Mikanda yatudi bafubishe mu Programe a bisangilo bya Bwina Kidishitu na mudimo wetu

LUBINGO LWA 13-19/4

BUPETA BWA MWIYI DY’EFILE MUKULU | KIBANGILO 31

Yaakobo na Labane abakitshi kilombeno kya butaale

it-1-F 943 ¶5

Galaade

Yaakobo na Labane babaadi bapudishe mwanda mu butaale, na abo nkukita kilombeno kya butaale munkatshi mwabo. Bwa kwikikita, Yaakobo nkwata ebwe kwidikita bu musungu aye nkulungula “bakwabo” bwabadya kubunga mutuuto wa mabwe pamune, pangi beakite bu mesa, kwabadya kudiila kidibwa kya kilombeno. Labane nkuudika yaya mbalo bu “Yegare-Sahaduta” eshina dya mu kina Arameya dya (syrien) mwanda wa mutuuto wa mabwe, kadi Yaakobo namu nkwiyiudika eshina adipatuula shi “Galaade” mu kina Ebelu. Labane nkwaba’shi: “Uno mutuuto uno wa mabwe [Heb., gal] nkamonyi [Heb., ʽedh] munkatshi mwande noobe.” (Kib 31:44-48) Wawa mutuuto wa mabwe (na wawa musungu) awikala bu kamonyi kwi bantu booso abakidi. Nkamuyile abibileesha verse 49, “Kitenta kya Mulami NWT [Heb., mits·pahʹ],” kibaadi akilesha’shi Yaakobo na Labane babaadi bepusheene bwa kulama butaale munkatshi mwabo na mwa bifuko byaabo (Kib 31:50-53). Ingi misango mu mafuku a kala babaadi abafubisha mabwe mu mushindo umune bwaadya kwikala bu tumonyi tushatwakula.​—Yos 4:4-7; 24:25-27.

it-2-F 1089-1090

Kitenta kya Mulami

Yaakobo baadi mukite mutuuto wa mabwe ubaadi mubungye pamune aye nkwiwitanyina bu “Galaade” (“ubaadi bu kamonyi”) na “Kitenta kya Mulami.” Labane bakwile’shi: “Yehowa etutale, ami n’obe, patwikala ta tukyatwimoneshena.” (Kib 31:45-49) Wawa mutuuto wa mabwe ubaadi autuusha bu kamonyi’shi Yehowa kwete kutala Yaakobo na Labane su abanemeka kilombeno kyabo kya butaale.

Kukimbuula bwa kupeta mabwe a muulo a mu kikudi

it-2-F 1062

Nkishi

(Ancient Near Eastern Texts, ubabafundjile kwi J. Pritchard, 1974, esak dya. 219, 220, (Pwandikisha na Kib 31:14-16.) (Kib 31:19-30) Binyibinyi, Yaakobo baadi mupwe kuluba wawa mwanda ubakitshiine Rashele (Kib 31:32), na takwi mbalo ayilesha’shi Yaakobo baadi amono yaya nkishi bu mushindo wadya kupeta bintu bya bupyanyi bya baana ba Labane. Ma nkishi taabaadi na muulo ku meso kwa Yaakobo nya. Kunyima kwa mafuku, ma nkishi abaadi ashimine pabaadi Yaakobo mufwamishe b’efile booso ba benyi bababamupeele kwi bena kifuko kyaaye muushi mwa mutshi ubaadi peepi na Shekeme.​—Kib 35:1-4.

w13-F 15/3 21 ¶8

Yehowa​—Kifwamino kyetu

⁸ Yaakobo pabafikile ku Harane, muyomba’aye Labane badi mumukukile na muloo ooso, na kunyima aye nkumupa Lea na Rashele bu bakashi baaye. Kadi kunyima Labane nkubanga kufubisha Yaakobo bi bubi pa kushintula efuto dyaaye misango ekumi! (Kib. 31:41, 42) Yaakobo baadi anyingila kuno kukutwa kwa kululama na kushinkamisha kooso’shi Yehowa akatungunuka na kumukwatshishena​—tabaadi mwidimbe nya! Byabya, nsaa ibaadi Efile Mukulu mulungule Yaakobo bwa kwaluka mu Kanaana, Yaakobo baadi na “bisaka bya nyema bi bungi, na bafubi bakashi na balume, tuumeelo na mpunda.” (Kib. 30:43) Na lutumbu looso Yaakobo nkukita luno luteko: “Tshi mulombene buno bumuntu boso na kifulo kyoso byodi mundeshe, ami muntu obe. Pa nabukile uno musulo wa Yordano, nadi mukwate’nka penda mutshi wa kutambuka n’ao. Binobino ngiu, nyi na bino bisaka bibidi.”​—Kib. 32:10.

