myanda abiyimono Efile Mukulu. Alekyelaa Yehowa bwa kukunkusha muwa waye na e na kitshibilo kya kumukokyela. (1 Kod. 2:12, 13) Daavide nkileshesho kibuwa kya muntu mulamate ku myanda ya mu kikudi. Bayimbile’shi: ‘Yehowa mbupyaanyi bwande.’ (Mis. 16:5) Daavide badi na lutumbu bwa “bupyaanyi” bwaye, kipwano kyaye kikata n’Efile Mukulu, na badi mufwamine mwadi. (Mis. 16:1) Pa mwanda wa byabya, badi mukumbene kwamba’shi: “Kikudi kyande akisanguluka.” Takwi kintu kibadi kipe Daavide muloo ukata kukila kipwano kyaye na Yehowa! (Mis. 16:9, 11) Bantu batule binangu byabo ku makuta sunga mu kukimba kwikala na muloo ta mbalombene kupeta muloo wi mumune na ubadi nao Daavide nya. (1 Tim. 6:9, 10) Kulesha lukumino lobe mwi Yehowa na kumufubila, wekala na nshalelo ebuwa na a muloo. Byabya, nkinyi kyodya kukita bwa kwikala na lukumino lwi bukopo? Abitungu wekale okisha nsaa pamune na Yehowa pa kubadika kwa Eyi dyaaye, kutala bintu bibuwa byadi mupangye, na kutula binangu ku ngikashi yaye, mpa na ku kifulo kyadi noobe.​—Lom. 1:20. w18.12 25 ¶7-8

Mpoolo tabadi mwakule uno mwanda mu kibungi pabitale eyibakishi nya. Badi alungula bena Kidishitu’shi be na kya kunemeka eyibakishi, nkwamba’shi bedyate na muulo. Wataa dibaka mu wawa mushindo, bikishekishe su we mu dibaka su? Su wataa eyibakishi na muulo, okwete kulonda kileshesho kibuwa. Yesu badi munemekye eyibakishi. Bafadisee pababamwipwishe pabitale kutshiba eyibakishi, balesheshe bibambile Efile Mukulu pabitale eyibakishi dya kumpala shi: “Ngi mwanda kinyi mulume alekye nshaaye naa nyinaaye, bwa kulamata mukashi aaye, abo booso abakeekala mbidi imune.” Yesu bakumbeshe dingi’shi: “Muntu talamûnanga kyakya kibungibwe n’Efile Mukulu.”(Mak. 10:2-12, EEM; Kib. 2:24) Yesu badi mushinkamishe’shi Efile Mukulu nyi bapangile eyibakishi na’shi abitungu eyibakishi dikale kwanka bwa looso. Nsaa ibabakitshine eyibakishi dya kumpala kwi Efile Mukulu, tabadi mulungule Adame na Eeva’shi mbakumbene kutshiba eyibakishi nya. Anka, mpàngo yaaye ibadi ya’shi, “abo booso” bekale mu buumune mwiyibakishi bwa looso. w18.12 10-11 ¶2-4

Pabatubangile kulonga bya binyibinyi, tubadi balongye’shi bi na muulo bwatudya kutumikila miya ya Yehowa. Kadi nsaa yatutungunuka na kwenda kumpala, atulongo myanda i bungi pabitale mushindo wanangushenaa, nkwamba’shi, myanda yakuminaa, yadi mushikwe, na mweneno aaye a myanda na, bino bina bukitshishi ku bitshibilo na bikitshino byetu. Sunga twalonga bya kunangushena bu Yehowa, ingi nsaa mbilombene kwikala bukopo bwa kwikala na mweneno bu aaye mwanda twi bakutwe kupwidika. Bu kileshesho, atuuku bi mweneno a Yehowa kwikala beselele mu binangu, kifulo kya bintu bya ku mbidi, mudimo wa bulungudi, bya kufubisha mase, na ingi myanda. Kadi mbilombene kwitwikela bukopo bwatudya kupusha bwakinyi eyimonaa mu uno mushindo. Mmushindo kinyi watudi balombene kulonga bya kunangushena ngofu bu abinangushenaa Yehowa? Atupete lwalulo nsaa yatudi bapasukye mu kulonga kw’Eyi dy’Efile Mukulu, kupusha binangu byaye, kunangushena ku dyanka, na kwikitshisha ngofu bwa kunangushena abinangushenaa Efile Mukulu. w18.11 23-24 ¶2-4

