Mueshi wa 4

Atuuku’shi na Yesu namu betulesheshe kifulo kikata, p’aye kukumina kutusha muwa waye pa muanda wetu. (Yo. 15:13) Tatuanekale na ngobesha ya kufuta muulo wa kifulo kituleshe Yehowa na Yesu. Anka tui balombene kulesha lutumbu luetu mu mushindo watukitshi mianda mu nshalelo etu a ku efuku n’efuku. (Kol. 3:15) Bedibue muimu abata nkuulo na muulo ukata, muanda ayibakuasha bua’shi lukulupilo luabo luibuwa lukumbane. (Mat. 20:28) Pa muanda wa lukulupilo luabo mu mulambu wa nkuulo ya Kidishitu, Yehowa muibetanyine bu balulame na ebakumiina bu bana baye. (Lom. 5:1; 8:15-17, 23) Na ingi mikooko namu ina lutumbu lukata bua nkuulo. Pa muanda wa lukumiino luabo mu mulambu wa nkuulo ya Kidishitu, beselele kumpala kua Efile Mukulu na mbakulupile’shi “abakapanda ku mpombo ikata.” (Kibaf. 7:13-15) Mushindo umune aulesha bedibue muimu na ingi mikooko’shi bena lutumbu mu nkuulo ya Kidishitu mpa kutuela mu kitentekiesho ku kipua kioso. w22.01 23 ¶14-15

Bwa Yesu, kibadi akimukalakasha ta mushindo ubadi mwipayibwe. Badi akamba kukalakashwa bwa mwanda ubabadi bamwipayile. Abadi bamudimbile’shi mmusabule Efile Mukulu. (Mat. 26:64-66) Uno mwanda ubadi aumukalakasha ngofu mu mushindo ubadi akulupila’shi, Nshaye t’akuminanga’shi ayishibwe milongo mu uno mushindo. (Mat. 26:38, 39, 42) Bibadi abitungu’shi bakokole Yesu ku mutshi bwa kufungusha bena Yuda ku mulwa. (Nga. 3:10) Abadi bakumine bwa kukokyela Mwiya w’Efile Mukulu, anka ta babadi bebikite nya. Abadi balombene kufwa mwanda bana ba Adame na dingi, abadi bedibwe mulwa. (Lom. 5:12) Mwiya ubadi Efile Mukulu mupe bena Isaleele ubadi awamba’shi, su muntu akita mulwisho ulombene lufu, abitungu kumwipa. Akupu, mbidi yaye beyipudikye ku mutshi. (Miy. 21:22, 23; 27:26) Pa mwanda Yesu badi mupudikwe ku mutshi, bena Yuda abadi balombene kufungushwa ku mulwa, na mulambu waye ubadi ulombene kwibakwasha sunga bibabadi ba musumbushene. w21.04 16 ¶5-6

Banda kupwandjikisha bibadi bikitshikye mwifuku dya nfudilo kumpala kwa’shi bepee Yesu. Badi mutadile’shi bamukwate kwi basalayi bena Loma, bamukupile kushi lusa. (Mat. 26:52-54; Yo. 18:3; 19:1) Abadi bafubishe lufimbo lubadi alumutapa nsaa ibabadi abamukupila. Kunyima, abamutwadishe mutshi wi bushito, aku mase afwa amunokanga. Yesu babanga ku kaka mutshi bwa kwenda nao pa mbalo y’abamwipayila, anka mu kapindji kapela, basalayi ba bena Loma abadi batumine ungi muntu eyi bwa’shi eutwale. (Mat. 27:32) Nsaa ibafikile Yesu mbalo y’abamwipayila, basalayi abamukokwele misumadi mu masa mpa na ku ngwa. Bushito bwa mbidi, abusana yaya mbalo yabadi bakokwele yaya misumadi. Ba kuuku ba Yesu mbenyongole na nyin’aye kwete kudila, anka bakata ba bena Yuda abamusepe. (Luk. 23:32-38; Yo. 19:25) Yesu mmukyengye munda mwa nsaa i bungi. Eshimba dyaye na mafwafwa t’abifubila pa bukopo, na kupuuka kubanyisha kumwelela bukopo. Yesu badi muukye’shi balesha lulamato na kumpala kwa’shi afwe, batekyele Yehowa bwa musango wa nfudilo. Akupu, bayinyikile mutwe aye nkufwa. (Mak. 15:37; Luk. 23:46; Yo. 10:17, 18; 19:30) Eyendo’shi, ta lubadi lufu lwa mu kimpulunkamba, lubadi lwa makyenga na lwa bufu. w21.04 16 ¶4