LUBINGO LWA 20-26/4

BUPETA BWA MWIYI DY’EFILE MUKULU | KIBANGILO 32-33

“Okwete kulwa bwa kupeta myabi?”

w03-F 15/8 25 ¶3

Okimbaa Yehowa n’eshimba dyobe dyoso su?

Mu Bible mwi bileshesho bya bantu babaadi bakimbe Yehowa n’eshimba dyabo dyoso. Kimune kya ku byanka nyi nkya Yaakobo, baadi mulwe na mwikeyilu baadi mwate mbidi ya bu muntu mpana pa kutoka. Mwanda wa byabya, baadi mupete eshina dya bu Isaleele (balwile n’Efile Mukulu), mwanda baadi “mulwe” sunga “kunyingila,” aye “nkukita mwaye mooso,” bwa kulamata kwi Efile Mukulu. Nyi mwikeyilu nkumwelela myabi mwanda wa kantshintshi kaaye.​—Kibangilo 32:24-30.

it-1-F 356

Kulemana

Kulemana kwa Yaakobo. Pabaadi Yaakobo na bipwa 97, baadi mulwe ngoshi inamwinyi na mwikeyilu a Efile Mukulu baadi mufwale mbidi ya bu muntu mu bufuku bushima. Baadi mutshimune paaye kukwata mwikeyilu mpana pabaadi mumwelele mwabi. Pababadi abalu, mwikeyilu bakumine Yaakobo ku kiningwa kya mufufwa wa mwitankanta, nyi kibaadi kikashe Yaakobo na kilema. (Kib 32:24-32; Os 12:2-4) Kubanga nka dyadya efuku, kulemana kwa Yaakobo akumutentekyeshaa’shi, sunga baadi ‘mulwe ngoshi n’Efile mukulu [mwikeyilu a Efile Mukulu] mpaa na bantu, baadi mutshokole’, anka abibilesha mwikeyilu, mu kwakula kwa kalolo Yaakobo tabaadi mutshimune mwikeyilu a bukome a Efile Mukulu nya. Su Yaakobo baadi mulwe na mwikeyilu, mwanda nkapenda’shi Efile Mukulu baadi mukumine na baadi mutadiile bwashi bikitshikye byabya, bwa kutuusha bishinkamiisho’shi, Yaakobo baadi na lukalo lukata lwa kupeta myabi y’Efile Mukulu.

it-1-F 1212

Isaleele

Nyi eshina dibabapele Yaakobo kwi Efile Mukulu pabaadi na bipwa 97. Bubaadi bufuku pabaadi Yaakobo musabukye mwela wa Yaaboke ende mu kufumankana na mukwabo Esau, nyi pabalwile na muntu baadi bu mwikeyilu. Mwanda Yaakobo baadi munyingiile mu ino ngoshi, eshina dyaaye babaadi bedishintule bamupa bu Isaleele mwanda wa myabi y’Efile Mukulu. Bwa kutentekyesha wawa mwanda, Yaakobo baadi mwitanyine yaaya mbalo bu Penyele. (Kib 32:22-31; tala JACOB No. 1.) Kunyima kwa mafuku, ku Betele, Efile Mukulu nkushinkamiisha Yaakobo kwakwa kushintula kw’eshina dyaye, na kubanga nka paapa babaadi abetanyina Yaakobo nka bu Isaleele mpaa na ku lufu lwaye. (Kib 35:10, 15; 50:2; 1Mya 1:34) Misango ikile pa 2500 y’abatemuna eshina dya Isaleele abakwila bwa bana ba Yaakobo bu mwilo.​—Efi 5:1, 2.

Kukimbuula bwa kupeta mabwe a muulo a mu kikudi

w10-F 15/6 22 ¶10-11

Ngakwilo e buwa anyingisha bu kuuku

¹⁰ Ngakwilo e buwa na kwisamba kwa kalolo abikwashaa bwa kwikala na bantu mu kipwano kibuwa na mu butaale. Bi mumene, kukita mwetu mooso bwa kulumbula kipwano kyetu na bangi akukwasha bwa kwikala na ngisambilo e buuwa. Bwa kwibikita, abitungu kwibilesha ku bikitshiino bu​—kukimba mishindo ya kukwaasha bangi, kupa bangi bya buntu n’eshimba dimune, na kwikala na kalolo​—bino mbilombene kukwasha bwa kumona bya kubanga mwisambo na muntu. Twibalombene mpa na ‘kutenteka muntu Makala e kaalo’ na kumutushisha nyikashi yaaye, bilombene kukwasha bwa kubanga ka mwisambo.​—Lom 12:20, 21.