Abakuke badi mu mafuku e bukopo bukile. Abadi bamwifunyishe kwi bantu babi na ba ntomboshi, na bino bibadi abimwinyongosha ngofu. Koso kubadi atala, badi amono nka bena Isaleele abekitshishena myanda ibubi na ya kukutwa kululama. Abakuke badi eyipusha’shi: ‘Ino myanda ibubi ayikafudiila mafuku kinyi? Bwakinyi Yehowa kwete kunyengakana bino?’ Badi apusha’shi ta kwi muntu mulombene kumukwasha. Ngi bwakinyi batekyele Yehowa bwadya kukita kintu kampanda. Pangi Abakuke babangile kwela binangu’shi Yehowa tatalaa dingi myanda ya mwilo Waye sunga’shi taakitshi kintu. Nobe namu tobandile kupusha bino su? Abakuke badi mwele ino nkonko pa mwanda wa’shi badi mukatushe lukulupilo kwi Yehowa na mu milayilo yaye su? Ta mbyabya nya! Abakuke badi atekye Yehowa bwa’shi amukwashe pa mwanda wa mpaka na myanda ibadi nayo, na bino abilesha’shi tabadi mukatushe lukumino nya, anka badi ki’atungunuka na kukulupila Mwadi. Abakuke badi binyibinyi na twinyongoshi na tabadi auku kya kukita nya. Tabadi auku bwakinyi Yehowa badi atengyela bwa kufudisha makyenga na bwakinyi Badi amutadila akyengye bino nya. w18.11 14 ¶4-5

Mpyeele na Andree babadi ba ndobeshi ba mishipa, anka nsaa ibabadi bebetanyine kwi Yesu bwabadya kwikala balongi baye, abalekyele mudimo wabo wa kuloba mishipa. (Mat. 4:18-20) Bino tabipushisha’shi nsaa yolongo bya binyibinyi abitungu olekye mudimo oobe nya. Muntu oso e na lukalo lwa kufuba mudimo bwadya kulombasha nkalo ya ba mu kifuko kyaye. (1 Tim. 5:8) Anka nsaa yolongo bya binyibinyi, mushindo onangushena pabitale bintu bya ku mbidi aushintuluka. Oshinguula myanda i na muulo ngofu mu muwa obe. Banda kutala kileshesho kya Maria. Badi akumina kwasha maasha a ndundo abetanyinaa bu golf kubanga ku bukinga bwaye. Kunyima, babangile kulonga Bible. Badi mufule myanda ibadi alongo na babangile kwiyifubila mu nshalelo aaye. Maria bamwene’shi bi bukopo bwadya kulama kipwano kyaye na Yehowa na mudimo waye wa kwasha ndundo. (Mat. 6:24) Ngi bwakinyi batshile kitshibilo kya kuleka kepatshila ka kufika muntu mukata mu kwasha maasha a golf bwadya kupeta kintu ki na muulo ukata. Lelo uno, kwete kufuba bu mbala-mashinda na akula’shi e na “nshalelo a muloo, na ebuwa bukalabale.” w18.11 5 ¶9-10

