Mueshi wa 5

Bwa kwitukwasha bwa’shi tulongye bwa kuuka Mwan’aye, Yehowa mmufundjishe Mwiyi dyaye, Evanjile inanka. Evanjile ayakwila nshalelo a Yesu na mudimo waye wa bulungudi. Ayilesha bibadi Yesu mwakule, bibadi mukite na bibadi eepusha. Ayitukwasha bwa ‘kutuma binangu’ ku kileshesho kya Yesu. Mu ano ma evanjile, mwi matabula etulekyele Yesu. Byabya, p’atwiyilongo, atuuku Yesu kalolo. Bu kipeta, twibalombene kulonda mu matabula aye kalolo. Bwa’shi myanda i mu ma evanjile itukwashe, t’abitungu penda kwiyibadika nya. Abitungu twate nsaa ya kwiyilonga kalolo na kwiyinangushena ngofu. (Pwandjikisha na Yooshwa 1:8.) Mona myanda i mu evanjile bu ayikitshika yaya nsaa y’obadika. Nangushena bu’be kwete amono na kupusha byoso abikitshika paapa. Bwa kwibikita, kimbula mu mikanda itushe ndumbulwilo a Yehowa. w21.04 4-5 ¶11-13

Bipwa nkama kumpala kwa Yesu kufika pa nsenga, Yehowa badi muleshe Mwiyi dyaye’shi, Mesiya akepanyibwa ku fwalanga 30. (Sek. 11:12, 13) Na muntu akapana Yesu, akekala umune a ku ba kuuku baye. (Mis. 41:10) Mutemuki Sekadya bafundjile’shi: ‘Kupila mulami a mikooko, mikooko ipalakane.’ (Sek. 13:7) Pamutwe pa kukokola bwa ino myanda, bantu ba sha mashimba alulame mbalombene kunyingishibwa p’abo kumona ano matekumi aalombena Yesu. Okwete kumona uno mwanda lelo uno su? Oolo. Bangi ba Temwe ba Yehowa abaukibwa kalolo, mbalekye kufubila Yehowa, basumbula lukumino na bakwete kukita mwabo moso bwa kukaka bangi kwabadi. Bakwete kupalakasha myanda ya madimi pabitale ba Temwe ba Yehowa ku bisashi, na ku Internete. Anka bantu ba sha mashimba alulame ta bakwete kudimbibwa. Kadi, abaukushi Bible badi mupwe kutemuka’shi ino myanda aikakitshika.—Mat. 24:24; 2 Mp. 2:18-22. w21.05 11 ¶12; 12-13 ¶18-19

Atokiesha kalolo’shi bantu abakapusha bia binyibinyi kalolo mu kukila kua mafuku. (Kol. 1:9, 10) Yehowa afumbula bia binyibinyi kapelakapela, na abitungu kutengiela na luishinko bua kumona etaata dia bia binyibinyi bia diende na kutama. Nsaa i Kasaka Ka bakunkushi Bakulu kabasangana’shi kui lukalo lua kushintula mpushisho sunga mianda kampanda, abeyishintuula kushi kunyengakana. Bakata ba bipuilo be bungi lelo uno, abashintula malongiesha abo buabadia kukuminyibua na bena bipuilo baabo, sunga buabadia kuukibua na bantu be bungi, anka ba Temue ba Yehowa abashintuula mianda muanda abakumina kuifubuila kui Efile Mukulu abo, na kumulanguila mu mushindo ubadi umulanguile Yesu. (Shak. 4:4) Su atushintula mianda nta mpa muanda wa’shi atulondo mueneno a bantu ba mu nsenga abashintula nya, kadi mpa muanda wa’shi atupusha Bible kalolo, na tui bafule bia binyibinyi!—1 Tes. 2:3, 4. w21.10 22 ¶12

Nkinyi kiodi mulombene kukita su w’epusha bupenka? Nangushena ku mushindo ukwete aukukwasha Yehowa. (Mis. 55:23) Bino abikukwasha bwa kwikala na mweneno e buwa pabitale mwanda obe. Nangushena dingi, pabitale mushindo ukwete Yehowa kukwasha bangi bena Kidishitu abepusha bupenka. (1 Mp. 5:9, 10) Hiroshi mukwetu mulume badi Temwe a Yehowa bupenka munda mwa bipwa bi bungi mu kifuko kyabo, amba’shi: “Kuuka’shi, atwe boso tukwete atwitatshisha bwa kufubila Yehowa, nkulombene kunyingisha oso a kwatudi epusha bupenka mu bya binyibinyi.” Dingi, lama byubishi bi buwa bya mu kikudi. Abitungu olungule Yehowa byoso bywepusha. Bi na muulo bua’shi obadika Eyi dy’Efile Mukulu efuku dyoso, na onangushene pa myanda ayishimika kasele pa kifulo kya Yehowa b’obe. Bangi bena Kidishitu mbalamine bifundwe abibanyingisha bu Misambo 27:10 na Yeeshaya 41:10. Bangi namu abamonaa’shi, bi buwa kutemesha mikanda ikobolwe ya kulonga mu bisangilo nsaa y’abelumbula sunga nsaa y’ababadika Bible bwa kupela kwipusha bupenka. w21.06 9-10 ¶5-8

