Mueshi wa 9

Bwa bangi bantu, malongyesha a Yesu t’aabadi akumbane. Babadi abakumina’shi akite bikile paapa. Anka nsaa ibadi mupele kukita kitundwilo kibabadi abakyebe’shi akite, abakokwele. (Mat. 16:4) Bifundwe abyakula kinyi? Pabitale Mesiya, mutemuki Yeshaya bafundjile’shi: “Teele musaase, taakaamish’eyi, taabapusha eyi dyaaye mu miseese.” (Yesh. 42:1, 2) Yesu badi akitshi mudimo waye wa bulungudi kushi kukaka binangu bya bantu kwadi. Tabadi mwibakye ntempelo na tabadi mufwale bilamba bibadi abifwala bakata ba bipwilo sunga kukumina’shi bantu bamwitamine mu myasu ya bakata ba bipwilo. Sunga pabadi muwa waye mu masaku, Yesu bapelele kukita kilengyeleshi bwa kusankisha Mfumu Erode, badi akyebe kwikimona. (Luk. 23:8-11) Yesu badi mukite bingi bilengyeleshi, anka mwanda ubadi na muulo kwadi, nkulungula mukandu wibuwa. Balungwile balongi baye’shi, “kyakya nyi kinfwishe.”​—Mak. 1:38. w21.05 4 ¶9-10

Atukimbi baba boso be na “mashimba alombane bua muwa wa loso.” (Bik. 13:48, NWT) Bua kukuasha bano boso bantu bua’shi bafikie balongi ba Yesu, abitungu tuibakuashe bua (1) kupusha, (2) kukumina, na (3) kutumikila bioso bi’abalongo mu Bible. (Kol. 2:6, 7; 1 Tes. 2:13) Muntu oso mu kakongye mulombene kukuasha balongi ba Bible, pa kuibalesha kifulo na kuibakukila na muloo oso nsaa y’abafiki mu bisangilo. (Yo. 13:35) Yawa alongo Bible na muntu, abitungu dingi akishe nsaa i bungi na akite muaye moso bua kukuasha mulongi a Bible bua kushintula nkumino sunga bikitshino “bishimate ngofu.” (2 Kod. 10:4, 5, NWT) Mbilombene kuata mafuku e bungi bua’shi muntu ashintule nshalelo aye bua kukumbasha kepatshila ka kubatshishibua. Anka kukita bino kui na muulo. w21.07 3 ¶6

Tui na bishinkamisho mu binangu bietu’shi tukuete kulambukisha bia binyibinyi? Na’shi kileshesho kia lulanguilo akilondo ba Temue ba Yehowa lelo uno nyi kiinyi kiabadi bakumine kui Yehowa su? Mpoolo mutumibua badi na kishinkamisho kikata kia bia binyibinyi. (1 Tes. 1:5) Kino kishinkamisho takibadi kimeene penda ku bibadi apusha nya. Mpoolo badi mulongi ebuwa a Eyi di’Efile Mukulu. Badi mukumine’shi “kifundwe kyoso nkiyokielwe kwi Efile Mukulu.” (2 Tim. 3:16, Kilombeeno Kipya 2014) Badi mulongie kinyi? Mu bifundue Mpoolo badi musangane mianda ailesha’shi Yesu nyi Mesiya mulayibue, anka bakata ba bena Yunda abadi bate kitshibilo kia kupela ku mutundula bu Mesiya. Bino bipuilo bioso bia bulamalama abiamba’shi bikuete kufubila Efile Mukulu, anka abakitshi mianda yabadi bashikue kui Efile Mukulu. (Tt. 1:16) Mu kuilekena na bano bantu, Mpoolo ntamusangule kipindi kia mianda kampanda mu Eyi di’Efile Mukulu kia kutumikila na kingi ki’shi kia kutumikila nya. Badi alongiesha na kutumikila “elango dioso di’Efile Mukulu.”​—Bik. 20:27, Esambi Dipya 2015. w21.10 18 ¶1-2

Patukunu na ku myamina mema, abitungu tushingule mudimo winao Efile Mukulu. (1 Kod. 3:6, 7) Yehowa ataa bantu boso na muulo. Mwitupe kinemo kya kufuba pamune na Mwan’aye bwa kubunga bantu ba mu miilo yoso kumpala kwa’shi nfudilo afikye. (Ang. 2:7) Mudimo wa bulungudi aupasha myuwa ya bantu. Byabya tufubeyi boso pamune bwa kukumbasha uno mudimo, sunga byekala’shi, ta natwe boso abafwisha bantu mu ndumbulwilo a Yehowa. T’atuuku bungi bwa bantu abutungu kukwasha be mu uno ndubulwilo a Satana nya. Anka Yehowa e kufubisha oso akwatudi bwa’shi tukwashe bano bantu. Andreas mushale mu Bolivie amba’shi: “Nauku’shi nsaa yamono muntu alongo Bible na kubatshishibwa, nyi mbipeta bya bantu boso bafube pamune bwa kumukwasha.” Abitungu tulame uno mweneno mu mudimo wa bulungudi. Su tubebikitshi, Yehowa etwelela myabi na mudimo wetu wa bulungudi awitupa muloo wi bungi. w21.05 19 ¶19-20