Yesu balunguile batumibua baye 11 basha lulamato pabitale bilombeno bibidi​—kilombeno kipia na kilombeno kia Bufumu. (Luk. 22:20, 28-30) Bino bilombeno bibidi bibadi bifunguile bano batumibua boso na bungi butshibibue bua bangi bantu bua badia nkekala ba mfumu na ba tshite-muakuidi muiyilu. (Kibaf. 5:10; 14:1) Nka penda bedibue muimu ba mu bino bilombeno bibidi nyi balombene kudia mukate na kutoma nfinyo ku kitentekiesho. Yehowa muibape lukulupilo lua kukanya​—lua nkekala na muwa muiyilu na kusankila mbidi ishaifu na ishainyanga dingi bua nkamunana pamune na Yesu Kidishitu mutumbishibue na kisaka kia 144 000 kia bedibue muimu, na muanda wi na muulo ukata bua nkekala kumpala kua Yehowa Efile Mukulu etu! (1 Kod. 15:51-53; 1 Yo. 3:2) Bedibue muimu abauuku’shi bua’shi bende muiyilu abitungu balame lulamato luabo nyaa mpa na ku lufu luabo.​—2 Tim. 4:7, 8. w22.01 21 ¶4-5

Ba ntomboshi babidi abadi bepayibwe pamune naye. (Luk. 23:40, 41) Umune a kwabadi bealwile kui Yesu amba’shi: ‘Yesu ontentekyeshe p’okekala bu mfumu.’ (Luk. 23:42) Yesu badi mupe uno ntomboshi tabadi afu lukulupilo mwanda badi auku’shi Nshaye sha lusa. (Mis. 103:8; Eb. 1:3) Yehowa akumina kwitufwila lusa. Anka ebikitshi nka su tubalesha’shi tubelanga kwishimba bwa milwisho yetu na su twina lukumino mu mulambu wa Yesu Kidishitu. (1 Yo. 1:7) Bangi mbalombene kupwandjikisha’shi bi bukopo bwa’shi Yehowa ebafwile lusa ku milwisho yabadi bapwe kukita. Su bino binangu byakufwila, tala uno mwanda: Kapindji kapela kumpala kwa’shi Yesu afwe, badi muleshe ntomboshi lusa badi kyabanga kulesha lukumino. Yehowa mmulombene kufwila bafubi baye ba sha lulamato lusa.​—Mis. 51:1; 1 Yo. 2:1, 2. w21.04 9 ¶5-6

Pa kulama lulamato lwaye mpa na ku lufu, Yesu badi mukumbashe myanda i bungi. Wa kumpala, badi muleshe’shi Satana sha madimi. Yesu badi muleshe’shi, muntu mupwidjikye e kulama lulamato lupwidjikye sunga Satana akita kinyi. Wa kabidi, Yesu badi mutushe muwa waye bu nkuulo. P’aye kutusha muwa waye bu nkuulo, mupe bantu ba’shi bapwidjikye mushindo wabadi balombene kwikala mu kipwano ki buwa n’Efile Mukulu na kwikala na lukulupilo lwa kupeta muwa wa ikalayika. Wa kasatu, Yesu badi muleshe’shi Yehowa nyi mukunkushi e buwa, na aye nkutumbisha eshina dya Nshaye. Tumoneyi efuku dyoso bu dyetu dya nfudilo dya kulama lulamato lwetu! Paapa, sunga twekala kumpala kwa lufu, atwikala na ngobesha ya kwakula’shi, “Yehowa, nakitshi mwande moso bwa kulama lulamato, bwa kulesha’shi Satana sha madimi na bwa kutoosha eshina dyobe na kukwatshishena Bufumu bobe!” w21.04 12 ¶13-14

Kunyima kwabo kumudimbila na kumutshibila kimu bwa mwanda wa’shi mukite, Yesu abadi abamusepe, kumukyengyesha na ku nfudilo, abo nkumukokola ku mutshi wa makyenga. Misumadi ibadi imutubule masa na ngwa. Kupuuka na kwakula bibadi abimwelela bukopo. Anka bibadi abitungu nka’shi akule, mwanda badi na mwanda wina muulo wa kwakula. Twi balombene kulongyela myanda i bungi ku mayi a nfudilo a Yesu. Abetuntekyesha’shi abitungu tufwile bangi lusa na tukulupile’shi Yehowa etufwila lusa. Twi na kinemo kikata kya kwikala mu kifuko kya mu kikudi ki buwa kya bakwetu balume na bakashi abakumina kwitukwasha, anka bwa’shi bebikite, abitungu twibatekye bukwashi. Atuku’shi Yehowa mulombene kwitukwasha bwa kunyingila lukalakashi loso lwatudi balombene kupeta. Na tubalongo muulo wa kumona efuku dyoso bu dyetu dya kulesha lulamato, bashinkamishe’shi muwa wetu ngulamibwe kalolo mu masa a Yehowa. w21.04 8 ¶1; 13 ¶17-18