Yesu pabalombeshe bipwa 30, balekyele mudimo wa kusee mabaya aye nkufika mulungudi a mukandu wibuwa mwanda badi auku’shi uno ngi mudimo wi na muulo ukata ubadi autungu’shi afube. Bambile’shi kulungula mukandu wibuwa wa Bufumu bw’Efile Mukulu ngi kabingilo kamune kababadi bamutumine kwi Efile Mukulu bwadya kufika pano pa nsenga. (Mat. 20:28; Luk. 3:23; 4:43) Mu muwa waye, Yesu badi mwipaane mu kulungula mukandu wibuwa, na badi akumina’shi bangi bantu bamwambule. (Mat. 9:35-38) Bantu bebungi ba kwatudi tabauku kusee mabaya nya, anka boso bwetu twi balungudi abalongyesha bangi bantu mukandu wibuwa. Uno mudimo wi na muulo ngofu ngi bwakinyi mpa n’Efile Mukulu kwete kufuba netu. Ngi bwakinyi abetwitanyina bu bantu ‘bakwete kufuba pamune n’Efile Mukulu.’ (1 Kod. 3:9, EEM; 2 Kod. 6:4) Atukumina ano mayi a mufundji a misambo bambile’shi: “Kìsha ky’eyi dyoobe nyi mbiinyibiinyi.” (Mis. 119:159, 160) Eyi dya Yehowa ndya binyibinyi. Byabya, abitungu twikale bashinkamishe’shi ‘atuukisha na bululame mukandu wa binyibinyi’ nsaa yatudi mu bulungudi. (2 Tim. 2:15) Byabya abitungu tutungunukye na kwikitshisha bwa kunyisha kulongamisha mushindo watufubu na Bible, kina mudimo kikata kyatufubu nakyo bwa kulongyesha bangi bantu bwabadya kuuka Yehowa, Yesu, na Bufumu. w18.10 11 ¶1-2

Nsaa i mulume ambula kifulo na kileshesho kibuwa kya nfumu aaye, Yesu Kidishitu, abikekala bibofule bwa’shi mukashi’aye ekale ‘amunemeka.’ (Ef. 5:22-25, 33) Nsaa i mukashi anemeka mulum’aye, akekitshisha bwa kuuka byapusha. Nsaa i ba nambutwile abekitshishena myanda mu mushindo aule’sha’shi muntu oso a kwabadi kwete kupasukila mwin’aye, abalekyela bana bano kileshesho kibuwa. Na dingi abitungu balongyeshe bana babo bwabadya kwikala abanangushena bwa bangi na kwikala na kalolo. Bu kileshesho, ba nambutwile mbalombene kulongyesha bana babo bwabadya kuleka kusuka lubino ku Nshibo ya Bufumu. Sunga’shi nsaa yabadi na bantu bebungi, mbalombene kulongyesha bana babo bwabadya kutengyela bantu bakulu babande kwata bya kudya kumpala. Twi balombene kukaanyisha mwana nsaa yakitshi mwanda wibuwa, bu kileshesho, nsaa yetufungwila kiibi. Bino abikwasha mwana bwadya kupusha buwa na abimukwasha bwadya kulonga’shi: “Muloo wa kupaana ngukile wa kupeebwa.” w18.09 29 ¶5-6

Bukunkushi bwabetupa kwi Yesu Kidishitu, Nfumu eetu kwete kumunana, abwitukwasha kubanga binobino mpa na mu mafuku aafiki. Ekitshishe bwa kumona myanda ibuwa yodi mupete pobe kulonda bukunkushi bupya. Mu lulangwilo lwenu lwa mu kifuko, nwi balombene kwisambila mushindo winukwashe kushintuluka kukitshikye pabitale bisangilo na pabitale mudimo wa bulungudi. Su tubatentekyesha’shi kulonda buludiki bwabetupa kwi ndumbulwilo a Yehowa akwitupetesha bipeta bibuwa bibungi, bino abiketubofwila bwa kulonda bukunkushi bwabetupa na muloo. Bu kileshesho, twi na muloo pa kuuka’shi tukwete kulama makuta ebungi patwe kufubisha byamo bipya byabadi batushe binobino pa kupela kutusha mikanda ibungi yatutushanga kumpala. Bino abikwasha ndumbulwilo eetu bwadya kutamisha mudimo wa kulungula mukandu wibuwa. Twi balombene kunyisha kufubisha mikanda ku bukwashi bwa twamo twetu twa ku maasa sunga ku ordinatere. Uno nyi ngumune wa ku mishindo watudi balombene kukwatshishena Kidishitu, aye akumina’shi tufubishe makuta a ndumbulwilo kalolo. Nsaa yatukwatshishena bukunkushi bwa Kidishitu, atukwasha bakwetu balume na bakashi bwabadya kwikala na lukumino lunyingye na kunyisha kwikala mu buumune. w18.10 25-26 ¶17-19

