Mweshi wa 10

Ta twi balombene kutala bi mu mashimba bu’bo nya bu abikalaa Yehowa na Yesu nya. Anka, twi kutompa kupusha nkalo ya bangi na byabapusha ku mashimba. (2 Kod. 11:29) Mu kwilekena na bantu ba mu uno ndumbulwilo bashabatalaa nkalo ya bangi, atwitatshisha bwa shi: “Muntu takimbanga’anka penda buwa bwê nabêne, ooo akimbe namu na bwa bangi.” (Fid. 2:4, EEM) Bikishekishe bakulu mu tukongye, abitungu bekale abetulu pa mbalo ya bantu. Abauku shi abakayimuka muyile kipaso kyabapasukila mikooko ya Yehowa. (Eb. 13:17) Bwa kukwasha bakwabo bena Kidishitu, abitungu bakulu bekale abetulu pa mbalo yabo. Bakulu mbalombene kwitula pa mbalo ya bangi naminyi? Mukulu etulu pa mbalo ya bangi, akishaa nsaa na bakwabo bena Kidishitu. Elaa nkonko, na atemeshaa kalolo na lwishinko loso. Byabya bi na muulo bikishekishe su umune a ku ino mikoko akumiina kumulungula byapusha mwishimba dyaye, kadi akimbi bya kupeta bishima bilombane. (Nki. 20:5) Pa kukumiina kukisha nsaa yaye nabo, uno mukulu anyingisha kipwano kyaye nabo, abamukulupila na kumufula kwi bakwabo bena Kidishitu.​—Bik. 20:37. w19.03 17 ¶14-17

Kutumbula muntu kwi nka bu kidibwa kibuwa​—akisankisha muntu nsaa yomupa kyanka. Nsaa yatupusha’shi bangi be na lutumbu bwa byatukitshi, abitusankisha ngofu. Nsaa yatutumbula bangi, atwibasankisha. Patutumbula muntu, amono’shi kwitatshisha kwaye bwa kwitukwasha sunga bwa kwitupa kintu kampanda ta nkwende bisumanga nya. Bu kipeta, bu kuuku bwetu na yawa muntu abunyingi. Kutumbula bangi kwi na muulo ukata bu byabidi mu kifundwe kya lelo. Banda kunangushena kintu kipwibwe na oòlò na bekilengyesha na kyamo ky’ebàkanyi byakidi kilombene kwikala buwa! Dingi, banda kunangushena muulo wakidi kilombene kwikala nao! We kupusha naminyi su bakupa kya buntu ki byabya? Bishima byotumbula nabyo muntu, bi kwikala na muulo ukata. Dingi, tubande kutaluula uno mwanda: Kintu kyabadi bapwe na oòlò nkilombene kuyisha bipwa bibungi. Mu kipaso kimune, muntu e kutentekyesha bishima biboodi mumutumbule nabyo, na kwibyata na muulo mu muwa waye oso. w19.02 15 ¶5-6

Pabaadi Adame na Eeva badye kikuba kya mutshi wa kuuka buwa na bubi, babaadi baleshe patoka shi: Tababaadi abakulupila Yehowa na miiya yaye. Abasangwile bwa kwielela miiya pabitale kibuwa na kibubi. Kadi banda kunangushena bintu byabadi bashimishe. Abashimishe kipwano kyabo na Yehowa. Abashimishe dingi muwa wa loso, na abaadi bambukiishe bana babo mulwisho na lufu. (Lom. 5:12) Pwandikisha bibaakitshine Adame na Eeva na bibaadi bikite mutungulwe mwina Etshyopii nsaa ibabadi bamulambukishe. Mwina Etshyopii balesheshe lutumbu lukata bwa bibaadi bimukitshine Yehowa na Yesu, aye nkukumiina kubatshishibwa mususa umune. (Bik. 8:34-38) Nsaa yatwilambula kwi Efile Mukulu, na kubatshishibwa bu bibakitshine mwina Etshyopii, atulesha patoka shi, twi na lutumbu bwa byabadi betukitshine kwi Yehowa na Yesu. Atulesha dingi’shi, twibakulupile Yehowa, na shi nka penda aye nyi mulombene kwitwelela miiya pabitale kibuwa na kibubi. w19.03 2 ¶1-2

Bwetu’twe bafubi b’Efile Mukulu, kululama akulesha kufula na kulamata Yehowa n’eshimba dyetu dyoso, na kukita myanda ayimusankisha misusa yoso. Mu Bible, kishima kya mu kina Ebelu kyabadi baluule bu “kululama” akilesha: kilombane, kishi kalema, sunga kishima. Bu kileshesho, nyema ibabadi abalambula Yehowa bibaadi abitungu’shi ikale ilombane. (Lv. 22:21, 22) Mwilo w’Efile Mukulu taubadi na kya kulambula nyema mutshokokye mukolo, mutshibikye etwi, mutunyikye eyiso sunga nyema e na maladi. Kwi Yehowa bibadi na muulo bwa’shi nyema ekale mushima. (Mal. 1:6-9) Atupusha bwakinyi akuminaa kintu kilombane sunga kishima. Nsaa yatuulu kintu kampanda, byakikala’shi nkikuba, mukanda, sunga kintu kya kufuba nakyo, t’atukuminaa’shi kikale na matubu akata sunga kikutwe lungi lupoolo. Atukuminaa kyakya kikumbane, sunga kishima. Yehowa apushaa nka byabya pabitale kifulo kyetu bwaye, na lulamato lwetu kwadi. Abitungu bikale bilombane, bishima. w19.02 3 ¶3