Okuete kudila muntu odi mufule mufue su? Ata nsaa ya kunyingisha lukumino lobe mu lusangukilo pa kubadika mianda i mu Bible ya baaba boso babasangukile. We muinyongole pa muanda wa muina kifuko nobe abadi batuushe mu kakongie su? Longa bodia kushinkamisha obe nabene’shi dinyoka di’Efile Mukulu adikalaa nka buwa misusa yoso. Sunga wekala na muanda kinyi, eufubishe bua kunyingisha lukumino lobe. Tuula eshimba diobe dioso kui Yehowa. Toshalanga pa bupenka obe nabene, anka efubuile kui bakuenu balume na bakashi. (Nki. 18:1) Kita mianda ilombene nkukuasha bodia kunyingiila, sunga biokuete odidi pa muanda wa biabia abikalanga bikukitshikile. (Mis. 126:5, 6) Tungunuka na kiubishi kiobe kia kutuela mu bisangilo, kuenda mu bulungudi, na kuibadikila Bible nsaa yoso. Ikala dingi onangushena pabitale mianda ibuwa yabadi bakuelele miabi kui Yehowa na y’akakupa mu mafuku aafiki. Nsaa y’omono mushindo aukukuasha Yehowa binobino, lukumino lobe muadi alunyisha kutama. w21.11 23 ¶11; 24 ¶17

Mu ungi mushindo kinyi, mwi balongi ba Yesu bu “bano bakinga”? Ba nnanyi babamonaa bu be na muulo kwi bantu ba pano nsenga? Ba mpeta, bantu bende nkumo, na basha bukome. Mu kwilekena na byabya, balongi ba Yesu abamweneka bu bashi na muulo, bu bana “bakinga.” (1 Kod. 1:26-29) Anka Yehowa t’ebamonaa mu uno mushindo nya. Bwakinyi Yesu badi mwakule pabitale “bano bakinga”? Balongi baye abamwipwishe’shi: “Naanyi mukile bukata mu Bufumu bwa mwiyilu?” (Mat. 18:1) Bena Yuda be bungi abadi abakumina’shi bangi bebamone bu be na muulo. Ungi muntu akimbulaa myanda ya mu Bible amba’shi: “Kupeta kinemo na kwenda nkumo nyi kintu kibadi na muulo mu nshalelo abo.” Yesu badi auku’shi, bibadi abitungu balongi baye bakite mwabo moso bwa kukatusha kikudi kya kwipikena, kibadi kishimate ngofu mu bipikwa bya bena Yuda. w21.06 20 ¶2; 21 ¶6, 8; 22 ¶9

Mpoolo mutumibua, mmulekie kileshesho ki buwa kui bakulu. Bu kileshesho, nsaa ibaadi bakuabo ba mu Tesalonika na lukalo lua elango, Mpoolo ta baadi eetutuusha bua kuidituusha nya. Mpoolo baapeele bakuabo ba mu Tesalonika elango nsaa ibaabadi nadio lukalo. Dingi, baadi mutale bi nshalelo aabo, auuka na kalolo kooso’shi, nshalelo aabo, ta baadi mubofule nya. Na babaadi abakankamana mu kubinguabingua na mashimba anyingie. (1 Tes. 1:3; 2 Tes. 1:4) Baadi mpaa na mulungule baaba bakuabo’shi mbekadikie kileshesho bua bangi bena Kidishitu. (1 Tes. 1:8, 9) Babaadi na muloo ukata p’abo kupeta lutumbu lua Mpoolo lubaadi alutukila muishimba! Kushi mpaka, Mpoolo baadi mufule bakuabo ngofu. Ngi buakinyi, mu mikanda yaye yoso ibidi ibaadi mutumine bena Tesalonika, baadi mutuushe malango e buwa.—1 Tes. 4:1, 3-5, 11; 2 Tes. 3:11, 12. w22.02 15 ¶6

Satana kuete kufubisha bakata ba bipuilo bia madimi bua kulongiesha’shi Yehowa ntomboshi, na’shi naye nsulo ya makienga a bantu. Bangi abamba’shi, nsaa ayifu muana, Efile Mukulu nyi bamuata muanda e na lukalo lua bangi ba mikeyilu muiyilu. Kuno nyi nkukutua kua kanemo bu’Efile Mukulu! Anka atuuku kalolo’shi Yehowa nyi Nshe-bana sha kifulo. T’atutopekanga Efile Mukulu nsaa y’atudi na mukumbo wi bukopo sunga nsaa y’atufuisha muntu atudi bafule. Kadi, tui na lukumino’shi dingi efuku, akapasha ba sha mikumbo na kusangula bantu bafue. Na atulungula muntu oso etutemesha’shi Yehowa nyi Efile Mukulu sha kifulo. Bino abikuasha Yehowa bua kualula uno kuete kumolomona. (Nki. 27:11) Yehowa nyi Efile Mukulu sha lusa. Enyongolaa nsaa y’etumono atukiengie, pangi muanda wa kubinguabingua, maladi sunga kukutua kuetu kua kupuidika. (Mis. 22:23, 24) Yehowa auku nkalakashi yetu, akumina kuiyimika, na eyimika.—Puandjikisha na Efilu 3:7, 8; Yeeshaya 63:9. w21.07 9-10 ¶9-10