Kulonda mu matabula a Yesu akwitutwala ku muwa wa loso. Nsaa ibadi nsongwalume mpeta mwipushe kyadya kukita bwa kupeta muwa wa loso, Yesu bamwalulwile’shi: ‘Ndonde.’ (Mat. 19:16-21) Balungwile bangi bena Yuda ba’shibadi abamukumina bu Kidishitu’shi: “Mikooko yande . . . ayindondo. Ami neeyipa muuwa wa looso.” (Yo. 10:24-29) Atulesha lukumino mwi Yesu p’atutumikila bibadi mulongyeshe na kwambula kileshesho kyaye. Su twakita byabya, atwikala nka mwishinda aditwala ku muwa wa loso. (Mat. 7:14) Kumpala kwa kulonda mu matabula a Yesu, abitungu tulongye bwa kumuuka. Kulonga bwa kuuka Yesu, nyi nkintu akitungu’shi tutungunukye na kukita. Abitungu tutungunukye na kulonga bi bungi pabimutale​—kwamba’shi nyikashi yaye, ngyelelo aye a binangu na miya yaye. Sunga twekala bapwe kukita bipwa bi bungi bwi naminyi mu bya binyibinyi, abitungu tutungunukye na kulonga bwa kuuka Yehowa na Mwan’aye. w21.04 4 ¶9-10

Abimweka’shi Mpoolo mutumibwa badi ekalakasha bwa myanda ibadi mukite kumpala kwa kwikala mwina Kidishitu. Eamba bu mulwishi “a kumpala.” (1 Tim. 1:15) Kumpala kwa kuuka bya binyibinyi, Mpoolo badi ende mu kibundji na kibundji bwa kubingabinga bena Kidishitu, kwibelesha mu nkano na kwipayisha bangi. (Bik. 26:10, 11) Banda kupwandjikisha bibadi Mpoolo epusha nsaa ibadi afumankana na mwina Kidishitu sha baledi babadi mwipayishishe. Badi enyongola bwa milwisho yaye, anka badi euku’shi ta mulombene kushintula bipwe kukila. Badi mushinkamishe’shi Yesu mumufwile na bafundjile’shi: “Bino byandi nee mwibiikeele ku buntu bw’Efile Mukulu.” (1 Kod. 15:3, 10) Bino abitulongyesha kinyi? Abitungu oshinkamishe’shi Yesu mukufwile na bino mbikukwashe bwa kwikala mu kipwano ki buwa na Yehowa. (Bik. 3:19) Kina muulo kwi Efile Mukulu, nkyatukwete kukita binobino na ky’atukitshi mu mafuku aafiki, ta milwisho yetu ya kala.​—Yesh. 1:18. w21.04 23 ¶11

Sunga bena Yuda be bungi ba mu mafuku a Yesu t’abadi abatengyela’shi, Mesiya e na kya kufwa, tala bibadi bitemukye Bifundwe: ‘Badi mwipaane’ye nabeene mpaa na ku lufu, aye nkwitula mu mulongo wa baa-sha-milwisho; mwanda baadi musemune bito bya bibumbu, dingi nkwakwila baa-sha-milwisho.’ (Yesh. 53:12) Sunga bibabadi bafude Yesu’shi mukite milwisho na abo nkumwipa, bena Yuda t’abadi na kabingilo ka kukokola. Lelo uno, twi balombene kuleka kulonga malongyesha aakokosha. Mu mwisambo waye wa pa mwengye, Yesu badi mudimushe bantu abadi abamutemesha’shi bangi bantu ‘abakenudimbila myanda ii bubi iilekeene.’ (Mat. 5:11) Nsulo ya ano oso madimi nyi Satana. Kwete atakula bantu betushikwe bwabadya kupalakasha myanda ya madimi pabitale boso bafule bya binyibinyi. (Kibaf. 12:9, 10) Abitungu tupele kutemesha myanda ya madimi y’abakula kwi bantu betushikwe. Tatutadila ano madimi bwa adya kwitutshinyisha sunga kubofusha lukumino lwetu. w21.05 11 ¶14; 12 ¶16

Kwasha mulongi obe a Bible bwadya kukulupila mwi Yehowa. Yesu badi mushinkamishe balongi baye’shi Yehowa ebakwasha, mwanda mwibafule. (Mat. 10:19, 20, 29-30) Tentekyesha mulongi obe a Bible’shi, Yehowa amukwasha naye namu. We kumukwasha bwa’shi akulupile mwi Yehowa pa kuteka naye pamune bwa bipatshila byaye. Franciszek mushale mu Pologne amba’shi: “Mulongyeshi ande badi akula bwa bipatshila byande mu nteko yaye. Pa nadi mumone mushindo ubadi Yehowa mwalule ku nteko ya mulongyeshi ande, nabangile nami namu kuteka kushi kunyengakana. Nadi namono bukwashi bwa Yehowa, nsaa inadi natekye bwa’shi su abampa matalwa ku mudimo bwa kwenda ku bisangilo na ku kikongeno kya mafuku asatu.” Yehowa apasukilaa balongi betu ba Bible ngofu. Auku mudimo wi bukopo aukitshi balongyeshi bena Kidishitu bwa kukwasha bantu bwa’shi befubwile pepi naye, na mwibafule bwa bino. (Yesh. 52:7) Su t’okwete kulonga Bible na muntu binobino, we kutungunuka na kukwasha balongi ba Bible bwabadya kwela matabula mpa na ku lubatshisho, pa kushindjikila bangi balungudi kwi balongi babo ba Bible. w21.06 7 ¶17-18

