Mueshi wa 7

Kutusha muntu mu kakongye kui mu mpàngo ya Yehowa. Na ngi mushindo wi buwa wa kukuasha muntu mulekie kufubila Yehowa, mpa na baaba boso bakite miluisho ikata. Bangi mu kakongie be kuamba’shi, nta kitshibilo ki bi buwa kia kutusha muntu mu kakongie. Anka kushi’bo kutentekiesha mianda i bubi ayikitanga yawa muntu abaabatusha mu kakongye. Aku namu ta tui na bishinkamiisho bioso nya. Bi buwa kukulupila bakulu abasambisha uno muanda, muanda abekitshishaa muabo mooso buabadia kulonda mayi akulonda a mu Bible na abatshibi biimu “mwishina dya Yehowa.” (2 Mya. 19:6) Nsaa y’okuatshishena kitshibilo kia bakulu bua kutusha muntu oodi mufule mu kakongye, omukuasha buadia kualuka kui Yehowa. Elizabeth amba’shi: “Bi baadi bukopo buatudia kuleka kuisamba na muana etu nsongualume.” Anka kunyima kua muan’aye kualuka kui Yehowa, amba’shi: “Kitshibilo kia kumutusha mu kakongye kibaadi buwa. Ingi nsaa, muan’aye ambaa’shi ne mupete malongiesha e bungi e buwa.” w21.09 28-29 ¶11-12

Nangushena pabitale uno mukashi a mu lufwila. Kushi mpaka, badi akumina kupa Yehowa bi bungi. Anka, badi mukite kyakya kibadi na bya kukita, badi mupe Yehowa kyakya ki na muulo bwaye. Na Yesu badi muukye’shi kya buntu kyaye ki na muulo ku meso kwa Nshaye. Pano, pe dilongyesha di na muulo bwetu: Yehowa asankaa nsaa y’atumupa kyakya ki buwa bwetu​—kwamba’shi: Mudimo watukitshi n’eshimba dyetu dyoso. (Mat. 22:37; Kol. 3:23) Yehowa asangalaa nsaa y’etumono atukitshi kyoso akitungu bwa kumufubila. Bino mbitale nsaa na bukome by’atutusha bwa kumulangwila, bu kwenda mu bulungudi na kutwela mu bisangilo. Mushindo kinyi odya kutumikila dilongyesha di mu mwanda utale mukashi a mu lufwila? Tentekyesha bantu bouku abatungu kunyingisha pa kwibatentekyesha’shi Yehowa, asanka nsaa y’abakitshi kyoso akitungu kukita bwa kumusankisha. Bi kwikala’shi mukwetu mukashi bapu kununupa, pangi epusha bu’shiki na muulo mwanda taki na mbidi bukome bwa kukita bi bungi mu mudimo wa bulungudi. w21.04 6 ¶17, 19-20

Yehowa auku nsaa i buwa ya kufudisha uno ndumbuluilo e bubi. Pa muanda wa luishinko luaye, bantu be bungi mbafikie mu kumuiuka, na lelo uno kui kibumbu kikata kia bantu midiyo kikuete kumulanguila. Boso buabo be na lutumbu muanda Yehowa mwindile kipindi kila bua’shi batandikue, balongie bua kumufula, na belambule kuadi. Kitshibilo kia Yehowa kia kunyingila akikamueka patoka, nsaa y’akelela midiyo ya bantu banyingile mpa na ku nfudilo miabi! Sunga biakudi kinyongua na makienga afwisha Satana, Yehowa e’nka “Efile Mukulu a muloo.” (1 Tim. 1:11, Kilombeeno Kipya 2014) Natue namu, tui kushala na muloo patuki’atutengiela’shi Yehowa atooshe eshina diaye, kulesha patoka matalua aye a kumunana, kufudisha buntomboshi, na kupudisha nkalakashi yatudi nayo lelo uno. Tuatei kitshibilo kia kunyingila pa kuuka’shi Nshetu e muiyilu kuete naye kunyingila. w21.07 13 ¶18-19

Bantu be bungi ba mu siekele a kumpala ta babadi na lukumino mwi Yesu. Anka bw’abo, badi penda mwana a nsèshi a mabaya. Na’shi badi mwina Naazarete, ka kibundji kababadi abamono bu kashi na muulo. Mpa na Natanaele, badi mufikye bu mulongi a Yesu, bambile’shi: “Ku Naazarete nkulombene kutuuka kintu kibuwa su?” Badi pangi anangushena ku butemuki bwi mu Mika 5:2, abulesha’shi Mesiya akatandjikwa mu Beteleme, kushi mu Naazarete. Mutemuki Yeshaya batemukile’shi, beshikwanyi ba Yesu t’abakatumu binangu “ku myanda ya mu kipungo kyaaye [Mesiya].” (Yesh. 53:8) Su baba bantu abadya kwata nsaa ya kutalula myanda yoso, abadya kulonga’shi Yesu badi mutandjikilwe mu Beteleme, na’shi badi mwikulu a Mfumu Davide. (Luk. 2:4-7) Byabya, Yesu badi mutandjikilwe mbalo y’abadi batemukye mu Mika 5:2. A byabya mwanda ubadi pekunyi? Bantu abadi abata bitshibilo lubilolubilo. Ta babadi abauku myanda yoso nya. Pa mwanda wa bino, abadi bakokole. w21.05 2-3 ¶4-6