Bwa kubamba mashimba etu ta twi na penda lukalo lwa kwimika bukitshishi bwibubi nya, twi na lukalo dingi lwa kukumina bukitshishi bwibuwa. Mu bibundji bya kala bibadi bifunyishwe na midimba, mulami a ku kiibi bashitshile kiibi kya kibundji bwa kupela kutwesha beshikwanyi, kadi ingi nsaa bekishitwile bwa kutwesha bidibwa na bingi bintu. Su biibi tabibadi bishitule, bantu abadya kufwa na nsala. Bi mumune, bibuwa tufungule mashimba etu nsaa yoso bwa’shi binangu by’Efile Mukulu bitukunkushe. Mu Bible mwi binangu bya Yehowa, byabya nsaa yoso yatumubadika, atulekyela binangu bya Yehowa bwa’shi bikunkushe ngyelelo etu a binangu, byatupusha, na byatukitshi. Mushindo kinyi watudya kupeta bukwashi mu kubadika kwa Bible? Luteko lwi na muulo bwa kwitukwasha “tumone bintu bibuwa bi mu Eyi dyaye.” (Mis. 119:18) Abitungu dingi tunangushene ku bibatubadika. Nsaa yatwele nteko, atubadika, na kunangushena, Eyi dy’Efile Mukulu aditwele “mund’eshimba [dyetu],” na atubanga kufula binangu bya Yehowa.​—Nki. 4:20-22. w19.01 18 ¶14-15

Yehowa auku’shi twi na bukome na myanda ilekeene, na asangelaa milambu yoso yatudya kumupa. Banda kunangushena ku milambu ya bena Isaleele ibadi atambula. Bangi bena Isaleele babadi na mushindo wa kutusha mwana a mukooko sunga mbushi. Anka mwina Isaleele mulanda badi na kya kutusha “tukutshi tubidi sunga tunkudimba tubidi.” Na su mwina Isaleele te na mushindo wa kutusha tonyi tubidi, Yehowa badi atambula “ky’ekumi kya mpaya a bukula.” (Lv. 5:7, 11) Bukula bubadi na muulo upela, anka Yehowa badi asangeela wawa mulambu, nka su bwabwa “bukula bwibuwa.” Efile Mukulu etu sha kalolo apushaa nka byabya pamwanda wetu lelo uno. Nsaa yatutusha ngaluulo, takimbaa nka’shi oso a kwatudi ekale nka mwisambi mukata bu bibadi Apolose sunga Mpoolo badi akumu bantu ku mashimba nya. (Bik. 18:24; 26:28) Yehowa atekye penda’shi tutushe ngaluulo mupunda bukome bwatudi nabo. Tentekyesha mukashi a mu lufwila badi mutushe tu bitshele tubidi. Badi na muulo kwi Yehowa mwanda batushishe mupunda bukome bwaye.​—Luk. 21:1-4. w19.01 8-9 ¶3-5

Bu byatudi balondji ba Kidishitu, atushingula’shi abetushikwa. Yesu badi mutemukye’shi balondji baye abakebakyengyesha ngofu mu mafuku a nfudiilo. (Mat. 24:9; Yo. 15:20) Butemuki bwa Yeeshaya abwitudimusha’shi beshikwanyi netu tabemena penda pa kwitushikwa nya; abafubisha bi na ngoshi bilekene bwa kwitulwisha. Beshikwanyi netu mbakumbene kufwamisha madimi abo bwa’shi amwekye bu bya binyibinyi, mbalombene kwitudimbiila sunga kwitubingabinga. (Mat. 5:11) Yehowa tatosha beshikwanyi netu bwabadya kufuba na bi na ngoshi byabo bwa kulwa netu nya. (Ef. 6:12; Kibaf. 12:17) Anka t’abitungu tutshine nya. Yehowa bambile’shi: “Kilonda kyooso” kyabafubisha bwa kulwa noobe “taakikukitshi kintu’kyo.” (Yesh. 54:17) Anka bu lubumbo lwitushikiile ku bukome bwa kipapi kikata kya mpeshi, Yehowa mwitulame ku “muuwa wa baa-sha-kifita.” (Yesh. 25:4, 5) Beshikwanyi netu tabe kobesha kwitukita kintu kibubi bwa looso nya. (Yesh. 65:17) Beshikwanyi b’Efile Mukulu booso “abesheete dingi bafwe.”​—Yesh. 41:11, 12. w19.01 6-7 ¶13-16

Ba nsongwa, Yehowa mmufule bulungantu, na bakupangile bwashi ofule namu bulungantu. Anka akumina’shi ofube na bulungantu bobe mu mushindo wibuwa aukukalwila. Pangi bangi benobe bakwete kutala poronografi, abakitshi myanda ibutete, abasha maasha aatulu muwa wabo mu masaku, sunga kutoma bintu abikolanaa sunga maalwa. Bwa mususa wa kumpala, bino bintu bi kumweneka bu miseku sunga bu bya kwasha nabyo, kadi abitushaa bipeta bibubi, bu mikumbo, kwikala ku bupika, sunga lufu. (Nga. 6:7, 8) Ba nsongwa bepane mu bino bintu mbalombene kwimona bu be bulungantu, aku namu ta mbalungantu. (Tt. 3:3) Ku lungi lupese, su atukokyela Yehowa mbwa buwa bwetu. Kwi buwa bwa mbidi yetu na kwitwikasha na bulungantu bwa binyibinyi. (Mis. 19:7-11) Na su bofubisha bulungantu bobe bibuwa, nyi kwamba’shi su bwata kitshibilo kya kukokyela miiya ipwidikye y’Efile Mukulu, olesha Efile Mukulu na baledi bobe’shi we muntu a kukulupila. Baledi bobe pangi mbalombene nkukulupila ngofu na kukupa bulungantu bwibungi.​—Lom. 8:21. w18.12 22-23 ¶16-17