Atulesha’shi tui na lutumbu lua kupeta Eyi di’Efile Mukulu, pa kuidibadika nsaa yoso. Ta tulekanga kuibadikila Bible pa bupenka, sunga ku mubadika nka patudi na nsaa. Kadi tuikitshishe bua kumuibadikila pa kiubishi, bino abinyigisha lukumino luetu. Mu kuilekena na “basha-binangu na basha-kapatupatu” ba mu ino nsenga, atue tuina lukumino lunyingie luimene mu Eyi di’Efile Mukulu. (Mat. 11:25, 26) Bible kuete etupatuluila bua kuuka buakinyi mianda ikuete kuenda na kuluila mu nsenga, na akikiebe kukita Yehowa. Biabia tuateyi kitshibilo kia kunyingisha lukumino luetu na kukuasha bantu be bungi buabadia kuikala na lukumino mui Mupangi etu. (1 Tim. 2:3, 4) Na tutungunukieyi na kutengiela nsaa, ya bakatumbisha Yehowa kui bipangua bioso bi pa nsenga na mayi e mu Kibafumbuilwe 4:11, aamba’shi: “Yehowa Eefile etu we mmulombene kupeta ntumbo . . . mwanda obe nyi bapangile bintu byoso.” w21.08 19 ¶18-20

Bu biabadi balami ba mikooko, bakulu be na bushito bua kutuusha malango nsaa ayitungu. Mbalombene’nyi kuikitshisha buabadia kutuusha elango mu mushindo aanyingisha na “aasankisha eshimba.” (Nki. 27:9) Bakulu, mbafule bakuabo balume na bakashi. Ingi nsaa, abaleshaa kifulo, p’abalanga muntu e mu masaku a kukita kilubilo. (Nga. 6:1) Kumpala kua kuisamba na muntu, bi buwa mukulu ataluule ingi mianda ya kifulo, yabadi baleshe kui Mpoolo mutumibua. ‘Kifulo kii na lwishiinko lukata na kalolo. . . . Akitadiila bioso, akikumiina bioso, akikulupilaa bioso, akikankamanaa [mu] bioso.’ (1 Kod. 13:4, 7) Nsaa i mukulu anangushena ngofu pabitale ano ooso ma verse, aakamukuasha buadia kushinkamisha’shi, atuush’elango di buwa na ende kui mukuabo na kinangu kibuwa. Su winyi aabapa elango apusha’shi mukulu mmumupasukile, yaya nsaa, abiikala bibofule bua kuidikumiina na kuiditumikila. w22.02 14 ¶3; 15 ¶5

Yehowa badi mupangie bamikeyilu na bantu, boso bapuidikie. Anka umune a ku ba mikeyilu baye; Satana (eshina adipushisha’shi “Muishikuanyi”) badi mutakule Adama na Eva bantu bapuidikie mu kutombokiela Yehowa. Bangi ba mikeyilu na bantu abaadi bamulonde mu buntomboshi buaye. (Yu. 6) Kushi mpaka, bino bibadi bitonde Yehowa. Anka, badi munyingile, na atungunuka na kunyingila mpa na apakalombana nsaa ya kubutula boso ba ntomboshi. Akupu, Yehowa na boso bamulamate abakekala na muloo, muanda tabekala dingi na kia kunyingila uno ndumbuluilo e bubi! Satana badi mudimbile Yobo mufubi mululame a Yehowa, pa kuamba’shi bafubi boso ba sha lulamato b’Efile Mukulu, abamufubila penda bua buwa buabo. (Yob. 1:8-11; 2:3-5) Diabulu ki’atungunuka na kuibikita mpa na lelo uno. (Kibaf. 12:10) Atukuasha mu kulesha patoka’shi Satana sha madimi pa kunyingila nkalakashi na pa kushala na lulamato kui Yehowa muanda tui bamufule. w21.07 9 ¶7-8

Mpoolo baadi mufubishe bileshesho bua kuitulongiesha mianda i na muulo, bua’shi tushintule nshalelo eetu. Mpoolo bafundile’shi abitungu’shi “muntu eetu a kala” akookolue ku “mutshi wa makienga.” (Lom. 6:6, NWT) Mu ungi ngakuilo, atukumiinaa kulonda kileshesho kia Kidishitu. Abitungu tukatushe binangu na bikitshiino biabadi bashikue kui Yehowa. Abitungu tuele ano ooso matabula, buatudia kupeta kondo k’eshimba katooka bua’shi tupete muwa wa ikalayika. (Yo. 17:3; 1 Mp. 3:21) Yehowa ta mmulombene kushintula mayi aaye a kulonda bua kuitusankisha nya. Mu kuilekeena na biabia, abitungu atue tushintule bumuntu buetu na tukookiele mayi aaye a kulonda. (Yesh. 1:17, 18; 55:9) Sunga kunyima k’obe kubatshishibua, abitungu otungunukie na kukambila nkalo i bubi ya ku mbidi. Teka bukuashi bua Yehowa na okulupile kikudi kiaye, kushi kukulupila mu bukome bobe’be nabene. (Nga. 5:22; Fid. 4:6) Abitungu tuate kitshibilo kia kufuula muntu a kala na kuleka kumulama. w22.03 6 ¶15-17