Mpibwe ekalaa na kepatshila kamune​—kukwata sunga kwipa nyema. Nka bu bibadi bileshe umune a ku ba kuuku be bubi ba Yobo, mpibwe afubishaa miteo ilekene. (Yob. 18:8-10) Mpibwe akakilaa nyema ku muteo waye naminyi? Alongaa yawa nyema. Ende kunyi? Akuminaa kudya kinyi? Muteo kinyi washa kutundula asuka? Satana enka bu uno mpibwe? Etulongaa. Alaminaa kw’atwende na kyatudi bafule. Akupu, ate muteo wakulupila’shi atukwatshika. Anka, Bible etushinkamisha’shi, su twakwatshika, twi kuposoka. Na etulongyesha bya kudimukila ino miteo. Miteo ibidi ikata ya Satana nyi kwitatula na lwabi. Satana mumone’shi ino miteo i buwa mwanda mupwe kwiyifubisha munda mwa bipwa binunu. Enka bu mpibwe a tonyi etukakila mu muteo sunga mu bukondja. (Mis. 91:3) Anka, t’abitungu’shi tukwatshibwe na Satana. Bwakinyi? Mwanda Yehowa mwitufumbwile mayele aafubishaa Satana.​—2 Kod. 2:11. w21.06 14 ¶1-2

Bantu banunu be na lulamato, be na kinemo nka bu mabue a muulo ukata. Eyi di’Efile Mukulu adipuandikisha nyene itooka bu lubango lua kinemo. (Nki. 20:29) Bi kuikala bibofule bua kumona ano mabue a muulo bu ashi na kinemo. Bansongua abaata bantu banunu na kinemo, be kupeta miabi ibungi kukila bupeta. Bantu banunu be na lulamato, be na muulo ku meso kua Yehowa Efile Mukulu. Ebamonaa binyibinyi bu bantu be mu binangu biaye, ebawuku kalolo na ataa ngikashi yabo ibuwa na muulo. Yehowa ekalaa na muloo p’amono bantu banunu, abalungula bansongua binangu biabadi bapete mund’a bipua bibungi biabadi bafube na lulamato. (Yob. 12:12; Nki. 1:1-4) Yehowa ataa dingi kunyingila kuabo na muulo. (Mal. 3:16) Mu nshalelo aabo babaadi bapete namu’nyi nkalakashi; kadi ta mbashimishe lukumiino luabo kui Yehowa nya. Lukulupilo luabo lua mafuku aafiki ndunyingie ngofu kukila pa babalongiele bia binyibinyi. Yehowa mmuibafule ngofu muanda baki’abatungunuka na kulungula eshina diaye “sunga mbitabadi banunu.”​—Mis. 92:12-15. w21.09 2 ¶2-3

Bi buwa tuikale atutalula binangu bietu nsaa na nsaa. We kuiyipusha’shi: ‘Nepushaa kalolo penda nsaa yampuandisha’shi ne mukile bangi su? Nkuete kufuba ngofu mu kakongye bua’shi bangi bammone bu’mi mukile bangi sunga bu’mi e na muulo su? Su nafubu ngofu bua kusankisha Yehowa?’ Bible etutosha kuipuandikisha na bangi. Buakinyi? Kabingilo kamune nka’shi, su atunangushena’shi tuibakile bakuetu, atuikala na kuitatula. Na dingi, su atupuandikisha’shi bakuetu mbetukile, tui kubofula. (Lom. 12:3) Abitungu tutentekieshe’shi Yehowa muitukakie kuadi kushi muanda’shi tui buwa, atuakula kalolo, sunga muanda wa’shi bantu be bungi mbetukumine, anka pa muanda wa’shi atukumina kumufula na kutemesha Muan’aye.​—Yo. 6:44; 1 Kod. 1:26-31. w21.07 14-15 ¶3-4

Bua kuibikita, abitungu tutekie, tulongie Eyi di’Efile Mukulu na kuidinangushena. Tungunuka na kukita ino mianda, na kuteka Yehowa bukuashi. Kikudi kiaye ki selele akikukuasha bua kukambila kikudi kia kuipuandikisha na bangi. Yehowa akukuasha dingi bua kutundula nsaa y’obanga kuikala na luabi sunga kuitatula, na nkukuasha bua’shi oshintulukie musango umune. (2 Mya. 6:29, 30) Yehowa auku bi muishimba dietu. Auku dingi ngoshi yatukuete kulua bua kukambila bukitshishi bui bubi bua mu ino nsenga na kukutua kuetu kua kupuidika. Apamono Yehowa mushindo w’atuitatshisha bua kukambila ino mianda, kifulo kiaye buetu akitama. Bua kupusha bi’epusha buetu, Yehowa mufubishe kileshesho kia kifulo ki pankatshi pa muana na nyin’aye. (Yesh. 49:15) Tui na muloo wakuka’shi Yehowa muitufule ngofu nsaa y’amono atukitshi muetu moso bua kumufubila! w21.07 24-25 ¶17-19