Byabya, ouku’shi pabadi Adame mukite mulwisho, myanda ibungi ibashintulukile. Kushintuluka kwa kumpala nyi mbantu ababangile kufwa, na kuno kushintuluka nkukume eyibakishi. Mpoolo mutumibwa badi mupatulwile bena Kidishitu’shi lufu nyi alufudishaa eyibakishi, na yawa bashaala na muwa e na bulungantu bwa kwibakila dingi. (Lom. 7:1-3) Mwiya ubabadi bape bena Isalele kwi Efile Mukulu ubadi aulesha kantu na kantu koso katale eyibakishi. Kileshesho, mulume mwina Isalele badi na matalwa a kwibakila bakashi bebungi. Kino kipikwa kibadi kwanka mpa na kumpala kwa’shi Efile Mukulu atushe uno Mwiya. Anka, Mwiya ubadi aukalwila bakashi na bana bwashi tabebakyengyeshanga. Kileshesho, su mulume mwina Isalele bebakila mpika na kunyima bata mukashi a kabidi, e nka na kya kulombasha nkalo ya mukashi a kumpala nka bibadi amukitshina kumpala. Efile Mukulu badi mutekye’shi atungunukye na kumulama na kumukalwila. (Efi. 21:9, 10) Lelo uno tatukwete kulonda Mwiya wa Moyiise nya. Anka awitulongyesha’shi Efile Mukulu ataa eyibakishi na muulo. Kushi mpaka bino abitukwasha bwa kunemeka eyibakishi. w18.12 10 ¶3; 11 ¶5-6

Kunyima kwa Abakuke kulungula Yehowa myanda ibadi ayimukalakasha, badi mulombene kwiyipusha mushindo ubadi Yehowa mulombene kumwaluula. Nka bu Nshe bana e na kifulo, Yehowa badi mushinguule bibadi abipusha Abakuke. Badi awuku’shi Abakuke badi akyengye na badi amutekye bukwashi. Yehowa tabadi musashile Abakuke nya, anka badi mumulungule byakyebe kukita bena Yuuda bashibadi na lulamato. Byabya, Abakuke badi muntu a kumpala ababadi balungule kwi Yehowa’shi dinyooka dyabo tadidi peepi. Yehowa badi mulungule Abakuke’shi tadi peepi na kufudisha bubi. Badi na kya kunyooka ba ntomboshi na bantu babi ba bena Yuuda. Bu bibamulungwile’shi bino bi na kya kikutshika “mu ano mafuku enu,” Yehowa badi muleshe’shi kino kiimu akikafiki nsaa i Abakuke na muwa sunga mu mafuku a bena Isaleele abadi bamwifunyishe na muwa. Yehowa badi mwaluule Abakuke mu mushindo washibadi anangushena. w18.11 15 ¶7-8

Efile Mukulu akyebe’shi bantu ba bipaso byoso “bapande, na bafikye ku kyuukilo kya biinyibiinyi.” (1 Tim. 2:4) Mweneno obe e naminyi pabitale bantu booso bashi balongye bya binyibinyi? Mpoolo mutumibwa badi mulongyeshe bena Yuuda abadi bapwe kwikala na ndambo a kiukilo pabitale Yehowa. Kadi badi dingi mulongyeshe baba abadi abalangwila b’efile ba madimi. Mu lwendo lwa kumpala lwa Mpoolo mutumibwa lwa bu misionere, aye na Barnabase babayile mu kibalo kya Listre. Bantu ba mu kyakya kibundji kya Likaonii abadi bape Mpoolo na Barnabase kineemo kikilekile, bebetanyina mu mashina a b’efile babo ba madimi Zeuse na Hermese. Mpoolo na Barnabase babadi bakumine uno mwanda su? Abamwene bino bu mwanda wa muloo ubabapete kunyima kwa kupeta bitompwanga mu bibundji bibabadi bakile kumpala su? Abadi banangushene shi bino bibabadi bebakitshine bibadi abilesha shi bi kukwasha bantu bwa kutemesha mukandu wibuwa su? Nya! Abadi benyongole ngofu na bebalungula n’eyi di bukopo’shi: “Ankinyi kyanukitshi byaabya? Atwe naamu, twi bantu [be na kubofula] anka bu’nwe!”​—Bik. 14:8-15. w18.09 4-5 ¶8-9

Nsaa yatulongo bya binyibinyi na kubanga kutumikila miya ya mu Bible, abitungu tukumine kushintuula ngyelelo eetu a binangu na bikitshino byetu. Mpyeele mutumibwa bafundile’shi: “Ikalayi anukôkyela Efile Mukulu, tanulondanga ngabyabi ya nubádi nayo kwibedi kwa kwiuka Kidishitu.” Kunyima bambile’shi: “Nwikale belamûne ku bubi boso mu mwikêlo wenu oso.” (1 Mp. 1:14, 15, EEM) Mu kibundji kya Kodinda a kala, bantu bebungi abadi bepaane mu kutambuka lusandji. Bantu babadi bashale mwanka abadi na lukalo lwa kushintuluka ngofu bwabadya kwikala batookane ku meso kwa Yehowa. Lelo uno, bantu bebungi bakwete kukita kuno kushintuluka nsaa yabalongo bya binyibinyi. Mpyeele badi mupatuule uno mwanda nsaa ibafundile’shi: “Kala nubadi anukamba kukita byabya [abisankisha] bantu bashi bakumine Efil’etu. Nubadi anutambuka mu bukitekite na lukyebanokyebano mpà na mu bunkodi’ bwa mâlwa na budyafi, . . . myanda i bufu, nubadi anulangwila mankishi.”​—1 Mp. 4:3, EEM. w18.11 6 ¶13