Nsaa y’atulesha kalolo akatukila kwi Efile Mukulu, twi kwikala bu lwalulo lwa ku luteko lwa muntu mukalakashwe. (2 Kod. 1:3-6) Byabya, totengyelanga’shi bakwenu balume na bakashi bekale bapwidikye. Ikala na nkatshi-nkatshi. Su botengyela’shi bakwenu bekale bapwidikye, bino abikakufwishisha twinyongoshi. (Mul. 7:21, 22) Tentekyesha’shi Yehowa e na nkatshi-nkatshi mu myanda yatengyela kwatudi. Byabya abitungu twikale na lwishinko kwi muntu na muntu. (Ef. 4:2, 32) Tatukumina kutakula bakwetu bwabadya kupusha’shi tabakitshi myanda kalolo sunga kwibapwandikisha na bangi bantu nya. Anka, atwibakankamika na kwibalesha myanda ibuwa yabakwete kukita. Bino mbilombene kwibakwasha bwabadya kwikala na muloo mu mufubo wa Yehowa.​—Nga. 6:4. w18.09 16 ¶16-17

Kukita kikyebe ky’eshimba dy’Efile Mukulu kubadi bu kya kudya kya Yesu. Kudya bidibwa bya ku mbidi akudisha mbidi yetu na kwitupa muloo. Mu mushindo umune, kukita kikyebe ky’eshimba dy’Efile Mukulu namu akwitukwasha bwa kupusha muloo na kudisha lukumino lwetu. Nsaa yatukitshi kyakya akitutekye Yehowa, atwikala na binangu. (Mis. 107:43) Na bantu basha binangu abapetaa myanda ibuwa ibungi. “Takwi kintu kilombane nabyo. . . . Binangu nyi mutshi wa muuwa bwa booso abeebipete, dingi baasha [muloo] mbano be nabyo.” (Nki. 3:13-18) Yesu bakwile’shi: “Su anuwuku ino myanda, nwi baasha muloo su anwiyikitshi.” (Yo. 13:17, Kilombeeno kipya 2014) Balongi ba Yesu abadi na kya kwikala na muloo su batungunuka na kutumikila myanda ibadi mwibalongyeshe. Kulonda kileshesho na malongyesha aye, kubafikile bu mwanda wi na muulo mu nshalelo abo. w18.09 4 ¶4-5

Sunga mbibadi Adame na Eeva bubidi bwabo mu lupango lwa Edene, babadi balombene kwela binangu bwa bangi bantu. Bwakinyi? Mwanda Yehowa bebapeele mudimo wa kukita. Bebalungwile bwabadya kuusha nsenga na bana babo na kwiyikasha mpaladiso. (Kib. 1:28) Adame na Eeva babadi balombene kukumina’shi bana babo babakatanda mu mafuku aafiki bekale na muloo, nka bibadi abikumina Yehowa’shi bantu booso bekale na muloo. Babadi na kya kufuba pamune boso bwabo bwa kwikasha nsenga yoso ishima mpaladiso. Uno mmudimo ukata! Bantu bapwidikye babadya kwikala dingi na lukalo lwa kutumika pamune na Yehowa bwabadya kwikasha nsenga mpaladiso na kukita kikyebe ky’eshimba dyaye. Mu uno mushindo, babadya kutwela mu kwikisha kwaye. (Eb. 4:11) Banda kupwandikisha buwa na muloo ubadya kupusha bantu bwa uno mudimo! Yehowa badya kwibelela myabi ibungi bwa kifulo kyabadi bafule bangi bantu na kwibapasukila kwabo. w18.08 18 ¶2; 19-20 ¶8-9

