Mueshi wa 6

Mukashi mufwishe mulume badi na nshalelo e bukopo, pangi ta badi na makuta akumbane, bwa kuula byakudya bibadi nabyo lukalo. Anka, bayile mbufyefye, akela tukuta twaye twa byamo mu kashete, pangi tu’shibadi twele tulelo twi bukopo mu kashete. Yesu bamwene bibadi mwele​—tukuta tubidi twa byamo twabetamina bu lepta, tubabadi abafubisha mu aa mafuku. T’aabadi makuta sunga alombane a kuula ka kimusodya kamune bwa kudya. Yesu badi mukanye ngofu bwa uno mukashi kilele. Nka paapa, aye nkwitamina balongi baye, nkufunka mukashi kilele, na aye nkwaba’shi: ‘Uno mukashi mulanda mufwishe mulume beele bikile bya booso.’ Akupu bakwile’shi: “Baba bangi boso [bikishekishe ba mpeta] abálambula mmono isubukye pa nkalo yâbo, ank’ê mu bulanda bwê, balambula koso k’aikalanga n’ako, koso kapwandjile kumukwasha mu mûwa wê.” (Mak. 12:43, 44) Nsaa ibadi uno mukashi kilele sha lulamato mwele koso kabadi nako dyadya efuku, badi mukulupile’shi Yehowa amupasukila.​—Mis. 26:3. w21.04 6 ¶17-18

Yesu badi mulame mweneno e buwa mu mudimo wa bulungudi, na akumina’shi balongi baye bamwambule. (Yo. 4:35, 36) Pabadi Yesu na balongi baye, balongi baye abadi na kisumi mu mudimo wa bulungudi. (Luk. 10:1, 5-11, 17) Anka, kunyima kwabo kukwata na kwipa Yesu, balongi baye abadi bashimishe kisumi kyabo bwa kapindji kapela mu mudimo wa bulungudi. (Yo. 16:32) Kunyima kwaye kusanguka, Yesu badi mwibanyingishe bwa kutula binangu ku mudimo wa bulungudi. Na kunyima kwaye kukamina mwiyilu, abadi balungule mukandu wibuwa na kisumi ki bungi mu mushindo ubadi mpa na beshikwanyi babo bambe mayi a kifundue kietu ki’efuku dia lelo. Yesu badi akunkusha mudimo wa bena Kidishitu ba mu siekele a kumpala, na Yehowa badi ebelela mwabi mwanda bantu be bungi abadi abakumina mukandu wabo. Bu kileshesho, mu Pentekote a kipwa kya 33 B.B., bantu pepi 3 000 abadi babatshishibwe. (Bik. 2:41) Na bungi bwa balongi bubadi abufwimi nka kufwima. (Bik. 6:7) Binyibinyi, Yesu badi mupwe kutemuka’shi, bantu be bungi abakakumina mukandu wibuwa mu mafuku a ku nfudilo.​—Yo. 14:12; Bik. 1:8. w21.05 14 ¶1-2

Otentekyesha nsaa ibodi bwa musango wa kumpala mumone’shi bopete bya binyibinyi? Bodi mupwandjikishe’shi, bantu boso abakumina kulonga myanda yodi mukumine. Bodi mushinkamishe’shi mukandu wi mu Bible, awibapa nshalelo a muloo kubanga binobino, na kwibapa lukulupilo lwi buwa bwa mafuku aafiki. (Mis. 119:105) Nyi bwakinyi, bodi na muloo wa kulungula ba kuuku bobe na bena kifuko nobe myanda yodi mulongye. Kadi nkinyi kibadi kikitshikye? Mwanda ubadi ukukanyishe, nkumona’shi be bungi babadi abapele bibodi w’ebalungula. T’abitukanyisha pa kumona’shi be bungi, abapele mukandu w’atwibalungula. Mu mafuku a Yesu, be bungi abadi abapele mukandu waye, sunga bibadi mukite bilengyeleshi, abilesha’shi badi na bukwashi bw’Efile Mukulu. Bu kileshesho, Yesu badi musangule Lazare​—kilengyeleshi kishibadya kupela beshikwanyi baye. Na dingi, bakata ba bena Yuda t’abadi bamukumine bu Mesiya. Anka, abadi abakimbi mpa na kwipaa Yesu na Lazare!​—Yo. 11:47, 48, 53; 12:9-11. w21.05 2 ¶1-2

Ekitshishe bwa kutwela mu bisangilo misango yoso. Programe a bisangilo a kunyingisha, na dingi akukwasha bwa kwiukena na bakwetu balume na bakashi kalolo. Kimba ba kuuku mu kakongye balombene nkukwasha, byabekala bakukudile, bena bobe, na sunga bekela na bipikwa bilekene na byobe. Bible etutentekyesha’shi bantu “bakulu nyi bena binangu.” (Yob. 12:12, EEM) Na bantu bakulu namu, bekulongyela bi bungi kwi ba nsongwa ba sha lulamato. Davide badi mukinga ngofu pe Yonatane, anka bino ta mbibakutshishwe kwikala ba kuuku. (1 Sam. 18:1) Davide na Yonatane abadi abekwashena bwa kufubila Yehowa sunga bibabadi na nkalakashi. (1 Sam. 23:16-18) Irina mukwetu mukashi e bupenka Temwe a Yehowa mu kifuko kyabo amba’shi: “Bakwetu bena Kidishitu mbalombene kufika baledi betu ba mu kikudi sunga bu bakwetu ba mu kifuko. Yehowa mulombene kwibafubisha bwa kukumbasha nkalo yetu.” Ba kuuku b’obe abakumina nkunyingisha na nkukwasha, anka abitungu w’ebalungule bwa’shi baukye kyabadya kukita. w21.06 10-11 ¶9-11

