Coupe du monde mmulombene kubunga bantu binyibinyi su?

Bantu peepi midiyala itano abakiebe kutala coupe du monde a Fifa kubanga muifuku dia 20 dia mueshi w’Ekumi na umune na kuifuku dia 18 dia mueshi w’Ekumi na ibidi 2022. Bantu bebungi abakulupila’shi ano maasha ngalombene kukita bibungi kukatusha penda kubunga bantu abeatala.

• “Maasha e na bukome bua kushintuula nsenga. E na bukome bua kutakula bantu mu kukita kintu kampanda. E na bukome bua kubunga bantu mu mushindo wi pabuao.”​—Nelson Mandela, baadi prezida a mu Afrique du sud.

• “Ndundo . . . ayibungu bantu mu lukulupilo, ayibabungu mu muloo, ayibabungu mu lukalo luabadi nalo, na boso buabo be na kintu ki mumune munkatshi muabo.”​—Gianni Infantino, prezida a FIFA.a

Coupe du monde sunga angi maasha ngalombeene kutuusha bipeta bi buwa bino su? Kui lukulupilo bua butaale na buumune su?

Abungaa bantu binyibinyi su?

Coupe du monde a kino kipua ta mmuimene penda mu kutakula bantu mu kunangushena ku ndundo nya. Ano maasha abatakula bantu mu kuikakeena pabitale mianda ya mu nshalelo na mianda ya politike pabitale bulungantu bua bantu, ntondo y’ekoba, kuilekena mu mushindo wa kupeta makuta.

Sunga mbiabia, bantu bebungi mbafule kutala maasha a nsenga ishima bu coupe du monde. Anka, sunga bantu bekala na luno lukalo, ano maasha ta ngalombene kubunga bantu bua looso nya. Anka, misango ibungi akuete kulesha mueneno na bikitshino abitshibuula bantu, bino biabadi baleshe mu Bible’shi abikala bu kitunduilo kia kipungo kiabetamina bu “mafuku a ku nfudiilo.”​—2 Timote 3:1-5.

Lukulupilo lua binyibinyi bua buumune pa nsenga

Mu Bible mui lukulupilo bua buumune bua nsenga ishima. Mmulee’shi bantu boso be pa nsenga abekala mu buumune ku bukunkushi bua mbulamatadi abetamina bu “Bufumu bu’Efile Mukulu.”​—Luka 4:43; Mateo 6:10.

Nfumu a buabua Bufumu, Yesu Kidishitu, akakitshi bia’shi kuikale butaale mu nsenga ishima. Bible amba’shi:

• “Mululame atangale, kwiyikeela kutame.”​—Misambo 72:7.

• “Apaasha mulanda eele musaase kwadi . . . Eebakalwila ku ntuditudi na ku kifita kya bantu.”​—Misambo 72:12, 14.

Sunga mbinobino, malongiesha a Yesu ngabungie bantu midiyo mu maumbo 239. Mbalongie biabadia kuleka kushikua bangi. Bua kuuka bibungi, badika mulongo wa miisambo ayamba’shi: “Tui balombene kukambila mushikua.”