Bantu basha kukokiela abakapete kinemo kikile bukata kia kufula na kulanguila Yehowa bua loso! Yesu akalumbula mianda yoso ibadi ifuishe Adama na Eva nsaa ibabadi baate kitshibilo kia kukatuka mu kifuko ki’Efile Mukulu. Yehowa akasangula midiyo ya bantu na kuibapa mushindo wa kuikala na muwa wa loso na bindi i buwa pa nsenga aikalulua mpaladiso. (Luk. 23:42, 43) Nsaa aikekala bantu abafubila Yehowa bapuidikie, boso buabo abakapete “ntumbo na kinemo” nka bibadi bifunde Davide. Su we mu “kibumbu kikata,” we na lukulupilo lui buwa biabia. (Kibaf. 7:9) Efile Mukulu mukufule na akumina’shi wekale mu kifuko kiaye. Biabia, kita mobe moso bua kumusankisha. Efuku dioso, ikala otentekiesha milailo y’Efile Mukulu mu binangu na kuiyilama muishimba diobe. Ata na muulo kinemo kiobe kia kulanguila Nshetu e muiyilu, na osankile lukulupilo lua kumutumbisha bua loso! w21.08 7 ¶18-19

Yelemiya badi mulungule mukandu wi buwa munda a bipua bikile pa makumi ananka, anka bantu nta mbamutemeshe. Na dingi babadi abamubingabinga “pa mwanda wa kukayibwa na kunsengibwa” badi mutshobolokie bua beshikuanyi naye na badi mukiebe kuleka mudimo wa bu mutemuki. (Yel. 20:8, 9) Anka Yelemiya ntamukokie nya! Kinyi kibadi kimupe ngobesha ya kukambila bino binangu bi bubi na kupetuula muloo dingi mu mudimo waye wa bulungudi? Badi muimene ku mianda ibidi i na muulo. Wa kumpala, mukandu wa Efile Mukulu ubadi Yelemiya alungula bantu ubadi ulombene kuibapa “lukulupilo bua mafuku aafiki.” (Yel. 29:11, EEM) Wa kabidi, Yehowa badi musangule Yelemiya buadia kumuakuila na kulungula bantu mukandu waye. (Yel. 15:16) Natue namu, tukuete kutuadila bantu mukandu wa lukulupilo na tui batuale eshina dia Yehowa bu ba Temue baye. Patutulu binangu bietu ku ino mianda atupete muloo pabitale abialuula bantu ku mukandu wi buwa. Tobofolanga sunga kutshoboloka su abiata mafuku e bungi bua mulongi oobe a Bible kutama mu kikudi bu bi’otengielanga. Bua kuikasha bantu bu balongi akutungu kuikala na luishinko.—Shak. 5:7, 8. w21.10 27 ¶12-13

Sunga tuekala bapue kufubila Yehowa munda mua bipua bi bungi, abitungu tutungunukie na kunyingisha na kulama lukumino luetu muadi. Buakinyi? Muanda su ta tui banyingie, lukumino luetu alubofula. Anka bu bitatupuile kuibimona, lukumino nduimene pa bintu bishabimueka. Kintu kiatusha tumono, tui kuikiluankana bukidi. Nyi buakinyi, Mpoolo bakuile bwa kukutua kua lukumino’shi, “mmiluisho ayiuku kuituanyina.” Tui kulama na kunyingisha lukumino naminyi? (2 Tes. 1:3) Kia kumpala, ikala otekie Yehowa kikudi kiaye, na ebikite efuku dioso. Buakinyi? Muanda lukumino nyi nkipindi kia kikuba kia kikudi ki selele. (Nga. 5:22, 23) Ta tui balombene kulama na kunyingisha lukumino luetu mui Mupangi, kushi bukuashi bua kikudi ki selele nya. Su tuatungunuka na kuteka Yehowa kikudi kiaye, etupa kianka. (Luk. 11:13) Abintungu, tutekie’shi: “Etukumbeeshe namu lukumiino.” (Luk. 17:5) Kia kabidi, ikala welongiela Eyi di’Efile Mukulu efuku dioso.—Mis. 1:2, 3. w21.08 18-19 ¶16-18

Bantu banunu be na bi bungi bia kukita, mu ndumbuluilo a Yehowa. Sunga mbiabashi’nyi na bukome bua kukita bu bibaabadi abakitshi kala, anka be na bupeta bua mianda i bungi yabadi bamone mund’a bipua bi bungi. Yehowa mmulombene kutungunuka na kuibafubisha mu mishindo i bungi. Bu kileshesho, Bible akula pabitale bantu be na lulamato babaadi bafubile Yehowa mpa na ku bununu buabo. Bu kileshesho, Moyise baadi na bipua 80 pa babangile kufubila Yehowa bu mutemuki na bu muntu alesha mpala yaye kui muilo wa Isaleele. Yehowa batungunukile na kufubisha Ndanyele bu mutemuki, pa baadi mpa na bipua bikile pa 90. Na Yowano mutumibua, baadi namu’nyi na bipua bikile pa 90 pa baadi muyokielue, bua kufunda mukanda wa Kibafumbuilue. Simeone muntu baadi “mululame na mushimate mwi Efile Mukulu” ta mbakambe kumuakula mu Bible nya, anka Yehowa baadi amuuku bibaadi na bamupeele kinemo kia kumona Yesu ku bukinga na kutemuka pabitale muana na nyinaye.—Luk. 2:22, 25-35. w21.09 3-4 ¶5-7