Bible ateemuna dingi, bantu babaadi bedibue miabi pa muanda wa kukumiina elango. Tutale muanda wa Yoobo. Sunga mbibaadi akumiina kusankisha Efile Mukulu, ta baadi mupuidikie nya. Pa baadi mu nkalakashi i bukopo, bekeele na mmueneno e bubi. Ngi buakinyi, babaamupeele elango dia pa butooka, kui Eliwu na Yehowa. Yoobo baakitshiine naminyi? Baadi mukumiine elango na kuiyisha kooso. Bambile’shi: “Nâkulanga bintu byanshanshingûla . . . Byabya, nakwatwa na bûfu, nelanga. Pa wawa mwanda, nealâsha mu nsenga na mu buto.” (Yob. 42:3-6, 12-17) Baadi mulesheshi mmuiyishe, pa kukumiina elango dibaamupeele Eliwu sunga mbibaadi Eliwu mukinga kuadi ngofu. (Yob. 32:6, 7) Kuiyisha, akuitukuasha dingi buatudia kutumikila elango, sunga nsaa y’atupusha’shi ta di buwa, sunga betupa dianka kui muana mukinga ngofu kuatudi. Atue booso, tui na lukalo lua kukimba kikuba kia kikudi kiselele ngofu, bua’shi tuikadikie balungudi na balongieshi ba mukandu wibuwa be buwa. w22.02 11 ¶8; 12 ¶12

Muntu oso e kukwasha bwa’shi mu kakongye mwikale kifulo na butaale, na bwa’shi muntu su ngumune t’epushanga bupenka. By’atukitshi na by’atwakula mbilombene kunyingisha bangi ngofu! We kukita kinyi bwa kukwasha baba abepusha bupenka, bwa’shi b’epushe bu bena kakongye? Ata mpángo ya kudya bu kuuku na bantu bapya. Twi kwibikita pa kwibakukila na muloo oso ku bisangilo. (Lom. 15:7) Anka, ta twimenanga nka penda pa kwi bakukila na muloo nya. Abitungu tunyingishe bu kuuku bwetu nsaa yoso. Byabya, ikala na kalolo na oleshe’shi opasukila bantu bapya. Pamutwe pa kutwelakana mu myanda yabo ibatale abo banabene, nkimba bwa kuuka myanda yabadi nayo. Bangi, abibelelaa bukopo bwa kwakula by’abepusha, byabya dimukila kwibakitshisha bwa’shi baakule. Anka, ebele tu nkonko na mayele oso na otemeshe ngalulo yabo na lwishinko. Bu kileshesho, we kwibepusha byabadi baukye bya binyibinyi. w21.06 11 ¶13-14

Twi na muloo wa kufubila Yehowa na bakwetu balume na bakashi bu “lombe lumunenka” ku bukunkushi bwa “mulami umune”! Mukanda wa Belumbuule bwa kukita akikyebe Yehowa, esaki 165 awamba’shi: “Bwa’shi bwabwa buumune bukukwashe, abitungu okite moobe mooso bwa kwibulama.” Nyi bwakinyi abitungu ‘twikitshishe bwa kumona bakwetu bu abibamonaa Yehowa.’ Atwe boso, be bu “bano bakinga” twi na muulo ku meso kwa Yehowa. Nyi byomonaa bakwenu balume na bakashi su? Yehowa amonaa na ataa na muulo kyoso ky’okitshi bwa kwibakwasha na kwibapasukila. (Mat. 10:42) Twibafule bena Kidishitu netu. Nyi bwakinyi ata kitshibilo kya kupela “kutuula ebwe dia kikokoshi sunga kateo ka kupoona kumpala kwa mukwenu.” (Lom. 14:13, Kilombeeno kipya 2014) Atumono bakwetu balume na bakashi bu betukile, na atukumina kwibafwila lusa n’eshimba dyetu dyoso. Tatutadilanga’shi bangi betukokoshe. Anka, “tukimbeeyi bintu biakufisha kufukama, na biabia biakufisha kukankamikwa kwa muntu na muntu.”​—Lom. 14:19, Kilombeeno kipya 2014. w21.06 24 ¶16-17

Su tualonga kalolo na kutumikila malango e Muiyi di’Efile Mukulu, na aetupa ndumbuluilo aye, kapela kapela atukimbi nyikashi ya bena Kidishitu. Atutamisha dingi kiukilo ki’etu bu’Efile Mukulu. Yesu badi mufubishe kileshesho bua kupatula mushindo awikala mukandu wa Bufumu w’atulungula bu katete kapela akende na kutama muishimba dia muntu mululame. Bambile’shi: “Yaya mbyo aishipuka, imene mu kipaso kyasheûku [mudimi]. Nsenga i nabêne aikomeshâ bikunwanga bitûkye mu mbyo mu kino kipaso: kwibedi kinkolwa akikulu, akitûsha myepo, ku nfudîlo ngano ayitwele munda.” (Mak. 4:27, 28) Yesu badi akiebe kuakula’shi nka bu abikulaa mutshi kapela kapela, muntu akumina mukandu wa Bufumu akulaa mu kikudi kapela kapela. Bu kileshesho, nsaa i balongi ba Bible abefubuila pepi na Yehowa, atubanga kumona mianda i bungi y’abashintula mu nshalelo abo. (Ef. 4:22-24) Abitungu tutentekieshe’shi Yehowa nyi kuete kukusha tuatua tutete tupela. w21.08 8-9 ¶4-5