Tui kutamisha muloo wetu p’atue kuipana bua kukita mudimo oso wabetupa mu mudimo wa Yehowa. Abitungu kuipana mu mudimo wa mukandu wi buwa na mu midimo ya mu kakongye. (Bik. 18:5; Eb. 10:24, 25) Bua kuenda mu bisangilo, abitungu kuilumbula bua kutusha ngalulo i buwa ayinyingisha ayitukila mu mukanda watulongo. Ata mudimo oso wabakupa wa bisangilo bia munkatshi a lubingo na muulo. Su oteka bua’shi bakukuashe na ingi midimo ya mu kakongye, wekala weyilombasha kalolo pa nsaa. Tomonanga mudimo oso wabadi bakupe bu aukuata nsaa nya, ikala weukitshi kalolo. (Nki. 22:29) P’onyisha kuipana mu midimo ya mu kikudi na mu midimo yabakupa, onyisha kuenda kumpala na muloo oobe autama. (Nga. 6:4) Okamono’shi mbibofule bua kusanka na bangi p’abapete mashito odilanga kupeta.​—Nga. 5:26. w21.08 22 ¶11

Tuekalanga na kuitatula, kumina Yehowa a kulongieshe. Nka bilombene mishila ya kuishimba ina maladi kukutshishua eshimba kufuba kalolo, nyi bilombene namu kuitatula kukutshishua eshimba dietu dia mu kinfuanyi kukumina buludiki bua Yehowa. Ba Fadiseo babadi na kuitatula babapelele pa butooka kutundula bishinkamisho abilesha’shi Yesu badi na kikudi ki’Efile Mukulu na’shi badi Muana a Efile Mukulu. (Yo. 12:37-40) Kuno kuitatula ku badi masaku akata muanda kubadi kuibakutshishue kupeta muwa wa ikalayika. (Mat. 23:13, 33) Biabia bina muulo tutungunukie na kulekiala Eyi di’Efile Mukulu na kikudi kiaye bua’shi kituludikie, mu ngielelo etu a binangu na mu bitshibilo biatuata! Pa muanda wa’shi Shake badi muiyishe badi mukumine kulongieshibua na Yehowa. Na dingi, pa muanda wa’shi badi na kuiyisha badi mufikie mulongieshi ebuwa. w22.01 10 ¶7

Su tualonda dino elango, na ‘kuikala atutekye na mufwaka,’ atuikala bashinkamishe’shi Nshetu e muiyilu etupusha na alula ku nteko yetu. (Kol. 4:2, EEM) Sunga luteko luetu lua mueneka bu lubayisha kushi lualulo, Yehowa mmulee’shi akalula pa “kipindji kikumbane.” (Eb. 4:16) Nyi buakinyi t’abitungu tutopekie Yehowa nsaa y’atumono’shi lualulo t’alufikie bukidi bu bi’atupuandikishanga. Bu kileshesho, be bungi mbapue kuteka munda mua bipua bi bungi bua’shi Ndumbuluilo a Efile Mukulu afudishe uno ndumbuluilo e bubi. Ta bi bubi, muanda Yesu badi mpa na muambe’shi tutekie bua uno muanda. (Mat. 6:10) Su tuashimisha lukumino luetu mui Efile Mukulu muanda wa’shi nfudilo tangifikie bu biatutengielanga, nyi nkukutua kua binangu! (Ab. 2:3; Mat. 24:44) Atulesha’shi tui na kinangu, pa kutungunuka na kutengiela Yehowa na kumuteka na lukumino. Nfudilo, ayikafiki pa kipindi kikumbane muanda Yehowa mmupue kusangula “efuku na nguba,” diayifiki. Na diadia efuku adikekala di buwa bua bantu boso.​—Mat. 24:36; 2 Mp. 3:15. w21.08 10 ¶10-11

Bantu banunu beyishe abauku’shi babapu kukula na nta mbalombene kukita bi bungi, bu bibaabadi abakitshi kumpala nya. Tubandeyi kutala kileshesho kia bakunkushi betu ba bifunda. P’abalombasha bipua 70, abebatekaa buabadia kukita ingi midimo. Bino bi kuibakalakasha muanda, mbafule ano mashito bua kufubila bakuabo. Anka mbawukie’shi bansongualume, be na lukalo lua kupasukilua bua kukita wawa mudimo. Abalesha dino eyikashi di mumune na dia bena-Levi ba mu Isaleele a kala. Nsaa ibaabadi abalombasha bipua 50, babaadi abebatekie bua kuleka kufuba mudimo wabo mu ntempelo. Muloo wa bantu banunu bena-Levi, ta ubaadi wimene nka ku mashito e pa buawo abaabadi nawo nya. Nsaa y’abalekie yaya midimo, abekitshisha muabo moso bua kukuasha bansongua bua’shi bebapiane mu yaya midimo. (Mba. 8:25, 26) Lelo uno apalombasha bakunkushi ba bifunda bipua 70, abatushaa bukuashi bui bungi na abanyingishaa tukongye. w21.09 8-9 ¶3-4