¹¹ Yaakobo baadi muukye bino kalolo. Mukwabo a lupasa Esau baadi mumufitshile munda ngofu nyi Yaakobo nkusuuka mwanda Esau baadi akyebe kumwipa. Kunyima kwa bipwa bibungi, Yaakobo baadi mwalukiile. Esau nkutwela mwishinda na bantu 400 bwa kufumankana naaye. Yaakobo baadi mutekye Yehowa bwashi amukwashe. Nyi aye nkutuma bantu na nyema ibungi bwashi bape Esau. Byabya bintu bibaadi mumutumine bibaadi bikwashe ngofu, mwanda pabafumankene naabo, Esau tabaadi dingi mufite munda nya, baadi musuukye lubilo aye nkukukila mukwabo Yaakobo.​—Kib. 27:41-44; 32:6, 11, 13-15; 33:4, 10.

it-1-F 641

Efile Mukulu, nyi Efile Mukulu a Isaleele

Kunyima kwa kufumankana na mwikeyilu a Efile Mukulu ku Panyele, Yaakobo baadi mupete eshina dya bu Isaleele, na kunyima kwaabo kufumankana na mukwabo Esau mu butaale, baadi mushale mu Sukote na mu Sikeme. Kwakwa, aye nkupeta lupango mu nsenga ya baana ba Hamoore na aye nkwibaka kashibo k’epema. (Kib 32:24-30; 33:1-4, 17-19) Akupu, aye “nkwibaka kwakwa kilambwilo kibaudikile buu Efile Mukulu, nyi Efile Mukulu a Isaleele,” sunga’shi “ Efile, Efile Mukulu a Isaleele.” (Kib 33:20) Paaye kusanga eshina dya kilambwilo n’eshina dibabamupeele bu Isaleele, Yaakobo baadi muleshe’shi mmukumiine dino eshina na kukumiina buludiki bw’Efile Mukulu, baadi mumutweshe mu Nsenga ya mulayilo. Kino kishima ki penda musango umune mu bifundwe.

LUBINGO LWA 27/4–3/5

BUPETA BWA MWIYI DY’EFILE MUKULU | KIBANGILO 34-35

“Bipeta bi bubi bukile abituukila kwi ba kuuku”

w97-F 1/2 30 ¶4

Shekeme​—kibundji ki mwibanda

Basongwalume babaadi abatala uno nsongwakashi kamame pabaadi afiki mu kibundji kyabo, pangi kushi muntu akumushindjikila mu mushindo kinyi? Mwana a nfumu “bamumwene, bamutentwile, balaadile naaye, dingi baamulwishishe.” Bwakinyi Dina baadi ende kuntu kwi masaku bwa kwikala bulole na bena Kanaana basha mwikeelo wi butete? Pangi baadi akumiina kwikala na balole ba mulongo waaye. Pangi dingi baadi mwana shi na matwi e na mutwe wi bukopo na baadi mufule kwikitshiina myanda bilekeene na bangi bakwambo booso. Badika uno mwanda mu mukanda wa Kibangilo tompa kupwandikisha kinyongwa na buufu bubapushiishe Yaakobo na Lea kunyima kwa Shekeme kulala na mwana aabo pa bukopo na kumulwisha.​—Kibangilo 34:1-31; 49:5-7; tala dingi Kitenta kya Mulami, kya 15/6 1985, esaki dya 31.

lvs 124 ¶14

“Sûkai Lusandji!”