We kupeta muloo su we ukimba mbalo i buwa. Muntu e na muloo “asepêlaa na kiadi nakio” lesha lutumbu ku biabia biodi nabio mu yaya nsaa muyile mianda yodi nayo. Sunga mbiabia, kunyima muntu e kutungunuka na kuiyipusha su e kupeta kintu kampanda kadi kiashi mulombene kupeta. Bino abitulongiesha kinyi? Bwa kupeta muloo, abitungu kutula meso etu ku kiatudi nakio na ku kiakia kiatudi balombene kuikala na ngobesha ya kwikipeta. Mu binyibinyi mbibofule bua kusepêla na kiodi nakio su? Kunyima kua biabia bioso, apende mafuku na kukila, atufumankanaa na nkalakashi ipia. Oolo, mu binyibinyi mbibofule. Tui kuikala na muloo kushi pamuanda wa bintu “biatudi nabio.” Tui kuiwupeta naminyi? Tutaluleyi lukindi lua Yesu lua ntalanta lui mu Mateo 25:14-30. Atukesambila kilombene lukindi kuitulongiesha, pa bitale mushindo wa kupeta muloo na kuiwutamisha mu miabi yatudi nayo lelo uno. w21.08 21 ¶5-6

Yehowa apasukila ngofu baba boso be “mu malwa na bapombolekye.” Oso akuatudi mulombene kukwasha bua kunyigisha bano bakuetu balume na bakashi, kushi penda bakulu mu kakongye. Mushindo umune watudia kuibikita nyi kuibalesha’shi atuibapasukila. Yehowa akumina tuibaleshe’shi, muibafule. (Nki. 19:17) Tui kukuasha dingi bakuetu balume na bakashi pa kwikala na kuiyisha na kuuka mikalo yetu. Tatukumina kukaka binangu bia bangi kuatudi, kutshina’shi tala betulakila. Pamutu’a biabia, atufubisha ngobesha yetu na kiukilo kietu bua ku nyingisha bangi. (1 Mp. 4:10, 11) Tui kulonga bia kukitshina bangi mianda pa kutala mushindo ubadi Yesu akitshina balongi baye mianda. Badi muntu mukata sh’ekele dimo kuanka. Sunga biabia badi muntu ‘mupopeele na dingi mwiyishe kwishimba.’ (Mat. 11:28-30) Badi afubisha ngakuilo mupelepele na kufubisha bileshesho bi buwa pabadi alongiesha bua kukuma mashimba a bantu beyishe.​—Luk. 10:21. w21.07 23 ¶11-12

Ekitshishe bua kuisamba na bantu banunu. Mu binyibinyi, meso aabo e kubanga kukutua kumona kalolo, butaale buabo buabanga kupeela, ngakuilo aabo abanga kushikala, anka mashimba aabo aki nka na bukome, na be na “nkumo i buwa” ku meso kua Yehowa. (Mul. 7:1) Ngi buakinyi Yehowa ebaataa na muulo. Tungunuka na kulesha’shi okuete kuibaata na muulo. Nka bu Elisha. Baadi mushishikile kushaala pamune na Eliya mafuku aaye a mfudiilo. Elisha baakuile misusa isatu’shi: “Ntankulekye’mi.” (2 Baf. 2:2, 4, 6) Lesha’shi opasukilaa bantu banunu pa kuifubuila kuabadi na kuibayipusha ingi mianda. (Nki. 1:5; 20:5; 1 Tim. 5:1, 2) We kuibeela nkonko bu ino: “Pabanudi nuki bansongua, nkinyi kibaadi kinushinkamiishe’shi nubapete bia binyibinyi?” na “Mmianda kinyi yanudi bamone inukuashe bua kuifubuila kui Yehowa?” na dingi “Mmianda kinyi inukuashe buanudia kulama muloo wenu mu mudimo wa Yehowa?” (1 Tim. 6:6-8) Ebateemeshe kalolo nsaa y’abakulondela myanda yabo ya kala. w21.09 5 ¶14; 7 ¶15

Nsaa y’okitshi mobe moso bua kukokiela eyi dia kulungula na kuikasha bantu bu balongi, olesha kifulo kiobe bu’Efile Mukulu. (1 Yo. 5:3) Banda kunangushena: Kifulo kiobe bua Yehowa kikutakule bua kulungula mukandu wi buwa ku nshibo na nshibo. Dino eyi ndibofule kukokiela su? Pangi nya. Poboile mu bulungudi bua musango wa kumpala, bodi na katshima-munda su? Olo! Anka, bodi ouku’shi nyi mudimo aukiebe Yesu’shi okite, na bodi mmukokiele eyi diaye. Na kunyima kua mafuku, bibadi bikubofuile bua kuenda mu bulungudi. Twi kuamba naminyi pabitale kulonga Bible na bantu? Opushaa katshima-munda su? Pangi. Anka, nsaa y’otekie Yehowa bua’shi akukuashe okatushe katshima-munda na kunying’eshimba bua kulonga Bible na muntu, Yehowa mulombene nkunyingisha lukalo lobe lua kuikasha bantu bu balongi. w21.07 3 ¶7