Yesu bakuile muanda aunyingisha pabitale muana ntomboshi watupete mu Luka 15:11-32. Nsongualume baadi mutombokiele nshaye, aye nkukatuka na ku nshibo bayiile mu luendo “kuiumbo di kula.” Kuakua babangile kuikala na nshalelo e butete. Nsaa ibaadi iluile nshalelo aaye, babangile kunangushena pabitale bitshibilo bibubi bibaadi muate. Basangene’shi nshalelo aaye baadi buwa ngofu pabaadi ku nshibo kua nshaye. Yesu bakuile’shi uno nsongualume, “binangu bibamualukiile.” Batshile kitshibilo kia kualukiila ku nshibo na kuteka lusa kui nshaye. Uno muana badi musangane’shi bitshibilo bibungi bibaadi muate bibaadi bubi. Baadi mushintuule mueneno aaye! Uno muana mushimine baadi muilangie kuishimba mu binyibinyi ku kiakia kibaadi mukite. Luno lukindi talui nka penda bu muanda wa kala aunyingisha nya. Uno muanda aukuasha bakulu ba mu kakongie ngofu awibakuasha nsaa y’abekitshisha bua kutundula su muntu mukite muluisho, mmuilangie kuishimba mu binyibinyi. w21.10 5 ¶14-15

Nkinyi kish’akikatshinkishibua sunga kukatushibua? Mpoolo mutumibua aakula’shi: “Bu byaatupete Bufumu bushii kusaanyishwa, . . . tufubileeyi nabwo Efile Mukulu, , na kukookyela, dingi na kutshiina.” (Eb. 12:28) Oolo, kunyima kua kutshinkisha bintu bioso, nka penda Bufumu bu’Efile Mukulu ngi abukashala. (Mis. 110:5, 6; Nda. 2:44) Ino nta nsaa ya kukisha bisumanga nya! Abitungu bantu basangule kia kukita: Su abasangula bua kutungunuka na kukuatshishena uno ndumbuluilo, abakabutudibua. Su abasangula bua kufubila Yehowa, na kuikitshisha buabadia kushintula nshalelo aabo, bua kukita kikiebe ki’eshimba di’Efile Mukulu, abakapete muwa wa ikalayika. (Eb. 12:25) Kukiila ku mudimo wetu wa bulungudi, tui kukuasha bantu buabadia kuata kitshibilo ki na muulo mu uno muanda. Na tui balombene kutungunuka na kutentekiesha mayi a Mfumu’etu Yesu aamba’shi: “Na uno mukandu wi buwa wa Bufumu aukalungulwa pa nsenga yoso yishaadibwe, bwa kulesha bu-kamonyi kwi maumbo ooso na kunyima nfudiilo ayikafiki.”​—Mat. 24:14, Kilombeeno kipya 2014. w21.09 19 ¶19-20

Bakulu, nui na mashito e pa buawo a kusamba balanguidi nenu be na bakuabo balekie kufubila Yehowa. (1 Tes. 5:14) Atayi mpàngo ya kuibanyingisha kumpala sunga kunyima kua bisangilo bia bena Kidishitu. Ebatembeleyi ku mashibo kuabo na kuteka n’abo pamune. Ikalayi anutuku n’abo mu bulungudi, na su kui mushindo nuibetanyine buabadia kutuela nenu mu lulanguilo lua mu kifuko. Bakulu, abitungu nuleshe mikooko ya Yehowa’shi, nukuete kukienga n’abo, anuibalesha lusa, nui bebafule, na anupasukila nkalo yabo. (1 Tes. 2:7, 8) Yehowa “taakumiina’shi kushimine muntu su ngumune, anka’shi booso bafikye mu kwilanga.” (2 Mp. 3:9) Sunga’shi muntu akita muluisho ukata, muwa waye winka na muulo ku meso ku’Efile Mukulu. Nangushena bukata bua muulo wadi mufute, mulambu wa nkuulo ya Muan’aye aadi mufule bua miluisho ya oso a kuatudi. Yehowa mmuwole eyasa na lusa loso, bua kukuasha boso balekie kumufubila buabadia kualuka kuadi. Na Mmukulupile’shi abakakumina kukita bino. Nka bu biatudi balombene kuibimona mu lukindi lua Yesu lua muana mushimine.​—Luk. 15:11-32. w21.09 30-31 ¶17-19

Bikuikala naminyi su maladi na kukutua kua mbidi bukome ta bikukuasha’nyi biodia kulungula mukandu wi buwa bu biuekalanga okitshi kumpala? We mulombene kutungunuka na kuikala na muloo muanda biabia biokuete kulungula abikuatshishena mudimo wa mu nsenga ishama. Tubande kutala kileshesho kia Mfumu Davide nsaa ibadi aye na bantu baye bende bua kukalua ngoshi bua bifuko na bintu biabo bibabadi baate kui bena Amaleke. Bana balume nkama ibidi babadi bakokie ngofu tababadi biakulua ngoshi nya, nyi abo nkushala kunyima bua kulama mabofu abo. Kunyima kua Davide na bantu baye kutshokola ngoshi na kunyenga bintu bia beshikuanyi, badi mutume eyi’shi baba basalayi balue ngoshi na baba babadi bashale bua kulama mabofu beabishene bintu nka mu mushindo umune. (1 Sam. 30:21-25) Bi mumune na mudimo wetu wa kuikasha bantu bu balongi mu nsenga ishama. We mulombene kukutua ngobesha ya kukita bi bungi mu mudimo wa bulungudi bu biokitanga nkumpala anka we kukita muyile ngobesha yobe, na we mulombene kutungunuka na kuikala na muloo nsaa yoso pokuasha muntu mupia umune buadia kuuka Yehowa na buadia kubatshishibua. Yehowa amona mushindo wa tuikitshisha bua kumufubila, na mushindo watudi bamufule, n’aye namu etupa efuto. Kuete kuitulongiesha dingi mushindo watudia kupeta muloo pabitale biatudia kukita mu mudimo wa bulungudi. (Yo. 14:12) Tui balombene kushinkamisha’shi Efile Mukulu aketukumina su tuatungunuka na kufuba kushi kukooka! w21.10 28 ¶15-17