Yehowa mulee’shi aketupa bidibua, bilamba na nshibo su tuatula Bufumu buaye pa mbalo ya kumpala na kukokiela miya yaye ya kululama. (Mat. 6:33) P’atukulupila mu uno mulayilo, t’atunangushena’shi bintu bia ku mbidi bia mu ino nsenga abitukaluila na kuituikasha na muloo nya. Atuuku’shi mushindo umune watudia kupeta butale bua binyibinyi, nyi nkukita kikiebe ki’eshimba dia Yehowa. (Fid. 4:6, 7) Sunga tuekala na mushindo wa kuula bintu bi bungi, abitungu tutale su tui na nsaa na bukome na kuibilama kalolo. We na mueneno kinyi pabitale bintu biobe bia ku mbidi? Yehowa muitupe mudimo wa kukita mu kifuko kiaye. Nyi buakinyi t’abitungu tutadile kintu su nkimune buakidia kukumba binangu bietu ku uno mudimo. T’atukumina su nkapela kuikala bu uno nsongua badi mufule bintu bibadi nabio ngofu, aye kuata kitshibilo kia kupela kulonda Yesu. Pa muanda wa bino, badi mushimishe mushindo wa kufubila Yehowa na wa kuikala umune a ku bana baye!​—Mak. 10:17-22. w21.08 6 ¶17

Olongo pabitale bu muntu bua Yehowa na ngikashi yaye, ino ngikashi yodi mulongie pabitale bipangua biaye. Kulonga ino ngikashi ya Yehowa akukushinkamisha’shi nyi mmuntu a binyibinyi. (Efi. 34:6, 7; Mis. 145:8, 9) Nsaa youku Yehowa kalolo, lukumino na kifulo kiobe buaye abinyigi ngofu, na kipuano kiobe naye a kikala bukopo. Lungula bangi bua lukumino lobe mui Efile Mukulu. Su touku bia kulongiesha muntu elesha mpaka’shi Efile Mukulu te kuanka, we kukita kinyi? Kimba kifundue kia kualula ku lukonko mu mikanda yetu na wekilungule yawa muntu. Teka mungi Temue a Yehowa buadia nkukuasha bua kualula lualua lukonko. Su yawa muntu akumina lualua lualulo alutukila mu Bible sunga kui lupela, abikukuasha muanda we mukimbule na lukumino lobe alunyisha kinyinga. w21.08 18 ¶14-15

Ta tui na lukalo na kuleka bintu bioso abitusankisha mu nshalelo etu bua kusankisha Yehowa nya. (Mul. 5:19, 20) Biabia, tatupelanga kukita bi bungi mu mudimo wa Yehowa penda muanda’shi tuina bintu kampanda biatudi bafule biatusha tukumina kuleka. Tatukitanga kilubilo kimune ki bakitshine muntu a mu lukindi lua Yesu bakimbile bintu bi bungi bia ku mbidi, anka ayiluankana Efile Mukulu. (Luk. 12:16-21) Nsaa yatufumankana na nkalakashi, abitungu tutekie ngofu na tuikitshishe bua kufubisha ngielelo etu abinangu kalolo, bua kukumbasha kepatshila ketu. (Nki. 3:21) Yehowa etuelelaa miabi mu mishindo ibungi. Tui kulesha lutumbu bua miabi yoso yadi muituelele, patukitshi kioso kiatudi balombene kukita bua kumutumbisha. (Eb. 13:15) Bino abipushisha kutamisha mudimo wetu wa bulungudi, na Yehowa namu etuelela miabi i bungi. Efuku dioso tutaluleyi mushindo wa ‘kumona bi buwa bua Yehowa.’ (Mis. 34:8) Na dingi, atukakula nka bu Yesu bambile’shi: “Kya kudia kyande nkukita akikyebe muntume na kukumbasha mufubo waye.”​—Yo. 4:34. w21.08 30-31 ¶16-19

Satana akumina’shi, twikale na kwitatula. Auku’shi su twekala na kwitatula, atufiki nkabu’ye na t’atupete muwa wa ikalaika. Nyi bwakinyi, Mpoolo mutumibwa badi mudimushe’shi, muntu mulombene ‘kwitatula, [na kupona mu] ku pîshîbwa bu bipîshîbwe Diabulu.’ (1 Tim. 3:6, 7, EEM) Bino bi kukitshikila oso a kwatudi, sunga twekala bapya mu bya binyibinyi, sunga twekala bapwe kufubila Yehowa munda mwa bipwa bi bungi. Bantu basha kwitatula, mbefule nkabo banabene. Satana akumina’shi twifule nkatwe banabene, kushi kufula Yehowa, bikishekishe nsaa yatudi mu nkalakashi. Bu kileshesho, mbakudimbile myanda su? Sunga’shi, mbakukitshine myanda na kukutwa kwa kululama su? Satana akumina’shi ofitshile Yehowa nsungu na bakwenu bena Kidishitu. Na Diabulu akumina’shi twipwile myanda atwe banabene, kushi kulonda bukunkushi abwitupa Yehowa ku bukwashi bw’Eyi dyaye.​—Mul. 7:16, 20. w21.06 15 ¶4-5