Mpika a mu mafuku a kala, babaadi abamuele kitunduilo bua kulesha’shi bakumina kushala na mfumu’aye bua losoo. Mu mushindo umune, boso ba mu ano mafuku etu mbatekibue buabadia kuikala na kitunduilo kia mu kifuanyi kuiyasa diabo sunga mu mpala yabo. Binangu biabo na bikitshino biabo, abilesha’shi mbakumine kushala na kukuatshishena mianda ya politike ya uno ndumbuluilo e bubi. Atukakumina kitampi kia mu kifuanyi, na kukuatshishena uno ndumbuluilo a politike su? Boso abapele kutambula kino kitampi, abakekala mu lukalakashi na mu masaku. Mukanda wa Kibafumbuilue awupatuula’nyi’shi: “Muntu te bia kuwula sunga nkuwudisha, su ta mpeenda yawa e na kitundwilo.” (Kibaf. 13:17, Kilombeeno Kipya 2014) Anka bantu b’Efile Mukulu abauku akikatshi Efile Mukulu, bua baaba boso be na kitunduilo kiabadi baleshe mu Kibafumbuilue 14:9, 10. Pa mutue pa kutuala kiakia kitampi, abakafundu mu maasa aabo’shi “ami ne a Yehowa.” (Yesh. 44:5) Kino ngi kipungo, kiatudia kushinkamisha’shi lulamato luetu kui Yehowa ndunyingie. Su ngi biabidi, Yehowa akekala na muloo wa kuakula’shi tui bantu baye! w21.09 18 ¶15-16

Bwa kulombasha mudimo wetu wa bulungudi, twi na lukalo lwa bukwashi bwa bangi. Mpoolo mutumibwa badi mulungule Timote mayele abyakulungula na kulongyesha mukandu wibuwa, na bwadya kulesha bangi aa mayele. (1 Kod. 4:17) Nka bu Timote, twi kulongyela kwi bangi mu kakongye. Na dingi, tutekye bukwashi kwi Yehowa. Teka Yehowa bukwashi nsaa yoso yodi mu mudimo wa bulungudi. Kushi bukwashi bwa kikudi kiselele, muntu su ngumune a kwatudi tamulombene kobesha kukita uno mudimo. (Mis. 127:1; Luk. 11:13) Nsaa y’otekye bukwashi kwi Yehowa mu luteko, mulungule myanda yoso patoka. Bu kileshesho, mutekye bwa’shi akukunkushe kwi muntu mulombene nkutemesha. Twate nsaa ya kwilongyela. Eyi dy’Efile Mukulu adyamba’shi: ‘Shinguula eshi kikyebe ki’eshimba di’Efile Mukulu nkinyi, kii buwa, akimusangasha na nkipwidikye.’ (Lom. 12:2, Kilombeeno kipya 2014) Nsaa y’atulongo Bible, atuuku Efile Mukulu kalolo kakile, bino abitukwasha bwa kwakula na kushinkamisha nsaa y’atulungula bangi pabimutale. w21.05 18 ¶14-16

Bikuikala naminyi su wekitshisha ngofu na wele nteko pabitale mulongi obe a Bible, anka aye tende kumpala mu kikudi, na dingi balekie kuikala na lukalo lua kulonga? Sunga’shi bi kuikala naminyi su tokuashishe namu muntu kampanda afika mu kubatshishibua. We kuinyongola pangi na kunangushena’shi Yehowa ta muelele mudimo obe wa bulungudi miabi. Yehowa atala su tubakitshi mudimo wetu wa bulungudi kalolo su? Yehowa atala kuikitshisha kuetu na kunyingila kuetu. Yehowa asankila mudimo wetu, nsaa yatulungula mukandu wi buwa na katshintshi muanda tui bamufule sunga bantu bakutua kui tutemesha. Mpoolo bafundile’shi: “Mwanda Efile Mukulu mmululame ta mmulombene kuluba kyanudi bakite, na kifulo kyanudi baleeshe bw’eshina dyaaye pa kwipaana ku mufubo wa bantu b’efile kukala na binobino dimo.” (Eb. 6:10) Yehowa atentekiesha kuikitshisha kuetu na kifulo kietu, sunga kuikitshisha kuetu kuakutua kutusha bipeta bi buwa. Biabia, obe nabene we mulombene kutumikila mayi a Mpoolo bambile mayi a mu kifundue kietu kia lelo. w21.10 25 ¶4-6

Kalolo na kifulo bia Yesu bibadi abimueka patoka mu mushindo ubadi akitshina balongi baye mianda. Badi auku’shi bena ngobesha na mianda ilekene. Nyi buakinyi t’abadi na bia kukita mianda i mumune sunga kulungula mukandu wi buwa mu mushindo umune. Anka, badi na muloo bua bioso bibadi abikitshi oso a kuabadi. Badi muibileshe mu kileshesho kiaye kia talenta. Mu kino kileshesho, mfumu badi mupe mufubi aye oso mudimo “muyiile bukome bwaye.” Umune a ku bafubi babidi ba sha kishima badi mupete bi bungi kukila ungi. Anka mfumu badi muibatumbule boso na mayi e mumune, amba’shi: “Bibuwa, mpika e buwa a kishima!” (Mat. 25:14-23) Yesu kuete alesha kalolo na kifulo mu mushindo w’etukitshina mianda. Auku’shi ngobesha na nshalelo etu mbilekene, biabia asankaa nsaa y’atuitatshisha bua kukita kioso akitungu. Abitungu tuambule Yesu. w21.07 23 ¶12-14