We kukita naminyi su muntu apalakasha myanda ya madimi mwishina dyobe? Mpa na Yesu na Yowano mubatshishi namu abadi bebapalakeshe myanda ya madimi. (Mat. 11:18, 19) Yesu bakitshine kinyi? Ta mufubishe nsaa na bukome bwaye boso bwa kukuminyisha bantu’shi ino myanda ngya madimi nya. Pamutwe pa byabya, badi mukankamikye bantu bwabadya kukimba bishinkamisho. Badi mwibatakule bwabadya kwimena pa myanda ibadi akitshi na ibadi alongyesha. Yesu bambile’shi: “Abatundulaa kinangu kilulame muyile mifubo yakyo.” ( Mat. 11:19, NWT.) Twi kupeta malongyesha e na muulo kwi Yesu. Ingi nsaa bantu mbalombene kwitwamba myanda ya madimi sunga ishi buwa, na twi kwikalakasha’shi ino myanda ngilombene kulwisha nkumo yetu. Kadi nshalelo eetu mulombene kulesha bangi byatudi binyibinyi. Nka bu abitulongyesha kileshesho kya Yesu, mwikelo wetu wibuwa ngulombene kukwasha bantu bwabadya kutundula’shi abekalanga betudimbiile. w18.08 6 ¶11-13

Kaayine, Salomone, na bena Isaleele boso bwabo abapetele mushindo wa kwinyongola na kushintuula mwikelo wabo. (Bik. 3:19) Abimweneka kalolo’shi, Yehowa takuminaa kusumbushenaa bantu bukidibukidi nka pa mwanda wa’shi abakitshi kilubilo nya. Nangushena mushindo ubadi mufwile Aarone lusa. Lelo uno, Yehowa kwete kwitudimusha na kifulo kyoso bwa kwitukalwila mu kukita myanda ibubi. Kwete kufuba na Bible, mikanda yetu, na bena Kidishitu netu. Su tubateemesha ku myanda yabetudimusha kwi Yehowa, twi kwikala bashinkamishe’shi aketufwila lusa. Kalolo kakata ka Yehowa ke na kepatshila. (2 Kod. 6:1) Aketupa mushindo watudya “kuleka bubi na lwabi lwa bintu bya pa nsenga.” (Tt. 2:11-14) Mu uno ndumbulwilo, amwikala nka myanda ayituulu lulamato lwetu kwi Yehowa mu kutompibwa. Ikala na kitshibilo kya kushala mu bwipi mwa Yehowa nsaa yoso! w18.07 21 ¶20-21

Lukalo lwetu lwa kukuminyibwa na Yehowa ndulombene kutama ngofu mu kipaso kyatukapele kukuminyibwa na bantu ba mu uno ndumbulwilo naminyi? Abitungu tulamine myanda ibidi ya binyibinyi i na muulo. Wa kumpala, misusa ibungi Yehowa auku baba boso abamufubila na lulamato. (Eb. 6:10; 11:6) Yehowa ataa muntu ooso amufubila na lulamato na muulo, na dingi apushaa’shi kwilwankana muntu su ngumune a kwabadi ‘nkukutwa kwa kululuma.’ Auku “eshinda dya balulame” na dingi auku bya kwibapasha. (Mis. 1:6; 2 Mp. 2:9) Wa kabidi, Yehowa mulombene kwitufuta mu kipaso kyatushi’abapwandikishanga. Su bantu bakita myanda i buwa bwa’shi bebamone kwi bangi, Yehowa mulombene kupela kwibapa efuto. Bwakinyi? Mwanda, Yesu bakwile’shi, dyadya ngi dyabo efuto. (Mat. 6:1-5) Ku lungi lupese, Yehowa “amonaa mu bufyefye” baba boso abakitshina bangi bibuwa kushi kukimba kinemo na kuukibwa na bangi bwa bibuwa byabakitshi. Alaminaa byoso byabakitshi na kwibafuta, sunga kwibelela myabi. w18.07 9 ¶8, 10