Mutemuki Angayi baapetele mudimo wi na muulo kui Yehowa. Kumpala kua’shi apete uno mudimo, Angayi baadi munkatshi mua bantu babaadi batukie mu bupika mu Babilone baaluka ku Yeelusaleme mu kipua kia 537 K.B.B. Mafuku apeela kunyima kuabo kualukiila kuanka, balanguidi ba Yehowa baasha lulamato, babayibakile kitako kia nshibo ya Yehowa, sunga bu ntempelo musango umune. (Esel. 3:8, 10) Anka mu kapindi kapeela, kubamuekiele muanda wi bubi. Muanda wa buluishi, babaadi batshobolokie na kuimika mudimo wa luibako. (Esel. 4:4; Ang. 1:1, 2) Kadi mu 520 K.B.B., Yehowa baatumine Angayi buadia kuibanyingisha bua kuatuula kisumi kiabo, na buabadia kupudisha ntempelo. (Esel. 6:14, 15) Kepatshila ka mukandu wa Angayi, kabaadi ka kunyingisha lukumino lua bena Yuda mui Yehowa. Kishima “Yehowa sha-biluilo” nkilombene kulesha muntu a kukulupila. Yehowa, e na kiluilo kikata kia ba mikeyilu ba ngoshi bakuete akunkusha. Biabia, bibaadi abitungu’shi bena Yuda bakulupile mui Yehowa buabadia kobesha. w21.09 15 ¶4-5

Lelo uno, ba Temue boso mu nsenga ishima bakuete kumona bi kifulo kia binyibinyi na buumune. Tui belekene na bingi bipuilo bioso, muanda tui nka bu kifuko kimune, sunga tuekala beumbo kinyi sunga ba kipikua kinyi. Tukuete kumona kishinkamisho kia kifulo kia binyibinyi pa tutuele mu bisangilo bia kakongie, ku bikongeno bia efuku dimune, na bikongeno bia mafuku asatu. Kino kishinkamisho akinyingisha lukumino luetu’shi lulanguilo luetu ndukuminyibue na Yehowa. (Yo. 13:34) Bifundue abitulungula biatudia “kwikala atuifulêna kifulo kikata.” (1 Mp. 4:8, EEM) Mu mushindo umune watuileshena kino kifulo mpa kuifuidishena lusa, na kuleka kutala kukutua kua kupuidika kua bakuetu. Atukimbaa mishindo ya kuikala na kalolo pa kukukila bakuetu boso mu kakongie, mpa na baba abetukitshina bilubilo. (Kol. 3:12-14) Su tubalesha kifulo kibino atushinkamisha’shi tui bena Kidishitu ba binyibinyi. w21.10 22 ¶13-14

Kutusha muntu mu kakongie akukuasha nkitshishi a bubi shelanga buadia kushintula muikelo waye su? Oolo. Bekumukuasha kui bantu be bungi bapue kukita muluisho ikata mbasangane’shi kitshibilo kia bakulu nkibakuashe buabadia kualusha binangu bua kushintuula bikitshino biabo, buabadia kualukila kui Yehowa. (Eb. 12:5, 6) Tubande kuata kileshesho. Mulami a mikooko bamuno’shi mukooko umune wi na maladi. Na aukushi bua kuiubuka kalolo abitungu kui ukatusha munkatshi mua ikuabo. Anka mikooko ayikumina kuikala nka mu kisaka ngilombene kupusha bi bubi nsaa ya beyabula. Bino abipushisha’shi ebukielo sunga’shi ntomboshi paye kukatusha uno mukooko munkatshi mua bakuabo su? Nta mbiabia nya. Muanda auku’shi su balekiela uno mukooko wi na maladi munkatshi mua ikuabo ano maladi a ambukila ikuabo yoso. Pakatusha uno wi na maladi akaluila lombe loso lubashala. w21.10 10 ¶9-10

Nyi nkinemo kikata, kia kuikala mu kifuko kia mu nsenga ishima kifulene. Atukuminaa’shi su kui mushindo, bantu be bungi besangie kuatudi mu kulanguila Efile Mukulu etu. Na uno muanda mu binangu, tulekieyi kukita kintu kioso ki bubi kilombene kuluisha nkumo ya muilo wa Yehowa, n’eshina dia Nshetu e muiyilu. Abitungu tuikitshishe atue banabene bua kuikala na muikelo, aukaka bantu ku mukandu wibuwa. Ingi nsaa, bangi be kuituipula sunga kuitukiengiesha muanda wa’shi atukookielaa Nshetu e muiyilu. Tui kukita naminyi su tui na moo wa kulungula bangi pabitale lukumino luetu? Tui balombene kukulupila mui Yehowa na mui Muan’aye buabadia kuitukuasha. Yesu baadi mushinkamiishe balongi baye’shi ta nui balombene kupangayika pabitale kia kuakula sunga kianudia kuisamba. Buakinyi? “Pa yaya nsâ yanudya kwakula, Efile Mukulu akenupa bya kwakula.” Yesu baadi mupatuule’shi: “Mwanda byabya bishima by’anukakula t’abikekala byenu, ooo. Nyi nkikudi ky’Efile Mukulu, Nshenu, akikâkwila mwanudi.”​—Mat. 10:19, 20, EEM. w21.09 24 ¶17-18