Yesu badi mutushe kileshesho kya mfumu na mufubi aye. Mfumu badi mulekyele mufubi aye elenyi dikata dyashibadi bya kufuta. Kunyima, uno mufubi bapelele kutadila elenyi dipela dibadi nadyo mufubi naye. Ku nfudilo, mfumu badi mweleshe uno mufubi bakutshilwe lusa mu lukano. Bikitshino bya uno mufubi ta bibadi bimukengyeshe penda ye nya, bibadi bikyengyeshe na bangi. Kya kumpala, badi mukyengyeshe mufubi naye ‘paye kwenda mu ku mwelesha mu lukano, mpaa na pabaady’a kufuta kyaakya kishiyo.’ Kya kabidi, badi mukyengyeshe bangi bafubi abadi bamone byabya byadi mukite. “Pabaabamwene kibaakitshikile, beenaaye babeenyongwele bikata.” (Mat. 18:30, 31) Mu mushindo umune, bikitshino byetu abikyengyesha bangi. Su muntu etululwishisha kadi twapela kumufwila lusa, kinyi kilombene kukitshika? Kya kumpala, tubamukyengyesha mwanda tubapele ku mufwila lusa, na tubapele kumulesha kifulo. Kya kabidi, atukyengyesha bangi mu kakongye nsaa y’abamono’shi, ta twi mu butale na yawa muntu. w21.06 22 ¶11-12

Bantu mbapangibue bua kuambula Efile Mukulu, Satana akumina’shi bakite mianda i butete. Nsaa ibadi Efile Mukulu ‘mumone’shi bubi bua bantu bubaady’abwend’abufiimanga,’ mu mafuku a Nowa, “Yehowa nkwikalashena bwa pabadi mupangye muntu pa nsenga. Pa wawa mwanda, aye nkwinyongola.” (Kib. 6:5, 6, 11) Mianda ngilumbulukie kubanga paapa su? Nya! Diabulu e na muloo p’amono bantu abakitshi mianda i butete mu mishindo yoso, bu kutambuka lusandi kua bantu bashi beyibakishene na kua balume na balume sunga bakashi na bakashi! (Ef. 4:18, 19) Satana e na muloo wi bungi, nsaa i balanguidi ba Yehowa abakitshi muluisho ukata. Satana takuete kumunana, kushi penda muntu ‘kutonta muinaye bua kumumuesha malwa’ nya, anka kuete dingi kuluisha nsenga na kukiengiesha nyema imupe Yehowa bua kuiyipasukila. (Mul. 8:9, EEM; Kib. 1:28) Bipeta kinyi bitukie? Bangi bena sianse abalesha’shi, bintu abikitshi bantu mbilombene kushimisha mudiyo umune wa nyema ilekene na mitshi munda mua bipua bipela kumpala. w21.07 12 ¶13-14

Bangi bafubi b’Efile Mukulu, bakiabanyisha nka kuinyongola bua bilubilo biabo bibabadi bakite mu mafuku akile. Tondo tuabo tua mashimba atuibatopeka atuibalungula’shi Yehowa ta mulombene kui bafuila lusa​—sunga belanga mu mushindo kinyi. Su nukuete kuinyingola mu uno mushindo, kulongiela ku kikiebe ki’eshimba di’Efile Mukulu na ku kifulo kiaye ki na lulamato bua bafubi baye kulombene kuinukuasha bua kufubila Yehowa na muloo na kondo keshimba katooka. Bino bi kukitshika muanda “mase a Yesu Kidishitu Muana aye aetutoosha ku bubi booso.” (1 Yo. 1:7) Su nubatshoboloka muanda wa kukutua kupuidika, tetenkieshayi’shi Yehowa akumiina kuinufuila lusa su nuelanga kuishimba. Tutaleyi kuipushena kubadi kuleshe mufundi a misambo Davide kui pankatshi pa kifulo ki na lulamato na lusa. Bafundile bino’shi: “Bukata bwa kifulo kyee kwi baaba abamunemeka bwi nka bwetando di pankatshi pa eyilo na nsenga, bu bibula bwi pankatshi pa kutunduka nguba na kupoona nyi bibula bwa kwasumbula bikitshino byetu by’etombo.”​—Mis. 103:11, 12, Ñono na malango. w21.11 5-6 ¶12-13