Bu bi’atuende na kukula, tui balombene kubanga kutshina’shi ta tui balombene’nyi kufubisha bukome buetu boso, bua kufubila Yehowa bu bibatudi atukitshi kumpala. Pangi bi kuikala binyibinyi’shi, tatudi na bukome bupeela pe bu batudi nabo kumpala. Tui kufubisha binangu na mianda yatudi bamone bua kukuasha bansongua, bua’shi bafubishe ngobesha yabo yoso bua kupeta mashito apia. Abitungu bantu banunu, bekale beyishe su abakiebe kukuasha bansongua. Muntu muiyishe amonaa bangi bu be kunundu kuaye. (Fid. 2:3, 4) Bantu banunu be na kuiyisha abakuminaa’shi, kui mishindo i bungi ya kukita midimo, bipushene na mayi a kulonda a mu Bible. Dingi be na mueneno e buwa a mianda i baabadi bakite mafuku akile. (Mul. 7:10) Be na mianda i bungi yabadi balombene kulungula bana bakinga, na abauku’shi “mianda ya uno ndumbuluilo [ikuete kuenda na kushintuluka, NWT]” na abitungu beubidishene na ino nshalelo ipia.​—1 Kod. 7:31. w21.09 8 ¶1, 3

Yehowa muilekene na bano b’efile boso ba madimi, na ta mulombene kukumina’shi balanguidi baye bakite kintu su nkimune ki butete nya. Muanda aye eselele mu mianda yoso. Bino bibadi bipushikie kalolo mu bifundue biabasangana mu ka kilongo ka kilonda kia olo, kabadi kalamikibue ku kilamba kia tshite-muakuidi. Kubadi kufundibue mayi aamba’shi: “Bwiselele mbwa Yehowa.” (Efi. 28:36-38, NWT) Mukandu ubadi ufunde ku kano ka kilongo ka kilonda kia olo ubadi aushinkamisha bantu boso a beumono’shi Yehowa eselele binyibinyi. Bibadia kuikala naminyi kui muina Isaleele shibaadi na mushindo wa kumona kano ka kilongo ka olo muanda’shi ta mulombene kuifubuila pepi na tshite-muakuidi? Badia kukutua uno mukandu wina muulo su? Nya! Muina Isaleele oso badia kupusha uno mukandu bu bibabadi ababadika uno muiya kumpala kua bana balume, bakashi, mpa na bana. (Miy. 31:9-12) Su bodia kuikala panka bodi mulombene kupusha ano mayi aamba’shi: “Nami Yehowa Efile Mukulu enu, . . . yikalayi beeselele mwanda ami nee eeselele.” ‘Nuina kya kwikala beeselele mwanda ami Yehowa nee eeselele.’​—Lv. 11:44, 45; 20:7, 26. w21.12 3 ¶6-7

Bangi mbalombene kuikalakasha pabitale nkalo ya bintu bia ku mbidi. Bangi bekuikala bashale muiumbo mui bantu bebungi balanda na mushi mushindo wa kupeta mudimo. Bi kuibakalakasha buabadia kupeta makuta akupua nkalo ya bifuko biabo. Pangi winyi muntu ayikalanga na makuta a kupua nkalo ya mu kifuko kiabo tafuile, kifuko kiashala kushi muntu akuibakuatshishena. Pamutue pa kuikalakasha pabitale mianda yetu. Abitungu tukulupile mui Yehowa, na tutentekieshe’shi Nshetu sha kifulo Yehowa etushinkamisha’shi aketupasukila ku nkalo yetu ya bintu bia ku mbidi su tuatula mianda ya mu kikudi pa mbalo ya kumpala. (Mat. 6:32, 33) Aye alombasha nka milayilo yaye. (Miy. 8:4, 15, 16; Mis. 37:25) Su Yehowa adishaa tonyi na bilongo, tatui balombene kuikalakasha pabitale kia kudia na kia kufuala nya! (Mat. 6:26-30; Fid. 4:6, 7) Nka bu nshe bana shaa kalolo apasukila nkalo ya ku mbidi ya bana baye, kifulo akitakula Nshetu e muiyilu buadia kupasukila nkalo ya ku mbidi ya muilo waye. w21.12 17 ¶4-5; 18 ¶8