Na Moyise namu badi mufubishe mayi a mu kinfuanyi e mumune pabitale kifuamino. (Mis. 90:1) Mafuku apela kumpala kua lufu lua Moyise batushishe mayi ebuwa bukile a mu kinfuanyi. Pabafundile’shi: “Ee Efile Mukulu a yikalayika nyi kifwamino kyenu, enutwala mu mboko yee mafuku ooso.” (Miy. 33:27, EEM) Kishima etutuala mu mboko yee mafuku ooso akitulongiesha kinyi pabitale Yehowa? Su Yehowa kifuamino kietu atuipusha mu bulami. Angi mafuku puepusha mutshoboloke we kukutua mpa na bukome bua kuibuushula. Mu yaya nsaa i biabia Yehowa ekuitukitshina kinyi? (Mis. 136:23) Etukuata na mboko yaye, etuibuesha bipelabipela etukuasha na biatushimika mikoolo paashi buashi tulekie kutshoboloka. (Mis. 28:9; 94:18) Patuuku’shi tuibalombene kukulupila penda kui Efile Mukulu, abitukuasha buatudia kuuka’shi tuibedibue miabi mu mishindo ibidi. Wa kumpala, sunga tuikala mbalo kinyi atuuku’shi Yehowa etukaluila efuku dioso. Wa kabidi, Nshetu sha kifulo e muiyilu etupasukila bikata. w21.11 6 ¶15-16

Yesu badi muukie’shi kukutua kua kululama kubaadi kulombene kutompa lukumino lua balongi baaye. Bua kuibakuasha bua’shi banyingiile kukutua kua kululama, badi muibape kileshesho kiatusangana mu mukanda wa Luuka. Yesu batushishe kileshesho kia mukashi kilele, shibakookanga kudidila nsushi baadi mukutue kululama bua’shi amutshibile kiimu na kululama. Baadi mushinkamishe’shi, ku katshintshi kaaye abamukitshina bianka. Ku nfudiilo, uno nsushi baadi mualule ku luteko luaye bua kumusankisha. Ndilongiesha kinyi dibatuimupetela? Yehowa ta mmukutue kululama. Ngi buakinyi Yesu bakuile’shi: “A biabia, Efile Mukulu t’akatshibi mianda ya baaba baadi musangule bakuete kuidila kuadi bufuku na kanya su?” (Luk. 18:1-8) Yesu bakumbeshe dimo’shi: “Apakafiki Muan’a muntu, asangana luno lukumino pa nsenga su?” Nsaa y’atukienge pa muanda wa kukutua kululama, tui na lukalo lua kulesha kukidila ku luishinko, na kunyingiila kuetu’shi, tui na lukumino lui bukopo bu lua uno mukashi kilele. Kuikala na lukumino lui bino, akuitushinkamiisha’shi, Yehowa etukaluila binobino, sunga mu mafuku aafiki. Abitungu dingi tukumine mu bukome bua nteko. w21.11 23 ¶12; 24 ¶14

Ba nsongua anupusha ingi nsaa’shi mayi a kulonda a Yehowa aenukutshishua bulungantu su? Uno nyi mueneno a Satana akumina’shi nuikale naye. Akumina’shi nutompe kutula binangu bienu bioso kui baba be muishinda dikata abamueneka bu bena bulungantu bua kukita kioso kiabakiebe. Akumina nunangushene’shi tanukuete kuasha masha abasha bena kalasa nenu sunga bena mudimo nenu, sunga kulesha bi nshalelo enu abilesha bangi bantu bi nshalelo abo ku internete nya. Akumina onangushene’shi mayi a kulonda a Yehowa aakukutshishua kuisangasha pokina mushindo wa kuibikita. Anka tentekeshayi’shi: Satana takumina’shi baba boso abatambukila mu eshinda dikata baukie akibatengiela ku nfudilo kua luendo luabo nya. (Mat. 7:13, 14) Yehowa, akumina’shi nuukie kalolo nshalelo enu biakekala buwa su nuashala muishinda diaye dipeela adituala ku muwa.​—Mis. 37:29; Yesh. 35:5, 6; 65:21-23. w21.12 23 ¶6-7