Abitungu mulume muina Kidishitu anemekie mukashi aye. (1 Mp. 3:7) Kanemo akapushisha kupasukila na kunemeka bangi. Bu kileshesho, mulume, ata mukashi aye na muulo pa kumuneka. T’amutekie kia’shi mulombene kukita. Na t’amupuandiksha na bangi bakashi. Mukashi e kupusha naminyi su mulume amupuandikisha na bangi? Mukuetu mukashi Rosa, e na mulume shi Temwe akamba kumupuandikisha na bangi bakashi. Bishima biaye bi bukopo bibadi abitapa Rosa na bibadi abimutakula mukuiyipusha su kui muntu mumufule binyibinyi. Amba’shi: “Nadi na lukalo lua muntu a kunshinkamisha’shi ne na muulo ku meso kua Yehowa.” Anka, mulume muina Kidishitu anemekaa mukashi aye. Auku’shi, bikitshino biaye bi na bukitshishi ku kipuano kiaye na mukashi aye mpa na kipuano kiaye na Yehowa. Mulume ata mukashi aye na muulo amutumbisha, amushinkamisha’shi mumufule, na kuakula bi buwa buaye. w21.07 22 ¶7-8

Opushaa bi bubi nsaa y’otengiela ebofu di bintu biodi mukumine, kadi dish’adifiki nsaa yu’editengiela? Kadi, we kupusha naminyi su owuka tubingilo tui buwa tokumina kutengiela na luishinko? Kileshesho akilesha bia kuikala na luishinko, ki mu Nkindji 13:11, EEM. Amba’shi: “Bupeta bwa mu kapindji n’aka t’abwimanaa kwishêta. Bwa mu kapêla kapêla namu abufwimâ.” Nkinyi akitulongiesha uno verse? Muntu sha binangu akita mianda na kalolo, kapela kapela, na apetaa bipeta bi buwa. Nkindji 4:18 amba’shi, “eshinda dya balulame dii buu etaata dya pa nkyèelo, adyend’aditamanga mpaa na mu nkatsh’efuku.” Bino bishima abilesha mushindo ukuete Yehowa kufumbuila muilo waye mpango yaye kapela kapela. Uno verse etukuasha dingi bua kupusha mushindo ulombene muina Kidishitu kushintuluka na kuifubuila pepi na Yehowa. Muntu t’anyinga mu kikudi muifuku dimune nya, abiataa mafuku. w21.08 8 ¶1, 3-4

Tui na bi bungi bia kukita bu bikuete kuifubuila nfudilo a uno ndumbuluilo. (Mat. 24:14; Luk. 10:2; 1 Mp. 5:2) Atue boso atukuminaa kufubila Yehowa ngofu muyile ngobesha yetu. Be bungi bakuete kutamisha mudimo wabo. Bangi abakulupilaa bua kufuba bu ba mbala-mashinda. Bangi abakulupilaa bua kufuba ku Betele sunga ku luibako lua mashibo a Bufumu. Na bakuetu be bungi balombashe ngikashi itekibue bakuete kufuba bu bafubi ba midimo sunga bu bakulu. (1 Tim. 3:1, 8) Yehowa e na muloo wi bungi nsaa y’amono mushindo wi muilo waye aukumina kumufubila! (Mis. 110:3) We mutshobolokie muanda wa’shi tue mulombashe bingi bipatshila bia mu kikudi su? Su mbiabia, teka Yehowa. (Mis. 37:5-7) Kukatusha biabia, teka binangu kui bakuetu banyingye mu kikudi bakuleshe biodia kulumbula mushindo odia kufubila Efile Mukulu, na dingi ekitshishe bodia kutumikila elango diabo. Su bokitshi bino, opete mashito na kulombasha bipatshila biobe. w21.08 20 ¶1; 21 ¶4

Binobino tubandeyi kunangushena bua mukashi kilele Aana mutemuki, baadi na bipua 84, anka “tabakatukanga ku ntempelo.” Baadi “atuele mu bisangilo” na lulamato loso na baadi mupete efuto dikata dia kupeta muabi wa kumona Yesu ku bukinga. (Luk. 2:36-38) Mu ano etu mafuku, bantu banunu bebungi be na lulamato, mbekale bileshesho bi buwa bua bansongua. Anka, atukapete miabi i bungi p’atuata nsaa ya kuifubuila kuabadi, bua kuibateemesha bua’shi betulondele miloo yabo yabadi bapete mu ndumbuluilo a Yehowa. Bakuetu balume na bakashi babapu kununupa be na muulo mu ndumbuluilo a Yehowa. Mbamone mishindo i bungi ilekenelekene yele Yehowa miabi mu ndumbuluilo aaye, na kuibelela miabi muntu pa bupenka. Na dingi, mbalongiele ku bilubilo biabo. Ebamoneyi bu nsulo ya binangu na kuifubuila kuabadi bua kuuka mianda yabadi bamone. (Nki. 18:4) Su buata nsaa ya kuibawuka, lukumino lobe alunyingishibua. w21.09 3 ¶4; 4 ¶7-8; 5 ¶11, 13