Twi kupeta bantu “be na mashimba alombane bwa muuwa wa looso” naminyi? Bwa bena Kidishitu ba kumpala, mushindo umune ubabadi nao bwa kupeta bano bantu nkulungula mukandu wibuwa. Yesu balungwile balongi baye’shi: “Mu kibalo sunga kibundji kampanda mwanutwele, [kimbaayi], bwa kuuka su kwi mulombeene.” (Mat. 10:11) N’atwe namu be lelo uno abitungu tukite bino. Byabya, su bantu ta be na mashimba e buwa, be na kwitatula, sunga’shi tabakumina kupusha myanda y’Efile Mukulu, ta twi balombene kwibakitshisha pabukopo bwabadya kuteemesha mukandu wibuwa nya. Atukimbi bantu be na mashimba ebuwa, be na kwiyisha, na be na lukalo lwa kuuka bya binyibinyi. Twi balombene kupwandikisha kukimba kwetu kwa bantu na mudimo ubabadi abakitshi kwi Yesu pabadi asee mabaya. Kumpala kwadya kupwa kintu kya mu nshibo, kiibi, kikumbo, sunga kingi kintu, badi abanda kukimba mutshi wibuwa. Kunyima badi aata kasheete kaye ka biina mufubo, bwa kufubisha binangu byaye, na kupwa kintu kyakumina. Mu mushindo umune, lelo uno twi na lukalo lwa kubanda kupeta bantu be na mashimba e buwa, kunyima tufubishe bina mufubo na binangu byetu bwa kwibakwasha bwabadya kufika balongi.​—Mat. 28:19, 20. w18.10 12 ¶3-4

Fidipe mulungudi a mukandu wibuwa badi kileshesho kibuwa kya muntu mutuule binangu byaye ku mudimo wa bulungudi sunga mbibadi bishintulukye nshalelo aaye. Ungi mususa, badi na muloo wa kupeta mudimo upya mu Yeelusaleme. (Bik. 6:1-6) Kunyima kwa kwipaa Etshyene. Bena Kidishitu abapetele kubingwabingwa kwi bukopo, na bakatuka mu Yeelusaleme. Mwanda Fidipe badi akumina kutuula binangu byaye mu kufubila Yehowa, ngi bwakinyi bayiile mu kibundji kya Samadiya, mubadi bantu be na lukalo lwa kupusha mukandu wibuwa. (Mat. 10:5; Bik. 8:1) Fidipe badi akumina kwenda mu mbalo yoso mwabamukunkusha kwi kikudi ky’Efile Mukulu. Ngi bwakinyi Yehowa bafubile naye bwadya kwenda mu kulungula mu ma mbalo mwi bantu bashi’abandile kupusha mukandu wibuwa. Bena Yuuda bebungi abayile mu Samadiya mu kwibakyengyesha. Anka Fidipe tabadi na ntondo nya, na badi mwibalungule mukandu wibuwa. Bena Samadiya namu abadi bamuteemeshe “n’eshimba dimune”! (Bik. 8:6-8) Anka mu mishindo yoso mubadi nshalelo a Fidipe mushintulukye, badi nka mwipaane mu mudino wa bulungudi, na Yehowa batungunukile na kumwelela myabi aye na kifuko kyaye.​—Bik. 21:8, 9. w18.10 30 ¶14-16

Dingi efuku, Yesu badi mu kipindji kya nsenga kya Dekapole nsaa ibadi bantu ‘bamutwadile [muntu] sha kitwi, aakula n’ewuwuuta.’ (Mak. 7:31-35, Kilombeeno kipya 2014.) Yesu bamupashishe, anka ta mumupashishe munkatshi mwa bantu nya. Bwakinyi? Mwanda bu bibadi nshikwe, pangi uno muntu badi epusha bibubi munkatshi mwa kisaka kya bantu bebungi. Yesu badi mushinguule abipusha uno muntu, ngi bwakinyi bamutwadile “kula na bantu, ku lupese” ku mbalo ishi bantu aye nkumupashisha ku ino mbalo. Sunga byekala’shi ta twi balombene kukita bilengyeleshi, abitungu twikale atunangushena bwa nkalo ya bakwetu na byabapusha akupu twibakitshine myanda na kalolo. Yesu badi mushinguule bibadi abipusha uno muntu nshikwe na badi mumukitshine myanda na kalolo. Byabya, abitungu twikale atupasukila bantu banunu na be na bilema. Eyikashi dikata dya kakongye ka bena Kidishitu nyi nkifulo, ta nkukita kwa myanda ikata nya. (Yo. 13:34, 35) Kifulo akitutakula bwatudya kwikitshisha na mwetu moso bwa kukwasha bakwetu balume na bakashi bapwe kununupa sunga be na bilema bwabadya kwenda mu bisangilo na kwenda nabo mu kulungula mukandu wibuwa. Atwibakwasha sunga nsaa yabitwelela bukopo sunga byekala’shi ta mbalombene kufuba ngofu.​—Mat. 13:23. w18.09 29-30 ¶7-8