Atuuku’shi abitungu tufwile bangi lusa; na nyi kintu ki buwa kya kukita. Kadi, bi kwitwelela bukopo bwa kwibikita. Ingi misango, Mpyele mutumibwa badi mwipushe nka bino. (Mat. 18:21, 22) Nkinyi kilombene kukwasha? Kya kumpala, nangushena misango bungi ipwe Yehowa nkufwila lusa. (Mat. 18:32, 33) Ta twi bakumbanyine kufwidibwa lusa, anka akumina kwitufwila lwanka. (Mis. 103:8-10) Byabya, “twina kya kwifuleena, atwe naamu, ku muntu na muntu.” Nyi bwakinyi kufwidishena lusa nyi kitungo. Twi na kyatudya kufwila bakwetu balume na bakashi lusa. (1 Yo. 4:11) Kya kabidi, nangushena ku akikitshika nsaa y’atufwila bangi lusa. Twi kukwasha yawa muntu mwitulwishishe, na kukwatshishena buumune bwa kakongye, kulama kipwano kyetu na Yehowa na kukatusha bushito bwi ku mapampa etu. (2 Kod. 2:7; Kol. 3:14) Ku nfudilo, sambila Yawa etutekye bwa kufwila bangi lusa. Totadilanga’shi Satana alwishe kipwano kyodi nakyo na bakwenu bena Kidishitu. (Ef. 4:26, 27) Twi na lukalo lwa bukwashi bwa Yehowa su t’atukumina kupona mu muteo wa Satana. w21.06 22 ¶11; 23 ¶14

Davide baadi asuuku bua kupaasha muwa waye. Saule Mfumu a mu Isaleele baadi bukome, baadi na kitshibilo kia kumuipa. Pabaadi Davide na lukalo lua bia kudia bayimeene mu kibundi kia Nobe, pabayimeene ku Nobe batekiele bua’shi su abamupa mikate itaano. (1 Sam. 21:1, 3) Kunyima aye na bantu baye, babadi bapete mbalo ya kufuamina mu lubuebue. (1 Sam. 22:1) Davide baadi muikale mu uno muanda mushindo kinyi? Saule baadi mukuatshile Davide kiutu muanda wa bantu babaadi bamufule na muanda wa’shi babaadi abamusamuna bua ngoshi ibungi yaadi mutshokole. Saule baadi mupue kuuka’shi Yehowa mmupue kulumbuula bua’shi Davide akekale Mfumu. (1 Sam. 23:16, 17) Saule baadi Mfumu na dingi baadi na kisaka kikata kia basalayi na bantu bebungi babaadi abamukuatshisheena. Davide namu badi asuuku bua kupasha muwa waye. Saule baadi anangusheena binyibinyi’shi mulombene kulua na Davide bua’shi Efile Mukulu akutue kulombasha mpango yaaye ya kutuula Davide bu mfumu su? (Yesh. 55:11) Bible tamuibiakule nya, kadi tui balombene kushinkamisha muanda umune. Saule baadi muituule aye nabene mu masaku, muanda booso abaluiya n’Efile Mukulu tabobeshaa! w22.01 2 ¶1-2

Yesu baadi mufube ngofu mu mudimo wa bulungudi. Baadi muleshe kifulo kiaye kui bantu naaye, nsaa ibaadi mutungunukie na kuibalongiesha, nsaa yoso ayimueneka mushindo. (Luk. 19:47, 48) Nkinyi kibaadi akimutakula bua kukita biabia? Yesu baadi etuulu pa mbalo yaabo. Ingi nsaa bantu bebungi babaadi abakumina kutemesha mayi a Yesu, mu kipaso kishibaadi Yesu na balongi baye “balombene kudya sunga ka kudya.” (Mak. 3:20) Nsaa ibaadi Nikodeme akiebe kuisamba na Yesu bufuku, Yesu baadi mukumine kufumankana na uno muntu buadia kumulongiesha. Munkatshi mua bantu babaadi abatemesha Yesu bebungi ta mbafikie balongi baaye nya. Anka boso babaadi abamutemesha babaadi bapete bu kamonyi bua binyibinyi. Lelo uno dingi, atukumina’shi bantu boso, bapete mushindo wa kupusha mukandu wibuwa. (Bik. 10:42) T’abitungu’shi tulungule mukandu wibuwa p’atukumina atue banabene nya, abitungu tushintuule programe etu na nsaa yetu ya kulungula mukandu wibuwa bua kupeta bantu bebungi. Su tubakitshi bino, tui balombene kushinkamisha’shi, atusankisha Yehowa. w22.01 17 ¶13-14

Lelo uno, bantu be bungi t’abamonaa’shi mbalombene kukulupila muntu ooso e na matalua nya. Mbamone’shi mbulamatadi na miya, abikaluila nka penda ba mpeta na bantu be bukome, anka t’abikamba kukaluila bantu balanda nya. Kukatusha biabia, bangi bakata ba bipuilo, bakuete kukitanga mianda i bubi. Bino mbikitshishe bua’shi bangi bantu bashimishe lukumiino luabo mui Efile Mukulu. Ngi buakinyi, p’atulongo Bible na muntu, tui na mudimo wi bukopo bua kumukuasha, bua’shi akulupile mui Yehowa na mui baaba abalesha mpala yaye pano pa nsenga. Eyendo’shi, t’anka penda balongi ba Bible ngi be na lukalo, lua kulonga bia kukulupila mui Yehowa, na mui ndumbuluilo aaye nya. Sunga atue booso batabadi mu bia binyibinyi mund’a bipua bi bungi, t’abitungu tushimishe lukumiino’shi Yehowa akitaa nka bi buwa nya. Ingi nsaa, kui kukitshika muanda autompo lukulupilo luetu mui Yehowa. w22.02 2 ¶1-2