Muilo wa Yehowa ngulombene kufubisha mayele abadi bafunde kui Yeeshaya bu “mabêle a mîlo.” (Yesh. 60:5, 16, EEM) Ku bukuashi bua bakuete kutuala ngobesha yabo, bakuetu balume na bakashi be na muulo bakuete kufika ba Temoin ba Yehowa, mudimo wa kulungula mukandu wibuwa ukuete kulungulua mu maumbo 240 na mu kungi kuakula, ukuete kulungulua mu ndimi ikile pa 1 000. Mu kino kipungo kia ku nfudiilo, kutshinkisha kua miilo kukuete kukitshisha bantu bua kuata kitshibilo. Abakakuatshishena Bufumu bu’Efile, su abakakulupila mu mbulamatadi ya muno mu nsenga? Kino nkitshibilo akitungu’shi muntu oso aate. Sunga muilo wa Yehowa awukookielaa miya ya mbulamatadi i mu nsenga muabadi bashale, mbelamuune ku mianda ya politike i mu ino nsenga. (Lom. 13:1-7) Abauku’shi nka penda Bufumu bu’Efile Mukulu ngi abukapudisha nkalakashi yoso ya bantu. Buabua Bufumu ta mbua pano pa nsenga’bo.​—Yo. 18:36, 37. w21.09 17-18 ¶13-14

Nsaa i muntu oodi mufule alekie kufubila Yehowa, bi buwa’shi otungunukie na kuinyingisha obe nabene, na kunyingisha bangi bena kifuko nobe. We kuibikita naminyi? Efubuile kui Yehowa pa kuikala na kiubishi kia kubadikanga Eyi di’Efile Mukulu, kunangushena ku dianka, na kutungunuka na kutuela mu bisangilo bia bena Kidishitu. Joanna, sha nshaye na mukuabo mukashi bakatukie mu bia binyibinyi amba’shi: “Nampushaa butaale muishimba nsaa yambadika eyikashi dioso dia muntu a mu Bible bu: Abigaile, Esteere, Yoobo, Yoosefe na Yesu. Bileshesho biabo abinkumaa kuishimba na kunkuasha bua kuikadika na mueneno e buwa.” Nsaa yodi na mianda ayikuinyongosha, tolekanga kumuteka Yehowa nya. Esendeele Efile mukulu etu sha kifulo, buadia nkukuasha wekale na mueneno e buwa bua uno muanda. Muanda amba’shi: “Naakakulambukisha, nkuleshe eshinda dya kulonda.” (Mis. 32:6-8) Mu binyibinyi, bi kuikala bukopo bua kupeta bishima biodia kulungula Yehowa biopusha. Anka Yehowa awuku kalolo bi’okuete okiengie muishimba. Akunyingisha bodia kumusumbuila mianda yobe yoso i kuishimba.​—Efi. 34:6; Mis. 62:7. w21.09 28 ¶9-10

Mu Pentekote kunyima kua 32 B.B., mutumibua Mpyele, Shake, na Yowano babadi bamone kimonua kia kukanya. Ku muengie wi bula, pangi ku muengie wa Hermone, Yesu belenguluile kumpala kuabo. “Mpala yaaye ibaabangile kumeekameeka bu nguba, bilamba byaaye nkutooka soo buu etaata.” (Mat. 17:1-4) Batumibua babapushishe eyi d’Efile Mukulu adiamba’shi: “Uno nyi Mwan’ande a kifulo kikata, nee na muloo pa mwanda we. Muteemesheeyi.” Bano batumibua basatu babadi baleshe’shi abatemesha Yesu kukiila ku muikielo wabo wa mu nshalelo a kwifuku n’efuku. Atukumina kuambula kileshesho kiabo. Tuina lutumbu lui bungi bu bi Yehowa etulesha kifulo kiaye pa kuitupa buludiki kukiila kui “mfumu a kakongye” Yesu Kidishitu! (Ef. 5:23) Tuikaleyi na kitshibilo kia “kumuteemesha,” bu bibatshile Mpyele mutumibua, Shake, na Yowano. Su tubakitshi bino, atupete miabi i bungi binobino na muloo wa loso mu mafuku aafiki. w21.12 22 ¶1; 27 ¶19

Ungi muina Kidishitu a mu Kodinda badi atambuka masandi na mukashi a nshaye. Mpoolo balunguile bena Kodinda bua kutusha waya muntu mu kakongie. Uno ntomboshi a masandi badi na bukitshishi bukata mu kakongie, bangi ba kuabadi tababadi abanangushena’shi uno muluisho taubadi ukata nya! (1 Kod. 5:1, 2, 13) Anka kunyima kua mafuku, Mpoolo badi mumone’shi uno muntu bashintuluka ngofu. Uno nkitshishi a bubi badi muilangie mu binyibinyi!! Mpoolo baluguile bakulu “Mufwileyi lusa na ku musamba.” Tala kabingilo ka Mpoolo “Nkupela tala enyongola bikishekishe.” Mpoolo bapushishe uno muntu belanga lusa. Mpoolo tabadi akiebe kumona uno muntu muiyongole bikishekishe, sunga mutshobolokie, pabitale biabia bibadi mukite, kadi biadi mupue kuleka ateka lusa. (2 Kod. 2:5-8, 11) Mu kuambula kua Yehowa, bakulu mbafule kufuidishena lusa. Abataa bitshibilo pa nsaa ayitungu, kadi abafuidishena lusa su kuikabingilo ka kuibikita. Mu mushindo umune nta ndusa nya, kadi nkulekiela. w21.10 11-12 ¶12-15