Tabadi bakukitshine muanda kampanda kui muntu kampanda, pangi mpa na kui muina Kidishitu nobe su? Tala kileshesho kia Yosefe sunga bibadi bakuabo bamukiengieshe. Batungunukile na kuipana mu mudimo wa Yehowa, na Yehowa badi mumuelele miabi bua luishinko na kunyingila kuaye. Muenda mafuku, Yosefe badi mufuile abadi bamuluishishe lusa na kumona abimuelela Yehowa miabi. (Kib. 45:5) Nka bu Yosefe, atunyingishibua p’atuifubuila pepi na Yehowa na kutula mianda yoso mu masa muaye. (Mis. 7:18; 73:28) Su okuete kunyingila kukutua kua kululama muanda wa’shi mbakuluishishe, tentekiesha’shi Yehowa e pepi na basha “mashimba asâsukye.” (Mis. 34:19, EEM) Mmukufule bua luishinko lobe na muanda wa’shi okuete kumusumbuila bushito bobe. (Mis. 55:23) Nyi Nsushi a be pa nsenga boso. Ta kui kintu su nkimune kiash’amono. (1 Mp. 3:12) Nsaa yodi mu nkalakashi yoshi biakupua obe nabene, okumina kutengiela Yehowa su? w21.08 11 ¶14; 12 ¶16

Tui balombene kufubisha nshalelo etu pakukita mianda ibuwa ilombene kusankisha Yehowa. Tuula mianda ina muulo pa mbalo ya kumpala. Ingi nsaa bua kufubisha nsaa yetu mu mushindo wibuwa, abitungu tusangule pankatshi pa midimo ibidi yatumono bu ibuwa atue banabene. Kileshesho kia Yesu pabadi mutembele Mariya na Maata ku nshibo kuabo akipatuula uno muanda kalolo. Kushi mpaka kutambula Yesu kubadi na muulo ukata kuadi, kubadi kuleshe’shi Maata atambula benyi nyi buakinyi badi muipane mu kuteeka bidibua bibungi. Mu yaya nsaa imune mukuabo mukashi Mariya badi mupetele miabi ibungi, muanda badi mushale pepi na Muanana atemesha malongiesha aye. Nsaa ibadi Maata akalakala bibadi abilesha’shi ena binangu bi buwa, anka Mariya badi musangule “kyakya kikile buwa.” (Luk. 10:38-42) Biabia, Mariya badi mulombene kuiluankana kiakia kidibua kibabadi badie yaya nsaa, anka tabadia kuiluankana malongiesha a Yesu nya. Anka bibadi bisangeele Mariya kukisha nsaa pamune na Yesu n’atue namu atusangeela kukisha nsaa pamune na Yehowa. w22.01 27 ¶5-6

Sunga bibamuekiele Akabe bu muiyishe kumpala kua Yehowa, kunyima muikelo waaye ubadi uleshe’shi tabaadi muilangie kuishimba mu binyibinyi nya. Tabaadi mukatushe lulanguilo lua Baale mu bufumu buaye nya. Na tabaadi munyingishe bangi buabadia kulanguila Yehowa nya. Kunyima kua lufu lua Akabe, Yehowa baadi muleeshe bibaadi anangushena pabitale uno muntu. Yehowa batumine mutemuki Yehu bamulunguile’shi: “muntu mubi.” (2 Mya. 19:1, 2, EEM) Tubande kunangushena: Su Akabe baadi muilangie kuishimba mu binyibinyi, mutemuki tabadia kumulesha bu muntu ebubi mushikue Yehowa nya. Mu kuakula kua kalolo, sunga bibaadi bileshe Akabe’shi benyongola ngofu, tabaadi muilangie mu binyibinyi nya. A nkinyi kiatudi balombene kulongiela ku kileshesho kia Akabe? Nsaa ibapushishe mukandu wa Eliya awamba’shi kifuko kiaye kioso kishima akinyokibuwa, batshile mpángo ya kuiyisha aye nabene. Ubaadi muanda wibuwa wa kukita. Anka bikitshino biaye bibalesheshe kunyima’shi, kuilanga kuaye takubaadi akutukila muishimba’ko. Kuilanga kuishimba kua binyibinyi, abitungu kukile kuakula penda kukanua’shi nenyongola bua kiandi mukite. w21.10 3 ¶4-5, 7-8

Yeeshaya baadi mutemuki, mbilombene kumueneka’shi na mukashi aye namu baadi na mudimo wa butemuki muanda babadi abamuitanyina’shi “mutemuki mukashi.” (Yesh. 8:1-4) Yeeshaya na mukashi aye babadi batuule lulanguilo lua Yehowa pa mbalo ya kumpala mu nshalelo aabo boso pamune. Bena dibaka lelo uno dingi mbalombene kuambula Yeeshaya na mukashi aye, p’aabo kukita kioso akitungu bua kufubila Yehowa. Mbalombene kinyingisha lukulupilo luabo mui Yehowa, pakuibadikila matemuki a mu Bible pamune na kumona mushindo waende na kulombana. (Tt. 1:2) Mbalombene kunangusheena pabitale kiabadi balombene kukita bua kukuasha mu kulombana kua angi matemuki a mu Bible. Bu kileshesho, mbalombene kukuasha mu kulombasha kua butemuki bua Yesu pabitale kulungula mukandu wibuwa mu nsenga yoso ishima ishadibue kumpala kua’shi nfudilo ifikie. Nsaa ayikala ishinkamishe bena dibaka’shi matemuki a mu Bible akuete kuenda na kulombana, abatamisha namu lukalo luabo na kuata kitshibilo kia kukita bibungi mu mudimo wa Yehowa. w21.11 16 ¶9-10