¹⁴ Shekeme bakitshine kyakya kibaadi na kyubishi kya kukita, na kibaadi buwa ku meeso kwaye. Bu bibaadi alakila Dina, “bamutentwile” na “baladile naye [pa bukopo].” (Badika Kibangilo 34:1-4.) Kino kibeshi kibatandjile myanda ibaadi ifwishe nkalakashi kwi Dina na kifuko kyaye kishima.​—Kibangilo 34:7, 25-31; Beena-Ngalatea 6:7, 8

w09-F 1/9 21 ¶1-2

Nsaa yabakulwishiisha

Misango i bungi, bantu abakumiina kwiobwela sunga kwalusha bubi ku bubi, ku byabadi bebalwishishe kwi bangi. Bu kileshesho, Bible etulungula’shi: pabaadi bana ba Yaakobo nkambwa a bena Ebelu baukye’shi Shekeme mwina Kanaana mulwishe mwina’abo Dina na kulala n’aaye pa bukopo, “abo nkufita munda bii-kashaa.” (Kibangilo 34:1-7) Bwa kwiobwela pabitale mwina’aabo mukashi, bana babidi ba Yaakobo babaadi baate mpango ya nkayipa Shekeme na ba mu nshibo yaabo. Babakitshiine mayele, abo nkutwela mu Kanaana nkwipa bana balume booso mpana Shekeme.​—Kibangilo 34:13-27.

Kwakwa kusumbula kwa mase kubaadi kupudishe mwanda? Yaakobo pabapushishe kibaadi kikite baana baaye baadi mwibasashile aye nkwamba’shi: “Nubantwadiila buubi pakunkakila ngoo kwi been’eumbo, . . . abakeebungu bwa kundwisha naa bwa kuntshokola ami na nshibo yande.” (Kibangilo 34:30) Eyendo, yaaya nsungu tayibapwile mwanda nya, kwiobwela kubatushiishe bipeta bikile bubi. Yaakobo na bena kifuko kyaaye babaadi na kya kudimukila bulwishi bwa ba nkungishanyi naabo babaadi na nsungu ibukopo. Bwa kusuuka buno bulwishi, Yehowa baadi mulungulu Yaakobo bwa kwenda na kifuko kyaaye ku Betele.​—Kibangilo 35:1, 5.

Kukimbuula bwa kupeta mabwe a muulo a mu kikudi

it-1-F 603 ¶9

Debora

Muleshi a Rebeka. Pabaadi Rebeka mukatukye ku nshibo kwa nshaye Betwele, bwa kwenda ku Palestine mu kutwela bulunda kwa Isaake, Debora bayile naaye. (Kib 24:59) Kunyima kwa kufuba bipwa bibungi ku nshibo kwa Isaake, Debora bekeele bu mwina kifuko kya Yaakobo, pangi kunyima kwa lufu lwa Rebeka. Abimweka shi bipwa 125 kunyima kwa Rebeka kwibakishena na Isaake, Debora bafwile na abo kumushiika mushi a mutshi ukata ku Betele. Wawa mutshi abeudikile bu (Allon-bacuth, adipushisha’shi “Mutshi ukata wa nkalo”) bino abilesha’shi bibadi Debora na muulo ukata ku meeso kwa Yaakobo na kifuko kyaye.​—Kib 35:8.

w17.12 14

Nkonko ya bantu ababadikaa

Mu Isaleele a kala, ba nkambwa ba Mesiya abadi nka na matalwa a bu mwana mbedi su?

Twi bapwe kwakula myanda ibungi pa unomwanda ingi misusa. Bino abimweneka bu bipushene na mwanda wi mu Beena-Ebelu 12:16. Uno verse akula’shi Esau bakutshilwe kunemeka “bintu biiselele” na “pa mwanda w’elonga dimunenka dya bya–kudya, baudiishe [Yaakobo] bukulu bwaye.” Bino abimweneka’shi pabadi Yaakobo mupete “bukulu” sunga matalwa a bu mwana mbedi, ngi pabatwelele mu mulongo wa ba nkambwa ba Mesiya.​—Mateo 1:2, 16; Luka 3: 23, 34.

Anka, patutaluula myanda ya mu Bible, atusangana’shi kwi muntu’shi badi na matalwa a bu mwana mbedi kadi e mu mulongo wa ba nkambwa ba Mesiya. Tubande kutala bino bishinkamisho:

Mu bana balume ba Yaakobo (Isaleele), mwana aaye mbedi abatandile na Lea, nyi Rubene. Kunyima, Yaakobo batandile ungi mwana mbedi na Rashele, uno mwana nyi Yoosefe. Nsaa ibadi Rubene mukite bukitekite, matalwa a bu mwana mbedi abakidile kwi Yoosefe. (Kibangilo 29:31-35; 30:22-25; 35:22-26; 49:22-26; 1 Myanda 5:1, 2) Kadi mu ba nkambwa ba Mesiya ta mwi Rubene sunga Yoosefe nya. Yuuda mwana a Yaakobo abatandile na Lea ngi nkambwa a Mesiya.​—Kibangilo 49:10.