Abitungu baledi badimukile kupuandikisha muana na ungi, sunga kuteka muana buadia kukita kintu kia’shi mulombene kukita. Su baledi bakita bino, be kubofusha bana b’abo. (Ef. 6:4) Mukuetu mukashi Sachiko amba’shi: “Mama badi akumina’shi mu mateta, mpete mpue 100 pa 100, nkintu kinamuene’shi ta kikukitshika. Ta kudi bipua bi bungi kasha napua kalasa, Anka, nkianeyipusha su Yehowa badi asankila sunga binadi mukite muande moso.” Mfumu Davide badi muakule’shi, tabadi “akimbi bintu bikata,” sunga bintu bimutabukile. Pa muanda badi muiyishe, badi asanka na kiadia kukita na badi na butale. (Mis. 131:2) Baledi bekulongiela kinyi ku mayi a Davide? Abitungu baledi bekale beyishe na abauku mikalo yabo kushi penda mu biabakumina’shi abo bakite nya, kadi mpa na mu bi’abakumina’shi bana b’abo bakite. Baledi mbalombene kukuasha bana b’abo pa kuibalesha’shi, be na bukome bua kukita kintu kampanda na ta be na bua kukita kintu kakengie, nsaa y’abebakuasha bua kuata bipatshila biabadia kukumbasha. w21.07 21-22 ¶5-6

Yehowa mmupe oso a kuatudi kia buntu kia kuisanguila. Bino abipushisha’shi tui kusangula kumukookiela sunga kupela kumukookiela. Bangi bana ta be na baledi bekale bileshesho bi buwa kuabadi nya, kadi mbaate kitshibilo, kia kufubila Yehowa na kushala na lulamato kuadi. Kui bangi bana basangule baledi be buwa abebakuasha muyile mayi a kulonda a mu Bible aebakuasha bua kukula mu bia binyibinyi mpa na p’abakanunupa. Kunyima kua kutaluula, abitungu tuate kitshibilo atue banabene kia kukumina kufubila Yehowa. (Yos. 24:15) Biabia, ba nambutuile benyongole, lekayi kunangushena’shi su uno muanda ubakitshika nkilubilo kienu! Ingi nsaa muledi, e kuleka kufubila Yehowa sunga kukatuka mu kifuko kiaye. (Mis. 27:10) Bino bi kufuisha lukalakashi kui bana abamonaa ba nambutuile bu bileshesho. Bansongua, su umune a ku baledi benu atushibua mu kakongye, mashimba etu aenyongolaa pamune nenu! Shinkamishayi’shi na Yehowa’nyi enyongolaa pamune nenu. Na mmuinufule, e na muloo pa muanda wenu bu bianukuete kutungunuka na kumufubila na lulamato. Tentekieshayi dingi’shi nta n’anue baatshile baledi benu kitshibilo. w21.09 27 ¶5-7

Mwina Kidishitu ababatusha mu kakongie e bu mukooko wi na maladi, na maladi ngalombene kuabukila ingi mikooko. Ena maladi a mu kikudi. (Shak. 5:14) Maladi a mu kikudi e nka bu angi maladi a ku mbidi alombene kuambukila bangi. Biabia mu ingi mianda bi na muulo kukatusha muntu e na maladi a mu kikudi munkatshi mua kakongie. Dino dinyooka adilesha kifulo kia Yehowa bua bantu boso be na lulamato be mu kifuko kiaye, na mbilombene kukuma eshimba dia nkitshishi a bubi afika mu kuilanga. Sunga muntu atushibua mu kakongie, aye nabene mulombene kuikala na mushindo wa kutuela dingi mu bisangilo, na kuakua mulombene kupeta malango aatukila mu Bible, na kunyingisha dingi lukumino luaye. Ebulungantu bua kupeta dingi mikanda ya kuibadikila na kubandila ma video mu televizio a JW. Nsaa ayimutala bakulu mushindo wende kumpala mbalombene kumupa malango nsaa na nsaa e bia ku mukuasha bua’shi anyingishe dingi lukumino luaye, na bino abimukuasha buadia kualushibua dimo mu kakongie. w21.10 10 ¶9, 11

Leno uno, tukuete kulonda kileshesho kia lulanguilo lua kakongie ka bena Kidishitu ba mu siekele a kumpala. Bu kileshesho, ndumbuluilo etu mutuule mianda mu mulongo—atuula bakunkushi ba bifunda, bakulu, bafubi ba midimo—anka bu bibakitshine batumibua ba mu siekele a kumpala. (Fid. 1:1; Tt. 1:5) Mueneno etu pabitale lusandi na eyibakishi, biatunemeka mase bu kintu kia kishila, na lukalo luetu lua kukaluila kakongie kui bankitshishi a bubi bashabelanga, bino bioso abilesha’shi atuambula kileshesho kia bena Kidishitu ba mu siekele a kumpala. (Bik. 15:28, 29; 1 Kod. 5:11-13; 6:9, 10; Eb. 13:4) Bible etupatuluila kalolo’shi, kui “lukumîno lumune” luabadi bakumine kui Efile Mukulu. (Ef. 4:4-6, EEM) Tui na kinemo kia kuikala muilo umune wa Yehowa auku bia binyibinyi pabitale Yehowa na bi mpango yaye! Biabia abitungu tutungunukie na kukita kioso akitungu bua kukuatshidila ku kishinkamisho kikata. w21.10 22-23 ¶15-17