Yesu badi akyebe kupasukila nyin’aye tabadi pangi mupwe kufwisha mulume. Bu bibadi mufule na apasukila Mariya, Yesu badi mutekye Yowano bwadya kupasukila nyin’aye, mwanda badi auku’shi amukwasha bwadya kutungunuka na kufubila Yehowa. Kubanga nka dyaya efuku, Yowano bafikile bu mwana a Mariya na badi amupasukila nka bu nyin’aye. Yesu badi muleshe’shi mmfule na ata na muloo uno mukashi badi mumupasukile kubanga efuku dibatandikilwe, mpa na pabadi mwimane kulupese lwaye nsaa ibafwile. Nkinyi ky’atulongyela ku mayi a Yesu? Kipwano kyatudi nakyo na bakwetu balume na bakashi, nkilombene kwikala bukopo kukila kyatudi nakyo na bena kifuko netu ba ku mbidi. Bena kifuko netu mbalombene kwitushikwa sunga kwitusumbushena, kadi, nka bu bitulee Yesu, patushaala balamate Yehowa na ndumbulwilo Aye, “atupete misusa lukama kukila” byatudi bashimishe. Be bungi mbafikye bu bana betu balume, bana betu bakashi, nyinetu sunga bu nshetu. (Mak. 10:29, 30) Opushaa naminyi pabitale kwikala mu kifuko kya mu kikudi ki mu buumune pa mwanda wa lukumino na kifulo​—kifulo bwa Yehowa na kifulo kya bu bana na bana?​—Kol. 3:14; 1 Mp. 2:17. w21.04 9-11 ¶7-8

Kifulo ki na lulamato akitutakula bua kukuasha bangi. Lelo uno nka bu mu mafuku a kala, bakuetu balume na bakashi bebungi bakuete kulesha kifulo ki na lulamato kui balanguidi naabo, mpaa na kui baba babashamuene kashaa. Bu kileshesho, nsaa yabauku’shi kubamueneka masaku aatuukila ku bintu bipangibue, abakitaa bukidi buabadia kutusha bukuashi. Nsaa i muina kakongie e munkatshi mua nkalakashi i bukopo, abakitaa bukidibukidi bua kumumona na kumupa bukuashi buadi nabo lukalo kushii kunyengakana. Nka bibaadi bikite bakuetu ba mu Maseduane ba mu siekele a kumpala, lelo uno bakuetu bakuete kukita bibungi kukila biabebatekie. Bakuete kutusha bia buuntu na biabadi nabio bikile mpaa na kupeta kuabo, bua kukieba kukuasha nka bakuabo. (2 Kod. 8:3) Patutala bakulu lelo uno be na kiwukilo kia kukuasha bakuabo balume na bakashi na kifulo kioso. Abatumbulaa bakuabo balume na bakashi na kuibanyingisha pa kipindi kilombane, na kupasukila nkalo yaabo.​—Yesh. 32:1, 2. w21.11 11 ¶14; 12 ¶21

Atue booso, tui na lukalo n’elango nsaa na nsaa. Mu ingi mianda, tui kuata mpango, ya kuteka muntu atunemekaa ngofu bua’shi etupe elango. Pangi namu’nyi, nyi mmukuetu mulombene kufika kuatudi bua kuitulungula’shi, tui peepi na ‘kukita kilubilo’ ki’atukenyongola kunyima. (Nga. 6:1) Mfudiilo a bioso, su tuakita kilubilo kikata, be kuitupa elango nsaa y’abetusaashila. Sunga elango diekala dia kipaso kinyi, tuteemeshe nka dianka. Kukita biabia, kui buwa buetu na nkulombene kupaasha miuwa yetu! (Nki. 6:23) Kifundue kietu kia lelo, akitunyingisha buatudia ‘kuteemesha bishima bya baa-sha-binangu.’ Ta kui muntu su ngumune aukaa mianda yooso nya. Akuikalaa nka muntu e na kiukilo kibungi, sunga mumone mianda ibungi kuitukila. (Nki. 12:15) Biabia, kupusha elango, akulesha’shi tui beyishe. Na abilesha’shi atuiwuku pemeene mikalo yetu; atuuku’shi tui na lukalo na bukuashi buatudia kulombasha bipatshila bietu. Mfumu Salamone sha binangu baafundile’shi: “Pakudi baa-sha binangu beebungi, byooso abilumbulukaa.”​—Nki. 15:22. w22.02 8 ¶1-2