Mfumu Davide tabadi alesha lusa nsaa yoso nya. Bu kileshesho, nsaa ibadi Nabale muntu sh’eshimba di bukopo muakule bishima bia kukutua kanemo na kupela kupa bantu ba Davide bidibua, Davide badi mufiite munda aye nkuata kitshibilo kia kuipa uno muntu na boso ba mushibo yaye. Anka mukashi a Nabale, Abigaele badi na kalolo na luishinko na batshile bidibua bukidibukidi aye nkapa bantu ba Davide, nyi bwakinyi Davide ntamusumbule mase bua kuipa Nabale na ba mushibo yaye. (1 Sam. 25:9-22, 32-35) Tubamono’shi nsaa ibafiitshile Davide munda batshile kitshibilo, kia kuipa Nabale na bantu boso ba mushimbo yaye. Kunyima Davide bakuile’shi yawa muntu mpeta a mu lukindi lua Natane badi mulombene kuipaibua bua biadi mukite. Davide badi muntu e buwa kadi buakinyi badi muate kitshibilo kia kutshibila uno ngifi kiimu ki bukopo. Tubandeyi kutala muanda wa Davide. Mu kiakia kipungo Davide badi na kondo k’eshimba kaluile. Kiakia kinangu kia kutshibila bantu kiimu kibubi takibadi akilesha’shi Davide badi muntu munyingie mu kikudi nya. Su muntu atshibila bangi kiimu ki bukopo abilesha’shi kipuano kiaye na Yehowa ta ki buwa. w21.10 12 ¶17-18; 13 ¶20

Muyile ano mayi a kifundue kietu kia lelo, tubauku biatudi balombene kuambula Yehowa, muikale kileshesho kikata kia buiselele. Tui balombene, na abitungu tuikale beselele mu muikelo wetu. Bino bi kumueneka bu bibukopo muanda tui bantu bashi bapuidikie. Na Mpyele mutumibua namu badi shi mupuidikie naye namu badi mukite bilubilo bi bungi, kileshesho kiaye akilesha’shi tui balombene kuikala beselele. Bantu pabanangushena muntu eselele a bapuandikisha bantu bashi na muloo, abafuala bilamba bia lulanguilo na abekala nsaa yoso anka bashingile. Anka bantu beselele tabekala bino nya. Muinyi Yehowa eselele, abamuitanyina bu “Efile Mukulu a muulo.” (1 Tim. 1:11) Boso abamulanguila bena “muloo.” (Mis. 144:15) Yesu badi mutopekie baaba boso babadi abafuala makandio ala, bua kulesha’shi mbelekene na bangi bantu na babadi abakitshi mianda ya kalolo bua’shi bantu be bamone. (Mat. 6:1; Mak. 12:38) Atue bena Kidishitu atuimena nka pa kiakia akiakula Bible pabitale kuuka akilesha buiselele. Tuibashinkamishe’shi Efile Mukulu etu eselele na sha kifulo nta mulombene kuituelela miya yatushi balombene koobesha kukokiela nya. w21.12 2 ¶1, 3

Na kalolo koso, Efile Mukulu muitupe bia buntu bi bungi. Pangi kimune kia ku bino bioso bia buntu kikile bukata, nyi ngobesha ya kumulanguila. Atulesha’shi tuibafule Yehowa ‘p’atulama miiya yaaye.’ (1 Yo. 5:3) Umune wa ku miya aikumina Yehowa’shi tutumikile, nyi nguno ubadi Yesu muitupe wa kuikasha bantu bu balongi, na kuibabatshisha. (Mat. 28:19) Na dingi, muitutumine eyi dia kuifulena. (Yo. 13:35) Yehowa akukila boso abakokiela ku miya yaye mu kifuko kia balanguidi baye be mu nsenga ishima bua loso. (Mis. 15:1, 2) Lesha bangi kifulo. Kifulo nyi eyikashi dikata dia Yehowa. (1 Yo. 4:8) Yehowa badi muituleshe kifulo kumpala kuatudia kumuuka. (1 Yo. 4:9, 10) Atumuambula p’atulesha bangi kifulo. (Ef. 5:1) Umune wa ku mishindo i buwa watudia kulesha bantu kifulo, nyi kuibalongiesha pabitale Yehowa pa kuki nsaa. (Mat. 9:36-38) Su tubebikitshi, atuibapa lukulupilo lua kuikala mu kifuko ki’Efile Mukulu. w21.08 5-6 ¶13-14