Mpyeele tabadi mupushe mwanda ubabadi abakyebe kumulongyesha kwi dino eyi dibadi apusha. Kunyima kwa kapindji kapeela, bantu bababadi batume kwi Korneye babafikile. Kikudi ki selele kibadi kiludikye Mpyeele bwadya kwenda ku nshibo kwa Korneye, ngi bwakinyi bayile pamune na bantu bababadi batume. Su Mpyeele badi mutshibe kiimu ‘muyiile bibaadi amono na meeso,’ tabadya kwenda ku nshibo kwa Korneye nya. Bena Yuuda tababadi abende ku mashibo a bantu ba milo yabene. Byabya Mpyeele bayile bwakinyi? Sunga mbibadi na ntondo kwi bantu bashi bena Yuuda, kimonwa kibamwene na bukunkushi bwa kikudi ki selele bibadi bishintuule binangu byaye. Kunyima kwa Mpyeele kutemesha Korneye, bambile’shi: “Naamono biinyibiinyi’shi Efile Mukulu tee na ntondo, na’shi mu kisamba kyooso, muntu ooso amutshinyi, naa akitshi myanda ya bululame apokyeelwa kwadi.” (Bik. 10:34, 35) Uno mpushisho mupya badi musankishe Mpyeele ngofu, na badi na bukitshishi kwi bena Kidishitu boso. w18.08 9 ¶3-4

Abitungu tusukye myanda yoso yabadi bashikwe kwi Efile Mukulu. Byabya twi balombene kukita kinyi nsaa yakushi mwiya awulesha wawa mwanda mu Bible? Atukauku myanda yabakumina’shi tukite kwi Efile Mukulu naminyi? Su tubalekyela Bible bwa’shi alongyeshe kondo ketu k’eshimba, atwikala atwata bitshibilo bibuwa. Bu byabadi betufule kwi Yehowa, mmwitupe mpa na mayi a kulonda alombene kuludika kondo ketu k’eshimba. Apatuula’shi: “Nami Yehowa, Efile Mukulu oobe, akupa bulambukishi abukukwasha, akukunkusha mwishinda dyoobe.” (Yesh. 48:17, 18) Su tubanangushena ngofu pabitale mayi a kulonda a mu Bible na kwialekyela bwa’shi alongyeshe mashimba eetu, twi balombene kuludika na kushintuula kondo ketu k’eshimba. Bino abitukwasha bwatudya kwata bitshibilo bibuwa. Eyi dya kulonda nyi mbya binyibinyi bya kitako abiludika ngyelelo etu a binangu, na kwitukwasha bwatudya kwata bitshibilo bibuwa. Kuuka mayi a kulonda a Yehowa akwitukwasha bwa’shi tuukye byakwete kunangushena na bwakinyi etwelelaa ingi miiya. w18.06 17 ¶5; 18 ¶8-10

Bena Eroode, kwamba’shi, bantu babadi abakwatshishena binangu bya politike bya Eroode, babadi abakulupila’shi su Yesu bamba’shi ta mbalombene kufuta kitadi, bamufunde bu mwishikwanyi a Ampire a bena Looma. Anka su Yesu bambile’shi abitungu bafute kitadi, bantu abadya kuleka kumulonda. Byabya, Yesu bakitshine naminyi? Yesu badi mudimukye na kupela kutwelakana mu uno mwanda. Yesu badi auku’shi baudishi ba bitadi bebungi abadi abatshibibwa milomo, anka ta mwimeene pa uno mwanda nya. Kadi, badi mwimeene pa Bufumu bw’Efile Mukulu, abo bulombene kupudisha myanda yoso i mu nsenga. Yesu mwitulekyele kileshesho kibuwa. Ta twi balombene kutwelakana mu myanda ya politike, sunga kisaka kimune kyamweneka bu kibuwa na akikitshi myanda ilulame na kingi namu kyamweneka bu kibubi na akikitshi myanda ishi ilulame. Bena Kidishitu abemenaa pa Bufumu bw’Efile Mukulu na myanda yabadi baleshe kwi Efile Mukulu’shi ngilulame. Bwa kano kabingilo, tatwimenaa pa myanda ya kukutwa kululama yabebakitshina nya. (Mat. 6:33) Ba Temwe ba Yehowa bebungi mbobeshe kukambila binangu bibukopo byabekalanga nabyo pabitale myanda ya politike. w18.06 6 ¶9-11