Mufubi a Yehowa ooso e na muulo ukata Kwadi na kwi Yesu. (Nga. 2:20) Twi bafule bakwetu balume na bakashi ngofu, ngi bwakinyi abitungu twibakitshine myanda na kalolo. Atukimbi “myanda ilombeene kutwala butaale na kwikwasheena.” (Lom. 14:19) Tukwete kukulupila ngofu nshalelo ebuwa mu Mpaladiso, mwanda mwanka muntu su ngumune takekala na mwanda ulombene kumubofusha nya! Takukekala mikumbo sunga ngoshi. Bantu tabakafu dingi pa mwanda wa mulwisho watudi bapyane, na takukekala kubingwabingwa, nkalakashi ya mu kifuko, sunga twinyongoshi twa mu nshalelo. Ku nfudilo kwa bipwa kinunu, bantu boso abakekala bapwidikye. Bantu boso abakashala na lulamato mu kutompibwa kwa nfudilo abakebakumina kwi Yehowa bu bana baye be pa nsenga na abakekala na “bulungantu na ntumbo bya bana b’Efile Mukulu.” (Lom. 8:21) Byabya boso bwetu twikaleyi atulesha kifulo akinyingishena na kukwasha bangi bwabadya nkatwela mu ndumbulwilo mupya a Efile Mukulu ebuwa. w18.09 14 ¶10; 16 ¶18

Kulonga ta mpenda kubadika myanda bukidibukidi sunga kwela mifunda ku ngaluulo ya ku nkonko ya kulonga nya. Nsaa yatulongo, atunangushene ku akitulongyesha yaya myanda pabitale bi Yehowa, byakitaa myanda, na mushindo wanangushenaa. Abitungu twikitshishe bwa kupusha bwakinyi Yehowa etulungula bwatudya kukita ingi myanda na kupela ingi. Tutale dingi akitungu’shi tushintuule mu nshalelo etu na mu binangu byetu. Byabya, ta mbilombene kwikala bibofule bwa kunangushena ku ino myanda nsaa yoso yatulongo nya. Anka bi buwa tukishe nsaa i bungi, pangi kya pankatshi kya nsaa yatukisha bwa kulonga bwa kunangushena ku myanda ibatukatuka mu kubadika. (1 Tim. 4:15) Nsaa yatunangushena ku Eyi dy’Efile Mukulu efuku dyoso, ‘atulesha atwe banabene’ sunga kushinkamisha atwe banabene’shi binangu bya Yehowa mbipwidikye. Atubanga kushingula bi mweneno a myanda a Yehowa, kunyima atukakumina uno mweneno aaye. Su tubakitshi byabya, atushintuula binangu byetu na kubanga kunangushena mu mushindo upya. (Lom. 12:2) Ku kapelakapela, atubanga kunangushena abinangushenaa Yehowa. w18.11 24 ¶5-6

Mpoolo bambile’shi aye na bangi bena Kidishitu ba mu siekele a kumpala abadi ‘abafubu pamune n’Efile Mukulu’ mwanda babadi abalungula na kulongyesha bantu bya binyibinyi. (1 Kod. 3:6) Natwe namu lelo uno twi balombene “kufuba pamune n’Efile Mukulu” pa kwikala atupaana na kalolo kooso nsaa yetu, bukome, na bintu byetu bya ku mbidi bwa kufuba mudimo wa bulungudi wabadi betupe kwi Efile Mukulu. Uno mmwabi ukata watudi nao! Kupaana nsaa na bukome bwetu patulungula na kulongyesha bantu akwitupa muloo wibungi. Bino ngi abyakula bakwetu bebungi bapete mushindo wa kulonga na bantu Bible. Abakula dingi’shi twi na muloo wa kumona bantu batulongo nabo abasanka nsaa yabashinguula akitulongyesha Bible, abatamisha lukumino, abashintuula nshalelo aabo, na kubanga kulungula bangi bantu myanda yabalongo. Na Yesu namu badi na muloo wibungi nsaa ibadi balungudi 70 babadi mutume, “babalukiile na muloo” pa mwanda wa myanda i buwa ibabadi bamone.​—Luk. 10:17-21. w18.08 20 ¶11-12

Twi balombene kubanga kwikulupila atwe banabene. Twi kwela binangu’shi tubapusha mwanda kalolo aku namu ta twi na bishinkamisho byoso. Dingi, mbilombene kwikala dingi bukopo bwatudya kutaluula mwanda kalolo nsaa yaudi utale mukwetu atushi’atukambaa kwipushena naye. Su tubatungunuka na kunangushena ku myanda ibadi itutupakashe, twi balombene kubanga kwelela mukwetu binangu bibubi. Kunyima, su twapusha mwanda wibubi umutale, twi kwikala na lukalo lwa kwiukumina bukidibukidi, sunga ta twi na kishinkamisho akilesha’shi uno mwanda ngw’eyendo. Bino abitulongyesha kinyi? Su tubatadila binangu bibubi mwatudi pabitale bakwetu, bino mbilombene kwitutakula bwatudya kwata bitshibilo bibubi bishi bimene pa bishinkamisho. (1 Tim. 6:4, 5) Ta twi balombene kutadila bwa’shi binangu bibubi bu lwabi na kyutu bishale mu mashimba eetu nya. Tatulubanga’shi Yehowa akumina’shi tufule bakwetu na kwibafwila lusa na mashimba eetu oso.​—Kol. 3:12-14. w18.08 6 ¶15; 7 ¶18