Kutapika mu binangu kui nka bu kutapika ku mbidi. Nkulombene kuikala kukata, sunga kupela. Bu kileshesho, ingi nsaa tui balombene kuitapa bipela ku munue nsaa yatukekie biteku. Diadia elonda adituele busungu kunyima kua efuku dimune sunga mafuku abidi, pangi tui kukutua kutentekiesha mpa na biatuikele batapikie. Mu mushindo umune, ingi mianda yabadi betuluishishe tayikala na muulo ukata nya. Bu kileshesho, kuuku etu mulombene kuakula sunga kukita kintu kampanda akitutapa kuishimba, anka tui balombene kuikala na mushindo wa kumufuila lusa musango umune. Kadi su elonda dietu ndikata munganga ekuiditela sunga kuidilamika bandage. Su atutungunuka na kukuma diadia elonda na maboko etu, tadiumu bukidi na dingi atunyinsha kuiditamisha nka tue banabene. Muanda wa malua, nyi biatukitaa su muntu muitutape kuishimba ngofu. Muntu mulombene kunangushena nka ku bishima biabadi bamuambe na biabimukiengiesha, na kunangushena nka mushindo aumukiengesha biabadi bamutape kuishimba kui ungi muntu. Ngi buakinyi baba boso abalamaa ngoo abekiengiesha kuishimba abo banabene. Biabia bi buwa kulonda elango diatupete mu kifundue kietu kia lelo. w21.12 12 ¶15

Puandikisha’shi ungi mukulu kuete akalakashua, pabitale mfuadilo a ungi muina Kidishitu. Yawa mukulu e kuiyipusha’shi: ‘Kui kabingilo mu Bible akantakula bua kuakula kintu kampanda su?’ Pa muanda yawa mukulu t’akiebe kutuusha aaye mmueneno, mmulombene kuteka binangu kui ungi mukulu, sunga kui ungi mulungudi munyingie mu kikudi. Booso buabo, abitungu bataluule elango dia Mpoolo pabitale mfuadilo, na kulumbuula kua mbidi. (1 Tim. 2:9, 10) Mpoolo baatushiishe elango dikata pabitale mfuadilo, alesha’shi, abitungu muntu anangushene kalolo pabitale bilamba bi’afuala, na akite bia’shi mfuadilo aaye, takumanga kusabulusha Yehowa. Anka, Mpoolo ta baadi muele miya pabitale kilombene muntu kufuala, na kiasha kufuala nya. Baadi auuku’shi, bakuabo balume na bakashi, mbalombene kusangula kioso ki’abakumiina kufuala, pakidi’shi t’akipaa miya ya mu Bible. Biabia, abitungu bakulu babande kuiyipusha’shi, mfuadilo a yawa muntu alesha kuiyisha na binangu bi buwa su? Bi na muulo tutentekieshe’shi, bakuetu babidi be kuata bitshibilo bilekeene, anka, bino t’abilesha’shi, kimune ki buwa kingi ki bubi nya. T’abitungu tukitshishe bena Kidishitu netu, buabadia kukumiina eetu mmueneno a ki buwa na ki bubi nya. w22.02 16 ¶9-10

Tui na tubingilo tuibuwa tua kuilesheena kifulo ki na lulamato. Tungi tubingilo kinyi tua ku tuanka? Tala mukanda wa nkindji uyokielue biautusha lualuulo ku luno lukoonko alulondo: “Biinyibiinyi na bulamate tabikulekanga. . . . Biabia opete mwabi dingi wekale mufudiibwe ngofu kwi Efile Mukulu naa kwi bantu.” ‘Muntu sha kifulo ki na lulamato ekitshina bi buwa’ye nabeene.’ “Akimbi bululame na kifulo ki na lulamato apete muuwa.” (Nki. 3:3, 4; 11:17, 21:21) Ino mikanda ya nkindji ibetuleesha tubingilo tua buakinyi tui balombene kuleesha kifulo ki na lulamato. Ka kumpala, kulesha kifulo ki na lulamato akuituikasha na muulo kumpala ku’Efile Mukulu. Ka kabidi, patuleesha kifulo ki na lulamato atuikitshina bi buwa atue banabene. Bu kileshesho, atuikala mu bukuuku na bangi. Ka kasatu, kukimba kifulo ki na lulomato, akuitutuala ku miabi ya mafuku aafiki mpaa na ku muwa wa ikalaika. Biabia tui na tubingilo tui buwa tua kukokiela Eyi dia Yehowa adiamba’shi: “Eleesheneyi kifulo ki na lulamato, na kuifuileena lusa.” w21.11 8 ¶1-2

Su bitompuanga biobe bia kala sunga bia binobino, abilesha’shi lukumino lobe ndubofule, totshobolokanga. Mona bino bu mushindo odia kunyingisha lukumino lobe. Teka Yehowa, bikishekishe nsaa y’ofumankana na lukalakashi lui bukopo. Yehowa mmulombene nkupa bukuashi bodi nabo lukalo kukidila kui kifuko sunga kui bakuuku. Nsaa y’otadiila Yehowa bua’shi akukuashe bua kunyingiila bitompuanga biobe bi binobino, okekala na bishinkamiisho bibungi abilesha’shi Yehowa akakukuasha bodia kunyingiila bitompuanga bioso biokafumankana nabio mu mafuku aafiki. Yesu bakuashishe balongi baaye buabadia kumona mbalo yabadi babofule mu lukumino, anka tabaadi na mpaka’shi ku bukuashi bua Yehowa mbalombene kobesha kukambila bitompuanga bia mu mafuku aafiki nya. (Yo. 14:1; 16:33) Badi na kishinkamiisho kikata’shi, lukumino ndulombene kukuasha kibumbu kikata buakidia nkapanda ku mpombo ikata. (Kibaf. 7:9, 14) N’obe namu okekala umune a munkatshi muabo su? Su otamisha na kunyingisha lukumino lobe mu mushindo oso wawa kubanga binobino!​—Eb. 10:39. w21.11 25 ¶18-19