Kunyima Yehoshafate bapetele lukalakashi lukata. Kisaka kikata kia basalayi ba bena Amone, bena Moabe, na bana balume babaadi bashale mu miengie ya Seir, babamutuukile ngoshi, aye na kifuko kiaye na muilo waye. (2 Mya. 20:1, 2) Mfumu Yehoshafate bakitshine kinyi? Batekiele bukuashi na bukome kui Yehowa. Luteko lua kuiyisha lua Yehoshafate luatusangana mu 2 Myanda 20:5-12, alulesha mushindo ubaadi mukulupile mui Nshaye a kifulo e muiyilu. Yehowa bakuile na Yehoshafate kukiila kui muina Leevi abetanyina bu Yehaziele. Akula mayi atupete mu kifundue kietu kia lelo, bu bibaadi Yehoshafate mutuule lukulupilo luaye loso mui Efile Mukulu aye, bakitshine nka kioso kibamulunguile Efile Mukulu. Nsaa ibabayile na muilo waye mu kulua ngoshi na beshikuanyi, babaadi mutuule ku mbalo ya ngoshi, nta baaba basalayi be bukome bua ngoshi nya, kadi baadi mutuule penda batuyimba bashi na ma mputu. Yehowa tabaadi mulekiele Yehoshafate bua’shi apone mu maasa a beshikuanyi nya, kadi Batshokuele beshikuanyi ba Yehoshafate.—2 Mya. 20:18-23. w21.11 15-16 ¶6-7

Nka bu bibatukatuka mu kulonga, nsaa yatufumankana na bitompuanga, tuibalombene kushinkamisha’shi Yehowa aketukuasha buatudia kushala na lulamato muadi. (2 Kod. 4:7-9) Tui balombene kushikamisha’shi Yehowa atungunuka na kuitulesha kifulo kiaye ki na lulamato muanda Bible etulungula’shi, ‘Meso a Yehowa e pe baaba abamunemeka, baaba bakulupile ku kifulo kiaye ki na lulamato.’ (Mis. 33:18-22) Kumpala kuakufubila Yehowa, tubadi bapete kifulo kiaye kialesha bantu boso ku bungi. Anka bubitatudi bu balanguidi baye tuibapete dingi kifulo kiaye ki na lulamato. Bu biadi na kino kifulo, Yehowa etukakila pakiadi kiaye na maboko aye bua kuitukaluila. Akatungunuka na kuitukaka kuadi, akalombasha mpango yaye kuatudi. Akumiina’shi tuikale bakuuku baye bua loso! (Mis. 46:1, 2, 7) Ngi buakinyi sunga tuafumankana na kitompuanga ki naminyi Yehowa etupa bukome buatudi nabo lukalo bua kutungunuka na kulama lulamato luetu. w21.11 7 ¶17-18

Bebungi ba kuatudi abauku mianda ayifikisha muntu mu kulamina muina mudimo naye, muina kalasa naye, muina kifuko naye sunga bangi bantu ba mu kifuko ngoo—munda mua bipua bi bungi! Tutentekieshe’shi Yosefe babadi bamulamine ngoo kui bakuabo ekumi, ku nfudilo kua bioso yaya ngoo ibadi ibatakule bua kikita mianda ibubi. (Kib. 37:2-8, 25-28) Mu kuilekena na bano bakuabo, Yosefe tabadi muibakitshine muanda wi bubi nya! Nsaa ibapetele matalua abadi mulombene kui obuela, bebalesheshe lusa. Yosefe ta muibalamine ngoo nya. Pa mutue pa biabia badi mukite bipushene n’elango dibabadi bafunde kunyima kua mafuku mu Bena-Levi 19:18. (Kib. 50:19-21) Bena Kidishitu abakumina kusankisha Efile Mukulu abitungu bambule Yosefe p’abo kufuila bakuabo lusa pamutue wa kui obuela ngoo kuabadi. Yesu muitunyingishe buatudia kufuila bantu abetuluishisha lusa. (Mat. 6:9, 12) Mu mushindo umune, Mpoolo mutumibua badi mulangie bena Kidishitu naye’shi: “Tanwiobwelanga anwe baanabeene anwe bande ba kifulo kikata.”—Lom. 12:19. w21.12 11 ¶13-14