Kifulo kikata kia Yesu bua Yehowa, nkimutakule buadia kuilambula bua Nshaye na buetu. (Yo. 14:31) Yesu balesheshe bi bukata bua kifulo kiaye bua bantu, mu mushindo ubaadi nshalelo aaye pano pa nsenga. Efuku dioso, baadi alesha kifulo na lusa sunga pa baabadi abamushikua kui bangi. Mushindo wi na muulo ukata ubaadi muleshe bi kifulo kiaye bua bantu, mpabaadi ebalongiesha pabitale Bufumu bu’Efile Mukulu. (Luk. 4:43, 44) Yesu baadi muleshe kifulo kiaye kia kuipaana bu’Efile Mukulu, na bua bantu paye kukumiina kukienga na kufua ku maasa a bankitshishi a bubi. Mmufunguile ooso a kuatudi mushindo wadia kupeta muwa wa ikalayika. Tui belambule atue banabene kui Yehowa na tuabatshishibua ku muanda tui bafule Nshetu a muiyilu. Biabia, nka bu Yesu abitungu tuleshe kifulo bua Yehowa mu mushindo w’atukitshiina bantu mianda. Yowano mutumibua bafundile’shi: “Mwanda shyaafulu mukwabo aamono, ta mulombeene kufula Efile Mukulu aashyaamono nya.”​—1 Yo. 4:20. w22.03 10 ¶8-9

Atusankila kuela nteko na kubadika Bible. Anka tabikala bibofule nsaa yoso nya, nshalelo etu muule na bibungi biakukita, nyi buakinyi bi kuituelela bukopo buatudia kulumbula programe etu bua kupeta nsaa yakukita mianda ya mu kikudi. Midimo ya ku mbidi, mashito a mu kifuko mpa na ingi mianda ilombene kumueneka bu ina muulo, i kuituata nsaa ibungi tuabanga kupusha bu atue bena bibungi bia kukita na kukutua bia kukita luteko, kuilongiela, na kunangushena. Nkulombene kuikala kingi kintu dingi ki kuituata nsaa yetu. Tui balombene kuikala na bibingi bia kukita biatumono atue banabene bu bishi bubi, kadi bilombene kuitufuishila lukalakashi, na kuituata nsaa yoso yatudi balombene kuifubuila kui Yehowa. Bu kileshesho, tu bande kutala muanda utale kukisha kapapi. Kupeta nsaa ya kuisankisha kuibuwa, Su tuasangula kukisha kapapi kui nka buwa. Anka su tuakisha nsaa ibungi kuanka atukutua nsaa ya kulanguila Yehowa. Abitungu tutentekieshe’shi kukisha kapapi ta nkintu kikambe kuikala na muulo ukata nya.​—Nki. 25:27; 1 Tim. 4:8. w22.01 26 ¶2-3

Nsaa ibadi Yehowa muelele bena Isaleele muiya bua kufula bantu nabo, tabadi muakule’shi nka penda bantu ba kisamba kia Isaleele na ekoba dimumune nabo nya. Badi muibalungule dingi bua’shi bafule benyi be munkatshi muabo uno nyi mukandu utokane kalolo watupete mu Beena-Levi 19:33, 34. Yehowa badi akumina’shi bena Isaleele bakitshine benyi mianda nka bu “ban’akibundi,” na bebafule nka bu abo banabene. Bu kileshesho, bena Isaleele babadi bape benyi na balanda matalua akupumbuula mu mafuba bua’shi nabo namu bapetele muabi ku ino mpango ya uno muiya. (Lv. 19:9, 10) Eyi dia kulonda pabitale benyi dina muulo mpa na kui bena Kidishitu lelo uno. (Luk. 10:30-37) Mushindo kinyi? Lelo uno kui midiyo ya bantu bakatukie kuabo bangi be mpa na mu kibundi kienu muamua. Nyi buakinyi bi na muulo kuatudi buatudia kukitshina bano bana balume, bana bakashi, na bana mianda na kanemo kakata. w21.12 12 ¶16

Nsaa yatunyisha kukimba bukunkushi bua Yehowa binobino, atunyisha kuikala na kishinkamisho mu bukome buaye’shi aketupaasha mu mafuku aafiki. Abitungu tuikale na lukumino na tuipaane bua kukulupila mui Yehowa. Na kuteka mukata eetu a mudimo bua’shi etupe mushindo watudi balombene kutuela mu bikongeeno bikata na bipeela, na kushintuula programe eetu bua’shi tumone bia kutuela mu bisangilo bioso, na kukisha nsaa ibungi mu mudimo wa bulungudi. Tubande kupuandikisha’shi su mukata etu a mudimo apela biatumutekie na etubinga ku mudimo waye. Atuikala na lukumino’shi Yehowa ta mulombene kuitulekiela sunga kuitusumbusheena nashi misuusa yoso ekala etulombesha nkalo yetu i na muulo su? (Eb. 13:5) Bafubi ba Yehowa bebungi be mu mudimo wa nsaa yoso, mbalombene kuitulungula mianda yabadi bamone ailesha mushindo wibakuashe Yehowa nsaa ibabadi mu lukalo lui bukopo. Yehowa e na lulamato. Bu Yehowa biadi ku lupese luetu ta tuina kabingilo ka kutshina mianda ayikakitshika mu mafuku aafiki nya. Efile Mukulu etu ta ketusumbusheena nya bu biatudi batuule mianda yaye pa mbalo ya kumpala mu nshalelo etu. w22.01 7 ¶16-17