Bwa kutompa ba mwikeyilu, pangi Satana tabadi penda mutompe ba mwikeyilu bakutwe lulamatu bwabadya kutambuka lusandji nya badi mwibalee’shi abakekala na matalwa kwi bantu boso. Mu uno mushindo, Satana badi pangi atompo kukutshishwa kulombana kwa butemuki bwa “kekulu ka mukashi.” (Kib. 3:15) Anka Yehowa ta mumutadile bwa’shi alombashe ino mpango yaye nya. Badi mufwishe Mpeshi a kabutu, badi mulwishe ino mpàngo yoso ya Satana na ba demo. Byabya, lusandji na kwitatula nyi mbinunwa bikata abifubaa na Satana. Ba mwikeyilu abakidile ku lupese lwa Satana abadi bakishe bipwa bibungi mwiyilu mu bwipi mw’Efile Mukulu nabene! Anka, bebungi ba kwabadi abatadidile bwa’shi malaka e bubi atame mwabadi, na ano malaka abatamine ngofu. Abitungu twikale atutentekyesha nsaa yoso’shi sunga twekala bapwe kukita bipwa bibungi mu kufubila Yehowa, malaka e bubi ngalombene kumena mishi mwishimba dyetu. (1 Kod. 10:12) Ngi bwakinyi abitungu twikale atwitaluula nsaa yoso bwa kutala myanda i mu mashimba eetu na kukatusha binangu byoso bya lusandji na kwitatula!​—Nga. 5:26; Kol. 3:5. w18.05 25 ¶11-12

Mpoolo badi mutshobolokye pa mwanda wa’shi bena Yuuda abadi bapele kuteemesha mukandu wa Bufumu. Anka, Mpoolo ta mwimikye kwibalungula mukandu wibuwa nya. Badi mupatuule bibadi apusha pa mwanda wa bano bena Yuuda nsaa ibambile’shi: “Lukalo lwi mwishimba dyande, naa kyantekyel’Efile Mukulu pa mwanda wabo nkya’shi bakapete kipandjilo. Mwanda, nee mushinkamishe’shi: Bee na katshintshi mu myanda y’Efile Mukulu, anka keenyi kaaka katshintshi ta kee na bukwashi bwa binangu nya.” (Lom. 10:1, 2) Mpoolo bambile’shi badi alungula mukandu wibuwa kwi bena Yuuda mwanda bino bibadi bu ‘lukalo lwi mwishimba dyaye.’ Badi na lukalo lwi bukopo lwa’shi bapashibwe. (Lom. 11:13, 14) Mpoolo badi atekye Yehowa bwa’shi akwashe bantu ba mu Yuuda bwabadya kukumina mukandu wa Bufumu. Mpoolo bambile’shi: “Bee na katshintshi mu myanda y’Efile Mukulu.” Mpoolo badi mumone myanda ibuwa i mwi bantu na lukalo lwabo lwa kufubila Yehowa. Badi auku’shi bano bena Yuuda be na katshintshi mbalombene kufika bena Kidishitu be na katshintshi nka bu’ye. w18.05 13 ¶4; 15-16 ¶13-14