Kuilanga kuishimba kua binyibinyi, nkukile penda kuakula’shi nenyongola p’ami kulonda eshinda di bubi dia miluisho. Abitungu dingi ashintuule binangu biaye, na eshimba diaye. Abitungu alekie muikelo waaye wibubi na akookiele mayi a kulonda a Yehowa. (Es. 33:14-16) Muanda wi na muulo ukata, abitungu dingi uno mukite muluisho ekale dingi mu kipuano kibuwa na Yehowa. Kinyi kiatudi balombene kukita su tubauku’shi kuuku etu a p’eshimba bakitshi muluisho ukata? Tui balombene kukitshina mukuetu bibubi, su tubamufiila wawa muluisho. Tatui koobesha kufia muluisho nya muanda Yehowa kuete kumona. (Nki. 5:21, 22) Tui balombene kukuasha mukuetu pa kumulungula’shi bakulu abakiebe nkukuasha. Su kuuku oobe bapele nkalungula bakulu pabitale muluisho waaye, we mulombene kuenda okalungula bakulu uno muanda bino abilesha binyibinyi’shi okumina kumukuasha. w21.10 7 ¶19-21

Atue booso tui balombene kulonga bia kuambula kinangu kia Yesu kia kuipaana. Bible amba’shi, ‘beetuudile bu mufubi.’ (Fid. 2:7) Mpika e buwa sunga mufubi, baadi akimbi mishindo ya kusankisha mfumu’aaye. Pa muanda tui ba mpika ba Yehowa, na atukuashaa bakuetu, atukumiina kuikadika na muulo ku meeso kua Yehowa, mpaa na kua bakuetu bena Kidishitu. Eyele nkonko bu ino: ‘Nakumiinaa namu kutuusha nsaa yande na bukome buande bua kukuasha bangi? Nankumiinaa kutuuka lubilo pakudi lukalo na bantu bua nkasuula ku nshibo ya kikongeeno sunga ya Bufumu su?’ Tupuandikishe’shi, bommono’shi abikutungu kulumbuula ku muanda kampanda, anka, ta kui namu kiinyi kia nkusukuma bua kuibikita. Mu muanda wi bino, ealuule kui Yehowa omutekie n’eshimba diobe dioso. Lungula Yehowa biopusha na omutekie bua’shi, akupe “lukalo na bukome bua kuibikita.”​—Fid. 2:13, NWT. w22.02 22-23 ¶9-11

Yesu baadi muleshe kalolo pa kuteemesha bangi, sunga pa baadi mu nshalelo e bukopo. (Mat. 11:29-30) Bu kileshesho, nsaa ibaadi imuisendeele muana mukashi muina Fenisi buadia kupaasha muana aaye, ta baadi mukumiine bua musuusa wa kumpala ubaadi mumutekie nya, anka nsaa ibaadi ileshe yawa muana mukashi lukumiino lukata, bu bibaadi Yesu na kalolo baadi mupaashe muana aaye. (Mat. 15:22-28) Sunga mbibaadi Yesu na kalolo, ta baadi alekie kutusha elango nya. Ingi nsaa baadi alesha kalolo pa kupela kushintuula mueneno aaye kui bantu baadi mufule. Bu kileshesho, nsaa ibaadi Mpyele mutompe kutshobolosha Yesu bua’shi akutue kukita kikiebe ki’eshimba dia Yehowa, Yesu baadi mumutopekie kumpala kua bangi balongi. (Mak. 8:32, 33) Ta baadi mukite bino bua kuisha Mpyele milongo nya, anka baadi mumulongieshe na kudimusha bangi balongi kupela’shi tala bafika mu kupeta kino kinangu. Kushi mpaka Mpyele baadi mupushe buufu, anka kuno kusashilua kubaadi kumukuashe. Bua kuikadika na kalolo kui boodi mufule, we mulombene kuikadika ingi nsaa webalungula mianda pa butooka. Nsaa y’okitshi biabia, ambula Yesu pa kutusha elango dimeene mu mayi a kulonda atupete Muiyi di’Efile Mukulu. w22.03 11 ¶12-13

Atulanguila Yehowa nsaa yatumutumbisha. (Mis. 34:1) Atutumbisha Yehowa nsaa yatuakula pabitale ngikashi yaye na mifubo yaye ya kukanya. Atukekala na mianda i bungi i buwa ya kuakula su tuina lutumbu kuadi. Patuata nsaa i bungi yakunangushena bibuwa bua Yehowa​—na bua bintu bioso biadi muitukitshine​—atuikala na tubingilo tui bungi tua kumutumbisha. Mu mudimo wa kulungula mukandu wibuwa awitupa mushindo wipabuao wa ‘kulambula Efile Mukulu milambu ayimusangasha kuamba’shi kikuba kia milomo yetu.’ Anka bubiatudi balombene kunangushena kumpala kua kuenda mu kuteka Yehowa mu luteko. Nyi biatudi balombene kunangushena kalolo pabitale mushindo watukalungula bantu boso batufumankana nabo mu mudimo wetu wa bulungudi. Atukumiina’shi “milambu yetu” ikale i buwa buayidia kusankisha Efile Mukulu. Nyi buakinyi atuakula na muloo wetu oso nsaa yatulungula bangi mukandu wibuwa. w22.03 21 ¶8