Lukulupilo luetu mui bakulu ndulombene kutompibua mushindo kinyi? Tupuandikishe’shi muntu batushibua mu kakongie nkuuku eetu a p’eshimba. Tui kuiyipusha su bakulu mbataluule mianda yooso, sunga’shi, bino bibaabatshibi kilumbu, ngi bibadia namu kuikitshiba Yehowa. Nkinyi kia kuitukuasha buatudia kushaala nka na mueneno eetu e buwa bua kino kitshibilo? Abitungu tutentekieshe’shi, kutuusha kua muntu mu kakongie, nyi mpango ya Yehowa. I kuanka bua buwa bua kakongie, na ngilombene kukuasha muntu mukite muluisho. Su muntu mukite muluisho sh’elanga kuishimba bamutadiila mu kakongie, mmulombene kutakula bangi bua kukita miluisho. (Nga. 5:9) Kukatusha biabia, pangi nta mmulombene kutundula bukata bua muluisho waye nya, na ta mmulombene kumona kabingilo ka kushintula binangu na bikitshiino biaye, buadia kukuminyibua dingi na Yehowa. (Mul. 8:11) Tui balombene kushinkamisha’shi, nsaa ayitaluula bakulu su muntu mmulombene kutushibua mu kakongie, abataa buabua bushito buabadi nabo na muulo. w22.02 5-6 ¶13-14

Bi buwa kuikala na luishinko na kalolo, nsaa ayipele muntu kutumikila elango dia mu Bible, musango wa kumpala. T’abitungu’shi mukulu, afiite munda su elango diaye nta mbedipushe na kuiditumikila nya. Biabia, nsaa ayele mukulu luteko luaye lua pa bupenka, bi buwa atekie Yehowa buadia kuelela yawa muntu aabalanga miabi, na kumukuasha buadia kupusha keenyi kabingilo ka ki’abamupeela elango na kuiditumikila. Pangi yawa abadi balangie, e na lukalo na nsaa yadia kunangushena ku kiabadi bamulungule. Su mukulu aakula na luishinko na kalolo, bi kuikala bibofule bua’shi mukuetu ateemeshe elango di’amupa. Eyendo’shi, abitungu elango ditukile nka mu Eyi di’Efile Mukulu. Kepatshila k’elango ta mpenda ka kutuusha bipeta, anka, dingi, nka “kusangasha eshimba.”​—Nki. 27:9. w22.02 18 ¶17; 19 ¶19

Nsaa y’atutekie Yehowa bukome bua kunyingila mianda yetu sunga bua kuleka kukita kintu kampanda kishikue Yehowa, tui kumona bu ata nsaa i bungi bua kualula nteko yetu. Buakinyi Yehowa t’alulaa nteko yetu yoso musango umune? Amonaa nteko yatuele n’eshimba di’etu dioso bu kishinkamisho kia’shi tui na lukumino. (Eb. 11:6) Nsaa y’atutekie Yehowa bukuashi bua kumusankisha, akuminaa kumona bi’atuikitshisha bua kukita mianda muyile nteko yetu, na kukita kikiebe ki’eshimba diaye. (1 Yo. 3:22) Biabia, abitungu tuleshe luishinko na tukite mianda muyile nteko yetu, p’atukiebe kukambila kiubishi kampanda ki bubi sunga kubofula kampanda. Yesu muitukuashe bua kupusha’shi ingi nteko yetu t’abeyalulaa musango umune nya. Bakuile’shi: “Tekaayi, abenupa; kimbayi, anupete; kookolayi, abeenushitwila. Mwanda, ooso atekye, apete; akimbi, amono, akookola, abamushitwila.”​—Mat. 7:7, 8. w21.08 8 ¶1; 10 ¶9-10

Sunga mbiabia, bua kunyingisha lukumino lobe mui Mupangi, abitungu otungunukie na kuilongiela Eyi d’Efile Mukulu. (Yos. 1:8) Nangushena dingi, ku matemuki oso a mu Bible apue kulombana na bipushene mianda ya badi bafunde. Kukita bino akunyigisha lukumino lobe’shi kui Mupangi sha kifulo na binangu muitupangie na muyokiele Bible. (2 Tim. 3:14; 2 Mp. 1:21) Nsaa yuelongiela Eyi di’Efile Mukulu, tala mushindo ulombene nkukuasha malango e muanka. Bu kileshesho, Bible badi mutemukie takudi bipua bi bungi’shi kifulo kia nfwalanga ki masaku na kino ngi akifuishaa “makyenga e bungi.” (1 Tim. 6:9, 10; Nki. 28:20; Mat. 6:24) We kupeta angi mayi a kulonda e mu Bible e nkukuasha su? Nsaa yatunyisha kusankila malango oso e mu Bible, atunyisha kukulupila’ shi Mupangi etu sha kifulo na binangu auku kiakia kilombene kuituikasha bibuwa, na atutungunuka na kutumikila malango aye. (Shak. 1:5) Bu kipeta, atuikala na muloo wi bungi mu nshalelo etu.​—Yesh. 48:17, 18. w21.08 17-18 ¶12-13