Kiolua muifuku dia 14, mueshi wa Nisane, mu kipua kia 33 B.B., Yesu bayile kuifuba dia Getesemane. Pabafikile kuakua, baadi mufunguile Yehowa eshimba diaye dioso. (Luk. 22:39-44) Mu ino nkalakashi yoso, Yesu ‘belele nteko na kwiyaaya . . . pa kwela musaase na mpolo ku meeso.’ (Eb. 5:7) Yesu baadi mutekie kinyi mu bufuku bua nfudiilo kumpala kua lufu luaye? Batekiele bukome buadia kulama lulamato luaye mui Yehowa na kukita kikiebe ki’eshimba Diaye. Yehowa baadi mupushe kenyongoshi mu luteko lua Muan’aaye na aye nkutuma muikeyilu bua’shi amunyingishe. Yesu baadi muiukie bushito bubaadi naabo bua kukaluila nkumo y’eshina dia Nshaaye. Yehowa baadi mutemeshe luteko lua Yesu lua kuiyaaya. Buakinyi? Muanda Yesu baadi muipaane bua kushaala na lulamato kui Nshaaye na buadia kukaluila nkumo y’eshina Diaye. Su kepatshila ketu kekala ka kukita bi mumune, Yehowa, akaluula nteko yetu, nsaa yetukuasha.—Mis. 145:18. w22.01 18 ¶15-17

Be bungi bakwete kukokola mwanda tatukwete kutwelakana mu myanda ya politike. Abakulupila’shi tukelele bantu tukanda. Anka su twasangula muntu bwa’shi etukunkushe, tubasumbushena Yehowa. (1 Sam. 8:4-7) Bangi be kupwandikisha’shi, abitungu twibakye tulasa na mpitalo bu bikwete abibikitshi bingi bisaka. Bakwete kukokola mwanda atukitshi mwetu moso bwa kulungula mukandu wibuwa kushi mu kukimba kupudisha myanda ya mu uno ndumbulwilo. Twi kukita kinyi bwa kupela kukokola? (Mat. 7:21-23) Abitungu tutule binangu byetu ku mudimo witutumine Yesu eyi bwa kukita. Tatukumanga kutula binangu byetu mu kutompa kupudisha myanda ya mu uno ndumbulwilo. Twi bafule bantu na atupasukila myanda yabo, anka atuku’shi mushindo ukile buwa wa kwibakwasha, nyi nkwibalongyesha pabitale Bufumu bw’Efile Mukulu, na kwibakwasha bwabadya kwikala mu kipwano ki buwa na Yehowa. w21.05 7 ¶19-20

Sunga bakunkushi be bungi ba miilo lelo uno abaakula’shi bakuete kufubila Efile, bakuete kupela bukome buaye. Nka bu bibaadi bakunkushi ba mu mafuku a Yesu, bakunkushi ba lelo uno bakuete kutombokiela bedibue muimu ba Yehowa baasha lulamato, pa kuibolomonanga na kuibakiengieshanga. (Bik. 4:25-28) Yehowa mmukite kinyi? Misambo 2:10-12 aamba’shi: ‘Binobino, anwe bamfumu, sopekaayi! Elangyeeyi, anwe bansushi ba pa nsenga! Fubilaayi Yehowa, numutshiine. Mulangwileeyi na kisuuso. Tumbishaayi mwan’aye bisumanga su baafiitshi munda anushimina; kantu n’aka, nsungu yaaye ibaatembe buu kaalo! Baasha muloo, mbano abefubwila kwadi.’ Bu bi Yehowa na kalolo, mmulekiele beshikuanyi baye nsaa yabadia kuata bitshibilo bi buwa. Be kushintuluka na kuata kitshibilo kia kukumina Bufumu bua Yehowa. Anka, ta be na kipindi kikata. (Yesh. 61:2) Bi buwa tuukishe bantu mukandu wibuwa lubilolubilo bua’shi baate bitshibilo bi buwa. w21.09 15-16 ¶8-9

Mpoolo bakuile nka penda’shi tui balombene kusanka na bintu bia ku mbidi biatudi nabio. (Fid. 4:12) Kintu ki na muulo ukata nkipuano kietu n’Efile Mukulu, ta bintu bia ku mbidi biatudi nabio nya. (Ab. 3:17, 18) Tubandeyi kutala kibaadi Moyise mulungule bena Isaleele kunyima kua kukisha bipua 40 mu kabaaka, bambile’shi: “Talai, Yehowa Efil’enu mmwinuelele mwabi mu mifubo yenu yoso. bipwa makumi ananka bibapu’bi ekalanga’nka nenu, tanwi bakutwe kintu sunga nkimune.” (Miy. 2:7, EEM) Mu bino bipua bioso 40 Yehowa baadi mupasukile bena Isaleele na maana a kudia. Bilamba biabo bioso bibabaadi bakatukie nabio mu Ejipitu—ntankuluile kilamba su nkimune nya. (Miy. 8:3, 4) Yehowa ekala na muloo nka su nubalongo bia kusanka na bianudi nabio, su nuina lutumbu bua bia kudia biadi muinupe, sunga biamueneka bu bipeelepeele, ebimoneyi bu muabi na numutumbule bua bianka. w22.01 5 ¶10-11