Biabia tatui balombene kukulupila’shi atupete bulami bua mu kilengieleshi lelo uno nya. Anka baaba boso abakulupila mui Yehowa abapete muwa wa ikalayika sunga bashimisha muwa wabo ano mafuku. Mafuku apeela e kumpala’ku lukulupilo luetu mu bukome bua Yehowa bua kuitulama alukatompibua. Nsaa ayikeboo Goge a kwiumbo dyaa Magoge, maumbo esangie buadia kutuuka muilo w’Efile Mukulu ngoshi tui kupuandikisha pangi’shi muwa wetu aukekala mu masaku, atukekala na lukalo lua kushinkamisha’shi Yehowa mmulombene na aketupasha. Bantu ba miilo abaketumono bu mikooko yabisumanga ishii na muntu a kuiyikaluila. (Es. 38:10-12) Tatukekala na bina ngoshi sunga balongieshibue bia kulua ngoshi nya, bantu ba miilo abaketumono nka bintu bibofule biakuikuatshila, abo tabakamono kiakia kiatukamono na meso a lukumino nya. Kisaka kikata kia bamikeyilu kifunyishe muilo w’Efile Mukulu, na belumbuule bua kuitukaluila. Bantu ba miilo tabakebamono nya, ta be na mueneno a mu kikudi nya. Bantu ba miilo abakabasamushua nsaa ayifiki biluilo bia muiyilu bua kuitukaluila!​—Kibaf. 19:11, 14, 15. w22.01 6 ¶12-13

Bakwetu balume na bakashi be na muulo ku meso kwa Yehowa, byabya twibate na muulo. Byabya, abitungu tukite mwetu moso bwa kwibakalwila na kwibapasukila. Su twapusha’shi tubatapa muntu kwishimba, t’abitungu tumone bu kushi kukitshikye kintu pa kwamba’shi, abitungu yawa muntu etufwile lusa na kuluba wawa mwanda. Bwakinyi muntu e kutapika kwishimba? Pa mwanda wa mbalo yabadi bakudile, bangi bakwetu balume na bakashi mbalombene kwimona bu bashadile pe bangi. Bangi namu baki bapya mu bya binyibinyi; tabaukile bya kukila ka kukutwa kwa kupwidjika kwa bangi. Sunga byekala naminyi, abitungu twalushe butale. Na dingi, su muntu atapika kwishimba nsaa yoso bwa bikitshino bya bangi, abitungu ashingule’shi dino eyikashi ta di buwa, abitungu edilekye. Paapa, ekala na muloo na ekala mu kipwano ki buwa na bangi. w21.06 21 ¶7

Yesu auku biopusha. Su tui benyongole, abikalaa muloo ukata pa kunyingishibua na kuuku oobe auku biopusha bikishekishe su naye namu mmupete nkalakashi i mumune na yetu. Yawa kuuku nyi Yesu. Auku muntu paadi mubofule na lukalo lua bukuashi luekalaa nalo. Euku bi kubofula kuetu na akumina’shi tupete bukuashi pa “kipindji kikumbane.” (Eb. 4:15, 16, Kilombeeno Kipya 2014) Anka bu Yesu bibaadi mukumine bukuashi bua muikeyilu muifuba dia Getesemane, abitungu tukumine bukuashi buabetupa kui Yehowa, buabua bukuashi tui kuibupeta mu mikanda yetu, mu ma video mu miisambo, sunga kunyingishibua nsaa ayitutembela mukulu sunga kuuku etu munyingie mu kikudi. (Luk. 22:39-44) Yehowa akupa “butaale bw’Efile Mukulu” na akunyingisha. Nsaa y’atutekie, atupete “butaale bw’Efile Mukulu abo butabukile binangu byoso.”​—Fid. 4:6, 7. w22.01 18-19 ¶17-19

Yehowa akitaa nka mianda ibuwa. Anka, tui kuikadika na lukalakashi lua kukulupila, mui bantu abalesha mpala yaye pano pa nsenga. Tui kuiyipusha’shi, bano be na matalua mu ndumbuluilo a Yehowa, bakuete kukita mianda muyile buludiki bua Yehowa su mmuyile buludiki buabo abo banabene? Kiatudia kuuka nkuamba’shi, Yehowa mmukulupile bano booso bantu, baadi musangule bua kukunkusha ndumbuluilo aaye na tukongie. Lelo uno, Yehowa kuete akunkusha kipindi kiaye ki pa nsenga, kukiila kui “mpika a lulamato na mudimukye.” (Mat. 24:45, NWT) Nka bu bibaadi kasaka ka bakunkushi bakulu ka mu siekele a kumpala, uno mpika, kuete akunkusha muilo w’Efile Mukulu mu nsenga ishima, na kuete atuusha buludiki kui bakulu ba mu tukongie. Bakulu namu ku luabo lupese, bakuete kutumikila buabua buludiki mu tukongie. Atulesha’shi tui bakulupile mu mushindo aukitaa Yehowa mianda, p’atukookiela buludiki bu’atupete mu ndumbuluilo aaye, na kui bakulu. w22.02 4 ¶7-8

