Maumbo ngalombene kuibunga bua kuimika masaku a kushintuluka kua klima?​—Bible akula kinyi?

Bekeele bafudiishe kisangilo kia COP27 (Conférence des Nations Unies sur les changements climatiques) mu dia Lubingo 20/11/2022. Sunga biekala’shi bekeele bepushene bua kutusha makuta alombene kukuasha maumbo akuete kupetekielua na masaku a kushintuluka kua klima, bebungi abauku’shi bino t’abipu muanda nya.

• António Guterres sécretaire general de Nations-Unis ekeele muakule bino muifuku dia 19/11/2022 : “Ne na muloo bua kitshibilo kia kutusha makuta bua kukuasha baaba abakiengie bua kushintuluka kua klima, anka atuuku’shi bino tabipu muanda nya . . . Planete eetu e nka na malaadi.”

• Mary Robinson, baadi kala bu presida a mu Ireland na baadi mufube ku Haut-Commissariat des Nations unies aux droits de l’homme ekeele muakule bino muifuku dia 20/11/2022 : “Nsenga ngilombene kupeta binobino masaku akata aakuata muntu ooso.

Ba nsongua bakuete kuikalakasha bikata pabitale kilombene kufikila planete eetu mu mafuku e kumpala. Anka, kuibunga kua maumbo bua kufuba pamune na kulombasha mianda yabakuete kulaa bua kukita, nkulombene kuimika masaku a kushintuluka kua klima su? Bible akula kinyi?

Maumbo ngalombene kuibunga na koobesha?

Bible aleesha’shi, sunga bikuete kuitatshisha maumbo na kufuba ngofu, takui kushintuluka su nkumune kuabadi balombene kufuisha kulombene kupudisha masaku a kushintuluka kua klima nya. Buakinyi? Bua tuno tubingilo tubidi:

• “Kiikonye tambalombene kwikiludika.”​—Mulungudi 1:15.

  Kiabipushisha: Mbulamatadi ya bana ba bantu tayi na ngobesha ya kukita kioso kiabakumina, muanda bantu tababaadi bapangibue bua kuikunkusha abo banabene nya. (Yeelemiya 10:23) Sunga biekala’shi maumbo e kuibunga, aekala’nka akutue ngobesha ya kupudisha mianda ya pa nsenga, sunga batompa kuitatshisha mu kipaso ki naminyi.

• ‘Bantu abakekala bekumiine’nka abo banabêne, basha kifulo kya mmono, . . . abapelâ kipwano.’​—2 Timote 3:2, 3, EEM.

  Kiabipushisha: Bible baadi mutekumukie na kushinkamisha’shi, bantu bebungi mu ano mafuku eetu, abekala abakimbi’nka penda buwa buabo na kupela kukumiina kufuba pamune bua buwa bua bantu boso.

Kabingilo ka kuikala na lukulupilo

Bibia, kulumbuluka kua planete eetu bua mafuku e kumpala, t’akukitshika ku bukuashi bua mbulamatadi ya bana ba bantu nya. Efile Mukulu mmutuule Yesu Nkidishitu bu Nfumu mulombanyine. Bible akula pabimutale’shi:

• “Bufumu bwi pa mapampa aaye. Abamuudika ano mashina; Sha-binangu mupwidikye, Efile sha-bukome, Yaaya a looso, Mfumu a butaale.”​—Yeeshaya 9:6.

Yesu mmuikale Nfumu a Bufumu bu’Efile Mukulu sunga mbulamatadi a muiyilu. (Mateo 6:10) E na bukome na binangu, na lukalo lua kubaamba planete eetu na bantu bashala muanka. (Misambo 72:12, 16) Ku bukunkushi buaye, uno mbulamatadi a muiyilu akemika baaba bakuete “kulwisha nsenga” na kulumbula nsenga buashi ikale mbalo ibuwa ya kushala.​—Kibafumbwilwe 11:18; Yeeshaya 35:1, 7.

Bua kuuka bibungi pabitale kilombene kupudisha kuluisha kua kushintuluka kua klima, badika muisambo awamba’shi: “Kushintuluka kua Klima na nshalelo eetu a mafuku e kumpala​—Bible akula kinyi.”