Balume nui na mashito akupasukila bifuko bienu, biabia nukuete kutumika ngofu bua kuibikaluila na kuibikuatshisheena. Biabia nsaa yanupete nkalakashi nui balombene kupusha’shi nui na mushindo wa kupudisha ino mianda anue banabene, biabia katushayi binangu bia kukulupila mu bukome buenu anue banabene. Mu kuilekeena na biabia, teka Yehowa bukuashi nsaa yodi bupenka. Kukatusha biabia teka pamune na mukashi oobe. Tekayi buludiki abufiki kui Yehowa pa kuilongiela Bible, mikanda yabatuusha kui ndumbuluilo a Efile Mukulu na kutumikila malongo oso anuimupete. Bangi be kukutua kusangeela bitshibilo bianuata bimeene mu Bible. Mbalombene kuakula’shi kukimba makuta ebungi na kuula bintu bibungi bia ku mbidi nkulombene kukaluila kifuko kienu. Anka tentekieshayi kileshesho kia Mfumu Yehoshafate. (2 Miy. 20:1-30) Baadi mukulupile mui Yehowa na baadi muleshe bino ku bikitshino biaye. Yehowa ta musumbushene uno muntu sha lulamato nya, nanue namu ta kenusumbushena nya.—Mis. 37:28; Eb. 13:5. w21.11 15 ¶6; 16 ¶8

Efile Mukulu mmuitupangie kuifuanyiko diaye, ngi buakinyi atukumiinaa kumona abakitshiina bantu bi buwa. (Kib. 1:26) Biabia, pa muanda tui bakutue kupuidika, tui balombene kutopeka mianda kua bisumanga, sunga nsaa y’atupuandikisha’shi tui na bishinkamiisho bioso. Bu kileshesho, banda kutentekiesha, mushindo ubaadi Yoona mupushe bubi bua kitshibilo kia Yehowa kia kufuila muilo wa Ninive lusa. (Yon. 3:10–4:1) Kadi, banda kutala bipeta bibatukile. Miuwa ya bantu bakile pa 120 000, ya bena Ninive babaadi belangie ku mashimba, ibaadi ipashibue! Aku namu p’atutala kalolo, mueneno a Yoona ngi baadi atungu kulumbuulua—kushi a Yehowa. Yehowa te na kitungo kia kupatuluila bantu bitshibilo biaye nya. Eyendo’shi, Yehowa baadi mutadiile bafubi baye ba kala, buabadia kuakula bi’abapusha, pabitale bitshibilo bibaadi muate sunga bibaadi akiebe kuata. (Kib. 18:25; Yon. 4:2, 3) Ingi nsaa, baadi mupatuule kitshibilo kiaye. (Yon. 4:10, 11) Biabia, Yehowa, te na lukalo na kukumiina kuetu nya, biabiikala kumpala sunga kunyima kua kukita muanda kampanda.—Yesh. 40:13, 14; 55:9. w22.02 3-4 ¶5-6

Atwikala bu ‘bakile bukinga’ nsaa y’atumono ‘bangi bu betukile.’ (Fid. 2:3, EEM) Patwikala na uno mweneno, t’atukamba kukokosha bangi. Bakwetu balume sunga bakashi mbetukile mu mushindo kampanda sunga mu mushindo kasangue. Mbibofule kumona bino, nsaa yatutumu binangu byetu ku nyikashi yabo i buwa. Abitungu tutumikile elango dibadi Mpoolo mutumibwa mupe bena Kodinda: “Nnanyi atuulu kwilekeena munkatshi mwobe [na mungi]? Dingi nkinyi kiodi nakio, kioshimutambule? Na dingi su wemwikitambule, bwakinyi wesadika, bu’be shibekitambwile?” (1 Kod. 4:7, Kilombeeno kipya 2014) Abitungu tudimukile kukaka binangu bya bantu kwatudi sunga kwimona atwe banabene bu bakile bangi. Su mukwetu mulume e na ngobesha ya kwela miisambo i buwa, sunga mukwetu mukashi e na ngobesha ya kubanga kulonga Bible na bantu be bungi, abitungu balushe ntumbo kwi Yehowa. w21.06 22 ¶9-10

Abyelelaa ba Temwe ba Yehowa be bungi bukopo bwa kwisamba na bantu ku mashibo aabo. Bangi balungudi mbashale mu ma mbalo ebakwe mashibo alamibwe kalolo. Kwanka, nkulombene kwikala nsamo sh’atwesha muntu abashibetamine kwi bena nshibo. Bangi t’abapete bantu be bungi ku mashibo, sunga mu teritoire mushi bantu be bungi. Balungudi be kutambuka kipindji ki bula bwa nkatala muntu umune pangi abashabapete su nkupeta. Su twapeta lumune lwa ku ino nkalakashi, t’abitungu tubofule. Tompa kukimba bantu nsaa ilekene. Twi kwisamba na bantu be bungi su atulambukisha nsaa yatudi balombene kwibapeta ku mashibo aabo. Sunga byakita naminyi, abalukila’nka ku mashibo aabo. Bakwetu balume na bakashi be bungi mbamone’shi, bi buwa kulungula mukandu wibuwa kunyima kwa midi sunga ku kyolwa mwanda’shi abapetaa bantu be bungi ku mashibo aabo. Na dingi bena nshibo, abekalaa bapwe kwikisha na abakuminaa kwisamba na bantu yaya nsaa. w21.05 15 ¶5, 7