Tui na muloo na kinemo kia kuikala bu ba Temue ba Yehowa! Atuikala na muloo nsaa yatukuasha muntu kampanda ena eshimba “dilulame bua kupeta muwa wa ikalaika” buadia kuikala muina Kidishitu. (Bik. 13:48, NWT) Atuipusha anka bu bibapushishe Yesu, badi “musepeele mu kikudi” nsaa ibalukile balongi baye na bipeta bia mianda i buwa ibabadi bakamone mu mudimo wa bulungudi. (Luk. 10:1, 17, 21) Mpoolo Mutumibua badi mulungule Timote’shi: “Dimuka p’abikutale obe nabeene na bulambukishi bwobe.” Mpoolo alombasha dingi’shi: “Pa kukita byaabya biinyibiinyi, ngi pookeepaasha obe nabeene mpaa naa bano abakuteemesha.” (1 Tim. 4:16) Bulungudi buetu abupasha mmuwa. Abitungu tudimukie atue banabene muanda tui bana ba Bufumu bu’Efile Mukulu. Abitungu efuku dioso tuikale na bikitshino abitumbisha Yehowa na bipushene na mukandu wi buwa wa tukuete kulongiesha. (Fid. 1:27) Atulesha’shi atudimuka atue banabene na malongiesha etu pakuilumbula kalolo, nsaa yatuende mu mudimo wa bulungudi na kuikala atutekie miabi ya Yehowa kumpala kua kulungula bangi mukandu wi buwa. w21.10 24 ¶1-2

“Bumuntu bupya” nyi mmushindo wa kunangushena na kukita mianda bua kuambula Yehowa. Muntu afuala bumuntu bupia aleshaa kikuba kia kikudi ki’Efile Mukulu, atadiilaa’shi kikudi kiselele kikadikie na bukitshishi mu binangu biaye, ku bi’apusha na ku bikitshiino biaye. Bu kileshesho, mmufule Yehowa na muilo waye. (Mat. 22:36-39) Yawa muntu alamaa muloo waye, sunga nsaa ayimukuata nkalakashi. (Shak. 1:2-4) Nyi mmuntu afuishaa butaale. (Mat. 5:9) E na luishinko na kalolo kui bangi. (Kol. 3:13) Mmufule mianda i buwa na kuiyikita. (Luk. 6:35) Aleshaa ku bikitshiino biaye’shi e na lukumiino lunyingie mui Nshaye e muiyilu. (Shak. 2:18) Ashaala muumiine nsaa y’abamoolomona na kulesha butontshi bua mbidi nsaa y’apete kitompuanga. (1 Kod. 9:25, 27; Tt. 3:2) Bua kufuala bumuntu bupia, abitungu tuikadikie na ino ngikashi yoso yabadi bateemune mu Ngalatea 5:22, 23 na mu bingi bifundue bia mu Bible. w22.03 8-9 ¶3-4

Bakulu mbalombene kuambula Mpoolo mutumibua kushi nka penda mu kulungula mukandu wibuwa ku kibelo na kibelo, anka pabekala belumbuule na kukumiina kutuusha bu kamonyi apamueka mushindo. (Ef. 6:14, 15) Nka bu Mpoolo bakulu mbalombene kufubisha nsaa yabakisha mu mudimo wa kulungula mukandu wibuwa bua kulongiesha bangi mpaa na bafubi ba midimo mu tukongie. (1 Mp. 5:1, 2) Anka, bakulu ta mbalombene nka penda kuipaana mu midimo, kadi bakutua nsaa ya kukita mudimo wa bulungudi nya. (Mat. 28:19, 20) Bua’shi bekadikie na nkatshinkatshi bua kukita mudimo wa bulungudi, abitungu’shi ingi nsaa bapele kukita ingi midimo. Kunyima kua kunangusheena na kuela luteko, mbalombene kushinkamisha’shi, t’abitungu bakite ingi midimo bua kuiluankana ingi midimo ii na muulo ukata nya kukita kua lulanguilo lua mu kifuko, kulungula mukandu wibuwa na katshintshi, sunga kulongiesha bana baabo biabadia kukita mudimo wa bulungudi. Anka mbalombene kushinkamisha’shi Yehowa awuku bi nkalo yaabo buabadia kuikadika na nkatshinkatshi mu mianda yooso. w22.03 27 ¶4, 7; 28 ¶8