Su tanudi bantu banunu, shinkamishayi’shi Yehowa atentekieshaa mudimo oso wanudi bakite mafuku akile. Nui bakuatshishene mudimo wa bulungudi na katshintshi. Nuibanyingile mianda i bungi ifikie mpa na mu kuinuinyongosha kadi nuakaluila miya ilulame ya mu Bible, nuashala na lulamato ku mashito e na muulo mu ndumbuluilo a Yehowa, na kulongiesha bangi. Nui bakite muenu moso bua kulama butale na kuiwubidishena na kushintuluka kua mu ndumbuluilo a Yehowa. Nui bakuatshishene bangi na kuibanyingisha buabadia kutungunuka na mudimo wa nsaa yoso. Yehowa mmuinufule ngofu p’anue kushala na lulamato. Yehowa mmule’shi: “Taasumbusheena bamulamate” nya! (Mis. 37:28) Yehowa enushinkamiisha’shi: “Nenutwaala mpaa naa paanupete nyeene itooka.” (Yesh. 46:4) Biabia, tanunangushenanga’shi muanda nubapu kununupa, tanuki na muulo mu ndumbuluilo a Yehowa nya. Nui nka na muulo ukata! w21.09 3 ¶4

Yehowa etuleshaa lusa muanda e na binangu bibungi. Muanda Bible akula’shi: “Binangu bia muiyilu” mbia “lusa na bikuba bibuwa.” (Shak. 3:17) Nka bu nambutuile sha lusa, Yehowa auku’shi lusa luaye alukuasha bana baye. (Yesh. 49:15) Muanda Yehowa aleshaa muilo waye lusa, be na lukulupilo lua mafuku aafiki sunga mbiabashi bapuidikie. Biabia binangu bia Yehowa ta bi na nfudiilo nya, nyi buakinyi abimutakulaa bua kulesha bangi nsaa yadi na kabingilo ka kuibikita. Biabia Yehowa auku nsaa yadi mulombene kulesha sunga kukutua kulesha lusa. Bu biadi na binangu ta mulombene kupela kutopeka muntu bakitshi bibubi pa muanda wa lusa nya. Tupuandikishe’shi mufubi a Efile Mukulu baata kitshibilo kiakuikala na muikelo wa bukitekite. Tuibalombene kukita kinyi? Mpoolo badi muyokielue bafundile’shi, “tanwikalanga bukuuku naye.” (1 Kod. 5:11, Kilombeeno Kipya 2014) Nkitshishi a bubi shelanga kuishimba nyi atushibua mu kakongie. Kino kikitshino akikaluila bakuetu balume na bakashi bena lulamato, na kulesha mashinda alulame a Yehowa. w21.10 9-10 ¶7-8

Atulanguila Yehowa nsaa yatutusha bia buuntu bietu bua kukuatshishena mudimo ya Bufumu. Bena Isaleele babadi abatuadila Yehowa bia buuntu biabo nsaa yabende mu kutuela ku musangeelo wa ku kipua. (Miy. 16:16) Bantu boso babadi abatuala bia buuntu muyile nshalelo aabo, p’abo kukita bino babadi abalesha’shi bena lutumbu bua mpango yoso ya mianda ya mu kikudi yabadi bebakitshine kui Yehowa. Tui kulesha kifulo kietu na lutumbu luetu bua Yehowa bua bintu bioso bia mu kikudi biakuete kuitupa mushindo kinyi? Umune wa ku mishindo, nyi nkutusha bia buuntu bietu bua kukuatshina kakongie na mudimo wa mu nsenga ishima muyile kumona kuetu. Mpoolo mutumibua bakuile bino pabitale uno muanda: “Mwanda su kusasakeeta kupaana kwi kudi, kwi buwa muyiile kiakia kii na muntu, kushii muyiile kiakia kiashii nakio.” (2 Kod. 8:4, 12, Kilombeeno Kipya 2014) Yehowa ena muloo pabitale biatudi balombene kutuusha n’eshimba dietu dioso sunga biekala bipela.​—Mak. 12:42-44. w22.03 24 ¶13

Bakulu tambalombene kukatusha nkalakashi yooso yabafumankana nayo kui bafubi ba Yehowa nya. Sunga mbiabia Yehowa akumiina’shi bakulu bakite muyiile ngobesha yabo bua kunyingisha na kukaluila mikooko yaaye. Mushindo kinyi ulombene bakulu bena bibungi bia kukita efuku dioso kupeta nsaa yabadia kukuasha bakuabo balume na bakashi be mu lukalo? Kulonda kileshesho kia Mpoolo mutumibua. Mpoolo baadi akimbi mishindo yooso ya kutumbula bakuabo na kui banyingisha. Bakulu abakitshi kalolo pa kulonda kileshesho kiaye kia kifulo, nsaa yabakitshina bafubi ba Yehowa mianda na kifulo kioso. (1 Tes. 2:7) Mpoolo baadi mushinkamiishe bakuabo balume na bakashi’shi mmuibafule, na’shi Yehowa’nyi mmuibafule. (2 Kod. 2:4; Ef. 2:4, 5) Mpoolo baadi amono bano booso babaadi mu kakongie bu bakuuku baaye, na kukisha nabo nsaa pamune. Balesheshe’shi muibakulupile pa kuibalungula pa butooka pabitale moo na kubofula kuaye. (2 Kod. 7:5; 1 Tim. 1:15) Biabia Mpoolo tabaadi mutuule binangu nka ku nkalakashi yaaye nya. Anka baadi akumiina kukuasha bakuabo. w22.03 28 ¶9-10