Bu bi Yehowa ngi bapangile bantu, atwe boso twi bantu baye. (Mis. 100:3; Kibaf. 4:11) Anka mu bantu boso bekale kwanka, Efile Mukulu mmusangule bantu balombene kwikala bantu baye mu mushindo wi pa bwao. Bu kileshesho, mukanda wa Misambo 135 awitanyina balangwidi ba Yehowa basha lulamato ba mu Isaleele a kala bu “kintu kyaaye’ye buupenka.” (Mis. 135:4) Na dingi, Osea badi mutemukye’shi bangi bantu bashii bena Isaleele abakafiki bu mwilo wa Yehowa. (Os. 2:23) Buno butemuki bubadi bulombane nsaa ibabangile Yehowa kusangula bantu bashi bena Isaleele bwabadya kumunana pamune na Kidishitu mwiyilu. (Bik. 10:45; Lom. 9:23-26) Bano bantu bedibwe mwimu wa kikudi abebayitanyina bu “eumbo diiselele.” Mbekale “mwilo wisangwile” Yehowa aye nabene. (1 Mp. 2:9, 10) Byabya twi kwamba naminyi bwa bena Kidishitu basha lulamato be kwanka lelo uno abakulupila nkashala na muwa wa ikalaika pa nsenga? Yehowa ebetanyina nabo namu bu “bantu bande” na bu “basangulwe bande.”​—Yesh. 65:22. w18.07 22 ¶1-2

Bena Kidishitu ba binyibinyi abambulaa Kidishitu, mwitulekyele kileshesho kipwidikye kya mushindo ulombene muntu kwikala na kalolo. (Mat. 20:28) Byabya twi balombene kwiyipusha’shi: ‘Ne kunyisha kulonda kileshesho kya Yesu su?’ (1 Mp. 2:21) Yehowa asankaa nsaa yatulondo kileshesho kipwidikye kyabadi betulekyele aye na Yesu. Atwambula kino kileshesho kyabo pa’twe kwikala atupasukila bantu na kukimba mishindo ya kwibakwasha. Yesu balesheshe muulo wa kukita bino nsaa ibakwile mwanda wa mwina Samadiya e buwa. (Luk. 10:29-37) Balongyeshe balondji baye’shi abitungu bekale abakwasha bangi, kushi kutala byabadi na mbalo yabadi bashale. Otentekyesha bwakinyi Yesu badi mulonde uno mwanda su? Mpa mwanda wa’shi ungi mwina Yuuda bamwipwishe’shi: “A muntu-naami nnanyi?” Lwaluulo lwa Yesu alwitulongyesha’shi su atukumina kusankisha Yehowa, abitungu twikale na kalolo nka bu mwina Samadiya. w18.08 19 ¶5-6

Yehowa badi mutungukye na kukumina Madiya mwanda wa bibadi alama Yesu kalolo su? Oolo. Efile Mukulu badi mufundishe ingi myanda ibabadi abakula na ibabadi abakitshi kwi Madiya mu Bible. Bamwene’shi Madiya tabadi na ngobesha ya kwenda na Yesu mu kulungula mukandu wibuwa munda mwa bipwa bisatu na kipindji bibadi mukite mudimo waye wa bulungudi nya. Pangi pa mwanda wa’shi badi mukashi kilele, badi mulombene kushala ku Nazarete. Badi mukutwe kumona myanda ibuwa ibabadi bamone kwi bangi. Anka badi kwanka nsaa ibafwile Yesu. (Yo. 19:26) Kunyima, Madiya badi ku Yeelusaleme na balongi ba Yesu kumpala kwa kutambula kikudi ki selele mu Mpentekoote. (Bik. 1:13, 14) Badi mwedibwe mwimu pamune na bangi balongi. Su mbyabya, bino abilesha’shi badi mupete mushindo wa kwikala na Yesu mwiyilu bwa looso. Mbinyibinyi, dino nyi efuto dikata bwa mudimo waye wa lulamato! w18.07 9 ¶11; 10 ¶14

Yesu badi mutumikye na mayi a kulonda bwa kulongyesha balongi baye’shi binangu na bikitshino byabo bi na bukitshishi. Bu kileshesho, badi mulongyeshe’shi nsungu ngilombene kutuma muntu ku bu ntomboshi, na’shi myanda i butete ngilombene kutuma muntu ku lusandji. (Mat. 5:21, 22, 27, 28) Su tubalekyela mayi a kulonda a Yehowa bwa’shi etuludikye, kondo ketu k’eshimba akekala kalongyeshibwe kalolo, na dingi atukata bitshibilo bibuwa abitwadila Efile Mukulu kinemo. Sunga bena Kidishitu bafuba na Bible bwa kulongyesha kondo kabo k’eshimba, mbalombene kwata bitshibilo bilekene pa myanda kampanda. Bu kileshesho pabitale kutoma maalwa. Bible takula’shi bibubi kutoma maalwa nya, anka etudimusha’shi tatwi balombene kutoma maalwa akile bungi sunga kukwatshika. (Nki. 20:1; 1 Tim. 3:8) Bino abipushisha’shi su mwina Kidishitu tatomo maalwa akile bungi, tabitungu anangushene ku kingi kintu nsaa yata kino kitshibilo su? Nya. Sunga byekala’shi kondo kaye k’eshimba akamutumu mu kutoma maalwa, abitungu anangushene namu pabitale kondo k’eshimba ka bangi. w18.06 18 ¶10-11

Yesu badi mudimushe balongi baye bwabadya kusuuka “kitatusho,” sunga malongyesha a Baafadisee, Baasaduseo, na bena Eroode (Mat. 16:6, 12) Abitusankisha pa kumona’shi Yesu badi mwakule ano mayi kapindji kapeela kunyima kwa bantu kutompa kumutuula bu nfumu. Nsaa ayitwelakana bena bipwilo mu myanda ya politike, misusa ibungi abitushaa myanda ya bu ntomboshi. Yesu balungwile balongi baye bwabadya kupela kutwelakana mu myanda yoso ya politike. Kano ngi kabingilo kamune kabadi katakule ba tshite-mwakwidi na Baafadisee mu kukimba bya kwipaa Yesu. Babadi na moo wa’shi bantu mbalombene kumuteemesha na kuleka kwibalonda. Su bibadya kukitshika byabya, abadya kushimisha matalwa aabo a mu bipwilo na a mu politike. Abambile’shi: “Su twamuleka anyisha kukita byabya, bantu booso abakumina mwadi, kuunyima beena-Looma abakafiki, balwishe mbalo yeetu ya-kishila n’eumbo dyetu.” (Yo. 11:48) Ngi bwakinyi Tshite-mwakwidi mukata e panundu Kayifase badi mwate mpango ya kwipaa Yesu.​—Yo. 11:49-53; 18:14. w18.06 6-7 ¶12-13