Okwete kumona uno mwanda lelo uno su? Oolo. Bantu be bungi abafitaa munda pa kumona’shi, ba Temwe ba Yehowa t’abakitshi nabo misangeelo ikutwene na Bifundwe bu; kusankila efuku dyabo dya kutandjikwa na Nowele. Bangi namu abafitaa munda mwanda ba Temwe ba Yehowa t’abakitaa nabo misangeelo y’eumbo sunga bipikwa bya maalo bishi bipushene n’Eyi dy’Efile Mukulu. Bano bakwete kukokola pa mwanda wa bino, bakwete kupwandikisha’shi Efile Mukulu akumina mushindo w’abamulangwila. Anka ta mbalombene kumusankisha su abakumina bipikwa bya pa nsenga pamutwe pa malongyesha atookane e mu Bible. (Mak. 7:8, 9) Twi kukita kinyi bwa kupela kukokola? Abitungu tunyingishe kifulo kyetu bwa miya ya Yehowa na bwa mayi a kulonda e mu Bible. (Mis. 119:97, 113, 163-165) Nsaa y’atufulu Yehowa, atulekye kukita bipikwa byoso bish’abimusankisha. T’atutadila kintu su nkimune bwa’shi kitukutshishwe kufula Yehowa. w21.05 6 ¶15-16

Twi kukita kinyi bwa kutumikila malango a Mpoolo mutumibwa? Abitungu tutungunukye na kulama lukumino lwetu lunyingye pa kwilongyela efuku dyoso, kuteka kushi kukoka, na pa kutungunuka na kukita mudimo wabadi betupe kwi Yehowa. (2 Tim. 4:4) Su twina lukumino, t’atukatshinyi nsaa y’atukapusha myanda ya madimi pabitale ba Temwe ba Yehowa. (Yesh. 28:16) Kifulo kyetu bwa Yehowa, bw’Eyi dyaye na bwa bakwetu, abitukwasha bwa kupela kukokola pa mwanda wa baba balekye kufubila Yehowa. Mu siekele a kumpala, be bungi abadi bakokole, na abo nkupela kutemesha Yesu. Anka bangi’nyi be bungi abadi bakumine kumutemesha. Munkatshi mwabo mubadi umune a ku bena Sanedrine mpa na “baa-tshite-mwakwidi be bungi.” (Bik. 6:7; Mat. 27:57-60; Mak. 15:43) Lelo uno, midiyo ya bantu ikwete ayilondo Yesu. Bwakinyi? Mwanda abauku na mbafule bya binyibinyi bi mu Bifundwe. Eyi dy’Efile Mukulu adyamba’shi: “Bafule Miiya yoobe bee mu butaale: bw’abo, takwi kikokoshi.”—Mis. 119:165. w21.05 13 ¶20-21

Mpoolo mutumibwa badi auku’shi byoso bibadi mukite mu mudimo wa Yehowa, badi mwibikite ku bukome bw’Efile Mukulu, kushi bwaye’ye nabene. Ku bukwashi bwa kikudi kyaye kiselele, Yehowa badi mupe Mpoolo bukome bwa kukumbasha kalolo mudimo waye—sunga bibabadi bamubingyebingye, bamwele mu lukano na ingi nkalakashi ibadi mupete. Timote mwina mufubo naye na Mpoolo, badi na kya kukulupila mu bukome bw’Efile Mukulu bwa kukumbasha mudimo waye. Badi mushindjikile Mpoolo mu ngyendo ila ya bu misionere. Na Mpoolo badi amutumu mu ingi ngyendo bwa kukunka na kunyingisha tukongye. (1 Kod. 4:17) Timote badi pangi epusha bu shi mulombane. Pangi mwanda wa bibadi Mpoolo mumulungule’shi: “Muntu su ngumune takupeeshanga bwa bukinga bwobe.” (1 Tim. 4:12) Na mu aa mafuku, Timote badi na waye mulobo umutungye mu mbidi—“kukumba’nka kapindji kapindji.” (1 Tim. 5:23) Anka, Timote badi auku’shi kikudi kya Yehowa nkilombene kumupa bukome bwadi nabo lukalo bwa kulungula mukandu wibuwa na kufubila bakwabo.—2 Tim. 1:7. w21.05 21 ¶6-7

Eyendo’shi, eyi dia kulonda di mu Shake 1:19, nditale booso abatuusha elango. Shake baafundile’shi: “Muntu ooso eekale na kupusha kwa bukidi, anka eekale mwiyeeshe mu kwakula, na mu kufiita munda.” Mukulu mmulombene kupuandikisha’shi, auuku mianda yoso ya nshalelo a muntu kadi, eyendo ngi biabidi? Mukanda wa Nkindji 18:13 awitutentekiesha’shi: “Aaluula kumpala kwa kuteemesha mmupatakane, naa abamukwatshisha buufu!” Bi buwa tukayipushe muntu nabene, bua’shi alonde bi muanda waye. Biabia, abitungu’shi mukulu ateemeshe kumpala kua kuakula. We kumuipusha bino: “A we naminyi ano mafuku?” “Tui nkukuasha naminyi?” Su mukulu aata nsaa ya kuuka mianda ayifumankana nayo muntu, mbilombene kumupa mushindo wadia kukuasha na kunyingisha, bakuabo balume na bakashi. Kutuusha ku’elango di buwa, ta nkutale kubadika kua ndambo ya Bifundue, sunga kumulesha muanda umune sunga ibidi ayitungu’shi akite nya. Abitungu bakuetu balume na bakashi bapushe’shi, tukuete kuibapasukila, tui bebafule na atukumiina kuibakuasha. w22.02 17 ¶14-15