Otentekyesha moo wa kwikala Temwe a Yehowa ubodi opusha? Pangi bodi wepusha’shi, twemulombene kukita mudimo wa bulungudi. Pangi bodi otshinyi’shi bena kifuko nobe sunga ba kuuku bobe be nkulwiisha. Su bi bino, we kwitula pa mbalo ya mulongi obe a Bible nsaa y’epusha biabia. Yesu badi auku’shi, bangi bantu mbalombene kupusha uno moo. Anka, badi munyingishe balongi’shi tabatadilanga uno moo bwaudya kwibakutshisha kufubila Yehowa. (Mat. 10:16, 17, 27) Kapelakapela, nyingisha mulongi obe a Bible bwadya kwakula pabitale lukumino lwaye. Balongi ba Yesu abadi pangi bapushe katshima munda pabadi mwibatume mu kulungula mukandu wi buwa. Anka, Yesu badi mwibakwashe pa kwibalungula mbalo na kyabadya nkakula mu bulungudi. (Mat. 10:5-7) We kwambula Yesu naminyi? Kwasha mulongi obe a Bible bwadya kuuka mbalo yadya kulungula mukandu wi buwa. Bu kileshesho, mwipushe su auku muntu e kukumina kulonga bya binyibinyi bi mu Bible. Akupu, omukwashe bwa kulumbula kyadya kwakula pa kumulesha mushindo upelepele wadya kulungula byabya bya binyibinyi? w21.06 6 ¶15-16

“Mu kapindi kapeela, makashinyi na mashibo a kala bibaadi bipone biapalakana nka bu mapupua.” Na “bantu be bungi babaadi na moo ukata . . . Dingi be bungi babakuile’shi mbikitshikie nka mu minite ibidi. Buande’mi, namuene nka bu’shi tubapu kufua bua losoo.” Ino mmianda i baabadi baakule kui bantu babaadi bapande mu kuno kutshinkatshinka kua nsenga kubaadi kukitshikie ku Nepal mu 2015. Biabia, kubanga nka paapa, tukuete kumona mishindo i bungi ya kutshinkatshinka kua nsenga kukuete kutshinkisha miilo yoso. Mutemuki Angayi mupue kuakula pabitale kuno kutshinkisha. Baafundile’shi: “Yehowa sha-[biluilo, NWT] amba’shi: ‘Mu kapindji akeekala keepi, natshinkisha eyilu na nsenga.’” (Ang. 2:6) Kutshinkisha kuabalesha kui Angayi, ta nkuno akutshinkaa nsenga yaluisha bintu nya. Mu kuilekena na kuno akuluishaa bintu, kuno kutshinkisha akutushaa bipete bi buwa. Yehowa nabene etulungula’shi: “Nakatshîsha mîlo yoso, bilombêne yafwisha bintu byayo binême mu ino nshibo. Nkafwadikye nshibo yande ntumbo.” w21.09 14 ¶1-3

Kipwano akinyingaa pankatshi pa bantu babidi p’abesamba nsaa yoso na kwilungushena by’abepusha. Bi mumune na bwa kipwano kyetu na Yehowa. Nsaa y’atumulesha by’atwipusha na bi binangu byetu mu nteko, atulesha’shi twibamukulupile na atuuku’shi mwitufule. (Mis. 94:17-19; 1 Yo. 5:14, 15) Kwikala na ba kuuku ba sha lulamato; nyi kya buntu kya Yehowa. (Shak. 1:17) Nshetu e mwiyilu muleshe’shi etupasukila, pa kwitupa kifuko kya mu kikudi kya bakwetu balume na bakashi abetulesha “kifulo mafuku ooso.” (Nki. 17:17, EEM) Mu mukanda ubadi mufundjile bena Kolose, Mpoolo esambila bangi bena Kidishitu abadi bamukwatshishene, amba’shi: ‘Mbamukankamikye bikata.’ (Kol. 4:10, 11, EEM) Sunga Yesu Kidishitu, badi na lukalo lwa bukwashi na badi musankile bukwashi bubadi mupete kwi ba kuuku baye, byabekala ba mikeyilu sunga bantu. (Luk. 22:43) Nsaa y’olungula kuuku obe munyingye mu kikudi myanda yobe, t’abilesha’shi lukumino lobe ndupela, anka mbilombene nkukalwila. w21.04 24-25 ¶14-16

Su mukwenu mwina Kidishitu akita mwanda aukukalakasha, we kukita kinyi? Kita mobe moso bwa kulama butale. Lungula Yehowa byopusha. Mutekye bwa’shi akwashe yawa muntu mukulwishishe, na akukwashe omone nyikashi i buwa ya yawa muntu​—nyikashi itakule Yehowa bwa kumufula. (Luk. 6:28) Su tomulombene kufwila yawa mukwenu lusa, nangushena myanda yodya nkakula naye. Bi buwa kunangushena’shi yawa mukwenu t’akyebanga nkutapa kwishimba. (Mat. 5:23, 24) Nsaa yw’esamba naye, mulesheshi ta mwibikite pa bukopo. We kukita kinyi su t’akumina nwakita butale? ‘Tungunuka na kumulesha lwishinko.’ Tokokanga. (Kol. 3:13) Na mwanda wi na muulo, tomulaminanga ngo, mwanda mbilombene kulwisha kipwano kyobe na Yehowa. Totadila kintu bwa’shi kikukokoshe. Su bokitshi byabya, olesha’shi wemufule Yehowa kukila kingi kintu kyoso.​—Mis. 119:165. w21.06 23 ¶15