Kinunwa kyabakwete kufubisha kwi Satana ndukalo lwa kuuka myanda ya mu mufito. Lelo uno, kwete kutompa bwa kukaka bantu bwabadya kwikala na lukalo lwa ba demo pa kufubisha bipwilo bya madimi mpa na kukisha kwa kapapi. Ma filme, masha a mu ma ordinatere, na ingi mishindo ya kukisha kapapi ngilombene kulesha myanda ya mu mufito bu ibuwa. Twi kusuuka kino kinunwa naminyi? Ta twi balombene kukulupila’shi ndumbulwilo a Efile Mukulu etupe mulongo wa mishindo ya kukisha kapapi ibuwa na ibubi nya. Abitungu tulongyeshe kondo ketu k’eshimba bwa’shi kekale aketukwasha bwa kwata bitshibilo bimeene pa mayi a kulonda a Yehowa. (Eb. 5:14) Byabya, atwata bitshibilo bibuwa su atutumikila malango a Mpoolo. Muntu nsesa akulaa myanda ilekene na yakitshi. Byabya, nsaa yatusangula mushindo wa kukisha kapapi, abitungu twiyipushe’shi: ‘Nalondaa mayi a kulonda amune ankwete kulungula bangi bwabadya kwialonda su? Bantu bandongaa nabo Bible sunga bantu bangitanyina mbalombene kunangushena naminyi su bamona uno mushindo wa kukisha kapapi wansangula?’ Nsaa yatulondo mayi a kulonda atulungula bangi bwabadya kwialonda, abiketubofwila bwatudya kusumbula binunwa bya Satana.​—1 Yo. 3:18. w18.05 25 ¶13

Twi kwambula Mpoolo naminyi? Kya kumpala, abitungu twikale na lukalo lwa kusangana bantu “be na mashimba alombane bwa muuwa wa looso.” Kya kabidi, atutekye Yehowa bwadya kukwasha bantu be na mashimba alulame bwabadya kuteemesha nsaa yatwibalungula mukandu wibuwa. (Bik. 13:48; 16:14) Bino ngi bibakitshine Silvana, badi mufube bu mbala-mashinda munda mwa bipwa bifikye ku 30. Akula’shi: “Kumpala kwa kutwela mu lupango mu teritware ande, nakitaa luteko kwi Yehowa, na kumuteka bwadya kumpa binangu bibuwa.” Atutekaa dingi bwa’shi ba mwikeyilu betukwashe bwatudya kupeta bantu abakumina kwituteemesha. (Mat. 10:11-13; Kibaf. 14:6) Robert, mufube bu mbala-mashinda munda mwa bipwa bikile ku 30, akula’shi: “Kufuba pamune na ba mwikeyilu abauku myanda ayikitshika mu nshalelo a mwina nshibo nyi mwanda wa muloo.” Kya kasatu, atwikitshisha bwa kumona myanda ibuwa i mwi bantu na ngobesha yabo ya kufubila Yehowa. Carl, ungi mukulu akula’shi: “Nakimbaa bwa kumona tu myanda tupeela tulombene kundesha myanda i mwishimba dya muntu binyibinyi, pangi kusepa, kuntala na meso a kalolo, sunga kungyela lukonko lwibuwa.” Su tubakitshi ino myanda, twi balombene “kupa bikuba na kunyingiila” nka bibakitshine Mpoolo. w18.05 15 ¶13; 16 ¶15

Abitupeyaa muloo ngofu nsaa yatupusha’shi bantu babatudi bakwashe mu mafuku ashale mbashale na lulamato. Yowano mutumibwa bafundile’shi: “Muloo wande aunyiisha kutama pampusha’shi baana bande abatambukila mwitaata dya-biinyibiinyi.” (3 Yo. 4) Ba mbala-mashinda bebungi abapushaa muloo ngofu nsaa yabasangana’shi muntu ababadi bakwashe bwa kulonga bya binyibinyi kunyima kwa mafuku kwete kutungunuka na kufubila Yehowa na lulamato, pamo kwete kufuba n’aye bu mbala-mashinda. Byabya su ba mbala-mashinda babofula, twi balombene kwibatentekyesha myanda yoso ibuwa yabadi bakite pa kukwasha bangi. Bakunkushi ba bifunda bebungi mbakule’shi abo na bakashi babo abadi banyingishibwe nsaa ibabadi bapete mikanda ya lutumbu ibabadi bebafundile kunyima kwabo kutala kakongye. Bakulu, ba misionere, ba mbala-mashinda na bena Betele, bakwete kufubila Yehowa na lulamato nabo namu mbapushe bino. Nsaa yatwibatumbula, twi kwibanyingisha ngofu kukila byatupwandikisha. w18.04 23 ¶14-15