Abitungu oso a kwatudi ekale apasukila nkalo ya bangi bwatudya kumona mushindo wa kwibakwasha. Mpoolo badi mufundjile beena Kidishitu ba mu Ebelu’shi: ‘Buushayi maasa aakyebe kukooka nyingishayi manwi abofule dingi tobolayi tushinda tolokye twanudya kutambukila, bwa’shi asumpikita tafungunukanga mukoolo apande nka kupanda.’ (Eb. 12:12, 13) Boso bwetu twi bakumbene kwinyingishena na kwikankamishena mu byatwakula, sunga twekala bana bakinga. Mpoolo badi mutushe dino elango: “Byabya, su nwi balombene kwilangeena mu Kidishitu, kwinyingisheena ku mashimba mu kifulo, kulombashena mu kikudi, na kwilesheena kifulo, nyiishaayi dimo kunguusha ndaa na muloo pa kushaala mu kwipusheena kukata. Ikalaayi na kifulo kya-mumune, n’eshimba dya-mumune; kimbaayi bumune; tanukitanga kintu su nkimune bwa kwipikeena, su nkimune bwa kwitatula-tatula, anka mu kwiyisha, ikalaayi anumono bangi bu be kunundu kwenu. Muntu takimbanga bya kumusangasha pend’aye nabene, asangashe namu bangi.”​—Fid. 2:1-4. w18.04 22 ¶10; 23 ¶12

Kabingilo kababadi batumine Yesu kwi Yehowa bwadya kwitutuusha mu bupika bwa mulwisho na lufu nka’shi tumone mushindo wa kufubisha muwa wetu oso bwa Kumufubila. Mushindo ukile buwa watudi balombene kufubisha bulungantu bwetu nkufubisha nsaa na bukome bwetu bwa kufubila Yehowa ngofu. Kukita bino akuketukalwila bwa’shi bipatshila bya mu uno ndumbulwilo na malaka eetu’twe banabene tabikalanga pa mbalo ya kumpala mu muwa wetu. (Nga. 5:16) Banda kunangushena ku bibakitshine Nowa na kifuko kyaye. Abadi bashale mu ndumbulwilo a bantu ba ntomboshi na bafule myanda i butete. Anka tababadi batwelakane mu bipatshila na myanda ibabadi abakitshi kwi bantu bebeefunyishe nya. Abasangwile bwabadya kwikala bepaane mu mudimo ubabadi bebape kwi Yehowa. Abayibakile bwato, babunga bya kudya byabo na bya nyema, na abadi abaukisha bangi bantu pabitale Mpeshi a kabutu. Bible akula’shi: ‘[Nowa] bakitshine nka byabya bibamufundjile Efile Mukulu.’ (Kib. 6:22) Bu kipeta, Nowa na kifuko kyaye abadi bapande ku nfudilo kwa yawa ndumbulwilo.​—Eb. 11:7. w18.04 10 ¶8, 11; 11 ¶12

Satana na ba demo bakwete kufuba dingi na bipwilo bya madimi na ndumbulwilo ya busunga bwa kupambwisha “ba pano boso,” sunga bantu boso. (Kibaf. 12:9) Satana kwete kufubisha bipwilo bya madimi bwa kudimba bantu pabitale Yehowa, na mmutompe mpa na kufwamisha eshina dy’Efile Mukulu. (Yel. 23:26, 27) Bu kipeta, bamo bantu be na mashimba ebuwa abapwandikisha’shi bakwete kulangwila Efile Mukulu, aku namu bakwete kulangwila ba demo. (1 Kod. 10:20; 2 Kod. 11:13-15) Satana kwete kufuba dingi na ndumbulwilo a busunga bwa kupalakasha myanda ya madimi, bu binangu bya madimi bya’shi makuta na bintu mbilombene kupa bantu nshalelo a muloo. (Nki. 18:11) Bantu abakumina ino myanda ya madimi bakwete kukisha nshalelo aabo mu kufubila “Mapeta” pamutwe pa kufubila Efile Mukulu. (Mat. 6:24) Sunga byekala’shi abekalanga bafule Efile Mukulu kumpala, kifulo kyabo bwa bintu bya ku mbidi akinyisha kutama ngofu mu kipaso kyabashimisha mpa na kifulo kyabekalanga bafule Efile Mukulu.​—Mat. 13:22; 1 Yo. 2:15, 16. w18.05 23 ¶6-7