Salomone bakutshilwe kutumikila uno mwiya. Badi mwibakile bakashi 700 na makupi 300! (1 Bf. 11:3) Bebungi ba ku bano bakashi babadi bantu ba milo yabene babadi abalangwila b’efile ba madimi. Byabya Salomone badi mukutwe kukookyela mwiya w’Efile Mukulu wa kupela kwibakila bakashi ba miilo yabene. (Miy. 7:3, 4) Ku kapelakapela, Salomone badi mushimishe kifulo kyaye bwa miya ya Yehowa. Ku nfudilo a byoso, badi mukite myanda i bubi bukile. Badi mwibakye bilambwilo bya b’efile ba madimi Astartee na Kemoshe, aye nkubanga kulangwila bano b’efile ba madimi pamune na bakashi baye. Salomone badi mwibakye mpa na bino bilambwilo ku mwengye ubadi kumpala kwa kibundji kya Yeelusaleme, mubadi mwibakile Yehowa ntempelo! (1 Bf. 11:5-8; 2 Bf. 23:13) Pangi Salomone badi mwidimbe pa kunangushena’shi Yehowa mulombene kupela kubadika myanda yoso ibubi ibadi akitshi pa mwanda wa’shi kwete kumulambula milambu mu ntempelo. Anka Yehowa ta mukutwe kubadika milwisho yaye nya. w18.07 18-19 ¶7-9

“Mmikyetwe” kinyi yabadi balombene nkwasa kwi Satana? Pangi mulombene nkulwisha na myanda ya madimi pabitale Yehowa. Satana akumina opushe’shi Yehowa ta mukufule na’shi ta kwi muntu su ngumune akupasukila. Ida, e na bipwa 19, akula’shi: “Misusa ibungi nadi napusha’shi Yehowa te pepi nami na’shi takumina kwikala Kuuku ande nya.” Akitaa naminyi nsaa yapusha bino? Akula’shi: “Bisangilo ngi ngabo ikata ayikalwilaa lukumino lwande. Nadi na kyubishi kya kwimushala nka bisumanga kushi kwaluula, nadi napwandikisha’shi ta kwi muntu su ngumune akumina kupusha byangakula. Anka binobino, nalumbulaa bisangilo na kwikitshisha bwa kwaluula misango ibidi sunga isatu.”Ngabo ya musalayi ayikalaa nka na bukata bumune. Kadi nka bu bibatwibimono mu kileshesho kya Ida, lukumino lwetu talushalaa nka na bukata bumune nya. Lukumino lwetu ndulombene kutama sunga kupeela, kunyinga sunga kubofula. Atwe banabene ngi abatungu’shi tusangule. (Mat. 14:31; 2 Tes. 1:3) Bwa’shi “ngabo ya lukumiino” yetu itukalwile, abitungu tutungunukye na kwiyitamisha na kwiyinyingisha! w18.05 29-30 ¶12-14

Mulami a ku lukano badi mushintuule binangu byaye na kuteka bukwashi nka kunyima kwa kutshinkakana kwa nsenga. (Bik. 16:25-34) Mu mushindo umune, bangi bantu bashi’abakumina kuteemesha mukandu wa mu Bible mbalombene kushintuula binangu byabo na kukimba bukwashi nsaa ayikitshika mwanda wi bukopo mu nshalelo aabo. Pangi mbalombene kwinyongola ngofu pa mwanda wa kushimisha mudimo sunga kunyima kwa kutshiba eyibakishi dyabo. Bamo mbalombene kutapika kwishimba nsaa yabebalungula’shi be na mukumbo wibukopo sunga pa mwanda wa’shi mbafwishe muntu abadi bafule. Mbalombene kubanga kwela nkonko pabitale muwa, aku namu kumpala tabekalanga abeele ino nkonko nya. Mbalombene mpa na kwiyipusha’shi: “Kilombeene nakita nkinyi bwa kupanda?” Mbalombene kukumina kuteemesha mukandu wetu awibapa lukulupilo lwibuwa bwa musango wa kumpala mu muwa wabo. Byabya su tubatungunuka na kulungula na lulamato loso, atukekala panka nsaa ayikekala bantu na lukalo lwa kukumina busambi bwetu.​—Yesh. 61:1. w18.05 19-20 ¶10-12

Lelo uno, Satana mmubwikile bantu bebungi ku meso na tabashinguula’shi be mu bupika bwa bipwilo bya madimi, bwa bintu bya ku mbidi, na bwa myanda ya politike nya. (2 Kod. 4:4) Nka bu Yesu, twi na mwabi wa kukwasha bangi bantu bwabadya kuuka na kulangwila Yehowa, Efile Mukulu sha bulungantu. (Mat. 28:19, 20) Kulungula bangi mukandu wibuwa ta nkubofule nya. Mu angi ma mbalo, bantu tabakumina kuuka Efile Mukulu, na bamo bantu abetufitshila munda nsaa yatukyebe kwibalungula mukandu wibuwa. Anka bu byabadi betutekye kwi Yehowa bwatudya kulungula mukandu wibuwa, abitungu twiyipushe’shi, ‘ne kufuba na bulungantu bwande bwa kufuba ngofu mudimo wa Yehowa su?’ Abitukankamika ngofu pa kumona’shi bafubi ba Yehowa bebungi mbapwe kushinguula’shi nfudilo a uno ndumbulwilo befubwila peepi ngofu na mbaate kitshibilo kya kwikala na nshalelo mupelepele na kubanga mudimo wa bu mbala-mashinda. (1 Kod. 9:19, 23) Bamo abafubu bu mbala-mashinda mu bibundji byabo bya butandwa, bangi namu abakatuka na kwenda mu tukongye twi na lukalo lwa bukwashi. Twi na muloo wibungi wa kumona bantu bebungi bino abafubu na bulungantu bwabo bwabadya kufubila Yehowa mu kino kipaso!​—Mis. 110:3. w18.04 11-12 ¶13-14